Mu Chugur Ngak Got

‘Ke Fel’ u Wan’ Jehovah’

“KUG lemnag ni dakuriy fag,” aray e n’en ni yog reb e pumoon ni ke tal ko pigpig ku Got. Nap’an ni tabab ni nge pag e ngongol rok nib kireb me lemnag ni dabki n’ag Got fan e kireb rok u wan’. Machane nap’an ni ke beeg fare thin nu Bible u murung’agen Manasseh ni bay ko 2 Kronicles 33:1-17 (BT) ma aram me yog e athap ngak. Faanra kam lemnag ndakuriy fam ni bochan e kireb ni kam rin’, ma n’en ni rin’ Manasseh e rayog ni nge fal’eg lanin’um.

Kan ni gargelnag Manasseh u ba tabinaw ni yad ma pigpig ngak Got. Hezekiah, ni chitamangin e reb fapi pilung nu Judah nib fel’. Kan gargeleg Manasseh ni sogonap’an dalip e duw nga tomuren ni ka nog ngak e chitamangin ni ngan n’uwnag boch e yafas rok. (2 Kings 20:1-11) Dariy e maruwar riy ni i lemnag Hezekiah ni Manasseh ni fak e Got e ke pi’ nib tow’ath ngak me guy rogon ni nge ayuweg fak ni nge adag e bin riyul’ e liyor. Machane gathi gubin e bitir ni ma fol ko n’en ni ma rin’ e gallabthir rorad. Ma aray e n’en ni buch rok Manasseh.

Nap’an ni yim’ e chitamangin Manasseh ma dawori pag 12 e duw rok. Machane ke ‘denen nib togopluw ngak Somol.’ (Verse 1, 2) Gur, ke rin’ e tin nib kireb ya bochan e pi tafonow rok ndariy fan e bin riyul’ e liyor u wan’rad? De weliy e Bible murung’agen. N’en ni be yog e Bible e ke un Manasseh ko liyor ko liyos ma ke gafgownag e girdi’. Ke fal’eg e gin ni yima tay e got rorad ni googsur u daken, me pi’ pi fak ni pumoon ni maligach, me un nga ngongolen e pig, me tay reb e liyos nga lan e tempel rok Jehovah u Jerusalem. Bochan ni n’uwnag Jehovah e yafas rok Hezekiah ma aram fan nni gargelnag Manasseh. Machane rib gelan’, ere aram fan nda i fol ko pi fonow ni i pi’ Jehovah ngak.—Verse 3-10.

Munmun me pag Jehovah ni ngan fek Manasseh nib kalbus nga Babylon. Mu rom e ke yog rok ni nge fal’eg i lemnag e tin nib kireb ni i rin’. Gur, ke guy ni pi liyos ni ki i liyor ngorad e de yog ni ngar ayuweged? Ke yib ngan’ e pi n’en ni ke fil e chitamangin ngak u nap’an ni kab bitir, fa? Demtrug ko mang e ke yib ngan’ machane ke kalngan’. Be yog e Bible ni gaar: “U fithik’ e gafgow rok me sobut’ laniyan’ me chel nge sap ngak Somol ni Got rok, me wenig ngak ni nge ayuweg. Me fel’ e meybil rok Manasseh u wan’ Got.” (Verse 12, 13, BT) Machane riyul’ ni rayog ni nge n’ag Got fan e kireb ni aram rogon, fa?

Riyul’ ni ke kalngan’ Manasseh u fithik’ e yul’yul’ ma aram me runguy Jehovah. Ke rung’ag Got e meybil rok me “pag nge sul nga Jerusalem nge gagiyeg bayay.” (Verse 13) Ke micheg Manasseh ni riyul’ ni ke kalngan’, ya ke chuweg urngin ban’en ni bay rogon ko liyor ko liyos me yog ngak e girdi’ “ni ngar liyorgad ngak Somol ni Got rok yu Israel.”—Verse 15-17.

Faanra kam lemnag ni dabiyog ni nge n’ag Got fan e kireb ni kam rin’ kafram, ma ngam lemnag e n’en ni buch rok Manasseh. Re chep ney e bang ko Thin rok Got ni kan thagthagnag. (Roma 15:4) Ere ba tamilang ni baadag Jehovah ni ngad nanged ni “ma n’ag fan” e kireb rodad. (Psalm 86:5) Tin nib ga’ fan u wan’ Jehovah e gathi uw feni ubchiya’ fare denen ni kam rin’ ya baadag ni nge guy ni ke kalngan’um ko denen ni kam rin’ fa dawor. Reb e tadenen ni ma meybil u fithik’ e yul’yul’ me pag e ngongol nib kireb, me athamgil ni nge rin’ e tin nib mat’aw e ra “fel’” u wan’ Jehovah ni bod Manasseh.—Isaiah 1:18; 55:6, 7.