Mini’ e En Th’abi Ga’ Fan u Wan’um?

“Gur e Th’abi Tolang u ga’ngin yang e fayleng.”​—PS. 83:18, NW.

1, 2. Faanra nge yog e yafas ngodad ma mang fan ni dabi gaman ni kemus ni ngad nanged fithingan Jehovah?

 SANA yay ni som’on nim guy fithingan Jehovah e nap’an ni kan dag ngom u Psalm 83:18 (NW). Sana kam gin u nap’an ni kam beeg fapi thin ni be gaar: “Nge nangem e girdi’ ni fithingam e Jehovah ni gur e Th’abi Tolang u ga’ngin yang e fayleng.” Ma dariy e maruwar riy ni ka aram nap’an i yib ni ga be fanay e re thin nu Bible ney ni ngam ayuweg boch e girdi’ ni ngar nanged Jehovah ni Got rodad.​—Rom. 10:12, 13.

² Yugu aram rogon nib ga’ fan ni nge nang e girdi’ fithingan Jehovah, machane bay ban’en ni kub t’uf ni ngar rin’ed. Mu tay fanam i yan u rogon ni tamilangnag fare psalmist ban’en ni ku ra ayuwegdad u nap’an ni gaar: “Gur e Th’abi Tolang u ga’ngin yang e fayleng.” Arrogon, Jehovah e ir e th’abi ga’ fan u ga’ngin e palpalth’ib. Ma bochan ni ir e ke sunmiy urngin ban’en, ma bay rogon ni ngan pigpig ngak. (Rev. 4:11) Ere, ba fel’ ni ngad fithed gadad ni nge lungudad, ‘Mini’ e en th’abi ga’ fan u wan’ug?’ Rib ga’ fan ni ngad fal’eged i lemnag e fulweg rodad ko re deer ney!

 Magawon ni Sum u Lan fare Milay’ nu Eden

3, 4. Uw rogon ni yog rok Satan ni nge bannag Efa, ma mang e buch nga tomuren?

³ Feni ga’ fan e re deer ney e ba tamilang ko n’en ni buch u lan fare milay’ nu Eden. U rom e chel Satan ni Moonyan’ riy nge waliy e bin som’on e ppin ni aram Efa, ni nge rin’ e tin ni baadag me th’ab e motochiyel rok Jehovah ko fare ke gek’iy ni ke yog ni dab ni kay. (Gen. 2:17; 2 Kor. 11:3) I aw Efa ko re wup ney ma aram me darifannag mat’awun Jehovah ko gagiyeg. I m’ug ko ngongol rok Efa ni gathi Jehovah e en th’abi ga’ fan u wan’. Machane, uw rogon ni yog rok Satan ni nge bannag Efa?

⁴ I fanay Satan boch e ban nib mith u nap’an ni i non ngak Efa. (Mu beeg e Genesis 3:1-5.) Som’on, e de fanay fithingan Jehovah, ya kemus ni i yog ni “Got.” Machane, fa en ni yoloy fare babyor ni Genesis e fanay fithingan Jehovah ko bin som’on e verse ko re guruy nem. Bin migid e fanay Satan fare bugithin ni “rriyul’” u nap’an ni be non ngak Efa. Re ban ney nib mith ni fanay e ke achignag fan e n’en ni ke yog Got. (Gen. 2:16) Ere ke guy Satan rogon ni nge m’aynag fan e re motochiyel nem. Ma bin dalip e yugu aram rogon ni yigoo Efa e be non ngak, machane i fanay fare bugithin ni “ngomew.” I rin’ e re n’em ya be guy rogon ni nge lemnag Efa ni ir be’ nib ga’ fan ma ir e ba ga’ lungun u puluwon figirngin. Ere mang e buch? I dugliy Efa ni nge non ni pa’row figirngin ma aram me gaar: “Demtrug e re ke gek’iy ni ba’ ko gi woldug ney ma ra gu wew wom’engin.”

5. (a) Mang e guy Satan rogon ni nge tiyan’ Efa ngay? (b) Mang e ke dag Efa ni bochan e ke kay wom’engin fare ke gek’iy ni ka nog ni dab ni kay?

