Ra Mich Jehovah u Wan’um Ma Ra Pagan’um Ngak

“Be rung’ag [Jehovah] lamag nap’an ni gu ra pining.”​—PS. 4:3, BT.

1, 2. (a) Mang magawon nib gel e yib ngak David? (b) Bin ngan e Psalm e gad ra weliy?

 TOMUREN ni ke n’uw boch nap’an ni ke gagiyeg David u Israel, ma aram me mada’nag e magawon nrib gel. Absalom ni fak e ke yog ni ir e nge mang pilung min towasariy David ni nge chuw u Jerusalem. Maku bay be’ ni yow ba pach ni ma pi’ e fonow ngak ni bannag. Chiney e be yan David ko Burey nu Olives ndariy e sus u ay ni be yor ma bay boch e fager rok nib yul’yul’ ni yad be un ngak. Shimei ni be’ ko tabinaw rok Saul ni Pilung e ke pag e malang ngak David ma be yog e thin nib kireb ngak.​—2 Sam. 15:30, 31; 16:5-14.

² Gur, pi n’en ni ke buch rok David e ra k’aring ni nge yim’ ni bochan e kireban’ nge tamra’? Danga’, ya ke pagan’ ngak Jehovah. Ba gagiyel e re n’ey ko thin ni bay ko bin dalip e Psalm ni ke yoloy David murung’agen ba ngiyal’ ni i mil rok Absalom. Maku ir e ke yoloy e bin aningeg e Psalm. Gali tang ney e be dag ni kari mich u wan’ ni ma rung’ag Got e meybil ma ma fulweg taban. (Ps. 3:4; 4:3) Maku be micheg ngodad ni bay Jehovah ko pi tapigpig rok nib yul’yul’ ni ma ayuwegrad ni rran nge nep’, ma be ayuwegrad ni ngaur pared ni yad ba gapas mab pagan’rad. (Ps. 3:5; 4:8) Ere gad ra weliy e gali Psalm ney ma ngad guyed ko uw rogon ni nge k’aringdad ni ngari mich Got u wan’dad me pagan’dad ngak.

‘Ke Pag Urngirad ni Yad Be Togopluw Ngodad’

3. Rogon ni yog ko Psalm 3:1, 2, mang magawon e mada’nag David?

³ Ke yog be’ ni tamol’og ni gaar: “Ke fol e girdi’ nu Israel ngak Absalom.” (2 Sam. 15:13) Be lemnag David ko uw rogon me fol boor e girdi’ rok Absalom, ere ke fith ni gaar: “Jehovah, mang fan ni ke pag urngirad ni yad be togopluw ngog? Boor e girdi’ ni yad be yog murung’ageg ni gaar: ‘Dabi ayuweg Got e cha’nem.’” (Ps. 3:1, 2, NW) Boor e girdi’ nu Israel e kar lemnaged ni dabki ayuweg Jehovah David ma dabiyog ni nge mil rok Absalom nge boch e girdi’ ni yad be un ngak.

4, 5. (a) Mang e ke mudugil u wan’ David? (b) Mang fan fare bugithin ni “ga ma fulweg e athamgil nga lanin’ug”?

⁴ Bochan nib mich Jehovah u wan’ David ma aram fan nib pagan’ ngak. Me yon’ reb e tang ni gaar: “Machane gur Somol, e rungrung rog ko riya’ ni gubin ngiyal’; ga ma gelnigeg ma ga ma fulweg e athamgil nga lanin’ug.” (Ps. 3:3, BT) Manang David nra rungrung Jehovah rok ni bod fa gin’en ni ma mith e salthaw nga fon ko cham. Arrogon, fare pilung e be mil ni ke upunguy lolugen ya ke tamra’, machane ra n’uf Jehovah David. Ya rayog rok Jehovah ni nge sulweg David nga rogon. Ke meybil David ngak Got ma manang nra fulweg taban. Ke mich Jehovah u wan’um ni bod rogon David?

⁵ Nap’an ni ke yog David ni “ga ma fulweg e athamgil nga lanin’ug” ma be dag ni manang David ni Jehovah e ma pi’ e ayuw ngak. Reb e babyor e be weliy ni nap’an nra fulweg Got e athamgil nga lanin’uy ma aram e ke gelnag e athap nge pagan’. Bay fan ni ke kireban’ David ya kan chuweg ko pilung. Machane nap’an ni kan ‘fulweg e athamgil nga laniyan’’ ma aram e ke pasigan’ bayay, ma ke pagan’, ma kari mich Jehovah u wan’.

