Bay e Thin nib Fel’ nib T’uf ni Nge Nang Urngin e Girdi’

‘Re Thin ney Nib Fel’ . . . e ir gelngin Got ni nge thapeg e girdi’ ngak.’​—ROM. 1:16.

1, 2. (a) Mang fan ni ga ma machibnag fare “thin nib fel’ ni murung’agen e gagiyeg rok Got”? (b) Mang boch ban’en riy ni ga ma weliy murung’agen ni gubin ngiyal’?

 ‘GU MA felfelan’ ni gu ma weliy fare thin nib fel’ ko girdi’ ni gubin e rran.’ Dabisiy ni kam lemnag ara ka mog ban’en ni aray rogon ba ngiyal’. Bochan ni gur reb e Mich Rok Jehovah, ma ga manang feni ga’ fan ni ngan machibnag e “re thin rok Got ney nib fel’ ni murung’agen e gagiyeg rok.” Ma sana ke mit fare yiiy rok Jesus ngom ni murung’agen e re n’ey, ma rayog ni ngam beeg ndab mu guy.​—Matt. 24:14.

² Ga ra machibnag “fare thin nib fel’ ni murung’agen e gagiyeg rok Got,” ma aram e ga be ulul i rin’ e n’en ni tababnag Jesus. (Mu beeg e Luke 4:43.) Dariy e maruwar riy nreb e ban’en nib ga’ ni ga ma weliy murung’agen e aram e dabki n’uw nap’an ma ra rin’ Got ban’en ko kireb ni be rin’ e girdi’. Nap’an fare “gafgow” nib ga’ ma ra thang e pi yurba’ i teliw ni googsur me chuweg e kireb u fayleng. (Matt. 24:21) Dabisiy ni ka ga ma weliy ko girdi’ ni Gil’ilungun Got e ir e ra paradisnag e fayleng bayay me yibnag e gapas nge felfelan’. Bin riyul’ riy e fare “thin nib fel’ ni murung’agen e gagiyeg rok Got” e bang ko fare thin nib fel’ ni yib rok Got ni i machibnag e babyor nib thothup ngak Abraham “u m’on riy ndawori taw nga nap’an ni baaray ni gaar: ‘U dakenam e bayi fal’eg Got waathan urngin e girdi’ nu fayleng riy.’”​—Gal. 3:8.

3. Mang fan nrayog ni nga dogned ni gagiyelnag apostal Paul murung’agen e thin nib fel’ u lan fare babyor ni Roma?

³ Gur, gathi rayog ni darud tamilangnaged ban’en nib ga’ fan ko fare thin nib fel’ nib t’uf ni nge nang e girdi’? U lan e babyor ni pi’ apostal Paul ngak piyu Roma e kemus ni taab yay ni weliy riy murung’agen e “gagiyeg rok Got” ara Gil’ilungun, machane 12 yay ni fanay fare bugithin ni “thin nib fel’.” (Mu beeg e Roma 14:17. a) Mang ban’en u murung’agen fare thin nib fel’ ni boor yay ni i weliy Paul murung’agen? Mang nrib ga’ fan e re “thin nib fel’” ney? Ma mang fan ni ngaud lemnaged u nap’an ni gad be machibnag ngak e girdi’ fare “thin nib fel’ ni yib rok Got”?​—Mark 1:14; Rom. 15:16; 1 Thess. 2:2.

N’en nib T’uf ko Girdi’ nu Roma

4. Mang e machibnag Paul murung’agen u nap’an e yay ni som’on nni kalbusnag u Roma?

⁴ Ba fel’ ni ngan lemnag e pi n’en ni i weliy Paul murung’agen u nap’an ni immoy u Roma nib kalbus. Kad beeged ni nap’an ni yib boch e Jew ra guyed, ma aram me ‘machibnag ngorad murung’agen e (1) gagiyeg rok Got ma be pithig fan u wan’rad. Me guy rogon ni nge mich murung’agen (2) Jesus u wan’rad.’ Mang e buch nga tomuren? “Ba’ boch i yad ni mich e thin ni ke yog u wun’rad, ma boch i yad e de mich u wun’rad e thin ni ke yog.” Ma nga tomuren ‘ma urngin e girdi’ nra yib ni nge guy Paul ma be felfelan’ ngorad ni kar bad. Mi i machibnag (1) murung’agen e gagiyeg rok Got ma be machibnag murung’agen (2) faanem i Somol Jesus Kristus.’ (Acts 28:17, 23-31) Ere gagiyeg rok Got ara Gil’ilungun e aram e n’en ni i tamilangnag Paul murung’agen. Ku mang ban’en ni i tamilangnag? Ki tamilangnag ban’en nib ga’ fan nga Gil’ilungun Got ni aram e n’en nib milfan ngak Jesus ni fan ko tin nib m’agan’ Got ngay.

