Gimed e Pi Tabinaw ni Kristiano, Mu Pared ni Gimed Ba “Od”

“Nguud pired ni gadad be od ma ba tamilangan’dad.”​—1 THESS. 5:6.

1, 2. Mang e ba t’uf ni nge rin’ e tabinaw ni faanra ngar pared ni yad ba od ko tirok Got ban’en?

 I WELIY apostal Paul murung’agen fare “rran ni ba ga’ ma ba gel e gafgow nra fek i yib” u nap’an ni yol ko pi Kristiano nu Thessalonika ni gaar: “Pi walageg ni girdien Kristus, e dakumur pired u fithik’ e lumor, ere dabiyog ni ngam da’da’gad ko re Rran nem ni bod ba moro’ro’ ni mda’da’gad ngak. Ya gimed gubin ni kam manged girdien e tamilang ni gimed girdien e rran. Ya gathi gadad girdien e nep’ ara girdien e lumor. Ere dab ud molod ni bod boch e girdi’; ya nguud pired ni gadad be od ma ba tamilangan’dad.”​—Joel 2:31; 1 Thess. 5:4-6.

² Fare fonow ni pi’ Paul ngak piyu Thessalonika e rib puluw ngak e pi Kristiano ni yad be par e chiney ko “tin tomren e rran.” (2 Tim. 3:1) Chiney nri be chugur ko tomur e ri be guy Satan rogon ni nge pingeg laniyan’ urngin e tapigpig rok Got ya nge dabkur pigpiggad ngak. Ere gad ba gonop ni faan gad ra fol ko fonow rok Paul ni ngad tedan’dad ko pigpig ni gad be tay. Faanra nge yog ni par reb e tabinaw ni Kristiano ni yad ba od ko tirok Got ban’en, ma rib ga’ fan ni nge bagayad me rin’ e n’en nib milfan ngak u lan e tabinaw nrogon ni be yog e Bible. Ere uw rogon ni nge ayuweg e piin figirngiy, nge piin leengiy, nge piin bitir e tabinaw rorad nge yog nra pared ni yad ba “od” ko tirok Got ban’en?

Piin Figirngiy, Mu Folwokgad rok ‘Faanem nib Fel’ Rogon ni Ma Gafaliy e Saf’

3. Mang e ba muun ko n’en nib milfan ngak e en lolugen e tabinaw nrogon ni bay ko 1 Timothy 5:8?

³ Be yog e Bible ni “pumoon e ir lolugen leengin.” (1 Kor. 11:3) Mang e kub muun ko n’en nib milfan ngak e en lolugen e tabinaw? Be tamilangnag e Bible reb e ban’en ni kub muun ko maruwel rok e en lolugen e tabinaw ni gaar: “Faanra dabi ayuweg be’ e girdi’ rok, ni ba ga’ ni girdien e tabinaw rok, ma aram e ke n’ag rogon nib mich Got u wan’, ma kab gel e kireb rok ngak be’ ndawori mich Got u wan’.” (1 Tim. 5:8) Ere en figirngiy e susun ni nge pi’ e tin nib t’uf ko tabinaw rok ni bod e mad, nge ggan, nge naun. Machane nge ayuweg e tabinaw rok ni ngar pared ni yad ba od ko tirok Got ban’en ma gathi kemus ni salpiy e nge yognag nga tabinaw. Ya kub t’uf ni nge ayuweg e tabinaw rok ni nge gel e tha’ u thilrad Got. (Prov. 24:3, 4) Uw rogon ni nge rin’ e re n’ey?