 ‘Ra Fulweg Jehovah Taban e Meybil!’

6. Mang fan ni ke yog David ni ke fulweg Jehovah taban e meybil rok ko fare burey nib thothup?

⁶ Bochan ni ke mich Jehovah u wan’ David ma ma pagan’ ngak, ere ke ulul ngay ni gaar: “Gu yornag e ayuw ngak Somol, me fulweg taban e meybil rog ko fare burey rok nib thothup.” (Ps. 3:4, BT) Kan fek fare kiwaren e m’ag ko fare Burey nu Zion, ya ireray e n’en ni ke yog David ni ngan rin’. (Mu beeg e 2 Samuel 15:23-25.) Ere ba puluw e thin rok David u nap’an ni yog nra fulweg Jehovah taban e meybil rok ko fare burey nib thothup.

7. Mang fan nde rus David?

⁷ De rus David ya manang ni meybil rok ngak Got e dabi aw nib m’ay fan. Ere ke yon’ reb e tang ni gaar: “Gu pageg nga but’ ni nggu mol, ma Somol e be yoror rog n’umngin e nep’.” (Ps. 3:5, BT) Yugu aram rogon nra nep’ ma bay e toogor nrayog ni nge og ngak David, ma de rus ni nge mol. Ke mudugil u wan’ nrayog ni nge od, ya n’en ni buch rok u m’on riy e ke ayuweg ni ngari mich u wan’ ni bay Got nra ayuweg. Ere ku arrogodad ni faanra ngad folgad ko “motochiyel rok” Jehovah ma dariy e ngiyal’ ni ngad paloggad rok.​—Mu beeg e 2 Samuel 22:21, 22.

8. Uw rogon ni be dag fare thin ko Psalm 27:1-4, ni ke pagan’ David ngak Jehovah?

⁸ Pagan’ nge michan’ rok David ngak Got e rib gagiyel u reb e thin ko psalm ni yoloy ni gaar: “I Somol e tamilang rog me ir e ba’ rog ni be ayuwegeg i yan; dab gu tamdag ngak be’. Somol e be yororiyeg rok urngin e riya’; ere dab gu tamdag . . . Ni yug ra longobiyeg baraba’ i salthaw ma dab gu rus . . . Kug wenignag taa ban’en ngak Somol; taa ban’en e gub adag, ni aram e nggu par u lan e naun rok Somol u n’umngin nap’an e yafos rog, me felan’ug nga feni fel’ Somol, mu gu wenig ngak u rom ni ngi i pow’iyeg.” (Ps. 27:1-4) Faanra ba puluw u wan’um e pi thin nem ma ba m’ag ngom ma gubin ngiyal’ nra um chag ngak e pi tapigpig rok Jehovah.​—Heb. 10:23-25.

9, 10. Yugu aram rogon e thin ni yog David ko Psalm 3:6, 7, ma mang fan ni rayog ni nga nog nder ma fanenikay e girdi’?

⁹ Yugu aram rogon ni ke bannag Absalom David maku boor e girdi’ rok nda ur pared ni yad  ba yul’yul’ ngak, ma aram me yon’ reb e tang ni gaar: “Da gu rus ko yu biyu’ e toogor ni yad ba liyegeg u ga’ngin yang. Somol, ni Got rog moy ngam ayuwegneg! Mu gechignag urngin e pi toogor rog, ngam pagrad ni ke m’ay gelngirad ni dabki yog ni ngar maad’adgad ngog.”​—Ps. 3:6, 7, BT.

¹⁰ David e gathi be’ ni ma fanenikay e girdi’. Got e ra “gechignag” e pi toogor rok. Ke chaariy David fare motochiyel ni pi’ Jehovah ngak piyu Israel ma manang ni ba’ bang riy ni gaar: “I Somol e bayi fulweg taban ngorad ni nge gechignagrad.” (Deut. 17:14, 15, 18; 32:35) Maku ba milfan ngak Got ni nge ‘m’aynag gelngin’ e piin nib kireb. Manang Jehovah ko mini’ e piin nib kireb ya “ma guy e lem ko girdi’.” (1 Sam. 16:7) Ri gad ba felfelan’ ya ke pi’ Got gelngidad ma ki ayuwegdad ni nge pagan’dad ya nge dabi gel Satan ngodad. Dabki n’uw nap’an ma yira kalbusnag min thang.​—1 Pet. 5:8, 9; Rev. 20:1, 2, 7-10.

