Ngad Tedan’dad ko Pigpig ni Gad Be Tay Ngak Jehovah
Ngad Tedan’dad ko Pigpig ni Gad Be Tay Ngak Jehovah
“Ya ngar guyed gur mi yad folwok ko ngongol nib fel’ ni ga be rin’; ngam tiyan’um ma ga yul’yul’ ko machib ni ga be tay.”—Titus 2:7.
1, 2. Mang e be k’aring boor e girdi’ ko re fayleng ney ni ngar lemnaged nde ga’ fan e yafas, ma mang boch e deer ni ke sum riy?
GAD be par u ba ngiyal’ ni kari mo’maw’ e par ma rib gel e kireban’ ni ma tay e girdi’. Ngiyal’ ney ni ke “mo’maw’” e par riy, e girdi’ nde fel’ e tha’ u thilrad Got e der yog ni ngar pithiged e magawon rorad. (2 Tim. 3:1-5) Pi girdi’ ney e dariy be’ ni be ayuwegrad ko magawon rorad ma ba ga’ ni der yog ni ngar pithiged ni gubin. Ere aram fan ni boor e girdi’ ni yad ma gay boch ban’en ni nge mitan’rad riy ya nge dabkur lemnaged e magawon rorad.
2 Girdi’ e ba ga’ ni yad ma m’oneg e fafel u wan’rad ya yad be lemnag ni aram e n’en nra chuweg e mochuch rorad. Faanra dabi kol ayuw e Kristiano mab mom ni nge af e lem ni aram rogon ngorad. Uw rogon ni nge dabi buch e re n’ey rodad? Gur, re n’ey e be yip’ fan ni dab ku ud uned nga boch e fafel? Uw rogon ni nge dabi m’on e pi n’en ni yima felfelan’ ngay u wan’dad me tomur e tin nib milfan ngodad? Mang boch kenggin e motochiyel u Bible ni rayog ni nge pow’iydad u rogon ni ngad m’oneged e pi n’en nib ga’ fan ni dabi pag rogon?
Ngan Tiyan’uy
3, 4. Uw rogon ni be ayuwegdad e thin nu Bible ni nguud tedan’dad ko pigpig ni gad be tay?
3 Ba tamilang ni girdi’ ko re fayleng ney e ‘ke t’uf e fafel rorad.’ (2 Tim. 3:4) Re n’ey e rayog ni nge magawonnag e tha’ u thildad Jehovah. (Prov. 21:17) Ere ba puluw e fonow ni pi’ apostal Paul ko babyor ni yoloy nge yan ngak Timothy nge Titus ni murung’agen e tiyan’. Faan gad ra fol ko re fonow nem ma ra ayuwegdad ni nge dab ud lemgad ni bod e girdi’ nu fayleng nde ga’ fan e yafas u wan’rad.—Mu beeg e 1 Timothy 2:1, 2; Titus 2:2-8.
4 Boch e chibog u m’on riy, me yog Solomon nib fel’ ni nguun tay ba ngiyal’ ni ngaun lemnag feni ga’ fan e yafas ko bin ni ngan par ni goo fafel e ke m’on u wan’uy. (Ekl. 3:4; 7:2-4) Bochan nib ngoch nap’an e yafas rodad ma aram fan nib t’uf ni ngad athamgilgad nge yog e yafas ni manemus ngodad. (Luke 13:24) Maku ba t’uf ni ngad pared nib fel’ e ngongol rodad u gubin ban’en. (Titus 2:7) Re n’em e be yip’ fan nib t’uf ni ngad tedan’dad ko pi n’en nib milfan ko piin Kristiano.
