“Nguum Gafaliyed fare Ran’ i Saf ni Got e Ke Pi’ Ngomed”

“Nguum gafaliyed fare ran’ i saf ni Got e ke pi’ ngomed, nguum gafaliyed yad nib m’agan’med ngay nrogon nib m’agan’ Got ngay ni ngam rin’ed, ma gathi nguum rin’ed nde m’agan’med ngay.”​—1 PET. 5:2.

1. Mang boch e magawon ni i mada’nag e piin Kristiano u nap’an ni yoloy Peter e gin som’on e babyor rok nge yan ngorad?

 BA NGIYAL’ u m’on ni nge tabab Nero i gafgownag e pi Kristiano nu Roma, ma aram me yoloy apostal Peter e gin som’on e babyor rok. Baadag ni nge pi’ e athamgil nga laniyan’ e piin taareb e michan’ rorad. Ngiyal’ nem e “yugu be yan” Moonyan’ ni be gay e pi Kristiano ni nge longuyrad. Ere ba t’uf ni ngar ‘tedan’rad’ mar ‘sobut’niged lanin’rad u tan pa’ Got nib gel gelngin’ ya nge yog nra gelgad ngak Moonyan’. (1 Pet. 5:6, 8) Kub t’uf ni ngar pared nib taareban’rad. De fel’ ni ngaur chamgad, ya rayog ni nge kireb e tha’ u thilrad Got nge boch e girdi’.​—Gal. 5:15.

2, 3. Mini’ e susun ni ngad chamgad ngak, ma mang e gad ra weliy ko re article ney nge bin migid?

² Ku aram rogon e magawon rodad e ngiyal’ ney. Ma gay Moonyan’ e kanawo’ ni nge kirebnag e michan’ rodad riy. (Rev. 12:12) Ma dab ki n’uw nap’an me yib fare gafgow nib ga’ ni “kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran.” (Matt. 24:21) Pi Kristiano ko bin som’on e chibog e ba t’uf ni ngar kol ayuwgad ndab ur chamgad, ere ku er rogodad. Yu ngiyal’ e ba t’uf ni nge ayuwegdad e piilal ya nge dabi buch e re n’ey u lan e ulung.

³ Ngad weliyed rogon nrayog ni nge ga’ fan u wan’ e piin piilal e maruwel rorad ni ngaur ayuweged ‘fare ran’ i saf ni Got e ke pi’ ngorad.’ (1 Pet. 5:2) Ngemu’, mu kud weliyed rogon ni ngan rin’ e re maruwel ney nib fel’ rogon. Ma bin migid e article e gad ra weliy riy rogon ni nge tay e ulung fan e ‘piin ni yad be maruwel u fithik’rad, ni piin ni ke mel’egrad Somol ni ngar pow’iyed yad.’ (1 Thess. 5:12) Gad ra rin’ ni aram rogon ma ra ayuwegdad ni ngad togopuluwgad ngak Satan ni ir e Toogor rodad, ya gad manang ni ir e en ni gad be cham ngak.​—Efe. 6:12.

Ngan Ayuweg e Ulung rok Got

4, 5. Susun ni nge uw rogon e pi saf rok Got u wan’ e piin piilal ko ulung? Mu susunnag.

⁴ Ke pi’ Peter e athamgil nga laniyan’ e piin piilal ni Kristiano ko bin som’on e chibog ni ngar lemnaged fare ulung ni kan pag fan ngorad ni bod rogon ni ma lemnagrad Got. (Mu beeg e 1 Peter 5:1, 2.) Yugu aram rogon ni yima tay ni Peter e ir e duga’ ko ulung, machane der ma darifannag e piin piilal, ya ma fonownagrad nder lemnag ni kab tolang ngorad. (Gal. 2:9) Ku aram rogon ni ma fonownag fare Governing Body ara fare Ulung ni Ma Pow’iyey e piin piilal ko ulung ni ngar athamgilgad ngar rin’ed e maruwel rorad ni ngar ayuweged e ulung rok Got.