‘Gel ni Yima Tay e Ma Yib Rok Jehovah’

11. Mang fan ni thingar da meybilgad ni fan ngak pi walagdad u lan e ulung?

¹¹ Manang David ni faanra rib t’uf e ayuw rok ma kemus ni Jehovah e rayog ni nge ayuweg. Machane gathi kemus ni goo birok e pogofan e be lemnag. Ma uw rogon e piin ni kar fel’gad u wan’ Jehovah? Ba puluw e tin tomur e thin ko tang rok David ni gaar: “Gel ni yima tay e ma yib rok Somol - mang e yigi fal’eg waathan e girdi’ rok.” (Ps. 3:8, BT) Riyul’ nib gel e magawon ni yib ngak David, machane ke lemnag e girdi’ rok Jehovah mab mich u wan’ nra tow’athnagrad. Ere gur, gathi kub ga’ fan ni ngaud lemnaged pi walagdad? Thingar dab da paged talin pi walagdad u nap’an ni gad be meybil ma ngad ninged ngak Jehovah ni nge pi’ gelngin nib thothup ngorad ya nge dab ra rusgad ma rayog ni ngar machibnaged fare thin nib fel’ nib pagan’rad.​—Efe. 6:17-20.

12, 13. Mang e ke buch rok Absalom, ma mang e ke rin’ David?

¹² Yam’ ni tay Absalom e rib gel e tamra’ riy, ma re n’ey e be ginang e piin ni yad ma darifannag e girdi’, nib ga’ ni girdi’ ni ke dugliyrad Got ni bod David. (Mu beeg e Proverbs 3:31-35) Kan mahl, me war Absalom nge tirok e girdi’. Nap’an ni be yan u daken reb e mule me mil fare mule u tan ba ke gek’iy nib ga’ ken ma mit piyan lolugen nga fithik’ i papa’ngin fare ke gek’iy. Ma aram ma dabkiyog ni nge mil me yib Joab nge pag dalip e sarey nga ngorongoren nge yim’.​—2 Sam. 18:6-17.

¹³ Gur, ke felfelan’ David u nap’an ni ke nang e n’en ni ke buch rok fak? Danga’. Ya n’en ni rin’ e i yan u baley e singgil nga baley ni be yor ni be gaar: “Absalom ni fakag! Absalom ni fakag! Faan mang e gu wan nga luwam nggum’ ma kab fel’! Absalom ni fakag! Absalom ni fakag.” (2 Sam. 18:24-33) Kemus ni thin ni yog Joab e ke fal’eg laniyan’ David. Rib gel e kireban’ ko n’en ni buch rok Absalom, ke yim’ ya bochan ni ke cham ngak e chitamangin ni en ni ke dugliy Jehovah.​—2 Sam. 19:1-8; Prov. 12:21; 24:21, 22.

Ke Dag David Bayay nrib Mich Got u Wan’

14. Mang e rayog ni nga dogned u murung’agen e thin ni bay ko fa bin 4 e Psalm?

¹⁴ Fa bin 4 e Psalm e reb e meybil rok David ni be micheg nrib mich Jehovah u wan’ ni bod rogon fare meybil rok ko bin 3 e Psalm. (Ps. 3:4; 4:3) Sana ke yoloy David e re tang ney ni fan e nge pining e magar ngak Got ya de yog rok Absalom ni nge fek lon, ara ke yoloy ni be lemnag e pi Levite ni yad ma tang. Demtrug fan ni ke yoloy David e re n’em, ma faanra ngad fal’eged i lemnag e pi thin nem ma rayog ni nge gelnag e michan’ rodad.

15. Mang fan ni rayog ni ngad meybilgad ngak Jehovah u fithik’ e pagan’?

¹⁵ Ke dag David bayay ni kari mich Got u wan’, ma ba pagan’ ngay nra rung’ag e meybil rok. Me yon’ reb e tang ni gaar: “Mu fulweg taban e meybil rog, A Got, ni gur e rungrung rog! Nap’an ni ug moy u fithik’ e oloboch, ma gur e mu ayuwegeg. Mu gol ngog e chiney ma ga rung’ag e meybil rog.” (Ps. 4:1, BT) Ku rayog ni nge pagan’dad ni faan gad ra rin’ e tin nib mat’aw. Bochan ni gad manang ni “Got” e ba mat’aw, ma ma tow’athnag e girdi’ rok nib mat’aw, me ere aram fan ni rayog ni ngad meybilgad ngak u  fithik’ e pagan’ u daken e michan’ rodad ko fare maligach ni ke pi’ Jesus. (John 3:16, 36) Bochan e re n’ey, ma rayog ni nge gapas lanin’dad.