5. Mang ban’en ni susun e ngar ud tedan’dad ngay?
5 Bod ni piin Kristiano e yad ma folwok rok Jehovah nge Jesus ngaur tedan’rad ko maruwel nib milfan ngorad. (John 5:17) Bochan e re n’ey ma ma yog e girdi’ ni piin Kristiano e yad ma maruwel nib gel ma yima pagan’uy ngorad. Ba ga’ ni piin lolugen e tabinaw e yad ma maruwel nib gel ya ngar ayuweged e tabinaw rorad. Ma faanra dabi pi’ be’ e tin nib t’uf ko tabinaw rok ma ke “n’ag rogon nib mich Got u wan’.”—1 Tim. 5:8.
Ngad Tedan’dad ko Pigpig ni Gad Be Tay ni Gad Ba Felfelan’
6. Uw rogon ni kad nanged nrib ga’ fan e pigpig ni gad ma tay ngak Jehovah?
6 Gubin ngiyal’ ni ma lemnag Jehovah nib ga’ fan ni ngan pigpig ngak nrogon nib m’agan’ ngay. Bod ni ke gafgow piyu Israel u nap’an ni kar paged e bin riyul’ e liyor. (Josh. 23:12, 13) Nap’an e bin som’on e chibog ma pi gachalpen Jesus e kar athamgilgad ni ngar ayuweged e bin riyul’ e liyor ni nge dabi maathuk e lem nge machib nde riyul’ nga fithik’. (2 John 7-11; Rev. 2:14-16) Ngiyal’ ney e ka be tiyan’ e tin riyul’ e Kristiano ko bin riyul’ e liyor.—1 Tim. 6:20.
7. Uw rogon ni i fal’eg Paul rogon ni fan ko machib?
7 Machib ni gad ma tay e ma yibnag e felfelan’ ngodad. Machane, rayog ni ngad pared ni gad ba felfelan’ ko re maruwel ney ni faanra gad ma fal’eg i lemnag ma gad ma fal’eg rogodad u m’on ni nga darod ko machib. Ke weliy Paul rogon ni i lemnag rarogon e girdi’ ni i fil e Bible ngorad. I yoloy ni gaar: “Kug mang urngin mit e girdi’ ngak urngin mit e girdi’, ni fan e nggu yognag boch i yad ngak Kristus u rogon e re mit i kanawo’ nrayog riy. Urngin e pi n’ey ni gu be rin’ e yigoo fan ko Thin Nib Fel’ ni yib rok Got, ma fan e ngki fel’ rogog ko birog e f’oth ni ba’ riy.” (1 Kor. 9:22, 23) Ba felfelan’ Paul ngay ni nge ayuweg e girdi’ ko tirok Got ban’en, ma i fal’eg i lemnag rogon ni nge pi’ e tin nib t’uf ko piin ni ur motoyilgad ngak. Ere aram fan ni yog rok ni nge pi’ e athamgil nga lanin’rad ni ngar pigpiggad ngak Jehovah.
8. (a) Susun ni nge uw rogon u wan’dad e girdi’ ni gad be machibnagrad? (b) Uw rogon nra gel e felfelan’ rodad ko machib ni gad be tay ni faan gad ra fil e Bible ngak be’?
8 Uw feni ga’ fan e machib u wan’ Paul? I m’agan’ ngay ni nge “pigpig” ngak Jehovah nge piin ni ur motoyilgad ko tin riyul’ ni i machibnag. (Rom. 12:11; 1 Kor. 9:19) Nap’an ni gad be fil e Thin rok Got ngak e girdi’ u tabinaw rorad, ara u nap’an e muulung, ara u nap’an e Fol Bible ni Tabinaw, ma gad ma lemnag e n’en nib milfan ngodad ni ngad rin’ed ya nge yog nda ayuweged yad, fa? Sana yu ngiyal’ e gad ma lemnag ni kaygi gel e maruwel riy ni ngaud filed e Bible ngak be’ ni gubin ngiyal’. Riyul’ ni bay yu ngiyal’ nthingar da paged e tin ni gad baadag ni ngad rin’ed ya nge yog ni yoor e tayim nda ayuweged e girdi’. Machane, gathi aram fan fapi thin ni yog Jesus ni faani gaar, “ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom”? (Acts 20:35) Faan gad ra fil ngak e girdi’ rogon ni nge yog e yafas ngorad ma felfelan’ nra yib riy ngodad e dariy ban’en nrayog ni ngan taarebrogonnag ngay.
