Gimed e Pi Tabinaw ni Kristiano, Mu “Fal’eged Rogomed Ngam Pired”

“Ngam fal’eged rogomed ngam pired, ya en ni Fak e Girdi’ e ra yib u reb e awa ndamur fineyed nra yib riy.”​—LUKE 12:40.

1, 2. Mang fan ni susun e ngad tedan’dad ko fare thin ni yog Jesus ni ‘ngad fal’eged rogodad ngad pired’?

 “NGIYAL’ nra yib e en ni Fak e Girdi’ riy ni ke pilung” ni nge kieg “girdien e pi nam nu fayleng,” e mang e ra buch romed chon e tabinaw rom? (Matt. 25:31, 32) Bochan nra buch e re n’ey u ba ngiyal’ ndanir lemnag, ma rib ga’ fan ni ngad lemnaged fare thin ni yog Jesus ni ‘ngad fal’eged rogodad ngad pired’!​—Luke 12:40.

² Fa binem e article ni ka fin da filed e be weliy rogon nrayog ni nge be’ u lan e tabinaw me rin’ e n’en nib milfan ngak nge yog ni ayuweg chon e tabinaw rok ngar pired ni yad ba od ko tirok Got ban’en. Chiney e ngkud weliyed boch e kanawo’ nrayog ni ngad ayuweged e tabinaw rodad riy.

Um Par nib “Fel’ Lan Owchem”

3, 4. (a) Mang e susun ni nge kol ayuw e pi tabinaw ni Kristiano riy? (b) Mang e be yip’ fan ni nge par lan owchedad nib fel’?

³ Faanra nge par e tabinaw ni kar fal’eged  rogorad ni fan ko wub nra tay Kristus, ma thingar ra kol ayuwgad ni dabi magawonnag boch ban’en e pigpig ni yad be tay ngak Jehovah. Ba t’uf ni ngar kol ayuwgad ndariy ban’en ni nge chafegrad nga bang. Bochan ni boor e tabinaw ni kar awgad ko wup ko chogowen e chugum, ma ba fel’ ni ngad lemnaged e n’en ni yog Jesus u murung’agen lan owchedad ni nge par nib “fel’.” (Mu beeg e Matthew 6:22, 23.) N’en nib fel’ ni gad ma suguy nga ‘lanin’dad’ e rayog ni nge ayuwegdad ni ngad ngongolgad u rogon ni dabi magawonnagdad ni bod rogon e magal ni rayog ni nge gal’ e kanawo’ rodad ya nge dab da dol’gad.​—Efe. 1:18.

⁴ Faanra ngad guyed ban’en nib fel’ rogon ma thingari maruwel lan owchedad nib fel’ rogon. Ere ku arrogon ni fare bugithin ni be yog ni nge par lan owchedad nib fel’ e be yip’ fan ni ngad pared ni taa ban’en e ba m’on u wan’dad. Susun ni tirok Got ban’en e ir e nge m’on u wan’dad ma gathi kemus ni ngad pared ni chugum nge tin nib t’uf ko tabinaw rodad ni bod rogon e naun, nge mad, nge ggan e ir e gad be maruweliy ni nge yog. (Matt. 6:33) Re n’ey e be yip’ fan ni nge fel’ u wan’dad e tin ni bay rodad ma nge par ni pigpig ni gad be tay ngak Got e ir e ba m’on u wan’dad.​—Heb. 13:5.

5. Uw rogon ni ke dag reb e rugod nib m’on u wan’ e pigpig ni be tay ngak Got?

⁵ Faan yira fil ko bitir rogon ni nge m’on e tirok Got ban’en u wan’rad ma ra yib angin nib fel’. Am lemnag e n’en ni rin’ reb e rugod nu Ethiopia. Rib llowan’ ko skul, ere u m’on ni chuw u skul min ognag ba guruy i salpiy ngak ni nge yan ko skul nib tolang. Machane pigpig ku Jehovah e aram e n’en nib m’on u wan’, ma aram me siyeg fare salpiy. De n’uw nap’an nga tomuren min ognag reb e maruwel ngak ni 4,200 e dolla puluwon u reb e pul. Re puluwon ney e ba ga’ nga puluwon yooren e girdi’ ni yima pi’ ko nam rok. Machane ke mu’ i dugliy u wan’ ni nge un ko pioneer. De t’uf ni nge fith ko gallabthir rok e n’en ni nge rin’. Ere mang e kar rin’ew u nap’an nra nangew e n’en ni ke rin’ fare rugod ni fakrow? Kar ra felfelan’gow ma rognew ngak nib fel’ e n’en ni ke rin’.