4. Mang e ra ayuweg e en figirngiy ni nge ayuweg chon e tabinaw rok ni nge gel e tha’ u thilrad Got?

⁴ Bochan ni “en ni pumoon e ngi i gagiyegnag e ppin rok ni bod rogon Kristus ni ir e be gagiyegnag” e ulung, ma en figirngiy e susun ni nge fal’eg i lemnag me folwok u rogon ni i ayuweg Jesus e ulung ni ir lolugen. (Efe. 5:23) Am lemnag rogon ni weliy Jesus murung’agen e tha’ u thilrad pi gachalpen. (Mu beeg e John 10:14, 15.) Uw rogon me yog ni nge ayuweg e en figirngiy chon e tabinaw rok ni nge gel e tha’ u thilrad Got? Baaray rogon: Mu fil e n’en ni yog Jesus mu um rin’ e n’en ni i rin’ ‘faanem nib fel’ rogon ni ma gafaliy e saf,’ mu um ‘lek luwan ay.’​—1 Pet. 2:21.

5. Uw feni tamilangan’ Faanem nib Fel’ Rogon ni Ma Gafaliy e Saf u rarogon e ulung rok?

⁵ Chiney e ngad weliyed e n’en nrayog ni nge fil e en lolugen e tabinaw rok Kristus. Tha’ u thilin be’ ni ma gafaliy e saf nge saf rok e be tor nga daken e tamilangan’ nge pagan’. En ma gafaliy e saf e manang gubin ban’en u murung’agen e saf rok, maku arrogon e saf rok ni yad manang e en ma gafaliyrad ma ma pagan’rad ngak. Yad manang lungun ma yad ma fol rok. I gaar Jesus:  “Gu manang e saf rog ma yad manangeg.” Gubin ban’en u rarogon e ulung rok Jesus ni manang. Fare bugithin ni Greek ni kan piliyeg ni “manang” e be yip’ fan ni ngan nang rarogon be’ nge be’ nib “fel’ rogon.” Ere faanem nib fel’ rogon ni ma gafaliy e saf e manang rarogon e saf rok ni gubin. Manang e n’en nib t’uf rok bagayad nge bagayad, nge n’en nib meewar riy, nge n’en nib gel riy. Dariy ban’en u murung’agen e saf rok nde nang. Maku arrogon e pi saf rok nri yad manang e en ma gafaliyrad ma ma pagan’rad nga rogon ni ma pow’iyrad.

6. Uw rogon ni nge folwok e piin figirngiy rok Faanem nib Fel’ Rogon ni Ma Gafaliy e Saf?

⁶ Faanra nge folwok e en figirngiy rok Kristus ma thingari fil rogon ni nge lem ni susun e ir e en ma gafaliy e saf ma piin be ayuwegrad e yad e saf. Thingari athamgil ni nge nang rarogon chon e tabinaw rok nib fel’ rogon. Gur, rayog ni nge rin’ e en figirngiy e re n’ey? Rayog ni faanra ba fel’ rogon e numon u thilrad chon e tabinaw rok, ma ma motoyil ngorad, ma ma yarmiy e pi n’en ni ma rin’ chon e tabinaw, ma ma tiyan’ nga rogon ni ma dugliy e pi n’en ni ma rin’ e tabinaw ni bod e fol Bible ni tabinaw, nge muulung ni yad ma un ngay, nge machib, nge fafel, nge pi n’en ni yad ma chuweg e chalban ngay. Faanra fil e en figirngiy e Thin rok Got nib fel’ rogon, me nang rarogon chon e tabinaw rok, nge rogon ni nga i dag e kanawo’ nib fel’, ma be dugliy ban’en u fithik’ e gonop, ma aram e rayog ni nge pagan’ e tabinaw rok nga rogon ni be gagiyegnagrad mu ur pared nib taareban’rad ko bin riyul’ e liyor.

7, 8. Uw rogon ni nge folwok e en figirngiy rok Faanem nib Fel’ Rogon ni Ma Gafaliy e Saf u rogon ni nge t’ufeg e piin ni yad bay u tan pa’?