⁵ I yog apostal Peter ni piin piilal e ngar ‘gafaliyed fare ran’ i saf ni Got e ke pi’ ngorad.’ Ba ga’ fan ni ngar nanged ni ulung e ba milfan ngak Jehovah nge Jesus Kristus. Yad ra weliy ngak Got rogon ni ur ayuweged e saf ara ulung rok. Bod ni faanra ke yog e fager rom ngom ni ngam par ko bitir rok ya nge yan nga bang, ma gathi ga ra ayuweg fapi bitir nib fel’ rogon mu um pi’ garad? Ma faanra ke m’ar bagayad, ma gathi ga ra guy rogon ni nge un ko tafalay? Ere ku er rogon e piin piilal ko ulung ni yad ma ‘par ko galesiya rok Got ni bod e piin ni ma ayuweg e saf, ya girdien e galesiya rok Got e ra manged girdien Got u daken e yam’ ni tay Fak.’ (Acts 20:28) Darur paged talin ni yad gubin ni kar manged girdien Got u daken rachaen Jesus Kristus. Ere bochan ni yad ra weliy ngak Got rogon ni ur ayuweged e ulung rok, ma aram fan  ni yad ma pi’ e tin nib t’uf rorad ko tirok Got ban’en, ma yad ma ayuwegrad.

6. Mang e maruwel ko piin ni yad ma gafaliy e saf kakrom?

⁶ Am lemnag rogon e maruwel ko piin ni yad ma gafaliy e saf kakrom. Thingar ra gafaliyed e saf rorad u taramaen e yal’ ngu fithik’ e garbeb u nap’an ni ke nep’. (Gen. 31:40) Ku yad ma pag fan e yafas rorad ni fan ko saf rorad. Nap’an ni kab pagel David me ayuweg e pi saf rok ya nge dabi li’rad e layon nge bear. Aram fan ni yog David ni ‘thiy pa’ nga k’angan nge li’ ngem’.’ (1 Sam. 17:34, 35) Riyul’ nder rus, ya yugu aram rogon ni ke chugur ni nge k’ad fare gamanman, me rin’ urngin ban’en nrayog rok ya nge ayuweg e saf rok.

7. Uw rogon ni ma ayuweg e piin piilal e pi walag u lan e ulung ni ke war e michan’ rorad?

⁷ Ngiyal’ ney e ba t’uf ni nge kol ayuw e piin piilal ko cham ni be tay Moonyan’ ko ulung ni bod e layon. Re n’ey e ba muun ngay ni ngar ayuweged e pi walag u lan e ulung ni ke war e michan’ rorad ni bod rogon ni ma ayuweg e piin ni yad ma gafaliy e saf e saf rorad ni nge dabi k’ad reb e gamanman. Rayog ni ngar nonad ngak e pi walag ney ni be n’en ni ngar awgad ko wup rok Satan ndar nanged. (Mu beeg e Jude 22, 23.) Riyul’ ndabiyog ni nge rin’ e piin piilal e re n’ey ni faanra dabi ayuwegrad Jehovah. Ere yad ma fanay e Thin rok Got ni ngar ayuweged e pi walag ni ke war e michan’ rorad u fithik’ e sumunguy, ni bod rogon e piin ni yad ma gafaliy e saf ni faanra ke maad’ad e saf rorad ma yad ma tafalaynag e maad’ad rorad.

8. Uw e ma pow’iy e piin piilal e ulung ngay, ma uw rogon?

⁸ Piin ni yad ma gafaliy e saf e yad ma pow’iy e pi saf rorad ko yungi n’en ni boor e pan nge ran riy. Ku er rogon e piin piilal ni yad ma pi’ e athamgil nga laniyan’ e girdi’ u lan e ulung ni ngaur uned ko muulung ni gubin ngiyal’ ya nge yog nra pared ni yad ba gel ko tirok Got ban’en min “pi’ garad ko ngiyal’ ni yima pi’ riy.” (Matt. 24:45) Sana ba t’uf ni nge tay e piin piilal e tayim ni ngar pied e athamgil nga laniyan’ e piin ni ke war e michan’ rorad u fithik’ e sumunguy, ya nge yog ni ayuwegrad e Thin rok Got. Rayog ni be gay be’ rogon ni nge sul ko ulung. Ere susun ndabi k’aring e piin piilal e marus ngak, ya ngar weliyed pi kenggin e motochiyel nu Bible ngak u fithik’ e sumunguy mar ayuweged u rogon ni nge fol riy.

9, 10. Susun ni uw rogon ni nge ayuweg e piin piilal e piin ni kar meewargad ko tirok Got ban’en?

 ⁹ Faanra kam m’ar, ma ba miti mang togta e ga baadag ni nge tafalaynagem? Reb e togta ni gathi rra motoyil ngom ya be gur ni nge pi’ e falay ngom ya ngki guy e bin migid e m’ar? Fa ga baadag ni ngam man nga reb e togta nra motoyil ngom, me weliy ngom e m’ar rom, nge miti tafalay nrayog ni ngam un ngay?