6, 7. Mang riya’ e ngad kol “ayuwgad” riy?

⁶ Ki ginangey Jesus u murung’agen e chogow u Matthew 6:22, 23. I yog Jesus e n’en nib thil u thilin lan owchey nib “fel’” nge lan owchey nib “kireb.” Rogon ko thin ni Hebrew e fare bugithin ni kan pilyeg ni lan owchey nib “kireb” e be yip’ fan e chogow. Uw rogon e chogow u wan’ Jehovah? Be gaar e Bible: “De mat’aw ni nge un u l’ugunmed e thin ko darngal, ara thin nib golong, ara thin ko chogow, ni bochan e gimed girdien Got.”​—Efe. 5:3.

⁷ Chogow e ba mom ni ngam guy rok be’, machane ba mo’maw’ ni ngam nang rom. Ere gad ba gonop ni faan gad ra fol ko fare fonow rok Jesus ni gaar: “Mu ayuwgad mi gimed guy rogomed rok urngin mit e chogow.” (Luke 12:15) Faanra ngad rin’ed e re n’ey ma ngad fal’eged i lemnag ko mang e ba m’on u wan’dad. Pi tabinaw ko Kristiano e thingar ra fal’eged i lemnag urngin e tayim nge salpiy ni yad ma fanay ni fan ko pi n’en ni yima chuweg e chalban ngay, nge fafel, nge chugum.

8. Uw rogon ni ngad kol “ayuwgad” ko chuway’ ni gad ma tay?

⁸ U m’on ni ngam chuw’iy ban’en ma gathi kemus ni ngam lemnag ko ra gaman puluwon rom fa danga’, ya baaray boch e deer nib t’uf ni ngam lemnag: ‘Bay e tayim rog ni ngaug maruwel ngay ni gubin e rran ma gu be ayuweg, fa? Uw n’umngin nap’an ni gu ra fil rogon ni nggu maruwel ngay?’ Gimed e piin fel’ yangaren, dab mu lemnaged ni gubin e chugum ni ma ognag e re fayleng ney mab fel’, maku dab um n’aged e salpiy ko mad nib tolang puluwon ara yugu boch e chugum. Mu filed rogon ni ngaum t’ared lanin’med. Maku, u m’on ni ngam chuw’iyed ban’en ma ngam lemnaged ko ra ayuweg e tabinaw romed ni ngar fal’eged rogorad ni fan ko wub nra tay faen Fak e girdi’ fa danga’. Nge pagan’med ko n’en ni ke micheg Jehovah ni gaar: “Ri dab gu pagem; ma ri dab gu n’igem.”​—Heb. 13:5.

 Mu Nameged Boch Ban’en ni Fan ko Tirok Got

9. Mang angin nra yib ko tabinaw ni faan yad ra nameg boch ban’en ni fan ko tirok Got?

⁹ Ku reb e kanawo’ ni nge gel e michan’ ko girdi’ u lan e tabinaw e ngar nameged boch ban’en ni fan ko tirok Got. Re n’ey e ra ayuweg e tabinaw ngar nanged rogon e mon’og ni yad be tay ko pigpig ngak Jehovah maku rayog ni nge ayuwegrad u rogon ni ngar mel’eged e n’en ni ngar m’oneged.​—Mu beeg e Filippi 1:10.

10, 11. (a) Mang e gimed be nameg chon e tabinaw rom ni fan ko tirok Got ban’en? (b) Mang boch ban’en ni gimed baadag ni ngam nameged?