⁷ Be’ ni ma gafaliy e saf nib fel’ rogon e ku ma t’ufeg e saf rok. Gad ra beeg fapi Gospel ni be weliy murung’agen e par rok Jesus nge machib ni i tay, ma ri gad ra gin nga rogon ni i t’ufeg Jesus pi gachalpen. Ma ki ‘yim’ ni fan ngorad.’ Piin figirngiy e susun ni ngar folwokgad rok Jesus ngar t’ufeged e piin ni bay u tan pa’rad. Be’ ni figirngiy ni baadag ni nge fel’ u wan’ Got e ma t’ufeg leengin “ni bod rogon feni t’uf girdien” e ulung rok, ma der ma gelnag e thin ngak. (Efe. 5:25) Ya susun ni nga i non ngak u fithik’ e sumunguy ma be dag ngak ni ma lemnag ma bay rogon ni ngan tayfan.​—1 Pet. 3:7.

⁸ En lolugen e tabinaw e susun ni ngki fol ko pi kenggin e motochiyel rok Got u rogon i llowan’nag e bitir. Machane thingar i t’ufeg pi fak. Ma nap’an nra t’uf ni nge yal’uwegrad, ma nge rin’ u fithik’ e t’ufeg. Boch e bitir e ba mo’maw’ ni ngar nanged fan e n’en ni yibe yog ngorad. Faanra aram rogon ma susun ni nge gum’an’ e matam. Ra i folwok e piin pumoon rok Jesus ni gubin ngiyal’ ma aram e yad be ayuweg e tabinaw rorad ni nge par nib pagan’uy riy ni bod ni i tangnag fare psalmist murung’agen.​—Mu beeg e Psalm 23:1-6.

9. (a) Mang e ba milfan ngak e piin figirngiy ni Kristiano ni bod rogon Noah? (b) Mang e ra ayuwegrad ni ngar rin’ed e n’en nib milfan ngorad?

⁹ Noah e immoy u ba ngiyal’ ni ke chugur ni nge thang Got e girdi’ nib kireb. Machane ke ayuweg Jehovah Noah nge ku medlip i girdi’ u nap’an ni “pag e ran nge tharey e nam ni tafen e girdi’ nib kireb.” (2 Pet. 2:5) Ba milfan ngak Noah ni nge ayuweg chon e tabinaw rok ya nge dab ra m’ad u nap’an fare Ran ni Tharey e Fayleng. Ku aram e n’en nib milfan ngak e piin lolugen e tabinaw e ngiyal’ ney ko tin tomuren e rran. (Matt. 24:37) Ere rib ga’ fan ni ngar filed murung’agen e pi n’en ni i rin’ ‘faanem nib fel’ rogon ni ma gafaliy e saf’ mar athamgilgad ni ngaur folwokgad rok.

Piin Leengiy, Mu ‘Ayliyed e Tabinaw’ Romed

10. Mang e be yip’ fan ni nga i yan e en leengiy nga laniyan’ figirngin?

¹⁰ I yoloy apostal Paul ni gaar: “Piin ni ppin, um marod nga laniyan’ pi figirngimed, ni Somol e gimed be yan nga laniyan’.” (Efe. 5:22) Re thin ney e gathi be yip’ fan ni piin leengiy e yad bay u reb e liw nib sobut’. U m’on ni sunmiy Got Efa ni ir e bin som’on e ppin, me gaar: “De fel’ ni nge par fare moon ni go ir. Bay gu ngongliy be’ ni nge chag ngak ngi i ayuweg.” (Gen. 2:18) Maruwel rok e en taayuw e nga i “ayuweg” figirngin ko pi n’en nib milfan ngak u tabinaw. Ma re liw ney e rib ga’ fan.