9, 10. (a) Ra ngan tiyan’uy ko pigpig ngak Jehovah, ma aram e be yip’ fan ndakuriy ba ngiyal’ ni ngan toffan min felfelan’ u taabang, fa? Mu weliy rogon. (b) Mang e ra ayuweg reb e piilal nge yog ni i pi’ e athamgil nga lanin’uy me mom ni ngaun non ngak?
9 Ra ngad tedan’dad ko pigpig ngak Jehovah ma gathi be yip’ fan ndab kud toffangad ma gad felfelan’ boch e girdi’ u taabang. I dag Jesus e kanawo’ ni ngan folwok riy ya gathi kemus ni ma fanay e tayim rok ni nge fil e thin rok Got ngak e girdi’, ya ku ma toffan maku ma fal’eg e tha’ u thilrad boch e girdi’. (Luke 5:27-29; John 12:1, 2) Re n’ey e ku gathi be yip’ fan ni gubin ngiyal’ ni ngad pared ni nge guydad e girdi’ mi yad lemnag ni gad ba damumuw. Faan gomanga aram rogon Jesus mab mudugil ndabi adag e girdi’ ni ngar nonad ngak. Mus ngak e piin bitir nda ur rusgad ni ngar nonad ngak. (Mark 10:13-16) Ere, uw rogon ni ngad folwokgad rok Jesus?
10 I weliy reb e walag ni pumoon murung’agen reb e piilal ni gaar, “Ma kireban’ ni faanra de yog ni nge rin’ e tin nib milfan ngak machane der ma lemnag ni gubin ban’en ni nge rin’ be’ mab fel’.” Aram rogon e n’en ni ga ma rin’, fa? Yu ngiyal’ e de kireb ni ngad lemnaged ni bay boch ban’en nthingari rin’ be’. Bod ni piin bitir e yad ma fol ko n’en ni ke yog e gallabthir rorad ni faanra lemnag e gallabthir boch ban’en nib fel’ ni ngar nameged min ayuwegrad ni ngar rin’ed. Maku arrogon e piin piilal ni yad ma pi’ e athamgil nga laniyan’ e girdi’ u lan e ulung ni ngar mon’oggad ko tirok Got ban’en mi yad ayuwegrad u rogon ni ngar rin’ed. Ma faanra yugu dabi pag rogon i lemnag ko piin piilal e re n’ey, ma aram e rayog ni ngar pied e athamgil nga laniyan’ e girdi’ u lan e ulung me mom ni ngaun non ngorad. (Rom. 12:3) I yog reb e walag nib pin ni gaar: “Dabug ni nga i lemnag reb e piilal ni gubin ban’en ni yibe yog ma yibe gosgos. Machane, faanra ku gathi ri ma siminmin ma kub mo’maw’ ni ngan non ngak.” Maku reb e walag e ki yog ni bay boch e piilal ni “yima rus ngorad ni bochan e gathi ri yad ma minmin.” De fel’ ni nge rin’ e piin piilal boch ban’en nra warnag e felfelan’ ko piin ni yad be pigpig ngak Jehovah ni fare Got nib felfelan’.—1 Tim. 1:11.