¹⁰ Ku yira nameg boch ban’en nib mom ni nge rin’ chon e tabinaw ma ra yib angin. Bod nrayog ni ngan nameg ni nguun beeg e thin u Bible u taabang ni fan nga reb e rran nge reb. Thin ni ma yog chon e tabinaw u nap’an ni yibe beeg e pi thin nu Bible ney e rayog ni nge ayuweg e en lolugen e tabinaw ni nge nang rogon e mon’og ni be tay chon e tabinaw ko tirok Got ban’en. Ku ra nameg e tabinaw ni ngaur beeged e Bible u taabang ni gubin e rran ma rayog ni nge ayuweg e bitir ni ngar mon’oggad ko beeg babyor nge rogon ni yad be nang fan e thin nu Bible. (Ps. 1:1, 2) Maku mang fan ndab da nameged ni ngad mon’oggad u rogon e meybil ni gad ma tay? Kub fel’ ni ngad nameged ni nge yog ngodad yu yang u wom’engin gelngin Got nib thothup. (Gal. 5:22, 23) Maku reb e mang ndab da nameged ni ngad nanged rogon laniyan’ e piin ni gad ma mada’nag u nap’an e machib? Faanra rin’ e tabinaw e re n’ey ma rayog ni nge ayuweg e piin bitir ni ngar filed rogon ni ngaur runguyed e girdi’, mar adaged ni ngar uned ko pioneer ara missionary.

¹¹ Mang ni dab mu lemnaged e tabinaw rom boch ban’en ni rayog ni ngam nameged? Rayog ni nge nameg e tabinaw rom ni nge yoor e tayim ni ngar uned ko machib, fa? Rayog ni ngam gayed rogon ni nge dab mu rusgad ni ngam uned ko machib u telefon, ara u kanawo’, ara tagil’ e siyobay, fa? Ma uw rogon ni faan gimed ra pi’ e ayuw ko machib ko pi binaw nib t’uf e ayuw riy? Maku rayog ni nge fil reb i chon e tabinaw e thin u yugu reb e nam ya nge yog ni ayuweg e girdi’ riy, fa?

12. Mang e rayog ni nge rin’ e piin lolugen e tabinaw ya nge yog nra ayuweged chon e tabinaw rorad ngar mon’oggad ko tirok Got ban’en?

¹² Gimed e piin lolugen e tabinaw, mu lemnaged boch e kanawo’ ni rayog ni nge mon’og e tabinaw romed ko tirok Got ban’en. Mi gimed nameg boch ban’en nra ayuwegmed ko re n’ey. Dab mu nameged chon e tabinaw rom boch ban’en ni kaygi mo’maw’, ya susun ni nge m’ag nga rogon e par romed nge pi n’en ni rayog romed. (Prov. 13:12) Riyul’ nib t’uf e tayim ni ngan nameg boch ban’en nra yib angin. Ere rayog ni ngan fanay e tayim ni yima yaliy e TV riy ni fan ko pi n’en ni yibe nameg ko tirok Got ban’en. (Efe. 5:15, 16) Mmaruwelgad nib gel ya nge yog ni mu rin’ed e n’en ni gimed be nameg. (Gal. 6:9) Pi tabinaw ni yad ma nameg boch ban’en ni fan ko tirok Got e ‘ra guy e girdi’ ni gubin ni yad be mon’og.’​—1 Tim. 4:15.

Ngan Tay Reb e Blayal’ ni Fan ko Fol Bible ni Tabinaw

13. (a) Mang e kan thilyeg u rogon e muulung ni yima tay u lan e wik? (b) Mang e deer ni ngad lemnaged?