11. Uw rogon ni ma “ayliy” be’ ni leengiy nib gonop e tabinaw rok?

 ¹¹ Be’ ni leengiy nrayog ni ngan folwok rok e ma rin’ e tin nib fel’ ni fan ko tabinaw rok. (Mu beeg e Proverbs 14:1.) Machane, be’ ni leengiy nib balyang e ma darifannag e en lolugen e tabinaw, ma be’ ni leengiy nib gonop e ma tayfan e en lolugen e tabinaw. Ma fol rok figirngin, ma der ma m’ug rok rarogon e girdi’ nu fayleng ndubrad ni ngaur folgad, maku dubrad ni nga i yog be’ e n’en ni ngar rin’ed. (Efe. 2:2) Be’ ni leengiy nib balyang e der ma magagawon ni nge weliy thibngin figirngin, ma be’ ni leengiy nib gonop e ma guy rogon ni nga i tay e bitir fan e chitamangirad. Be’ ni aray rogon e der ma darifannag figirngin ni ir lolugen, maku der meeriyog, maku der ma tugthin ngak. Maku be’ ni leengiy nib gonop e manang rogon ni nga i ayuweg e salpiy. Ma be’ ni leengiy nib balyang e ma adbey e salpiy. Machane, be’ ni leengiy nib fel’ e gathi aram rogon, ya ma ayuweg figirngin u rogon ni yow ma maruwel ko salpiy. Ma gonopiy rogon ni ma rin’ ban’en maku ma ayuweg e salpiy. Ma der ma towasariy figirngin ni nge yoornag e tayim ni nge maruwel riy.

12. Mang e rayog ni nge rin’ e en leengiy ni nge ayuweg e tabinaw rok ni ngaur pared ni yad ba “od” ko tirok Got ban’en?

¹² Be’ ni leengiy nib gonop e ma ayuweg e tabinaw rok ni ngaur pared ni yad ba “od” ko tirok Got ban’en, ya ma ayuweg figirngin ni ngar filew murung’agen Jehovah ko bitir rorow. (Prov. 1:8) Ku ma pi’ e ayuw ko Fol Bible ni Yima Tay u Tabinaw. Maku, nap’an nra fonownag figirngin pi fakrow fa llowan’nagrad, ma der ma togopuluw ngay. Be’ ni leengiy ni aray rogon e rib thil ngak reb e ppin ni der ma ayuweg figirngin nge bitir rok!

13. Mang nib ga’ fan ni nga i ayuweg e en leengiy figirngin nge baud laniyan’ ko maruwel rok u lan e ulung?

¹³ Uw rogon u wan’ e en leengiy ni faanra guy figirngin ni be rin’ boch e maruwel u lan e ulung ni Kristiano? Ba mudugil nra felfelan’! Demtrug ko figirngin e ir reb e ministerial servant, ara reb e piilal, ara ir reb i gothon e Hospital Liaison Committee ara Regional Building Committee, ma ma felfelan’ ko tow’ath rok figirngin. Faanra nga i pi’ e athamgil nga laniyan’ figirngin ko thin nge ngongol rok, mab muun ngay ni nge pag fan ir u boch ban’en. Machane, manang ni pi maruwel nem ni ma rin’ e pumoon rok u lan e ulung e ra ayuweg e tabinaw rorow ni ngar pared ni yad ba od ko tirok Got ban’en.

14. (a) Mang ban’en nrayog ni nge magawonnag e en leengiy, ma uw rogon nrayog ni nge pithig e re magawon ney? (b) Uw rogon ni nge ayuweg e en leengiy e tabinaw nge par nib fel’?

