Mang fare Thin nib Fel’?

“Re thin nib fel’ ney . . . ”—MATTHEW 24:14, NW.

PIIN Kristiano e ngar machibnaged fare “thin nib fel’” ni murung’agen Gil’ilungun Got ma yad be weliy ngak e girdi’ ni ireray e re am nib mat’aw nra gagiyegnag e fayleng ni ga’ngin boch nga m’on. Machane u lan e Bible e kan fanay fare bugithin ni “thin nib fel’” u boor e kanawo’. Bay reb e re thin nem ni gaar, “fare thin nib fel’ ni murung’agen ni ke ayuwegdad” (Psalm 96:2); nge fare “Thin Nib Fel’ ni yib rok Got” (Roma 15:16); nge fare “Thin Nib Fel’ ni murung’agen Jesus Kristus.”—Mark 1:1.

Fare thin nib fel’ e ba muun ngay urngin e tin riyul’ ni ke yog Jesus me yoloy pi gachalpen nga babyor. U m’on ni yan Jesus nga tharmiy me yog ngak pi gachalpen ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare [“gelngin Got nib thothup,” NW], mi gimed fil ngorad rogon ni nguur folgad u gubin e tin ni ku gog ngomed ni nguum rin’ed.” (Matthew 28:19, 20) Ere fare maruwel ni ma rin’ e tin riyul’ e Kristiano e gathi kemus ni ngar weliyed ngak e girdi’ murung’agen Gil’ilungun Got ya thingar ra athamgilgad ngar pingeged e girdi’ ngar manged pi gachalpen Jesus.

Mang e be rin’ e pi yurba’ i teliw? Boor e girdi’ e dar nanged fan Gil’ilungun Got, ere dabiyog ni ngar filed ngak e girdi’ nib fel’ rogon. N’en ni yad ma rin’ e yad ma machibnag boch ban’en ni ma k’aring e felfelan’ ngak e girdi’ ni bod rogon ni ngan n’ag fan e kireb ma nge mich u wan’uy Jesus. Maku yad ma rin’ boch ban’en nra k’aring e girdi’ ni ngar uned ngorad ni bod ni yad ma toy e aspital, skul, nge naun ni fan ko girdi’ nib gafgow. Bochan e pi n’ey ni yad ma rin’ ma rayog ni nge yoor girdien e teliw rorad, machane dabiyog ni ngar ayuweged e girdi’ ni ngar manged e tin riyul’ e Kristiano.

Reb e sensey e yoloy ni gaar: “Ba ga’ ni piin llowan’ nge pi tayugang’ ko teliw e yad manang nthingar da pingeged e girdi’ ngar manged pi gachalpen Jesus ma ngad filed ngorad urngin ban’en ni ke yog. . . . Rib tamilang e n’en ni yog Jesus u murung’agen e re maruwel ney. Kemus ni darud rin’ed ma darud guyed rogon ni ngad rin’ed. Ma ba tamilang ni dad nanged rogon ni ngad rin’ed.”

Nap’an ni kan fith boch e Katolik u Meriken me yan i m’ug ni 95 e pasent ko pi girdi’ nem e ka rogned ni machib e aram reb e ban’en nib t’uf ni ngar rin’ed. Machane yooren i yad e be lemnag ni gathi rib ga’ fan ni ngar weliyed fare thin nib fel’ ngak e girdi’ ya n’en nib ga’ fan e ngar daged e ngongol nib fel’. Bagayad e piin ni kan fith e gaar: “Ra ngan machib, ma gathi ireray e bin th’abi fel’ e kanawo’ ni ngan weliy murung’agen fare thin nib fel’ riy. Ya n’en nib ga’ fan e ngan dag e ngongol nib fel’.” Pi cha’nem ni kan fith boch e deer ngorad e ka rogned ni boor i yad e dubrad ni ngar weliyed e michan’ rorad ngak e girdi’ ni bochan e kan nang nu “lan e galesiya rorad e yima kol e girdi’ u gelngiy maku bochan nde puluw e machib ni yad ma tay.”—U.S. Catholic.

Reb e bishof ko fare teliw ni Methodist e ke kireban’ ya girdien e teliw rok e kar ruw raba’gad, ma ke wagey lanin’rad ma ke maruwaran’rad ni ngar machibgad ma yad ma ngongol ni bod e n’en ni ma rin’ yooren e girdi’. U fithik’ e ngochngochan’, me fith ni gaar: “Mini’ e ba milfan ngak ni nge machibnag murung’agen fare Gil’ilungun?”

De pi’ fare bishof e fulweg ko re deer ney. Machane bay e fulweg riy ni ga ra pirieg ko bin migid e thin.

[Blurb on page 6]

Fare thin nib fel’ e bay rogon ko Gil’ilungun Got nge yafas ni manemus ni nge yog ngak e girdi’ ni ke mich Jesus Kristus u wan’rad