Nge Milfan Boch Ban’en Ngodad u Lan e Ulung
11. Mang e be yip’ fan ni nge “nameg” be’ boch e maruwel u lan e ulung?
11 Nap’an ni pi’ Paul e athamgil nga laniyan’ boch e walag ni pumoon u lan e ulung ni ngar athamgilgad nge milfan boch e maruwel ngorad u lan e ulung, ma gathi be lemnag ni ngar nameged e pi n’em ni bochan e nge fel’ rogorad riy. Ya yoloy ni gaar: “Faanra ba adag be’ ni ngari mang reb e girdi’ ni ngi i tay murung’agen girdien e galesiya ma aram e ke nameg reb e maruwel ni ir e ba th’abi fel’.” (1 Tim. 3:1, 4) Faanra nge “nameg” reb e walag ni pumoon boch e maruwel u lan e ulung ma som’on e thingari adag ni nge maruweliy nge yog boch e fel’ngin ngak nra ayuweg ni nge pigpig ngak pi walagen u lan e ulung. Faanra ke gaman reb e duw ni ke taufe reb e walag ni pumoon ma be rin’ e pi n’en ni be yog e 1 Timothy 3:8-13 nthingari rin’ e piin ministerial servant ara piin ni yad ma ayuweg e ulung, ma aram e rayog ni ngan pi’ e re maruwel ney ngak. Mu tay fanam i yan riy ni verse 8 e be gaar: “Piin ni nguur ayuweged e galesiya e ku er rogon nthingar ur pired nib fel’ pangirad ma yad ba yul’yul’ ko maruwel rorad.”
12, 13. Mu weliy boch e kanawo’ nrayog ni nge nameg e pi walag ni pumoon ni ka yad ba pagel boch e maruwel u lan e ulung.
12 Gur reb e walag ni ka gab pagel ma ga ma tiyan’um ko pigpig ngak Jehovah, fa? Boor e kanawo’ nrayog ni ngam nameg boch e maruwel u lan e ulung. Reb e aram e ngam mon’og ko machib. Ga baadag ni ga ma un ngak e pi walag ndemtrug yangarrad ko machib, fa? Ga be guy rogon ni ngam pirieg be’ nrayog ni ngam fil e Bible ngak, fa? Faan ga ra fil e Bible ngak be’ ni ga be fol u rogon ni yima yog ni ngan rin’ u nap’an e muulung, ma aram e rayog ni ngam salap ko machib. Maku reb e ga ra nang rogon ni ngam nang laniyan’ e piin ni yad be fil murung’agen Jehovah. Ma nap’an ni ga ra guy ni ke nang faen ni ga be fil e Bible ngak nib t’uf ni nge thilyeg e ngongol rok, ma ga ra nang rogon ni ngam ayuweg u fithik’ e gum’an’ nge gonop ya nge yog ni fol ko pi kenggin e motochiyel nu Bible.
13 Gimed e pi walag ni ki gimed ba pagel e rayog ni ngam ayuweged e piin ni ke pilibthir u lan e ulung u rogon nrayog romed. Ku rayog ni ngam pied e ayuw ko klin u Kingdom Hall ya nga i par nib beech. Gimed ra pi’ e ayuw u rogon nrayog romed, ma aram e be m’ug nib ga’ fan u wan’med e pigpig ni gimed be tay. Rayog ni ngam filed rogon ni ngam pied e tin nib t’uf ko ulung ni bod Timothy.—Mu beeg e Filippi 2:19-22.
14. Uw rogon ni ngan ‘skengnag’ e pi walag ni pumoon ni ka yad ba pagel ni ngar rin’ed boch e maruwel u lan e ulung?
14 Piin piilal, mu pied boch e maruwel ngak e pi walag ni ka yad ba pagel ni yad be athamgil ni ngar ‘tiyed yad u urel ko tin ni ma ar’arnag e piin ni pagel’ ma yad be nameg e ‘tin nib mat’aw, ma yad be athamgiliy ni ngaur pared nib mich Kristus u wan’rad, ma ba t’uf Got rorad nge girdi’, ma ba gapas lanin’rad.’ (2 Tim. 2:22) Yira pag fan boch ban’en ngorad u lan e ulung ma aram e rayog ni ngan “skengnagrad” u rogon ni yad be rin’ e maruwel rorad, me yog ni ‘guy e girdi’ ni gubin ni yad be mon’og i yan.’—1 Tim. 3:10; 4:15.