¹⁴ Ba mo’maw’ ni nge dag e en leengiy e kanawo’ ni ngan folwok riy ni faanra dugliy figirngin ban’en nde m’agan’ ngay. Yugu aram rogon ma ma dag e “lem nib sumunguy ma ba gapas” ma der ma togopuluw ko n’en ni ke dugliy figirngin ya nge yan i aw nib fel’ rogon. (1 Pet. 3:4) Be’ ni leengiy nib fel’ e ma guy rogon ni nge folwok ko  ngongol nib fel’ ni i rin’ boch e ppin kakrom, ni bod Sarah, nge Ruth, nge Abigail, nge Maria ni chitiningin Jesus. (1 Pet. 3:5, 6) Ku ma folwok u boch e ppin e ngiyal’ ney ni kar puwelwolgad ni ma “par pangirad ni bod yalen e piin ni ppin.” (Titus 2:3, 4) Faanra i t’ufeg e en leengiy figirngin ma be tayfan, ma aram e rayog ni nge par nib fel’ e mabgol nge tabinaw rorow. Tabinaw rok e ra par ni bay e felfelan’ nge pagan’ riy. Mit ney e ppin e rib t’uf rok reb e pumoon nib t’uf Jehovah rok, ma ma maruwel nib gel ni fan ngak!​—Prov. 18:22.

Piin Bitir, Nge L’agan’med ko Pi N’en Ndanir Guy nga Owchey

15. Uw rogon ni nga i maruwel e piin bitir nge gallabthir rorad u taabang ya nge yog ni par e tabinaw nib “od” ko tirok Got ban’en?

¹⁵ Gimed e piin bitir, uw rogon ni ngam maruwelgad e gallabthir romed u taabang ya nge yog ni par e tabinaw romed nib “od” ko tirok Got ban’en? Am lemnaged e tow’ath ni ke micheg Jehovah nra pi’ ngomed. Sana nap’an ni ki gimed bbitir ma i dag e gallabthir romed ngomed yaan e Paradis. Ma nap’an ni kam ilalgad boch, mab mudugil ni ur fanayed e Bible nge boch e babyor rodad ni nge ayuwegmed ngam nanged rogon e yafas ni manemus u lan e bin nib beech e fayleng. Faanra l’agan’med ko pigpig ngak Jehovah mi gimed lemnag e n’en ni ngam rin’ed ko yafas romed nrogon nib m’agan’ ngay ma ra ayuwegmed ni ngaum pared ni gimed ba “od” ko tirok Got ban’en.

16, 17. Mang e rayog ni nge rin’ e piin bitir ya nge yog nra mu’naged fare sagreng ko yafas nib fel’ rogon?

¹⁶ Mu ted ngan’med fare thin ni yog apostal Paul ni bay ko 1 Korinth 9:24. (Mu beeg.) Mu uned ko fare sagreng ko yafas mi gimed nameg ni ngam m’onod. Mmel’eged reb e kanawo’ nra fekem i yan ko yafas ndariy n’umngin nap’an ni aram puluwon e re sagreng nem. Boor e bitir ni kar paged e fel’ rogon ni nge chafeg lanin’rad nga bang ya nge dab ki l’agan’rad ko fare tow’ath ni bay nga m’on. Rib balyang e en nra rin’ e re n’ey! Yira nameg e flaab ma dabi yog e bin riyul’ e felfelan’. Pi n’en nrayog ni ngan chuw’iy ko salpiy e ra m’ay. Ere nge l’agan’med ko pi n’en “ndab ni guy nga owchey.” Mang fan? Bochan ni pi n’en “ndab ni guy nga owchey e bay i par ndariy n’umngin nap’an.”​—2 Kor. 4:18.

¹⁷ Pi n’en “ndab ni guy nga owchey” e ba muun ngay e tow’ath nra yibnag Gil’ilungun Got. Mu nameged ni ngam rin’ed e pi n’en nrayog ni nge yognag e pi tow’ath nem ngomed. Pigpig ngak e bin riyul’ e Got e ra bing e kanawo’ ni ngam nameged boch ban’en e chiney nge boch nga m’on. a Gimed ra nameg boch ban’en ni fan ko tirok Got ma ra ayuwegmed ni ngam tedan’med ko pigpig ni gimed be tay ngak Got mu um pared ni ke l’agan’med ko fare tow’ath ni aram e yafas ndariy n’umngin nap’an.​—1 John 2:17.

18, 19. Uw rogon me nang reb e bitir ni kari fel’ e tha’ u thilrow Jehovah?