¹⁰ Ku er rogon e piin piilal nrayog ni ngar motoyilgad ko n’en ni be weliy be’ ni ke war e michan’ rok mar ayuweged ko magawon rok ni bod ni ngar ‘liyfed e gapgep nga daken’ u fithingan Jehovah. (Mu beeg e James 5:14, 15.) Thin rok Got e rayog ni nge fal’eg laniyan’ e en ni ke war e michan’ rok, ni bod fare falay ni yib u Gilead. (Jer. 8:22; Ezek. 34:16) Ma faanra fol be’ ko pi kenggin e motochiyel nu Bible ma rayog ni nge ayuweg ni nge dugliy boch ban’en nra ayuweg ni nge pigpig ngak Jehovah bayay u rogon nib m’agan’ ngay. Arrogon, rayog ni nge ayuweg e piin piilal be’ ni ke t’uf e ayuw rok ni faan yad ra motoyil ngak mi yad meybil u taabang.

Gathi Ngaur Rin’ed nde M’agan’rad Ngay, Ya Ngaur Rin’ed nib M’agan’rad Ngay

11. Mang e ma k’aring e piin piilal ni ngar ayuweged e pi saf rok Got nib m’agan’rad ngay?

¹¹ Bin migid me puguran ngak e piin piilal e pi n’en ni ngar rin’ed nge pi n’en ndab ra rin’ed u nap’an ni yad be ayuweg e ulung. Susun ni nge ayuweg e piin piilal e ulung rok Got ‘nib m’agan’rad ngay nrogon nib m’agan’ Got ngay ni ngar rin’ed, ma gathi nguur rin’ed nde m’agan’rad ngay.’ Mang e ma k’aring e piin piilal ni ngar ayuweged pi walagrad nib m’agan’rad ngay? Mang e ke k’aring Peter ni nge ayuweg e pi saf rok Jesus me pi’ e tin nib t’uf rorad? Aram e t’ufeg rok ngak Jesus. (John 21:15-17) Bochan e t’ufeg ni bay ko piin piilal ma aram fan ni ‘darur ngongolgad ni yad be yan nga tabon lanin’rad, machane yad ma ngongol ni yad be yan ngan’ faanem ni ir e ke yim’ ni fan ngorad.’ (2 Kor. 5:14, 15) Re t’ufeg ney ngki chagil ko t’ufeg rorad ngak Got nge pi walagrad e ir e ma k’aring e piin piilal ni ngar athamgilgad, ma yad be fanay e tin ni bay rorad, nge tayim rorad ni fan e ngar pigpiggad ni fan ko ulung rok Got. (Matt. 22:37-39) Yad ma ayuweg e ulung nib m’agan’rad ngay.

12. Uw rogon ni i ayuweg apostal Paul e ulung?

¹² Uw rogon ni nge ayuweg e piin piilal e ulung? Yad ma folwok rok apostal Paul ni bod rogon ni i folwok rok Jesus nga i ayuweg e ulung. (1 Kor. 11:1) Bochan nib t’uf e ulung nu Thessalonika rok Paul nge piin ni ur uned ngak, ma aram fan ni ‘gathi ke mus ni thin nib fel’ ni yib rok Got e ranod ra pied ngorad, machane kur pied yad nga pa’rad ngar ayuweged yad.’ Nap’an ni kar rin’ed e re n’em, ma ke m’ug ni yad ba sumunguy ni bod “feni munguy ba matin ngak pi fak ni be ayuwegrad.” (1 Thess. 2:7, 8) Manang Paul rogon ni ma lemnag reb e matin fak. Demtrug ban’en nra rin’ ni fan ngak nib muun ngay ni nge od ni lukngun e nep’ ni nge duruw’iy.

13. Uw rogon ni nge ayuweg e piin piilal e ulung ndab ra paged talin e maruwel nib milfan ngorad u lan e tabinaw?

¹³ Ba t’uf ni nge gonopiy e piin piilal rogon ni yad be ayuweg e ulung nge tabinaw rorad ya nge dabi magawon reb. (1 Tim. 5:8) Tayim ni ma fanay e piin piilal ni fan ko ulung e susun nrayog ni ngar fanayed ni ngar ayuweged e tabinaw rorad. Ere reb e kanawo’ nrayog ni ngar ayuweged e girdi’ u lan e ulung nge tabinaw rorad e ngar pininged boch e girdi’ u lan e ulung ni ngar uned yu ngiyal’ ko Fol Bible ni Tabinaw ni yad ma tay. Masanao nreb e piilal ko ulung u Sapan e ke yoor e duw ni ma pining boch e walag ni muchugbil nge pi tabinaw ndariy e matam riy ni ngar uned ko fol Bible ni ma tay e tabinaw rok. Ma boch i yad ni ke ayuwegrad e kar manged boch e piilal ma kar folwokgad ko n’en ni ke rin’ Masanao.

