Mang “e Tomur”?

“. . . ma aram me taw e tomur.”—MATTHEW 24:14, NW.

DAWORI n’uw nap’an faram ma boor ban’en ni kan weliy u murung’agen e tomur. Boor e babyor ni be weliy murung’agen tomuren e fayleng, maku yibe dag yaan u kachido. N’en nib muun ko pi n’ey e mahl ni yibe fanay e donmach ni ka nog e nuclear ngay nge boch e malang nib ga’ ni be chafin reb nga reb, nge yafang ni be thilthil.

Ma kub thilthil e machib ko piyu raba’ i teliw; boor i yad e ma yog nap’an nra yib e “tomur” ma ra m’ay urngin ban’en nib fos u fayleng. Be’ ni ma fil murung’agen e teliw nge Got e ke weliy murung’agen fare thin u Matthew 24:14 ni gaar: “Re thin ney e aram e bin th’abi ga’ fan ni bay u lan e Thin rok Got u Bible . . . Biney e mfen ni gad bay riy e yira gothey urngin ban’en ni bay riy, ma kemus nri in i gadad e ba mich u wan’ e re n’ey.”

Girdi’ ni ma lem ni aram rogon e de nang e thin nu Bible ni be weliy ni: Jehovah Got e ke sunumiy e fayleng “ke ngongliy rogon ke par”; de “ngongliy nge tay ni bangi ted ndariy ban’en riy ma der tugul ban’en riy, yi tay ni ngi i par e girdi’ riy.” (Isaiah 45:18) Ere nap’an ni weliy Jesus murung’agen e “tomur” ma de weliy ni fayleng e ngan kirebnag; maku de weliy ni ngan thang urngin e girdi’. Ya ke weliy ni girdi’ nib kireb ni aram e girdi’ ni dubrad ni ngar folgad ko thin rok Jehovah e yira thangrad.

Mu lemnag reb e fanathin. Susun ni bay e naun rom nib fel’ yaan ma kam pag boch e girdi’ ni ngar pared riy ndariy puluwon. Boch e pi girdi’ nem e yad ba gapas ma yad ma ayuweg e re naun nem. Machane boch i yad e ma k’aring e wagey ma yad be gafgownag boch e pi girdi’ nem ni yad ma par ko re naun nem. Boor ban’en ni kar kirebnaged ko fare naun ma dubrad ni ngar motoyilgad ko thin rom.

Uw rogon ni ga ra pithig e re magawon nem? Ga ra kirebnag e re naun rom nem? Danga’. Sana ga ra tuluf e pi girdi’ nem nib kireb ma ga fal’eg e gin ni kar kirebnaged ko fare naun.

 Ku ireray e n’en nra rin’ Jehovah. Ke thagthagnag nga laniyan’ fare psalmist me yoloy ni gaar: “Piin nib pagan’rad ngak Somol e bay ur pired u daken e nam u fithik’ e gapas, machane piin ni yad ba kireb e bay ni tulufrad ngar chuwgad u daken e nam. Dab ki n’uw nap’an me yan e piin nib kireb nga bayang; ra mu gayiyrad, ma dab mu piriegrad; machane piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.”—Psalm 37:9-11.

Ku ireray e n’en ni weliy apostal Peter murung’agen. I yoloy ni gaar: “Kakrom e non Got me sum e pi tharmiy nge fayleng. Me yib e but’ u fithik’ e ran nga lang ni ran e yodoromnag, ma ku ran ni fare ran ni yib nge tharey e nam e ir e kirebnag e bin kakrom e fayleng.” (2 Peter 3:5, 6) U roy e be weliy apostal Peter murung’agen fare Ran ni ke tharey e fayleng u nap’an Noah. Ngiyal’ nem e kan thang urngin e girdi’ nib kireb, machane dariy ban’en ni buch ko fayleng. Re n’em e be “dag ngak e piin ni kireb e n’en nra rin’ ngorad ni faanra ur pired nib kireb e ngongol rorad.”—2 Peter 2:6.

Me ulul Peter ngay ni gaar: “Lan e lang nge re fayleng ney ni ba’ e chiney e ka re bugithin nem rok Got e ir e ke tay ndabi kireb nge yan i mada’ ko ngiyal’ ni nge yib e nifiy i kirebnag.” Faanra gad ra museg i weliy u roy, ma sana dabiyog ni ngad nanged fan. Machane ngam lemnag e tin tomur e thin ko re verse ney ni gaar: “Bay ni pufthinnag e girdi’ nib kireb nge mu’ min kirebnagrad.” Ere gathi fayleng e ran kirebnag, ya girdi’ nib kireb. Tomuren e re n’ey, ma mang e ra buch? Ki yoloy Peter ni gaar: “Ke yog Got ni bay sum e bin nib beech e lan e lang [Gil’ilungun Kristus] nge bin nib beech e fayleng [ba ulung i girdi’ ni yad ba mat’aw], ni aram e tin nib mat’aw e ngongol e bay i par riy, ni ereray e pi n’en ni gadad be sonnag.”—2 Peter 3:7, 13.

Ku be dag e yiiy u Bible ni ke chugur fare “tomur.” Mu beeg e Matthew 24:3-14 nge 2 Timothy 3:1-5 ma rayog ni ngam guy boch ban’en ni be micheg nra riyul’ e re n’ey. a

Ka am lemnag ko mang fan ni girdi’ e dar nanged fan fare thin ko Matthew 24:14, ni mus ngak reb e bitir ma ra nang fan? Re n’ey e bochan ni ke tay Satan laniyan’ e girdi’ u fithik’ e lumor, aram fan ni dar nanged e thin riyul’ u Bible. (2 Korinth 4:4) Ma ki mithag Jehovah e tin nib m’agan’ ngay rok e piin nib tolangan’rad ma ke dag ngak e piin nib sobut’an’rad. I yog Jesus ni gaar: “Chitamag, ni gur e Somol nu tharmiy ngu fayleng! Kari mmagar ya kam dag ngak e piin ndar skulgad e n’en ni kam mithag rok e piin ni yad ba llowan’ nge piin ni yad ba skul.” (Matthew 11:25) Gad ba tow’ath ni gad ba muun ko piin nib sobut’an’rad ma kar nanged fan Gil’ilungun Got ma yad be sonnag e pi tow’ath ni yira pi’ ngak e piin ni yad be par u tan e re Gil’ilungun nem!

[Footnote]

[Picture on page 9]

Ra yib e “tomur” ko urngin e tin nib kireb u fayleng u tan Gil’ilungun Got