5. Mang e tamilangnag Paul u lan fare babyor ni Roma nib t’uf ko girdi’?

 ⁵ Gubin e girdi’ nib t’uf ni ngar nanged murung’agen Jesus me mich u wan’rad. Ireray ban’en ni yog Paul u lan fare babyor ni Roma. Boch nga m’on riy, me yoloy murung’agen ‘fare Got ni be pigpig ngak u polo’ i laniyan’ ni bochan e be machibnag ngak e girdi’ e thin nib fel’ ni yib rok ni murung’agen Fak.’ Miki ulul ngay ni gaar: “Dagur tamra’ ko re thin ney nib fel’ ni murung’agen Jesus, ya ir gelngin Got ni nge thapeg e girdi’ ngak, ni urngin e piin ni ke mich u wan’rad e re thin ney.” Boch nga tomuren me weliy murung’agen e ngiyal’ ni ‘bayi pufthinnag Got u daken Jesus Kristus urngin e tin nib mith ni be lemnag e girdi’, ni bod rogon ni be yog e thin nib fel’ ni yib rok Got, ni ir e be machibnag.’ Ngemu’, miki gaar: “Milekag ni gu tay u Jerusalem nggu mada’ nga Illyrikum e yigoo ku gog riy e thin nib fel’ ni yib rok Got ni murung’agen Kristus.” b (Rom. 1:9, 16; 2:16; 15:19) Ga be lemnag ma mang fan ni i tamilangnag Paul murung’agen Jesus Kristus ngak piyu Roma?

6, 7. Mang e rayog ni nga dogned u murung’agen rogon ni sum fare ulung nu Roma nge piin nra manged girdien?

⁶ Dad nanged ko uw rogon ni sum fare ulung nu Roma. Fapi Jew nge girdi’ ni gathi Jew ni ur moyed u nap’an e Pentekost ko duw ni 33 C.E. nra manged Kristiano e yad e ra sulod nga Roma? (Acts 2:10) Ara fapi Kristiano ni ta fol chuway’ nge piin ni yad ma milekag e yad e ra wereged e tin riyul’ u Roma? Demtrug ko mang e i buch u rom ma nap’an ni yoloy Paul e re ke babyor ney u bang ko 56 C.E., ma ke n’uw nap’an ni ke sum e re ulung nem. (Rom. 1:8) Ba miti mang girdi’ e ur moyed ko re ulung nem?

⁷ Boch i yad e Jew ara girdi’ nu Israel. I pi’ Paul e thin nge yan ngak Andronikus nge Junias me yog ni ‘yad piyu Israel.’ Aquila nge Priscilla ni leengin ni ur moyew u Roma e ku yow l’agruw e Jew. (Rom. 4:1; 9:3, 4; 16:3, 7; Acts 18:2) Machane ku boor e walag ni pi’ Paul e thin nge yan ngorad ni gathi yad e girdi’ nu Israel. Boch i yad e sana yib u “tafen e en ni pilung,” ni sana yad e tapigpig rok Caesar nge ku boch e girdi’ ni yad ma maruwel u tafen e en ni pilung.​—Fil. 4:22; Rom. 1:6; 11:13.

8. Mang magawon e immoy rok piyu Roma nib mo’maw’ ni nge chuw?

⁸ Gubin e Kristiano nu Roma ni immoy ban’en ni i magawonnagrad, maku er rogodad. I weliy Paul murung’agen e re n’em ni gaar: “Ke denen urngin e girdi’, kar pired ni yad mmal’af rok Got ke mul e flaab rok u pa’rad.” (Rom. 3:23) Ba tamilang ni rin’ urngin e piin nra beeged e gi babyor nem ni pi’ Paul e ba t’uf ni ngar nanged ni yad bogi tadenen me mich u wan’rad e n’en ni ke pi’ Got nra chuwegrad ko denen.

