Ma Pagan’um Ngak Jehovah, Fa?

“Ere ngam m’oneged u wan’med e gagiyeg rok Got nge tin nib m’agan’ ngay ni ngam rin’ed, ma aram me pi’ urngin e pi n’ey ngomed.”​—MATT. 6:33.

1, 2. (a) Mini’ e piin ni yad fare “Israel u fithik’ i lanin’rad” ni kan weliy murung’agrad ko Roma 2:29? (b) Mini’ e piin ni yad “fa ragag nge l’agruw i ganong nu Israel” ni kan weliy murung’agrad ko Matthew 19:28?

 NAP’AN ni ga ra beeg fare bugithin ni Israel u lan e Bible, ma mang e ga ra lemnag? Ga ra lemnag Jakob ni fak Isak ni kan thilyeg fithingan ni Israel? Fa ga ra lemnag pi fak ni kar manged fare nam nu Israel kakrom? Maku be weliy e Bible murung’agen fare ‘Israel u fithik’ i lanin’rad’ ni yad fare 144,000 ni kan dugliyrad nga gelngin Got nib thothup ni ngar manged pilung nge prist u tharmiy. (Roma 2:29; Rev. 7:4; 21:12) Machane rogon ni bay ko Matthew 19:28 e kun fanay fare bugithin ni Israel u yugu reb e kanawo’.

² I gaar Jesus: “Ngiyal’ nra par e en ni Fak e Girdi’ riy nga tagil’ u tafen e flaab ko bin nib beech e tamilang ni bay yib, e ku er rogon ni aram e gimed e re ragag nge l’agruw i girdi’ rog nir e bay kum pired nga tagil’med ni ngam gagiyegniged fa ragag nge l’agruw i ganong nu Israel.” U lan e re thin ney ma “fa ragag nge l’agruw i ganong nu Israel” e yad e piin ni ngar pared u paradis u fayleng ni dariy n’umngin nap’an. Ma fare 144,000 e yad ra mang tapuf oloboch nge prist rorad.

3, 4. Mang kanawo’ e be dag e piin ni kan dugliyrad?

³ Piin ni kan dugliyrad e ngiyal’ ney e rib ga’ fan u wan’rad e pigpig ni yad ma tay ngak Jehovah ni bod fapi prist nge pi Levite kakrom. (Num. 18:20) Ma piin ni kan dugliyrad e darur lemnaged ni nge yog boch e binaw ngorad ko re fayleng ney. Thin ni bay ko Revelation 4:10, 11 e be dag ni yad ra ulul ko pigpig ngak Jehovah u tharmiy, mi yad un ngak Jesus ngar manged e pilung nge pi prist.​—Ezek. 44:28.

 ⁴ Nap’an ni ka yad bay u roy u fayleng, ma piin ni kan dugliyrad e thingari m’ug ko ngongol rorad ni be pagan’rad ngak Jehovah. Pigpig ni yad ma tay ngak Got e aram e n’en th’abi ga’ fan u wan’rad. I gaar apostal Peter: “Ngam athamgilgad nge yib fan e pong ni ke tay Got ngomed, nge rogon ni ke mel’egmed nguum pired riy.” (2 Pet. 1:10) Piin ni kan dugliyrad e yad ma fol ko re thin ney, ya ke mich fare biyul ni ke pi’ Kristus u wan’rad ma gubin ngiyal’ ni yad ma folwok rok. Ba thilthil rarogorad nge salap rorad, machane yad ma rin’ e tin rayog rorad ko pigpig ngak Got. Yad ma dag e kanawo’ nib fel’ ngak e piin ni athap rorad e ngar pared u roy u fayleng.

5. (a) Uw rogon ma rayog ni nge pagan’ urngin e piin Kristiano ngak Jehovah? (b) Mang fan nib mo’maw’ e re n’ey?

⁵ Ke yog Jesus ni urngin e Kristiano e ra bagayad ma “thingari pagtalin ir” ma nga i par ni be fol rok. (Matt. 16:24) Bokum milyon e girdi’ ni athap rorad e ngar pared u paradis u fayleng e yad be pigpig ngak Got ma yad be fol rok Kristus ni aray rogon. Faanra rayog rorad ma yad ma yoornag e tayim rorad ni fan ko pigpig ngak Got. Boor i yad e kar paged boor ban’en ni fan e ngar thognaged 70 e awa ni fan ko machib. Boch i yad e ke athamgil ni nge un ko pioneer u lan in e pul u gubin e duw. Boor i yad e dabiyog ni nge un ko pioneer, machane be rin’ e tin nrayog rok. Yad bod Maria ni faani puog e florida nga daken Jesus. Me gaar Jesus: “Ya n’en ni ke rin’ e cha’ nir ngog e rib fel’. . . . Re pin ney e ke rin’ ngog urngin e tin nrayog rok.” (Mark 14:6-8) Ba mo’maw’ ni ngad rin’ed e tin nrayog rodad ko re fayleng ney ni Satan e be gagiyegnag. Ere rib t’uf ni ngad athamgilgad nge pagan’dad ngak Jehovah. Chiney e ngad guyed aningeg e kanawo’ nrayog ni ngad rin’ed e re n’ey riy.