Ngar Ayuweged e Ulung ni Gathi Bochan e Nge Yog Ban’en Riy Ngorad

14, 15. (a) Mang fan ni nge kol ayuw e piin piilal ndab ur rin’ed e maruwel rorad ni bochan e nge yog ban’en riy ngorad? (b) Uw rogon ni ngar folwokgad rok Paul ko re n’ey?

¹⁴ Ki pi’ Peter e athamgil nga laniyan’ e piin piilal ni ngar ayuweged e ulung rok Got ni ‘gathi bochan e nge yog ban’en riy ngorad, machane ngar ngongliyed ni fan e ri yad baadag ni ngar pigpiggad ngak Got.’ Ba gel e maruwel ni ma tay e piin piilal, machane darur lemnaged ni ngan pi’  puluwrad riy. I guy Peter nib t’uf ni nge fonownag e piin piilal u murung’agen e ayuw ni yima pi’ ko ulung ni “bochan e nge yog ban’en riy.” Re n’ey e ba gagiyel ko n’en ni ma rin’ e pi tayugang’ ko pi yurba’ i teliw ko “Babylon nib Gilbuguwan,” ni boor ban’en rorad ma tin ni ka bay e girdi’ e yad ba gafgow. (Rev. 18:2, 3) Piin piilal e ngiyal’ ney e ri kub ga’ fan ni ngar kol ayuwgad ko re n’ey.

¹⁵ I dag Paul e kanawo’ nib fel’ ni nge folwok e piin piilal ni Kristiano riy. Yugu aram rogon ni ir reb e apostal nrayog ni nge n’ag e pi Kristiano nu Thessalonika e ‘salpiy nga puluwon,’ machane de ‘pag be’ nge ayuweg nde pi’ puluwon ngak,’ ya i ‘maruwel nib gel nnep’ nge rran’ ni fan ngorad. (2 Thess. 3:8) Boor e piilal e ngiyal’ ney nib muun ngay e piin ni yad ma lekag e ulung ni yad ma rin’ e re n’ey. Yugu aram rogon ni ma gol e pi walag ngorad, machane danir ma ‘n’ag e salpiy nga puluwrad.’​—1 Thess. 2:9.

16. Mang e be yip’ fan ni ngan ayuweg e ulung rok Got ni yi ‘baadag’?

¹⁶ Piin piilal e yad ma ayuweg e ulung ‘ni fan e ri yad ba adag ni ngar pigpiggad ngak Got.’ Re n’ey e ba gagiyel u rogon ni yad ma pag farad ni ngar ayuweged e ulung. Machane re n’ey e gathi be yip’ fan ni yad ma towasariy e girdi’ ni ngar pigpiggad ngak Jehovah, maku darur k’aringed yad ni ngaur tagenginggad ngorad. (Gal. 5:26) Manang e piin piilal nib thilthil e girdi’ u lan e ulung. Ere yad baadag ni ngar ayuweged pi walagrad ni ngar pigpiggad ngak Jehovah ni yad ba felfelan’.

Dab Ra Guyed Rogon ni Ngar Suweyed e Ulung, Machane Ngar Pared nib Fel’ Pangirad

17, 18. (a) Mang fan ni immoy yu ngiyal’ nda i nang e pi apostal rok Jesus fan e pi n’en ni i fil u murung’agen e sobut’an’? (b) Ku mang e magawon ni aray rogon nrayog ni ngad mada’naged e ngiyal’ ney?

¹⁷ Kad weliyed faram ni susun e dabi pagtalin e piin piilal ni ulung ni yad be ayuweg e Got e ba milfan ngak, ma gathi yad. Ere yad ma kol ayuw ndab ra ‘suweyed’ e girdi’ u lan e ulung. (Mu beeg e 1 Peter 5:3.) Immoy yu ngiyal’ ni i luag e pi apostal rok Jesus e liw nib tolang nde puluw fan, ya kemus ni yad baadag ni nge yog e liw nib tolang ngorad ni bod e pi tayugang’ ko nam.​—Mu beeg e Mark 10:42-45.