 Ba T’uf ni Nge Nang e Girdi’ ni Yad e Tadenen

9. Mang angin fare thin nib fel’ ni rogon ni yog Paul?

⁹ Boch nga tabolngin e gi babyor ni yoloy Paul nem me weliy angin fare thin nib fel’ ni gaar: “Dagur tamra’ ko re thin ney nib fel’ ni murung’agen Jesus, ya ir gelngin Got ni nge thapeg e girdi’ ngak, ni urngin e piin ni ke mich u wan’rad c e re thin ney, ni som’on e ni pi’ ngak piyu Israel, mu kun pi’ ngak e pi nam ni gathi yad piyu Israel.” Arrogon, rayog ni nge thap e girdi’ ngak Got. Machane ba t’uf e michan’ nge n’en ni yog e Habakkuk 2:4 ni gaar: “Piin ni yad mmat’aw e yad ra fos ni bochan e yad ba yul’yul’ ngak Got.” (Rom. 1:16, 17; Gal. 3:11; Heb. 10:38) Machane, mang rogon fare thin nib fel’ ni ir e ma thapegey ngak Got ko fare thin ni be yog ni “ke denen urngin e girdi’”?

10, 11. Mang fan ni boch e girdi’ e manang fan fare thin ni bay ko Roma 3:23 ma boch e girdi’ e dar nanged fan?

¹⁰ U m’on ni nge michan’ be’ ma thingari nang ni ir reb e tadenen. Girdi’ nra ilalgad nib mich Got u wan’rad ma bay buchuuw ban’en u murung’agen e Bible ni yad manang e ba mich u wan’rad e re n’ey. (Mu beeg e Eklesiastes 7:20.) Demtrug ko ba mich u wan’rad ara be maruwar u wan’rad, ma bin nib ga’ fan riy e yad manang fan fare thin ni yog Paul ni gaar: “Ke denen urngin e girdi’.” (Rom. 3:23) Machane nap’an ni gad be machib ma rayog ni ngad mada’naged boch e girdi’ ndar nanged fan e re thin ney.

¹¹ U boch e nam e der ma lemnag e girdi’ riy ni kan gargelegrad ni yad bogi tadenen. Yad manang ni yad ma oloboch, ma bay thibngirad, maku yad ma rin’ boch ban’en nib kireb. Ma yad manang ni ku aray rogon e tin ka bay e girdi’. Machane dar nanged fan ni ma rin’ e girdi’ e pi n’em ni bochan rogon ni kan chuguliyrad. U boch e thin e faan ga ra yog be’ nib tadenen, ma ra lemnag e girdi’ ni ga be yog ni facha’ e ir be’ nib kireb ara be’ ni ke th’ab boch e motochiyel. Ba tamilang ni be’ ni ke ilal u bang ni aray rogon e sana dabi lemnag ni ir reb e tadenen ni rogon e n’en ni yog Paul.

12. Mang fan ni boor e girdi’ nder mich u wan’rad ni urngin e girdi’ nib tadenen?

¹² Mus ko pi nam ni boor e teliw ko pi Kristiano ni googsur riy e boor e girdi’ riy nde mich u wan’rad ni yad e tadenen. Mang fan? Mus ni faanra fin munmun mi yad yan nga galesiya, ma yad ma lemnag ni fare chep u Bible ni murung’agen Adam nge Efa e de riyul’. Ma boch e girdi’ e kar ilalgad u yu yang nde mich ara gathi rib mich Got u wan’ e girdi’ riy. Ba maruwar Got u wan’rad ere dar nanged ni bay Be’ nib Tolang ni ir e ke ngongliy e motochiyel ni fan ko girdi’ ma faanra dab ni fol riy ma wenegan nra yib e denen. Pi girdi’ ney e taareb rogorad ko girdi’ ko bin som’on e chibog u reb e kanawo’, ya yog Paul ‘ndariy ban’en ni ke l’agan’rad ngay’ ma ‘de moy Got rorad.’​—Efe. 2:12.

13, 14. (a) Mang reb i fan ndariy e tawey rok e piin nde mich Got nge denen u wan’rad? (b) Re n’ey e ke k’aring boor e girdi’ ni ngar rin’ed e mang?