Nge M’on u Wan’um Gil’ilungun Got

6. (a) Uw rogon ma girdi’ nu fayleng e yad be dag ntin nu fayleng ban’en e be pagan’rad ngay? (b) Mang nib fel’ ni ngan folwok rok David?

⁶ Ke fil Jesus ngak pi gachalpen ni nge m’on e gagiyeg rok Got nge tin nib m’agan’ ngay u wan’rad. Girdi’ nu fayleng e ba ga’ ni yad ma m’oneg u wan’rad e tin nib t’uf rorad. Be yog e Bible murung’agen e “piin ni boor ban’en rorad ko biney e tamilang.” (Mu beeg e Psalm 17:1, 13-15, BT.) Pi girdi’ ney e dariy fan Jehovah u wan’rad. Boor i yad e kemus ni yad be lemnag ni nge fel’ rogon e yafas rorad, me yog e tabinaw ngorad, nge rogon ni nge yog boch ban’en ko bitir rorad. David e ba thil ma baadag ni nge “fel’” thilrow Jehovah. Me munmun me Solomon ni fak e ke yog ni gadad gubin ni ngkud rin’ed ni aray rogon. (Ekl. 7:1) Manang David nra ngan m’ag fager ngak Jehovah ma aram e n’en th’abi ga’ fan, ni bod e n’en ni rin’ Asaf. Re n’ey e ke k’aring e felfelan’ ngak David. Boor e Kristiano e ngiyal’ ney e yad be dag ni kub ga’ fan e pigpig ni yad be tay ngak Jehovah ko maruwel ni yad be rin’ ni be yog e salpiy riy ngorad.

7. Mang tow’ath e yog ngak reb e walag ni pumoon ni bochan ni m’oneg Gil’ilungun Got?

⁷ Jean-Claude e reb e piilal ni bay dalip e bitir rok ni yad ma par u Central Africa. Ba mo’maw’ ni ngan pirieg e maruwel ko re nam nem, ma yooren e girdi’ e yad be athamgil ni nge dab ra digeyed e maruwel rorad. Reb e rran me yog e En nib ga’ ko maruwel rok ni nge tabab ko maruwel nnep’. Ra tabab ko maruwel ko 6:30 ni blayal’ ni gubin e rran. Me yog Jean-Claude ko En nib ga’ ko maruwel rok ni gathi kemus ni nge pi’ e tin nib t’uf ko tabinaw rok, ya kub ga’ fan ni nge ayuwegrad nge fel’ e tha’ u thilrad Got. Ki yog nib t’uf ni ngki ayuweg e ulung. Me fulweg e En ni ga’ ko maruwel rok ni gaar: “Faanra ba ga’ fan e maruwel rom u wan’um, ma thingar mu pagtalin urngin ban’en, nib muun ngay e ppin rom, nge bitir rom, nge magawon rom. Kemus ni maruwel rom e ngam lemnag, mag dugliy e n’en ni ngam rin’, teliw fa maruwel rom.” Faan mang e gur, ma mang e ga ra rin’? Manang Jean-Claude ni faanra par ndakuriy e maruwel rok ma Got e ra ayuweg. Ke pi’ Jehovah e tin nib t’uf ko tabinaw rok ere ke un ko muulung.  Tomur riy, ma ke fal’eg rogon ir ni nge yan ko maruwel ni yugu aram rogon nde nang ko ra maruwel fa danga’. Ma aram me telefon be’ ngak, me yog ni faen ga’ ko maruwel e kan taleg. Machane fare walag e dawor ni taleg ko maruwel.

8, 9. Uw rogon nrayog ni ngad boded e pi prist nge pi Levite ni ma pagan’rad ngak Jehovah?