¹⁸ N’en som’on nra ayuwegmed ni ngam marod u kanawoen e yafas e aram e ngari fel’ e tha’ u thilmed Jehovah. Kam rin’ed e re n’ey, fa? Nge bigimed me fith ir ni nge gaar: ‘Kug mon’og ko tirok Got ban’en, fa kemus ni gu ma un ko muulung nge machib ni bochan e gallabthir rog? Gu ma athamgil ni nge yog boch e fel’ngin ngog nra felfelan’nag Got, fa? Gu ma athamgil ni nggu un ko pi n’en ni yima rin’ ni bay rogon ko bin riyul’ e liyor ni bod e meybil ni gubin  ngiyal’, nge fol Bible, nge muulung, nge machib, fa? Gu be gay rogon ni ngari fel’ e tha’ u thilmow Got, fa?’​—Jas. 4:8.

¹⁹ Mu lemnaged e n’en ni rin’ Moses. Yugu aram rogon ni ilal u yugu reb e nam, me guy rogon ni nge fel’ e tha’ u thilrow Jehovah. I mel’eg ni nge mang reb e tapigpig rok Jehovah ko bin ni nga nog ni ir fak be’ nib ppin ni fak Farao. (Mu beeg e Hebrews 11:24-27.) Ere gimed e piin bitir ni Kristiano e kub t’uf ni ngam dugliyed ni ngam pigpiggad ngak Jehovah ni gimed ba yul’yul’. Faan gimed ra rin’ ni aram rogon ma ri gimed ra felfelan’, ma ra fel’ e par romed e chiney, ma ra yog e athap ko “bin riyul’ e yafos” ngomed.​—1 Tim. 6:19.

20. Mini’ e ra yog puluwon e sagreng ko yafas ngak?

²⁰ Kakrom e yira sagreng ma taabe’ e ma m’on. Machane gathi aram rogon e sagreng ko yafas. Ya baadag Got ni “urngin e girdi’ ni ngar thapgad ngak ma ngar nanged e tin nib riyul’.” (1 Tim. 2:3, 4) Boor e girdi’ ni kar uned ko re sagreng ney ni yad ba m’on romed ma kar mu’gad, maku boor e ki gimed be sagreng u taabang. (Heb. 12:1, 2) Puluwon e re sagreng ney e yira pi’ ngak e piin ndab ra talgad. Ere mu dugliyed ndab mu talgad!

21. Mang e gad ra fil ko bin migid e article?

²¹ Fare ‘rran rok Somol, ni aram fare Rran ni ba ga’ ma ba gel e gafgow riy’ e rib mudugil nra yib. (Mal. 4:5) Ere susun ndabi gin e pi tabinaw ni Kristiano ngay. Aram fan nib ga’ fan ni nge be’ me rin’ e n’en nib milfan ngak u lan e tabinaw nrogon ni be yog e Bible. Mang e ku rayog ni ngam rin’ mag par ni gab od ko tirok Got ban’en, mab gel e tha’ u thilmew Got? Bin migid e article e ra weliy dalip ban’en ni bay rogon ko tha’ u thilin chon e tabinaw nge Jehovah.

[Footnote]

Mang e Kam Fil?

• Mang nrib ga’ fan ni nge par e pi tabinaw ko Kristiano ni yad ba “od” ko tirok Got ban’en?

• Uw rogon ni nge fol e en figirngiy rok Faanem nib Fel’ Rogon ni Ma Gafaliy e Saf?

• Mang e rayog ni nge rin’ e en leengiy ya nge yog ni baud laniyan’ figirngin ko maruwel rok?

• Uw rogon ni nge ayuweg e piin bitir e tabinaw rorad nge yog nra pared ni yad ba od ko tirok Got ban’en?

[Study Questions]

[Picture on page 12]

Be’ ni leengiy nib fel’ e rib t’uf rok reb e pumoon nib t’uf Jehovah rok