⁵ Ke yog Satan ni ke ban Got. Ki m’ug ko thin rok ni Got e ba laniyan’ ni bochan e ke yog ngak Adam nge Efa ni ‘dab ra kew wom’engin urngin e gek’iy ni ba’ ko gi woldug nem.’ Bin migid e guy Satan rogon ni nge lemnag Efa ban’en ni nge fel’ rogon riy nge rogon ni nge “bod Got.” Tomur riy, me yog rok ni nge bannag nge par ni goo fare ke gek’iy nge wom’engin e be lemnag me pagtalin e tha’ u thilrow e en ni ke pi’ gubin ban’en ngak. (Mu beeg e Genesis 3:6.) Rib gel e kireban’ riy ya fare ke gek’iy ni kay Efa wom’engin e be dag riy ni gathi Jehovah e th’abi ga’ fan u wan’.

Magawon ni Sum u Nap’an Job

6. (a) Uw rogon ni togopuluw Satan ko yul’yul’ ni i tay Job? (b) Mang e ke mab kanawoen ngak Job?

⁶ Boch e chibog nga tomuren, miki mab e kanawo’ ngak Job ni nge dag ko Mini’ e th’abi ga’ fan u wan’. Nap’an ni weliy Jehovah ngak Satan murung’agen e yul’yul’ ni be tay Job, me yog Satan ni gaar: “Gur ra i par Job ni ba’ madgum u wan’ ni faanra der yib e fel’ riy ngak?” (Mu beeg e Job 1:7-10.) De yog Satan nder yul’yul’ Job ngak Got. I yog ni be pigpig Job ngak Jehovah ni gathi bochan e ba t’uf Jehovah rok, ya bochan e n’en ni be yog riy ngak. Kemus ni goo Job e rayog ni nge micheg nde riyul’ e pi thin ney, ma aram e n’en ni ke rin’.

7, 8. (a) Mang boch e skeng ni yib ngak Job? (b) Mang e ke dag ni bochan e ke athamgil ni nge par nib yul’yul’?

⁷ I pag Jehovah Satan ni nge fek e gafgow i yib ngak Job, nra m’ay reb miki yib reb. (Job 1:12-19) Ere mang e rin’ Job? Be yog e Bible ni ‘de  denen ya de yin’ e kireb riy nga daken Got.’ (Job 1:22) Machane de tal Satan, ya ki yog ni gaar: “Be’ nib girdi’ e ra pag urngin ban’en ni fan e nge ayuweg e pogofan rok.” (Job 2:4) I yog Satan ni faanra gafgow Job ma dabki tay ni Jehovah e ir e th’abi ga’ fan u wan’.

⁸ I yib ba mit e m’ar nrib sonogor ngak Job me yog e ppin rok ngak ni nge yog e thin nib togopuluw ngak Got me yim’. Boch nga tomuren, me yog dalip e fager rok ni ke rin’ ban’en nib kireb. (Job 2:11-13; 8:2-6; 22:2, 3) Yugu aram rogon gelngin e gafgow ni yib ngak Job, ma i par nib yul’yul’ ngak Got. (Mu beeg e Job 2:9, 10.) Yul’yul’ ni tay e dag riy ni Jehovah e ir e th’abi ga’ fan u wan’. Ke dag Job ni mus ngak be’ nde flont ma rayog ni nge micheg nde riyul’ e pi n’en ni ma yog Moonyan’.​—Mu taarebrogonnag ko Proverbs 27:11.

Fulweg nib Fel’ ni Pi’ Jesus

9. (a) Uw rogon ni fanay Satan boch ban’en ni yima ar’arnag ni nge guy rogon ni nge waliy Jesus? (b) Mang e rin’ Jesus?

⁹ De n’uw nap’an nga tomuren nni taufenag Jesus, me guy Satan rogon ni nge pingeg laniyan’ nge rin’ e pi n’en ni ma ar’arnag e dowef ma dabki tay ni Jehovah e ir e th’abi ga’ fan u wan’. Dalip ban’en ni guy Moonyan’ rogon ni nge waliy Jesus ngay. Bin som’on e guy rogon ni nge waliy nge piliyeg e malang nge ngal’ ni flowa. (Matt. 4:2, 3) Ngiyal’ nem e ke gaman 40 e rran ni dawori abich Jesus, ere kari yib e bilig ngak. Ma aram me guy Moonyan’ rogon ni nge waliy nge fanay gelngin ni nge yognag ban’en ngay ni nge kay. Machane mang e rin’ Jesus? De fol ko n’en ni rin’ Efa ya i lemnag e n’en ni bay ko Thin rok Jehovah me gurnag ir nge siyeg e n’en ni kan waliy ngay.​—Mu beeg e Matthew 4:4.