⁸ Boch i gimed e sana bay e magawon rok ni aram rogon. Sana ke magafan’um nga rogon ni ngam ayuweg e tabinaw rom ni faanra kan talegem ko maruwel rom. (1 Tim. 5:8) Machane demtrug ko ke buch rom ban’en ni aram rogon fa dawor ma sana ga manang ni dabi pag Got e piin ni ma pagan’rad ngak, mab m’on e pigpig ni yad be tay ngak u wan’rad. Nap’an ni yog Jesus ngak pi gachalpen ni ngar m’oneged u wan’rad e gagiyeg rok Got, me micheg ngorad nra pi’ Got e tin nib t’uf rorad ni bod e ggan, nge garbod, nge mad.​—Matt. 6:33.

⁹ Mu lemnag e pi Levite ni dariy e f’oth rorad ko binaw. Bochan ni maruwel rorad e yad ma ayuweg e girdi’ u rogon e liyor nib m’agan’ Got ngay, ma thingari pagan’rad ngak Jehovah nra pi’ e tin nib t’uf rorad. (Num. 18:20) Yugu aram rogon ndarud pigpiggad u tempel ni bod e pi prist nge pi Levite, machane ku rayog ni nge pagan’dad ngak Jehovah. Chiney ni gad be chugur i yan ko tomur e rib ga’ fan ni ngari pagan’dad ngak Jehovah nra ayuwegdad.​—Rev. 13:17.

Mm’oneg u Wan’um e Tin Nib M’agan’ Got Ngay

10, 11. Uw rogon ni ke dag boch e girdi’ ni ke pagan’rad ngak Got u nap’an ni kar mel’eged e maruwel? Mu weliy.

¹⁰ Ke yog Jesus ngak pi gachalpen ni ngar m’oneged e tin nib m’agan’ Got ngay. (Matt. 6:33) Re n’ey e be yip’ fan ni ngad folgad u rogon ni ma lemnag Jehovah e tin nib mat’aw nge tin nde mat’aw, ma gathi rogon ni ma lem e girdi’. (Mu beeg e Isaiah 55:8, 9.) Boch e girdi’ e ur yunged e tamagow, ara ur pied ni chuway’, ma boch e yad ma skulnag e girdi’ u rogon ni ngan un ko mahl, ara yad ma fal’eg talin e cham. Machane tomuren ni kar nanged e tin riyul’ ma yooren i yad e kar mel’eged ni ngar thilyeged e maruwel rorad me bung rogorad ni ngar uned ko taufe.​—Isa. 2:4; 2 Kor. 7:1; Gal. 5:14.

¹¹ Aray e n’en ni rin’ Andrew. Nap’an ni kar filew e ppin rok murung’agen Jehovah, mar dugliyew ni ngar pigpiggow ngak. Ri baadag Andrew e maruwel rok machane ke pag. Mang fan? Bochan ni maruwel rok e ba l’ag rogon ko mahl, ma baadag ni nge rin’ e tin nib m’agan’ Jehovah ngay. Nap’an ni digey e maruwel rok, ma l’agruw e bitir rok, ma salpiy ni bay rok e kemus nra gaman riy u lan in e pul. Ke bod e pi Levite ndariy e f’oth rorad ko binaw. Ke pagan’ ngak Jehovah ma aram me yan i gay yugu reb e maruwel. Nap’an ni yad ra lemnag e re magawon nem, ma rayog ni nga rogned nriyul’ e re thin nu Bible ney ni gaar: “Dab mu lemnag ni Somol e kaygi meewar ni nge ayuwegnem fa kari biling nde rung’ag lamam ni ga be ning e ayuw.” (Isa. 59:1, BT) Bochan ni kar lichnagew boch ban’en nga puluwrow, ma aram me yog ni ngar unew ko pioneer. Ke yog Andrew ni yu ngiyal’ e ma magafan’rad ko salpiy, nge gin ni ngan par riy, nge m’ar, ma kar pilibthirgow. Machane gubin ngiyal’ ni ma ayuwegrad Jehovah. Rayog ni nga rogned ni pigpig ni yima tay ngak Jehovah e rib fel’ ma ireray e tow’ath.​—Ekl. 12:13.

12. (a) Mang fel’ngin e ba t’uf ni nge yog ngodad ya nge yog ni m’on e tin nib m’agan’ Got ngay u wan’dad? (b) Mu weliy boch ban’en ni ke buch ko binaw rom.