¹³ U lan e babyor ni pi’ Paul nga Roma e weliy riy l’agruw i fan ndariy e tawey ko girdi’ ni aray rogon ni ki mada’ ko chiney. Bin som’on i fan e bochan e mich riy ni bay be’ ni ke Sunumiy urngin ban’en. (Mu beeg e Roma 1:19, 20.) Re thin ney e ba puluw nga ban’en ni guy Paul u nap’an ni yol ngak piyu Hebrew u Roma me gaar: “Urngin e naun ma mmudugil ni ba’ be’ ni  ir e toy mi Got e ir e ke sunumeg urngin ban’en.” (Heb. 3:4) Pi thin ney e be dag ni bay be’ ni ir e ke Sunumiy urngin ban’en u ga’ngin e palpalth’ib.

¹⁴ Ere nap’an ni be yol Paul ngak piyu Roma ma bay fan ni nge yog ni piin ni yad ma liyor ko liyos e “dakuriy e tawey rorad nga bayang” nib muun piyu Israel ngay kakrom. Ku er rogon e piin ni kar uned nga boch e ngongol ni puwlag ni gathi aram yalen e par ko pumoon nge ppin. (Rom. 1:22-27) Ere yog Paul ni “piyu Israel nge piin ni gathi yad piyu Israel e yad gubin ni yad ba’ u tan gelngin e denen.”​—Rom. 3:9.

Ban’en ni Be Dag ‘Nriyul’’ e Denen

15. Mini’ e bay e nangan’ rok, ma mang angin?

¹⁵ Fare babyor ni Roma e ku be dag reb i fan nsusun e nge nang e girdi’ ni yad e tadenen mab t’uf ban’en ni nge ayuwegrad ngar chuwgad u fithik’. I yoloy Paul murung’agen fapi motochiyel ni pi’ Got ngak piyu Israel kakrom ni gaar: “Yad be denen ke mang e re Motochiyel nem e be turguy e gechig rorad.” (Rom. 2:12) Ki yog ni girdi’ ko pi nam ara yu ulung i girdi’ ndar nanged e re motochiyel nem e ba ga’ ni ‘yad ma ngongliy e tin ni be yog e re motochiyel nem ni yad e sum u lanin’rad.’ Mang fan ni manang e pi girdi’ ney nib kireb ni nge par l’agruw ni’ ni yow tabinaw, nge mathang fan, nge moro’ro’? I yog Paul ni: Bochan e bay e nangan’ rorad.​—Mu beeg e Roma 2:14, 15.

16. Mang fan nra bay e nangan’ ma gathi be yip’ fan ndabkiyog ni ngan denen?

¹⁶ Yugu demtrug rogon ni bay e nangan’ rodad machane gathi be yip’ fan ni gad ma fol riy. Aram rogon ni buch u Israel kakrom. Yugu aram rogon ni bay e nangan’ rok piyu Israel nge motochiyel ni ke pi’ Got ngorad u murung’agen e nge par be’ nge be’ ni gathi mabgol rok nge moro’ro’, maku yad ma ngongol nib togopluw ko nangan’ rorad nge Motochiyel rok Jehovah. (Rom. 2:21-23) Rib gel e kireb rorad ma yad bogi tadenen nder yog ni ngar folgad ko pi motochiyel rok Got nge tin nib m’agan’ ngay. Re n’ey e ke kirebnag e tha’ u thilrad e En ke Sunmiyrad.​—Lev. 19:11; 20:10; Rom. 3:20.

17. Mang e ra pi’ e athamgil nga lanin’dad ni bay ko fare babyor ni Roma?

¹⁷ N’en ni kad weliyed ko fare babyor ni Roma e be tamilangnag rarogon e girdi’ u wan’ e En ni Gubin Ma Rayog Rok. Machane de museg Paul e thin rok u roy, ya yog fapi thin ni yog David ko Psalm 32:1, 2 ni gaar: “Kari felfelan’ e piin ni ke n’ag Got fan u wan’ e kireb rorad, ni piin ni ke upunguy Got e denen rorad! Kari felfelan’ e en ni denen rok e dab ki ta’ Somol ni malfith rok!” (Rom. 4:7, 8) Arrogon, ke bing Got e kanawo’ nrayog ni nge n’ag fan e denen rodad riy.

Fare Thin nib Fel’ ni Murung’agen Jesus

18, 19. (a) Mang ban’en u murung’agen fare thin nib fel’ nri tamilangnag Paul u Roma? (b) Faanra nge yog e tow’ath ngodad nra yibnag Gil’ilungun Got, ma mang e thingari tamilang u wan’dad?