10. Mang fan ni yog Satan ngak Jesus ni nge og ko fa gin’en ni th’abi tolang ko tempel?

¹⁰ Ki guy Satan rogon ni nge waliy Jesus nge rin’ ban’en ni ir e nge fel’ rogon riy. I yog ngak Jesus ni nge og u daken e gin’en th’abi tolang ko tempel. (Matt. 4:5, 6) Mang e be guy Satan rogon ni nge rin’? I yog ni faanra og Jesus ndabi  maad’ad, ma aram e mich riy ni ‘fak Got ir.’ Ba tamilang ni baadag Moonyan’ ni nge guy rogon ni nge dabuy Jesus ni nge kireb thin, ma aram me rin’ ban’en ni nga nog e sorok riy ngak. Manang Satan ni rayog ni nge rin’ be’ ban’en ni bay e riya’ riy ni bochan e tolangan’ nge bochan ni dabun ni ngan darifannag. I thilyeg Satan fan reb e thin nu Bible, machane ke dag Jesus nri manang e Thin rok Jehovah nib fel’ rogon. (Mu beeg e Matthew 4:7.) Nap’an ni siyeg Jesus e re n’em, miki dag ni Jehovah e ir e th’abi ga’ fan u wan’.

11. Mang fan ni siyeg Jesus urngin e pi nam nu fayleng ni ognag Satan ngak?

¹¹ Bin tomur e skeng ni pi’ Satan ngak Jesus, e ognag e pi nam nu fayleng ngak. (Matt. 4:8, 9) Machane me gur Jesus nge siyeg ya manang ni faanra fek ma aram e ke togopuluw nga mat’awun e gagiyeg rok Jehovah. (Mu beeg e Matthew 4:10.) Gubin yay ni non Satan ngak Jesus, ma aram urngin yay ni fulweg u daken e thin nu Bible ni ba’ fithingan Jehovah riy.

12. (a) Mang ban’en nrib mo’maw’ ni dugliy Jesus u m’on ni nge yim’? (b) Mang e gad ra fil ko n’en ni rin’?

¹² Nap’an ni ke chugur ni nge mus e yafas rok Jesus u fayleng, ma bay ban’en nib mo’maw’ ni thingari dugliy. N’umngin nap’an e machib ni i tay, ma i dag nib m’agan’ ngay ni nge pi’ e yafas rok nib maligach. (Matt. 20:17-19, 28; Luke 12:50; John 16:28) Machane, ku manang Jesus ni yira t’ar e thin nga daken, min dugliy ni ke th’ab e motochiyel, min li’ nge yim’ ni gowa ir be’ ni ke darifannag Got. Re n’ey e ri k’aring e magafan’ ngak nib gel. Aram fan ni meybil ni gaar: “Chitamag, faanra yog ma ga fek e re kap ney ngam chuweg rog!” Machane me ulul ngay ni gaar: “Gathi tin ni gub adag e ngam rin’ ya tin ni gab adag.” (Matt. 26:39) Arrogon, yul’yul’ ni tay Jesus nge mada’ ko yam’ e ke micheg ko mini’ e En th’abi ga’ fan u wan’!

Fulweg Rodad ko fare Deer

13. Mang e kad filed ko n’en ni rin’ Efa, nge Job, nge Jesus Kristus?

¹³ Ere mang e kad filed ko pi n’en ni kad weliyed? Kad filed ko n’en ni buch rok Efa ni piin ni yad ra paged yad ko pi n’en ni yad be ar’arnag e yad be dag ni gathi Jehovah e En th’abi ga’ fan u wan’rad. Ma yul’yul’ ni tay Job e kad filed riy ni mus ngak e girdi’ ni dawor ra flontgad ma rayog ni ngar daged ni Jehovah e ir e ba m’on u wan’rad ni faan yad ra athamgil u fithik’ e magawon ni keb ngorad ni yugu aram rogon ni dar nanged fan ni ke yib e pi n’em ngorad. (Jas. 5:11) Ma n’en ni rin’ Jesus e be fil ngodad ni ngad athamgilgad u fithik’ e tamra’ ma dab da lemnaged ni thidad e ir e rib ga’ fan ni nge fel’. (Heb. 12:2) Machane uw rogon ni ngad folgad ko pi n’ey?