¹² I yog Jesus ngak pi gachalpen ni gaar: “Faanra ba’ e michan’ romed ngak Got ni bod mam’ungun ba awochngin e mustard, ma rayog  ni nge lungumed ko re burey ney, Mman u roy i iram! ma ra yan. Ma demtrug ban’en ma rayog romed!” (Matt. 17:20) Ga ra m’oneg e tirok Got ban’en ni faanra yib e magawon ngom, fa? Faanra gathi rib tamilang e re n’ey u wan’um, ma ngam non ngak e girdi’ u lan e ulung. Ba mutrug ni faan ga ra nang rogon ni ke ayuwegrad Jehovah, ma ra gelnag e michan’ rom.

Mu Felfelan’ ko Pi N’en ni Ma Pi’ Jehovah

13. Nap’an ni gad ra athamgil ko pigpig ni fan ngak Jehovah, ma mang e ra yog ngodad?

¹³ Faanra ba ga’ fan e pigpig ni ga be tay ngak Jehovah u wan’um, ma rayog ni nge mudugil u wan’um nra pi’ Jehovah urngin ban’en nib t’uf rom ni bod e n’en ni rin’ ngak e pi Levite. Mu lemnag e n’en ni rin’ David ni yugu aram rogon ni i mith u lan e bokngo, ma rib mudugil u wan’ ni Got e ra ayuweg. Ku er rogodad ni ku rayog ni nge mudugil u wan’dad nra ayuwegdad Jehovah ni yugu aram rogon ni gowa dariy be’ nra ayuwegdad. Dab mu pagtalin nap’an ni yan Asaf “nga lan e tempel” me tamilang u wan’ e n’en nra buch rok e piin kireb. (Ps. 73:17) Ku er rogodad nthingari pagan’dad ngak Jehovah nra ayuwegdad nge fel’ e tha’ u thildad ngak. Re n’ey e be dag nib ga’ fan e pigpig rodad ngak u wan’dad ni yugu demtrug e magawon nra yib ngodad. Ere nge pagan’dad ngak Jehovah.

14, 15. Mang e susun ni ngad rin’ed ni faanra ke tamilang fan boch e thin nu Bible, ma mang fan?

¹⁴ Ma pagan’um ngak Jehovah u nap’an nra ayuwegdad ni nge tamilang e “tin nda nnang ni ke m’ay i lemnag rok Got” ko thin rok u Bible? (1 Kor. 2:10-13) Apostal Peter e ke rin’ ni aram rogon, mab fel’ ni ngad folgad rok. I yog Jesus ngak piyu Jew ni gaar: “Faanra dab mu ked e ufin rok e en ni Fak e Girdi’ mi gimed unum rachaen ma dabi yib e yafos nga fithik’med.” Boor pi gachalpen ni kar lemnaged ni be weliy Jesus murung’agen e ufin nge racha’, me lungurad: “Re machib ney e kayigi mo’maw’. Mini’ e ra motoyil ko tiney e thin?” Ma aram “ma boor pi gachalpen nra paged nge dakur uned ngak.” Miki yog Peter ni gaar: “Somol, i mini’ e gamad ra yan ngak? Yi gur e bay fapi thin rom ni ir e ma pi’ e yafos ndariy n’umngin nap’an.”​—John 6:53, 60, 66, 68.

¹⁵ Gathi rib tamilang u wan’ Peter fan e thin ni yog Jesus. Machane i pagan’ ngak Jehovah ni fanay Jesus ni nge ayuweg e girdi’ ngar nanged e tin riyul’. Faanra bay boch ban’en ni kan thilyeg ko machib u lan e ulung rodad e ngiyal’ ney, ma ga ma gay rogon ni nge tamilang u wan’um fan ni kan thilyeg, fa? (Prov. 4:18) Girdi’ nu Berea ko bin som’on e chibog e “kar motoyilgad ko thin rok Got ni kar uthumed telrad ngay, ma gubin e rran ni ur gayed u  lan e babyor nib thothup.” (Acts 17:11) Faan ga ra fol ko n’en ni ur rin’ed ma pigpig ni ga ma tay ngak Got e ra ga’ fan u wan’um, ma riyul’ ni ga ra felfelan’ ni faanra pagan’um ngak Jehovah.