¹⁸ Sana ra lungum, “Riyul’ ni ereray e thin nib fel’!” Arrogon, ma re n’ey e ku be tamilangnag ban’en ni yog Paul u murung’agen fare thin nib fel’ ni bay ko fare babyor ni Roma. I yoloy Paul ni gaar: “Dagur tamra’ ko re thin ney nib fel’ ni murung’agen Jesus, ya ir gelngin Got ni nge thapeg e girdi’ ngak.”​—Rom. 1:15, 16.

¹⁹ Re thin nib fel’ nem e ba ga’ ni be weliy murung’agen e n’en nib milfan ngak Jesus ko tin nib m’agan’ Got ngay. Rayog ni nge athapeg Paul e “chirofen ni bayi pufthinnag Got u daken Jesus Kristus urngin e tin nib mith ni be lemnag e girdi’, ni bod rogon ni be yog e thin nib fel’ ni yib rok Got.” (Rom. 2:16) Re thin nem ni yog e gathi be achignag fan Gil’ilungun Got ni aram e gin “suwon Kristus nge Got.” (Efe. 5:5) Machane ke yog ni faanra ngad pared u tan Gil’ilungun  Got ma gad felfelan’ ko pi tow’ath nra yibnag ma thingar da nanged (1) ni gad bogi tadenen u p’eowchen Got nge (2) fan nib t’uf ni nge mich Jesus Kristus u wan’dad ni faanra ngan n’ag fan e denen rodad. Nap’an nra nang be’ fan e pi n’em nib m’agan’ Got ngay me nang e athap rok ni fan ko gabul nge langlath, ma aram e rayog ni nge gaar, “Arrogon, ireray e thin nib fel’!”

20, 21. (a) Mang fan ni ngaud lemnaged fare thin nib fel’ ni kan tamilangnag murung’agen u Roma u nap’an ni gad be machib? (b) Mang angin nra yib ngodad?

²⁰ Susun dabda paged talin e re n’ey u nap’an ni gad be machib. I sul Paul u daken e thin rok Isaiah u nap’an ni be weliy murung’agen Jesus ni gaar: “En nra michan’ ngak Kristus e dabi kireban’.” (Rom. 10:11; Isa. 28:16) Piin ni manang buchuuw ban’en ni be yog e Bible u murung’agen e denen e gathi ri yad ra gin u nap’an ni yad ra rung’ag murung’agen Jesus. Machane boch e girdi’ e ba beech e re n’ey u telrad ni bochan e gathi ri yad manang ara ba mich Jesus u wan’ e girdi’ ko gin ni yad ma par riy. Ere nap’an nra mich Got u wan’rad me pagan’rad ko thin nu Bible, ma ra t’uf ni ngad weliyed ngorad e n’en nib milfan ngak Jesus. Bin migid e article e ra weliy e n’en ni be yog e Roma ko guruy ni 5 u murung’agen e re thin nib fel’ ney. Pi n’en ni yira weliy riy e dabisiy nrayog ni ngam fanay u nap’an e machib.

²¹ Rib fel’ ni ngan ayuweg e piin riyul’ ni yad baadag e tin riyul’ ni ngar nanged fan fare thin nib fel’ ni boor yay ni kan weliy murung’agen ko fare babyor ni Roma, ni aram fare thin nib fel’ ni “ir gelngin Got ni nge thapeg e girdi’ ngak, ni urngin e piin ni ke mich u wan’rad.” (Rom. 1:16) Gathi kemus ni yira tow’athnagdad, ya ka gad ra guy boch e girdi’ nra m’agan’rad ko fare thin ni yog Paul ni bay ko Roma 10:15 ni gaar: “Rib manigil e wub ni ke tay e piin ni kar feked i yib e thin nib fel’ ni yib rok Got!”​—Isa. 52:7.

[Footnotes]

Ka Ga Manang?

• Mang ban’en u murung’agen fare thin nib fel’ ni be tamilangnag fare babyor ni Roma?

• Mang e ba t’uf ni ngad ayuweged e girdi’ ngar nanged fan?

• Uw rogon ni yira tow’athnagdad ni bochan “fare thin nib fel’ ni yib rok Got ni murung’agen Kristus”?

[Study Questions]

[Picture on page 12]

Fare thin nib fel’ ni kan tamilangnag ko Roma e ba muun ngay murung’agen e n’en nib milfan ngak Jesus ko tin nib m’agan’ Got ngay

[Picture on page 13]

Gad gubin ni kan gargelegdad ni gad bogi tadenen!