14, 15. (a) Uw rogon nib thil e n’en ni rin’ Jesus ko n’en ni rin’ Efa? (b) Uw rogon ni rayog ni ngad folwokgad rok Jesus? (Ngan tamilangnag fare sasing ni bay ko page 20.)

¹⁴ Dab mu pag e pi n’en ni ma waliyey ko kireb nge k’aringem ngam pagtalin Jehovah. I par Efa ni be lemnag e n’en ni kan waliy ngay. I guy “feni manigil yaan i wom’engin, me finey feni manigil ni nge tamilangan’uy.” (Gen. 3:6) Rib thil e n’en ni rin’ ko n’en ni rin’ Jesus ko fa dalip i skeng ni yibnag Satan ngak. De pag e n’en ni kan waliy ngay ni nge k’aring ni nge pagtalin wenegan nra yib riy ngak. I taga’ nga daken e Thin rok Got ma ki fanay fithingan Jehovah.

¹⁵ Nap’an ni kan waliydad nga ban’en nde m’agan’ Jehovah ngay, ma mang e ngad lemnaged? Faanra yugu da pared ni gad be lemnag e re n’em, ma aram e ra gel e ar’ar nib kireb u lanin’dad. (Jas. 1:14, 15) Ba t’uf ni ngad gurgad ngad chuweged e re ar’ar nem u lanin’dad ni mus ni faanra rib mo’maw’ ya bod ni ngad lufed bang u dowdad. (Matt. 5:29, 30) Ba t’uf ni ngad lemnaged wenegan nra yib ngodad ni faanra dabda folgad nge rogon nra kirebnag e tha’ u thildad Jehovah. Thingar da lemnaged e n’en ni be yog e Thin rok ni aram e Bible.

16-18. (a) Mang e ra k’aringdad ni nge mulan’dad? (b) Mang e ra ayuwegdad ni nga darod u fithik’ boch e magawon nrib mo’maw’?

¹⁶ Dab mu pag e magawon rom nge k’aringem ngam damumuw ngak Jehovah. (Prov. 19:3) Chiney ni gad be chugur i yan nga tungun e re  m’ag nib kireb n’ey e be yoor i yan e girdi’ rok Jehovah ni yad be gafgow ni bochan e durru’, nge yoko’, nge ku boch e gafgow. Darud lemnaged ni ngan ayuwegdad u daken e maang’ang. Machane, rayog ni ngari magafan’dad u nap’an nra yim’ be’ nib t’uf rodad ara ke yib e magawon nib gel ngodad ni bod e n’en ni buch rok Job.

¹⁷ De nang Job fan ni pag Jehovah ni nge gafgow, maku er rogodad ni bay yu ngiyal’ ni dad nanged fan ni ma buch boch ban’en nib kireb. Sana kad rung’aged murung’agen boch i walagdad ni yad ba yul’yul’ ni kar m’ad u nap’an reb e yoko’ nib gel ara reb e durru’ ni bod fare durru’ ni ke aw nga Haiti. Maku rayog ni kad rung’aged murung’agen reb e tapigpig rok Got nib yul’yul’ ni kan li’ ara ke maad’ad ke yim’. Maku reb e rayog ni nge yib boch e magawon nib gel ngodad ara i buch boch ban’en nde mat’aw rodad. Kireban’ rodad e rayog ni nge k’aringdad ni nge lungudad: ‘Mang fan Jehovah? Mang fan ni gag? Mang e kug rin’ nib kireb?’ (Hab. 1:2, 3) Mang e ra ayuwegdad e ngiyal’ nem?

