Rogon ni Ke Fanay Jesus e Yafas Rok

“Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu maruweliy.”​—JOHN 4:34.

THIN rok Jesus u roy e be dag e n’en nib ga’ fan ko yafas rok. Jesus nge pi gachalpen e ka ur milekaggad ni kakadbul u lan e pi binaw nu Samaria. (John 4:6) Pi gachalpen Jesus e kar lemnaged ni ke yib e bilig ngak Jesus, ma aram mar pied e ggan ngak. (John 4:31-33) Ma fulweg ni yog Jesus e be dag e n’en nib ga’ fan ko yafas rok. Be m’ug ko thin rok ni kab ga’ fan u wan’ e pigpig ku Got ko ggan. Thin nge ngongol rok e be dag ni ke yib ni nge rin’ e tin nib m’agan’ Got ngay. Ere mang e tin nib m’agan’ Got ngay ni thingari rin’?

▪ Ngan machibnag min fil murung’agen Gil’ilungun Got ngak e Girdi’ Ke weliy e Bible murung’agen e maruwel rok Jesus ni gaar: ‘Me yan Jesus nga gubin yang u Galile, ni be machibnag . . . fare Thin Nib Fel’ ni murung’agen e gagiyeg rok Got.’ (Matthew 4:23) Gathi kemus ni i machibnag Jesus murung’agen Gil’ilungun Got, ya ke fil me weliy fan ngorad. Kenggin e machib ni tay Jesus e murung’agen Gil’ilungun Got.

N’umngin nap’an ni i machib Jesus me weliy ngak e girdi’ murung’agen Gil’ilungun Got nge n’en nra rin’ ni fan ngorad. Mu tay fanam i yan ko pi thin ni baaray u murung’agen Gil’ilungun Got ni aram e thin rok Jesus ni bay u Bible.

▪ Gil’ilungun Got e aram e am rok Got u tharmiy, ma ke dugliy Jehovah Jesus ni nge mang Pilung riy.​—MATTHEW 4:17; JOHN 18:36.

▪ Re Gil’ilungun Got ney e ra thothupnag fithingan Got ma ra lebguy e tin nib m’agan’ ngay u roy u fayleng ni bod rogon u tharmiy.​—MATTHEW 6:9, 10.

▪ U tan Gil’ilungun Got ma yira fal’eg e fayleng ni ga’ngin nge mang paradis.​—LUKE 23:42, 43.

▪ Dabki n’uw nap’an ma ra yib Gil’ilungun Got nge lebguy e tin nib m’agan’ ngay ni fan ko fayleng. a​—MATTHEW 24:3, 7-12.

▪ Ke fal’eg boch e maang’ang Ri yimanang ni Jesus e ir reb e “Tamachib.” (John 13:13) Machane u lan dalip nge baley e duw ni i machib, ma ki fal’eg boch e maang’ang. Pi maang’ang nem e ke tamilangnag l’agruw ban’en. Bin som’on, e ke tamilangnag nriyul’ ni ke l’og Got ke yib. (Matthew 11:2-6) Bin l’agruw, e ke dag e pi n’en nra rin’ Jesus u tan Gil’ilungun Got boch nga m’on. Baaray boch e maang’ang ni ke fal’eg.

▪ Ke mocha’nag e day nge nifeng.​—MARK 4:39-41.

▪ Ke golnag e girdi’ nib m’ar nib muun e piin ni malmit, nge piin ni biling, nge piin ni mugutgut ngay.​—LUKE 7:21, 22.

▪ Ke yoornag e ggan, me duruw’iy e girdi’ ni yoor ni kar m’ad ko bilig.​—MATTHEW 14:17-21; 15:34-38.

▪ Sogonap’an dalip yay ni ke faseg e yam’.​—LUKE 7:11-15; 8:41-55; JOHN 11:38-44.

 Mu susunnag ko uw rogon e par u fayleng u tan e gagiyeg rok reb e Pilung ni aram rogon!

▪ Ke gagiyelnag rarogon Jehovah Got I Jesus Kristus ni fak Got e rib fel’ rogon ni ke fil ngak e girdi’ murung’agen Jehovah. Bochan ni “ir e bin ni m’on i Fak ” Got, ere rib n’uw nap’an ni i par ko Chitamangin u tharmiy ko tin ni ka bay e engel. (Kolose 1:15) Mu lemnag feni rib n’uw nap’an ni ke nang fan laniyan’ e Chitamangin nge n’en nib m’agan’ ngay nge pi motochiyel rok.

Aram fan ni yog Jesus ni gaar: “Dariy be’ ni manang ko mini’ e en ni Fak, ya ke mus ni en ni Chitamangiy e manang, ma dariy be’ ni manang ko mini’ e en ni Chitamangiy, ya ke mus ni en ni Fak e manang, nge piin ni ba adag e en ni Fak nem ni ngar nanged e Chitamangin.” (Luke 10:22) Nap’an ni immoy Jesus u fayleng mab m’agan’ ngay ni nge fil ngak e girdi’ rarogon e Chitamangin. Pi n’en ni ke fil Jesus rok Got ni Th’abi Tolang u nap’an ni immoy u tharmiy e ireray e pi n’en ni ke fil ngak e girdi’.​—John 8:28.

Pi n’en ni ke fil Jesus u murung’agen e Chitamangin u tharmiy e nap’an ni yib nga fayleng me fil ngak e girdi’ u reb e kanawo’ nib mom ni ngar nanged fan.

Baaray l’agruw e kanawo’ nib ga’ fan ni ke fil Jesus murung’agen e Chitamangin riy ngak e girdi’.

▪ Ke fil Jesus ngak e girdi’ murung’agen fithingan e chitamangin, nge tin nib m’agan’ ngay, nge kanawoen.​—JOHN 3:16; 17:6, 26.

▪ Ngongol rok Jesus e rib fel’ rogon ni i m’ug rarogon Jehovah riy. Aram fan nrayog ni nge yog ni gaar: ‘Ga ra guyeg ma ga ra nang rarogon e Chitamag.’​—JOHN 5:19; 14:9.

Gad ma gin nga rogon ni ke fanay Jesus e yafas rok. Rayog ni nge fel’ rogodad riy ni faanra ngad nanged fan ni ke yim’ Jesus ma ngad ngongolgad nib puluw ko n’en ni gad ra fil u murung’agen.

[Footnote]