16. Mang fan ni ke mulan’ David?

¹⁶ Yu ngiyal’ ma rayog ni ngad mada’naged e magawon ni ma chuweg e pagan’ rodad. Bay ba ngiyal’ ni ke buch e re n’ey ku David, ya ke yon’ reb e tang ni gaar: “Gimed e girdi’, bu uw n’umngin nap’an ni nga mogned e thin ni kireb ngog? Uw n’umngin nap’an ni nge t’uf romed e n’en ni dariy ban’en nib fel’ ngay ma gimed be lek e n’en de riyul’?” (Ps. 4:2, BT) Fare bugithin ni “girdi’” e be yip’ fan e piin nib kireb. Pi toogor rok David e yad baadag e pi n’en “ni dariy ban’en nib fel’ ngay.” Reb e Bible e kan piliyeg e thin riy ni gaar: “Uw n’umngin nap’an ni nge t’uf rom e lem nde puluw ma ga be gay e pi got ni googsur?” (New International Version) Yugu aram rogon ni ke mulan’dad ni bochan e n’en ni be rin’ boch e girdi’, ma ngad ululgad ngad meybilgad u fithik’ e yul’yul’ ma ngad daged ni kari mich e bin riyul’ e Got u wan’dad.

17. Mu weliy rogon ni ngad ngongolgad nib puluw ko Psalm 4:3.

¹⁷ Michan’ rok David ngak Got e ba tamilang ko thin rok ni gaar: “Mu ted u wan’med ni Somol e ke mel’eg e piin nib mat’aw ni nge mil farad ngak, ma be rung’ag lamag nap’an ni gu ra pining.” (Ps. 4:3, BT) Ba t’uf e athamgil nge michan’ ngak Jehovah ni faanra ngad pared ni gad ba yul’yul’ ngak. Ba t’uf e gal fel’ngin ney ngak girdien reb e tabinaw ko Kristiano ni faanra bay be’ u lan fare tabinaw ni kan tharbog ko ulung. Ma tow’athnag Jehovah e piin ni yad ba yul’yul’ ngak ma yad ma fol ko yaram rok. Maku yul’yul’ nge michan’ ngak Jehovah e ra yognag e felfelan’ ngak e girdi’ rok.​—Ps. 84:11, 12.

18. Rogon nib puluw ko Psalm 4:4, mang e thingar da rin’ed ni faanra ke yog be’ e thin ni kireb ara rin’ ban’en nib kireb ngodad?

¹⁸ Uw rogon ni faanra bay be’ ni ke yog ban’en nib kireb ara rin’ ban’en nra k’aring e damumuw ngodad? Rayog ni ngad pared ni gad ba felfelan’ ni faanra ngad rin’ed e n’en ni be yog David ni gaar: “Ra magawon lanin’med machane dab mu denengad. U nap’an ni gimed ra thig nga chob romed nib math gulungmed.” (Ps. 4:4, NW) Faanra bay be’ ni ke yog e thin nib kireb ngodad ara rin’ ban’en nib kireb ma dab da fulweged taban e kireb. (Rom. 12:17-19) U m’on ni ngad molod ma rayog ni ngad meybilgad ngad weliyed ngak Got e tin ni bay u lanin’dad. Faanra ngad yibilayed e re magawon ney ni ke yib ngodad, ma rayog ni nge thil e lem rodad ma t’ufeg rodad e ra k’aringdad ngad n’aged fan e kireb ni ke rin’ be’. (1 Pet. 4:8) Ba ga’ fan ni ngad lemnaged e fonow ni ke pi’ Paul ni bay rogon ko fare thin ko Psalm 4:4 ni gaar: “Faanra mu damumuwgad, ma dab mpaged e damumuw romed nge fekmed nga fithik’ e denen; ma dab mpired ni gimed ba damumuw nge polo’ reb e rran. Dab mu binged e kanawo’ ngak moonyan’.”​—Efe. 4:26, 27.

19. Fare thin ko Psalm 4:5 e uw rogon nra ayuweg e liyor ni gad ma tay?

¹⁹ Ke yon’ David reb e tang ni be dag nrib ga’ fan ni ngad pagedan’dad ngak Got ni gaar: “Mu pied e maligach nib mat’aw ngak Somol, mi gimed tay e pagan’ romed nga daken.” (Ps. 4:5, BT) Pi maligach ni ke pi’ piyu Israel ngak Got e ra fel’ u wan’ ni faanra ba puluw fan ni kar pied. (Isa. 1:11-17) Ku arrogodad nrayog ni nge fel’ u wan’ Got e liyor ni gad ma tay ni faanra ba puluw fan ni kad rin’ed ma be pagan’dad ngak.​—Mu beeg e Proverbs 3:5, 6; Hebrews 13:15, 16.