Mabgol ni Ma Tay e Piin ni Girdien Kristus

16. Rogon ni bay ko 1 Korinth 7:39, uw rogon nrayog ko piin Kristiano ni muchugbil ni nge pagan’rad ngak Jehovah?

¹⁶ Reb e kanawo’ nrayog ni nge pagan’ e pi Kristiano ngak Got riy e ngar folgad ko motochiyel rok u Bible ni ngar mabgolgad nrogon ni ma rin’ “girdien Kristus.” (1 Kor. 7:39) Boor e Kristiano ni kar dugliyed ni ngar pared ni yad ba muchugbil ko bin ni ngar th’abed e motochiyel rok Got. Ma ayuweg Got e girdi’ ni aray rogon. Mang e rin’ David u nap’an ni ke thamiy ni gowa dariy be’ ni nge ayuweg? Ke ning e ayuw ngak Jehovah, me yog ni gaar: “Gu fek i yib ngak urngin e tin be magafan’ug ngay; gog ngak urngin e gafgow rog. Nap’an nra yan ni nge mulan’ug, ma manang e tin nthingar gu rin’.” (Ps. 142:1-3, BT) Boor e duw ni i pigpig Jeremiah ngak Jehovah u fithik’ e yul’yul’ nib muchugbil. Dabisiy ni ke thamiy ni gowa dariy be’ ni nge ayuweg.

17. Mang e ke rin’ reb e walag nib pin nib muchugbil u nap’an nra thamiy ni gowa dariy be’ nra ayuweg?

¹⁷ Reb e walag nib pin u Meriken e ke yog ndawori dugliy ni nge par nib muchugbil. Baadag ni nge mabgol ni faanra pirieg be’ nib manigil. Chitiningin ni gathi ir reb e mich rok Jehovah e ri baadag ni nge un e re ppin ni fak nem ko mabgol ni demtrug ko mini’ e ra leay. Ma aram me fith fare walag nib pin ngak e chitiningin ko ra adag ni faanra yan i aw ni ir e kireb rok ni bochan e ke un nga reb e mabgol nib kireb. Machane nap’an ni ke guy e chitiningin nib fel’ e maruwel rok, ma rayog ni nge ayuweg ir, mab felfelan’, ma aram me tal ndaki weliy murung’agen e pi n’em. Bay yu ngiyal’ ni be thamiy fare walag nib pin ni gowa dariy be’ nra ayuweg, me yog ni gaar: “Gu ma guy rogon ni nge pagan’ug ngak Jehovah ma der ma pageg.” Mang e ke ayuweg e re walag nib pin nem ni nge pagan’ ngak Jehovah? Ke yog ni gaar: “Meybil e ke ayuwegeg ni ngu nang ni riyul’ ni bay Got, ma dariy e ngiyal’ ni gu be par ni gowa dariy be’ ni nge ayuwegeg. En th’abi tolang e ma motoyil ngog, ere susun ni nggu felfelan’ ngay ni bay fag.” Ere ke pagan’ ko fare thin nu Bible ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” Ere ke gay rogon ni nge ayuweg boch e girdi’ ma der lemnag ni ngan pi’ ban’en ngak. Miki yog ni gaar: “Nap’an ni gu be lemnag ko mang e rayog ni nggu ayuweg e cha’ ney riy, ma ri gu be felfelan’.” (Acts 20:35) Ke pagan’ ngak Jehovah mab felfelan’ ko pigpig ni be tay ngak.

18. Uw rogon nrayog ni nge milfam ngak Jehovah?

¹⁸ Demtrug e magawon rom, ma rayog ni nge pagan’um ngak Got. Faan ga ra rin’ ni aray rogon, ma rayog ni ngam mang reb e girdi’ rok Got nib felfelan’. (2 Kor. 6:16, 17) Ma aram e rayog ni milfam ngak Jehovah, ni bod e n’en ni rin’ boch e pi tapigpig rok Got kakrom. (Mu beeg e Deuteronomy 32:9, 10.) Bod Piyu Israel kakrom ni ke mil farad ngak Got, ere ku rayog ni mel’egem ni nge milfam ngak, ma ra ayuwegem u fithik’ e t’ufeg.​—Ps. 17:8.

Uw Rogon ni Ga Ra Fulweg?

• Uw rogon nra m’ug ni be pagan’um ngak Jehovah ni faanra ba m’on u wan’um e gagiyeg rok nge tin nib m’agan’ ngay?

• Uw rogon nra m’ug ni be pagan’um ngak Jehovah ni faanra gab felfelan’ ko n’en ni ke pi’ ngom?

• Uw rogon nra m’ug ni be pagan’um ngak Jehovah ni faanra ga be fol ko fare motochiyel ni ngan mabgol u rogon ni ma rin’ girdien Kristus?

[Study Questions]

[Blurb on page 16]

Ra m’ug ni be pagan’dad ngak Jehovah ni faanra rib ga’ fan e pigpig rodad ngak u wan’dad

[Picture on page 17]

N’en ni rin’ Jeremiah e ra pi’ e athamgil nge lanin’dad