¹³ Reb e ban’en nra ayuweg e tabinaw ni ngar pared ni kar ‘fal’eged rogorad’ ni fan ko wub nra tay e en Fak e girdi’ e fapi n’en ni kan thilyeg u rogon e muulung ni yima tay u gubin e wik ni ke tabab ko January 1, 2009. Kan thilyeg e rorran ni yima tay e Fol Babyor ko Ulung kan puthuy ko Theocratic Ministry School nge Service Meeting. Re n’ey ni kan thilyeg e fan ni nge yib e tayim ni nge tay e pi tabinaw ni Kristiano e fol Bible ni tabinaw ni blayal’ u gubin e wik ya nge yog ni ngari fel’ e tha’ u thilrad Jehovah. Ere chiney ni ke n’uw boch nap’an e re yaram ney e rayog ni nge bagadad me fith ir ni nge gaar: ‘Gu be fanay e re tayim ney ni fan ko Fol Bible ni Tabinaw ara fol Bible ni goo gag, fa? Ke yib angin e re yaram ney ngog, fa?’

14. (a) Mang e bin th’abi ga’ i fan ni ngan tay reb e blayal’ ni fan ko fol Bible ni tabinaw ara ngam fol Bible ni goo gur? (b) Mang nib ga’ fan ni ngad ted reb e blayal’ ni fan ko fol Bible?

 ¹⁴ Bin th’abi ga’ i fan ni ngaud ted e Fol Bible ni Tabinaw ara fol Bible ni goo gadad e bochan ni ngad chugurgad ngak Got. (Jas. 4:8) Faanra ud fol Bible gad ni gubin ngiyal’ ma aram e rayog ni nge yoor ban’en nda nanged u murung’agen e En Tasunmiy, ma gad chugur ngak. Ma gad ra chugur ngak Jehovah ma aram e rra t’uf rodad ‘u polo’ i gum’ircha’dad, ngu polo’ i lanin’dad, ngu polo’ i lem rodad, ngu polo’ i gelngidad.’ (Mark 12:30) Riyul’ ni gad baadag ni ngad folgad rok Got mu ud folwokgad rok. (Efe. 5:1) Ere, faan gad ra tay reb e blayal’ ni fan ko Fol Bible ni Tabinaw ma rayog ni nge ayuweg gubin e girdi’ u lan e tabinaw ni ngar ‘fal’eged rogorad’ ngar pared ngaur sonnaged fare “gafgow” nib ga’ ni bayi yib. (Matt. 24:21) Rib ga’ fan e re n’ey ya ra ayuwegdad ngad mageygad ni gad ba fas.

15. Mang angin e Fol Bible ni Tabinaw ko tha’ u thilin chon e tabinaw?

¹⁵ Ku reb i fan ni kan yarmiy fare Fol Bible ni Tabinaw e bochan ni nge ayuweg chon e tabinaw ni ngar ra chugurgad nga taabang. Fol Bible ni ma tay chon e tabinaw u taabang e ke yib angin nga rogon ni yad ma lemnaged yad. Ku ma gel e t’ufeg u thilin e mabgol u nap’an ni yad be weliy e pi n’en ni ke michan’rad ngay u taabang. (Mu beeg e Eklesiastes 4:12.) Gallabthir nge bitir ni yad ma liyor ngak Got u taabang e yad ma par ni yad ba taareb u fithik’ e t’ufeg, ni aram e n’en ni “ma chugumiy urngin ban’en nga taabang.”​—Kol. 3:14.

16. Mu weliy rogon ni ke yib angin e fol Bible ni ke tay dalip e walag nib pin ni Kristiano u taabang.

¹⁶ Am lemnag rogon ni ke yib angin e re yaram ney ngak dalip e walag nib pin u reb e ulung. Dalip i walag ney e dariy rogorad, ma goo ke yim’ figirngirad, ma yad ma par u lan taareb e mach, ma ke n’uw nap’an nib fel’ e thin rorad. Ere kar dugliyed ni ngar ted reb e blayal’ ni ngaur mada’gad ngar filed e Bible u taabang ni bochan e yad baadag ni ngaur chaggad nga taabang ni gathi kemus ni fan e ngaur sabethingad, ya ku fan ko fol Bible. Som’on e ra tababgad i fil fare ke babyor ni “Bearing Thorough Witness” About God’s Kingdom (Ngan “Machibnag” Murung’agen Gil’ilungun Got). I yog bagayad ni gaar, “Ri gamad ma felfelan’ ko fol Bible ni gamad ma tay, ere ba ga’ ni gamad ma fol Bible nge pag reb e awa. Gamad ma gay rogon ni ug lemnaged e pi n’en ni buch ko pi walag ko bin som’on e chibog ni gowa gamad be guy, ma gamad ma weliy e n’en ni gamad ra rin’ ni faanra ke buch ban’en romad ni aram rogon. Ngemu’ ma gamad guy rogon ni nggu fanayed e pi n’en ni kug filed u nap’an e machib. Re n’ey e kari gelnag e felfelan’ ko machib ni gamad ma tay ma ke yib angin.” Re yaram ney e gathi kemus ni ke ayuweg e dalip i fager ney ko tirok Got ban’en ya ki chugurnagrad nga taabang. I lungurad: “Rib ga’ fan e re yaram ney u wan’mad.”