20. Mang angin nra yib ngodad ni bochan e ke mich Jehovah u wan’dad?

²⁰ Mi ki ulul David ngay ni gaar: “Me yoor e girdi’ ni nge meybil ni be lungurad: “Somol, kum fal’eg boch waathmad. Mu changar ngomad u  fithik’ e runguy!” (Ps. 4:6, BT) Bochan ni ke mich Jehovah u wan’dad, ma ra runguydad. Ma gad ba felfelan’ ni gad be rin’ e n’en nib m’agan’ ngay mab pagan’dad.

21. Mang e kan micheg ngodad e ngiyal’ ney ni faanra gadad be un ko fare maruwel ni mokun woldug nib mus rogodad riy?

²¹ Ke felfelan’ David ko pi n’en ni bay nga m’on, ere yon’ reb e tang ni gaar: “Felfelan’ ni kam pi’ ngog e ba gel boch ko felfelan’ ni yad ra tay ko urngin e grain nge wain rorad.” (Ps. 4:7, BT) Rayog ni nge michan’dad ni gad ra pirieg e felfelan’ ni faanra ngad uned ko fare maruwel ni mokun woldug. (Luke 10:2) Bochan ni fare nam ni ke gagiyegnag Got ni nge “yoor” e girdi’ riy ni aram e piin ni kan dugliyrad e yad be pow’iydad, ma gad ba felfelan’ ya be yoor i yan ‘girdien e maruwel’ ko mokun woldug. (Isa. 9:3) Riyul’ ni ga be un ko re maruwel ney u rogon nrayog rom, fa?

Um Pigpig nib Mich Got u Wan’um

22. Rogon nib puluw ko Psalm 4:8, mang angin ni yib ngak piyu Israel u nap’an nra pared ni yad be fol ko motochiyel rok Got?

²² Tin tomuren e thin rok David ko re Psalm ney e gaar: “Nap’an ni gu ra thig nga but’, mu rug mol ni gu ba gapas; kemus ni gur Somol, e ga ra ayuwegeg ndabi buch ban’en rog.” (Ps. 4:8, BT) Nap’an ni fol piyu Israel ko motochiyel rok Jehovah me par ni bay e gapas u thilrad Got ma kar pared nib pagan’rad. Ni bod u nap’an e gagiyeg rok Solomon ma “girdi’ u ga’ngin yang u lan yu Judah ngu Israel e ra pired ni de buch ban’en rorad.” (1 Ki. 4:25, BT) Piin ni ke mich Got u wan’rad e kar pared ni yad ba gapas ni yugu aram rogon ni pi nam u toobrad e ur togopuluwgad ngorad. Gad ma mol ni gad ba gapas, ya Got e be ayuwegdad ni bod rogon David.

23. Faanra nge pagan’dad ngak Jehovah, ma mang angin nra yib ngodad?

²³ Ere ngad ululgad ko pigpig ngak Jehovah nib pagan’dad. Maku ngad meybilgad u fithik’ e yul’yul’ ‘ma gapas rok Got ndabi chuchugur ni nge nang e girdi’ fan e ra yororiy gum’ircha’dad.’ (Fil. 4:6, 7) Re n’ey e ra yibnag e felfelan’ ngodad. Rayog ni nge pagan’dad ko tin ni bay nga m’on ni faanra riyul’ nib mich Jehovah u wan’dad.

Uw Rogon ni Ga Ra Fulweg?

• Mang magawon e ke mada’nag David ni bochan Absalom?

• Uw rogon ni ke ayuwegdad e thin ko Psalm 3 ni nge pagan’dad ngak Got?

• Mang boch e kanawo’ nrayog ni nge ayuwegdad e bin aningeg e Psalm ni ngari gel e michan’ rodad ngak Jehovah?

• Uw rogon nra yib angin ngodad ni faanra kari mich Jehovah u wan’dad?

[Study Questions]

[Picture on page 29]

Yugu aram rogon ni ke mil David ni bochan Absalom, ma i par nib pagan’ ngak Jehovah

[Picture on page 32]

Riyul’ ni ma pagan’um ngak Jehovah?