¹⁸ Ba t’uf ni ngad kol ayuwgad ni dab da lemnaged ni magawon ni ke yib ngodad e be dag nda kud fel’gad u wan’ Jehovah. I tamilangnag Jesus e re n’ey u nap’an ni weliy murung’agen fa gali n’en ni buch ko ngiyal’ ni immoy riy. (Mu beeg e Luke 13:1-5.) Boor ban’en ni ma buch ni bochan e “ngal’an nge pi n’en ni ma buch ko girdi’ e dan nang.” (Ekl. 9:11, NW) Machane demtrug ko mang magawon e ra yib ngodad, ma rayog ni ngad k’adedan’dad u fithik’ ni faan gad ra lemnag fare “Got ni urngin mit e ayuw me ir e be yib rok ngodad.” Ra pi’ gelngidad ni ngad athamgilgad u fithik’ e yul’yul’.​—2 Kor. 1:3-6.

19, 20. (a) Mang e ayuweg Jesus ni nge athamgil u fithik’ e pi n’en ni buch rok ni yira tamra’ ngay? (b) Mang e ra ayuwegdad ni ngad rin’ed e re n’ey?

¹⁹ Dab mu pag e tolangan’ ara tamra’ ni nge magawonnagem. Bochan nib sobut’an’ Jesus ma aram fan ni “pag e flaab rok ni gubin, nge yib i ngal’ nib tapigpig.” (Fil. 2:5-8) I yog rok ni nge k’adan’ u fithik’ e pi gafgow ni yib ngak ni yira tamra’ riy ni bochan e i pagan’ ngak Jehovah. (1 Pet. 2:23, 24) Re n’ey ni rin’ Jesus e be dag riy ni ke mon’eg e tin nib m’agan’ Jehovah ngay, ma angin ni yib riy ngak e ke tay Got nga  reb e liw nib tolang u tharmiy. (Fil. 2:9) Pi n’en ni i rin’ Jesus u nap’an ni immoy u fayleng e aram e n’en ni yog ngak pi gachalpen ni ngar rin’ed.​—Matt. 23:11, 12; Luke 9:26.

²⁰ Yu ngiyal’ e rayog ni ngad mada’naged boch e skeng nra k’aring e tamra’ ngodad. Machane, thingar da pared nib pagan’dad ni bod apostal Paul ni gaar: “Ereray fan ni kug gafgow. Machane dagur tamra’ ngay, ya gu manang e en ni kug pagan’ug ngak, ma mmudugil u wun’ug nrayog rok ni nge tay e tin ni ke pag fan ngog ndabi buch ban’en riy nge yan i mada’ ko Rofen ni bay sul riy.”​—2 Tim. 1:12.

21. Yugu aram rogon ni girdi’ ko re fayleng ney e goo yad e yad ma lemnagrad, ma mang e kam turguy ni ngam rin’?

²¹ Ke yog e Bible u m’on riy nra taw ko ngiyal’ ney ni gad bay riy ma ra i par e girdi’ ni “ke mus ni yad e yad be lemnagrad.” (2 Tim. 3:2) Aram fan ni boor e girdi’ e ngiyal’ ney nde ga’ fan Jehovah u wan’rad. Manga yigi dabi af e re lem ney ngodad! Demtrug ko kan waliydad ko kireb, fa ke yib e gafgow ngodad, fa kad mada’naged boch ban’en nra k’aring e tamra’ ngodad, ma ngad turguyed ni Jehovah e ir e En ni nge par ni th’abi ga’ fan u wan’dad!

Mang e Rayog ni Ngad Filed . . .

• u rogon ni bannag Satan Efa?

• ko n’en ni rin’ Job u nap’an ni yib e gafgow ngak?

• ko n’en ni th’abi ga’ fan u wan’ Jesus?

[Study Questions]

[Picture on page 19]

De m’oneg Efa u wan’ e tha’ u thilrow Jehovah

[Picture on page 20]

I siyeg Jesus e n’en ni waliy Satan ngay me par ni tha’ u thilrow Jehovah e ir e ba m’on u wan’

[Picture on page 22]

Machib ni i tay e pi walag ko tent u Haiti i yan u tomuren fare durru’

Nap’an nra yib e gafgow ngodad ma rayog ni ngad lemnaged fare “Got ni urngin mit e ayuw me ir e be yib rok ngodad”