17. Mang boch ban’en nra ayuweg ni nge yib angin e Fol Bible ni Tabinaw ni gad ma tay?

¹⁷ Me gur? Uw rogon ni ke yib angin ngom e fol Bible ni tabinaw ni gimed be tay chon e tabinaw rom u taabang ara fol Bible ni ga be tay ni goo gur? Faanra fin munmun min tay e fol Bible u tabinaw, ma dabi yib angin e re yaram ney. Gubin i gothon e tabinaw nra taw nga nap’an e fol Bible ma susun e kar mu’gad i fal’eged rogorad. Susun ndab ni taleg e fol Bible ni bochan boch ban’en nde ga’ fan. Maku thingar ni mel’eg e n’en ni ngan fil nib m’ag ko tabinaw. Mang e rayog ni ngam rin’ed me  felfelan’ gubin girdien e tabinaw ko re fol Bible ney? Susun ni ngan fanay boch ban’en nra yib angin, ma ngan rin’ u fithik’ e tayfan nge gapas.​—Jas. 3:18. a

“Nguud Pired ni Gadad Be Od” ni Kad ‘Fal’eged Rogodad’

18, 19. Faanra kam nanged chon e tabinaw rom ni ke chugur e ngiyal’ nra yib e en Fak e girdi’ riy, ma mang e ra rin’ ngomed?

¹⁸ Rarogon e re fayleng ney ni be gel e kireb riy e be dag ndariy e maruwar riy ni ke tabab e tin tomuren e rran ni ka nap’an e duw ni 1914. Be chugur i yib e Armageddon. Dab ki n’uw nap’an ma bay yib e en Fak e girdi’ ni nge pufthinnag e piin ndarur folgad rok Jehovah. (Ps. 37:10; Prov. 2:21, 22) Ere, gathi ra rin’ e re n’ey ban’en ngomed chon e tabinaw rom?

¹⁹ Ga be fol ko fare fonow ni pi’ Jesus ni nge par lan owchem nib “fel’”? Chiney ni be nameg e girdi’ nu fayleng e flaab, nge gilbuguwan, ma nge ga’ lungurad u boch ban’en, gimed be nameg chon e tabinaw rom e tirok Got ban’en, fa? Ga be fol ko fare yaram ni ngan tay e Fol Bible ni Tabinaw ara fol Bible ni goo gur, fa? Be yib angin ni bod rogon ni kan lemnag, fa? Ga be rin’ e maruwel nib milfan ngom u lan e tabinaw ndemtrug ko gur e en figirngiy, ara en leengiy, ara bitir ya nge yog ni par e tabinaw nib “od” ko tirok Got ban’en ni bod rogon ni kan weliy ko fa binem e article, fa? (1 Thess. 5:6) Faanra ga be rin’ ni aray rogon, ma aram e rayog ni ngam par ni kam ‘fal’eg rogom’ ni fan ko wub nra tay e en Fak e girdi’.

[Footnote]

Mang e Kam Fil?

• Mu weliy rogon nrayog ni nge par e pi tabinaw ni Kristiano ni kar ‘fal’eged rogorad’ ni aram e . . .

nge par nib ‘fel’ lan owcherad.’

ngar nameged boch ban’en ni fan ko tirok Got.

ngar ted reb e blayal’ ni fan ko Fol Bible ni Tabinaw.

[Study Questions]