Nge M’ug ni Gad Be Tedan’dad ko Pigpig ngak Got u Lan e Ulung ngu Lan e Tabinaw
15. Rogon e thin ni bay ko 1 Timothy 5:1, 2, uw rogon ni nge m’ug ni gadad be tedan’dad ko pigpig ngak Jehovah u rogon pi walagdad u wan’dad?
15 Ngan tiyan’uy ko pigpig ngak Jehovah e kub muun ngay ni ngaud ted fan pi walagdad. Fonow ni pi’ Paul ngak Timothy e weliy riy murung’agen feni ga’ fan ni ngaun tayfan e girdi’. (Mu beeg e 1 Timothy 5:1, 2.) Re n’ey e rib ga’ fan u rogon ni nga i ngongol reb e ppin ngak reb e pumoon ara reb e pumoon ngak reb e ppin. Ba fel’ ni ngad folwokgad u rogon ni i tay Job fan e piin nib pin, nib ga’ ni en leengin. I athamgil ni nge dabi changar ngak be’ nib pin me lemnag e tin nde machalbog. (Job 31:1) Ra ngad ted fan pi walagdad, ma aram e dab ud thin i puwlaggad ngorad ara ud rin’ed ban’en nra k’aring e tamra’ ngorad. Kub ga’ fan ni nge fol l’agruw ni’ ni yow be lemnag ni ngar mabgolgow ko re n’ey. Reb e Kristiano ni ma tiyan’ ko pigpig ni ma tay e susun ndab i darifannag laniyan’ be’.—Prov. 12:22.
16. Mu weliy rogon nib thil e lem ko girdi’ nu fayleng u murung’agen e liw ko en figirngiy ko n’en ni be yog e Bible.
16 Kub t’uf ni ngad tedan’dad ko maruwel rodad u lan e tabinaw ni ke pi’ Got. Fayleng rok Satan e ma darifannag e liw rok e en lolugen e tabinaw. Pi n’en ni yima chuweg e chalban ngay e yima dag riy ni yug rayog ni ngan moningnag ma yibe darifannag e en lolugen e tabinaw. Machane, be yog e Bible nib ga’ fan e liw ko en figirngiy, ya ir e ma “gagiyegnag e ppin rok.”—Efe. 5:23; 1 Kor. 11:3.
17. Mu weliy rogon nrayog ni nge m’ug ni gad be tedan’dad ko tin nib milfan ngodad ni faanra ud ted e fol Bible ni tabinaw.
17 Rayog ni be pi’ e en figirngiy e tin nib t’uf ko tabinaw rok ni bod rogon e, naun, nge mad, nge ggan. Machane, faanra dabi ayuwegrad ko tirok Got ban’en, ma aram e dariy e gonop rok. (Deut. 6:6, 7) Aram fan ni be yog e 1 Timothy 3:4 ni faanra gur reb i lolugen e tabinaw ni ga be nameg boch e maruwel u lan e ulung ma thingari yog rom ni ngam ‘gagiyegnag girdien e tabinaw rom nib fel’ rogon, ma be guy rogon e bitir rom ni ngar folgad rom mi yad ta’ fam.’ Ere mu fithem ni nge lungum, ‘Kug tay ba ngiyal’ ni ngaug fol Bible gad e tabinaw rog u taabang, fa?’ Boch e piin leengiy e thingar ra weniggad ko pumoon rorad ni ngar rin’ed e n’en nib milfan ngorad ni fan ko tirok Got ban’en. Ra reb i figirngiy ma thingari fal’eg i lemnag e pi n’en nib milfan ngak. Machane, ku thingari pi’ e en leengiy e ayuw ni fan ko fare yaram ko Fol Bible ni Tabinaw mar maruwelgow figirngin u taabang nge yog ni yib angin e re yaram ney.
