Ngan Rin’ Ya Ba Ga’ Fan!

FOL BIBLE NI TABINAW e ba ga’ fan ya ngan chuguliy e bitir “nrogon ni ma fonownagey Jehovah nge rogon ni ma pow’iy e lem.” (Efe. 6:4, NW) Faanra gur reb e gallabthir ma ngam nang ni piin ni bitir e ba papey ni ma chalbarad. Ere uw rogon ni ngam ayuwegrad ngar tedan’rad ko fol Bible? Mu lemnag e n’en ni ke rin’ boch e gallabthir.

I yog George ni be’ nu California, U.S.A. ni gaar: “Nap’an ni kab achig pi fakmow, ma gamow e ppin rog e gamow ma thilthilyeg e kanawo’ u rogon ni gamad ma fil e Bible nge kenggin e machib ni gamad ma fil. Yu ngiyal’ ma gamad ma chuw ko mad ni bod rogon e munmad ko girdi’ kakrom u Bible maku gamad ma yan u yaan e pi girdi’ nem u nap’an ni gamad ra beeg fare Babyor Rog Ni Chep Nu Bible. Ma gamad ma fanay boch ban’en ni bod e sog ko pilung, nge sayden, nge kabang nge ku boch ban’en. Maku gamad ma gosgos ni nga nog ko mini’ u lan e Bible e yibe yan u yaan nge reb e gosgos ni yibe fith boch e deer u murung’agen e thin nu Bible nib mo’maw’ ma boch e ba mom. Ngemu’ ma kug fal’eged yaan reb e arke nib achichig ni bod yaan fare arke ni ke fal’eg Noah, ma kug fal’eged ban’en ni be dag e ngiyal’ ni i buch boch ban’en u Bible. Yu ngiyal’ ma gamad ma yoloy yaan e girdi’ ara chep nu Bible. Chiney e gamad be lemnag ni nggu yoloyed yaan fare madan e cham ni ke pi’ Got ni bay ko Efesus 6:11-17, ma ra bagamad me weliy fan bang riy. Pi n’ey e ke ayuwegmad ni nggu felfelan’gad u nap’an e fol Bible ni tabinaw.”

Debi nreb e matin ni ma par u Michigan, U.S.A. e ke yog ni gaar: “Gamow e pumoon rog e ba mo’maw’ romow ni nggu ayuwegew ba buliyel ni fakmow ni sogonap’an dalip e duw rok ni nge tiyan’ ko n’en ni gamow be fil ngak. Ma bay reb e rran ni gu be beeg fare chep u murung’agen Isak nge Rebekah ko fare Babyor Rog Ni Chep Nu Bible ma kug fek l’agruw i liyos ni nge yip’ fan Isak nge Rebekah. Ma aram mug guy fare buliyel rog ni be motoyil ngog nib fel’ rogon. In e pul nga tomuren ma kug fanay e gal liyos nem ni nge yip’ fan boch e girdi’ nu Bible. Tomuren ni kug beegew reb e chep nu Bible, ma fare tir romow e ma yan u lan e naun ni be gay boch e liyos ni bod ni be gay e machaf ni nggu fanayed u nap’an ni nggu weliyed fan e re chep nem. Kug fanayed reb e kahol ko sus nge ba yil’ i gaf nib rorow ni be yip’ fan e naun rok Rahab. Ma kun fanay ba talin e gosgos ni bod yaan ba porchoyog ni lal e fit n’umngin, ngan bachiy nga kolngin e wolguw ni nge dag yaan fare porchoyog ni be weliy fare thin ko Numbers 21:4-9. Gamad ma chaariy e pi talin e gosgos nem u lan reb e kabang nib ga’. Gamow be felfelan’ ya fachi buliyel romow e ba ga’ ni ma yan u lan e singgil ko gin ni bay fare kabang riy nge fek boch e pi talin e gosgos nem nge yan u yaan fapi chep nu Bible.”

De mom ni ngan chuguliy e bitir, ma dabi gaman ni kemus ni taab yay u lan reb e wik ni ngan fil ngorad ni ngar adaged ni ngar pigpiggad ku Jehovah. Machane nap’an fare fol Bible ni tabinaw e aram e ngiyal’ nib fel’ ni ngan fil e thin rok Got riy ngak e bitir. Ere ngan rin’ ya ba ga’ fan!