¹⁸ Ngiyal’ ney, e pi walag ni pumoon ni yad baadag ni ngar uned i “tay murung’agen” girdien e ulung e ba fel’ ni ngar fal’eged i lemnag e bin riyul’ i fan ni yad be nameg e re maruwel ney. (1 Tim. 3:1) Ma piin piilal e chiney e ba fel’ ni ngar fithed yad ko bay e lem rorad ni bod e lem ni immoy rok boch e apostal kakrom ni yad baadag ni nge yog e liw ngorad nib tolang fa danga’. Faanra mus ngak e pi apostal ma immoy e magawon rorad ni aram rogon, me ere ku arrogon e piin piilal nib t’uf ni ngar siyeged e lem ko fayleng ni yi baadag ni nge ga’ lunguy u puluwon boch e girdi’.

19. Mang e susun ndabi pag e piin piilal talin u nap’an ni yad be ayuweg e ulung rok Got?

¹⁹ Riyul’ ni bay yu ngiyal’ nib t’uf ni nge gelnag e piin piilal e thin rorad, nib ga’ nu nap’an ni yad be ayuweg e ulung ko “wolf nib damumuw.” (Acts 20:28-30) I yog Paul ngak Titus ni nge ‘maruwel nga mat’awun ni polo’ ko ngiyal’ ni be pi’ e athamgil nga laniyan’ ma be fonownag e piin ni yad be motoyil ngak.’ (Titus 2:15) Mus ni faanra ba t’uf ni nge pi’ e piilal e fonow nib gel, ma thingar rin’ed u fithik’ e tayfan. Yad manang ni ngongol nib fel’ e kab ga’ angin ma rayog ni nge thilyeg laniyan’ be’ nge sul ko ngongol nib fel’ ko bin ni ngan gathibthibnag.

20. Uw rogon ni nge folwok e piin piilal rok Jesus ngaur daged e ngongol nib fel’?

²⁰ Ngongol nib fel’ ni i rin’ Jesus e ma k’aring e piin piilal ni ngar t’ufeged e ulung rok. (John 13:12-15) Ri gad ma felfelan’ u nap’an ni gad ma beeg murung’agen rogon ni i skulnag pi  gachalpen u rogon ni ngar machibgad mar yognaged boch e girdi’ ni ngar manged boch i gachalpen. Sobut’an’ ni i dag e ke k’aring pi gachalpen ni nge ‘bagayad me sobut’nagan’, ma dabi finey ni ir e ba sorok ngak e tin ni ka bay e girdi’.’ (Fil. 2:3) Piin piilal e ngiyal’ ney e ku yad ma folwok rok Jesus, maku yad baadag ni nga i ‘folwok’ e ulung rorad.

21. Mang tow’ath e rayog ni nge athapeg e piin piilal?

²¹ I museg Peter e fonow ni pi’ ko piin piilal ni aram e weliy murung’agen ban’en ni kan micheg ni fan ko gabul nge langlath. (Mu beeg e 1 Peter 5:4.) Piin ni yad ma yaliy e ulung ni kan dugliyrad e yad ra un ngak Kristus ko gagiyeg u tharmiy ni ke yog ngorad “fare teeliyaw ko flaab ndabi math ramaen biid.” Ma tin ni ka bay e piilal ni yad ba muun nga “yugu boch e saf” e ra yog fare tow’ath ngorad ni ngar ayuweged e girdi’ rok Got u fayleng ni yad ra par u tan e gagiyeg rok e “cha’ ni ir pilungen e piin ni yad ma gafaliy e saf.” (John 10:16) Bin migid e article e yira weliy riy boch e kanawo’ ni rayog ni nge pi’ e girdi’ u lan e ulung e ayuw riy ngak e piin ni kan tayrad ni nga u rogned e thin u lan e ulung.

Ngan Sul u Daken

• Mang fan nib puluw ni nge fonownag Peter e piin piilal ni ngar gafaliyed fare ran’ i saf ni Got e ke pi’ ngorad?

• Uw rogon ni nge ayuweg e piin piilal e pi walag ni ke war e michan’ rorad?

• Mang e ma k’aring e piin piilal ni ngar gafaliyed fare ran’ i saf ni Got e ke pi’ ngorad?

[Study Questions]

[Picture on page 21]

Piin piilal e ngiyal’ ney e thingar ra ayuweged e pi “saf” rok Got ni kan pag fan ngorad ni bod rogon ni i ayuweg e piin ni yad ma gafaliy e saf e saf rorad kakrom