18. Uw rogon ni nge fil e bitir rogon ni ngaur tedan’rad ko pigpig ngak Jehovah?
18 Ku yibe pi’ e athamgil nga laniyan’ e piin bitir ni ngar tedan’rad ko pigpig ni yad be tay ngak Jehovah. (Ekl. 12:1) De kireb ni nge fil e bitir rogon ni ngaur maruwelgad nib gel, ma yad be rin’ e maruwel rorad u tabinaw nib m’ag nga yangarrad nge rogon nrayog rorad. (Lam. 3:27) Nap’an ni kab pagel David, me fil rogon ni nge mang reb e tachugol saf. Ki fil rogon e musik maku ma tunguy e tang, ma aram e re salap ni fek i yan nga tafen e pilung nu Israel. (1 Sam. 16:11, 12, 18-21) Dariy e maruwar riy nnap’an ni kab pagel David maku ma fafel, machane ki fil boch ban’en ni munmun me fanay ni nge pining e sorok ngak Jehovah. Salap rok ni ir reb e tachugol saf e ayuweg ni nge gagiyegnag e nam nu Israel u fithik’ e gum’an’. Ere gimed e piin fel’ yangaren, mang boch ban’en ni gimed be fil nra ayuwegmed ko pigpig ni gimed be tay ngak e En Tasunmiy miki ayuwegmed ko maruwel romed boch nga m’on?
Dab Mu Tiyan’um nge Thum’ nga Wuru’
19, 20. Mang e kam dugliy ni ngam rin’ ni fan ngom nge pigpig ni ga be tay ngak Got?
19 Gadad gubin ni ngad athamgilgad ni nge dab ud lemnaged e pigpig ni gad be tay nge pag rogon ma gad par ndakuriy e felfelan’ rodad, ya de fel’ ni nge pag rogon ni ngaud lemnaged ni gadad e gad ba “fel’.” (Ekl. 7:16, BT) Yira yog ban’en nib makak’ar ma rayog ni nge ayuwegey u nap’an ni ke sum e magawon u tabinaw, ara u tabon e maruwel, ara u thildad pi walagdad ni Kristiano. Chon e tabinaw e ngar kol ayuwgad ni dab ur pared ni yigoo thibngirad e yad be yaliy ya ra kirebnag e gapas ko tabinaw. Ma gubin e girdi’ u lan e ulung nrayog ni ngar filed rogon ni ngaur felfelan’gad u taabang, mu ur pied e athamgil nga lanin’rad.—2 Kor. 13:10; Efe. 4:29.
20 Gad be par u ba fayleng ni girdi’ riy e darur lemnaged Jehovah nge pi motochiyel rok. Machane, girdi’ rok Jehovah e rib ga’ fan u wan’rad ni ngar pared ni yad ba yul’yul’ ngak. Ri gad ba felfelan’ ni gad bang ko fare ulung i walag ni yad ma tedan’rad ko pigpig ni yad be tay ngak Jehovah! Ere manga yugu da pared nib ga’ fan u wan’dad e yafas rodad nge liyor ni gad be tay ngak Got.
Uw Rogon ni Ga Ra Fulweg?
• Mang fan ndab da folgad ko girdi’ nu fayleng ndariy fan e yafas u wan’rad?
• Uw rogon nrayog ni ngad tedan’dad ko machib ni gad ma tay ma ka gad be par ni gad ba felfelan’?
• Uw rogon ni nge m’ug nib ga’ fan u wan’dad e maruwel nib milfan ngodad?
• Mu weliy fan nib t’uf ni ngaud ted fan pi walagdad u lan e ulung nge girdi’ u lan e tabinaw rodad.
[Study Questions]
[Picture on page 14]
En figirngiy e thingari pi’ e tin nib t’uf ko tabinaw rok nib muun e tirok Got ban’en ngay