Mang e Susun ni nge Fil e Piin Bitir u Murung’agen Got?
Mang e Susun ni nge Fil e Piin Bitir u Murung’agen Got?
“Urngin e thin ni bay u lan e babyor nib thothup e Got e yib i pi’ nga laniyan’ e girdi’ ngar yoloyed nga babyor, me ir e ba ga’ fan ya ma fil e tin nib riyul’ e thin ngodad, ma be yal’uweg e tin ni be oloboch e girdi’ riy, ma be fulweg e girdi’ ko ngongol nib fel’, ma be fonownag e girdi’ u rogon e ngongol ni ngar pired riy ni ir e mmat’aw u mit Got.”—2 TIMOTHY 3:16.
BA T’UF ni ngan fil e tin riyul’ u murung’agen Got ko bitir. Uw e rayog ni ngar filed e tin riyul’ riy? Rayog ni ngar filed u ba ken e babyor ni goo yimanang, ni aram e Bible.
Bible e bod bangi babyor ni yib rok Got. U lan e gi babyor nem e ke tamilangnag Got riy rarogon ma be pow’iy pi fak u rogon e ngongol ni ngaur rin’ed. Mu tay fanam i yan u boch e
machib ni bay ko Bible nge n’en ni yira fil riy ni ki mada’ ko piin bitir.Mang e baadag Got ni ngad nanged u murung’agen?
◼ N’en ni be fil e Bible: “Mang e yugur nanged ni kemus ni gur [Jehovah], ni gur fare tagagiyeg Nib Th’abi Tolang u polo’ e fayleng.”—Psalm 83:18, BT.
N’en ni yira fil riy: Riyul’ ni bay Got ma bay fithingan.
◼ N’en ni be fil e Bible: “Manang [Jehovah] gubin e tafinay rom nge tin ga be ar’arnag, ma faan ga ra sul ngak ma ra rung’ag e meybil rom. Machane faanra mu fek yathin, ma ra n’agem ni manemus.”—1 Kronicles 28:9, BT.
N’en ni yira fil riy: Ma lemnagdad Jehovah ni gad gubin nib muun e bitir ni kab achichig ngay. (Psalm 10:14; 146:9) Baadag ni ngad filed murung’agen.
◼ N’en ni be fil e Bible: “Dab mu gafgowniged e . . . bitir ni ka nim’ rorad. Ya faan gimed ra gafgownagrad, nri yorgad nga lang ngog ni nggu ayuwegrad, me Gag Somol, e gu ra rung’ag lamrad, ma gu ra damumuw, mu gu ra li’med u fithik’ e mahl. Me par leengimed ni dakuriy figirngirad nge pi fakmed ni dakuriy e chitamangirad.”—Exodus 22:22-24, BT.
N’en ni yira fil riy: Ki mada’ ko bitir nib achichig ni ma motoyil Jehovah ko meybil rorad. Rayog ni ngaud nonad ngak ni gubin e rran, ngaud weliyed ngak e pi n’en ni bay u lanin’dad.
◼ N’en ni be fil e Bible: “Ur skengniged Got u bayay nge bayay, nguur amithniged laniyan’ fare Got nib Thothup rok yu Israel.”—Psalm 78:41, BT.
N’en ni yira fil riy: Thin ni gad ma yog nge ngongol rodad e ma rin’ ban’en nga laniyan’ Jehovah. Ere susun ni ngaud lemgad u m’on ni ngad nonad ngu m’on ni ngad rin’ed ban’en.
Susun ni nge uw rogon e ngongol rodad ngak e piin ni gad ba thil?
◼ N’en ni be fil e Bible: “Gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.”—Acts 10:34, 35.
N’en ni yira fil riy: Faanra gubin e girdi’ ni taareb rogorad u wan’ Got, me ere susun dab ud laniyan’gad ngak boch e girdi’ ni bochan raen dowrad ara yaarad.
◼ N’en ni be fil e Bible: “Mu fal’eged rogomed ni gubin ngiyal’ ni ngam pied e fulweg ko n’en nra fith be’ ngomed ni ngam weliyed u murung’agen e re n’en ni ir e ke l’agan’med ngay.”—1 Peter 3:15.
N’en ni yira fil riy: Nap’an ni gad be weliy murung’agen e teliw, ma susun ni ngad weliyed e tin ni ke michan’dad ngay u fithik’ e sumunguy. Ma susun ni ngkud ted fan e piin nib thil e michan’ rodad.
Susun ni nge uw rogon e ngongol rodad ngak chon e tabinaw rodad?
◼ N’en ni be fil e Bible: “Piin ni bitir, thingar um folgad ko thin rok e gallibthir romed ni gubin ngiyal’ nrogon girdien Kristus, ya ereray e n’en ni ba adag Got.”—Kolose 3:20.
N’en ni yira fil riy: Bitir ni ma fol e gathi kemus ni yad be dag nib t’uf rorad e gallabthir rorad, ya ku yad be dag ni yad baadag ni ngar rin’ed e tin nib m’agan’ Got ngay.
◼ N’en ni be fil e Bible: “Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um n’iged fan u wun’med e n’en ni ke rin’ bigimed ngak bigimed ni bod rogon ni ke n’ag Somol fan u wan’ e tin ni kam rin’ed nib togopluw ngak.”—Kolose 3:13.
N’en ni yira fil riy: Bay yu ngiyal’ ni ma kirebnag boch e girdi’ lanin’dad nib muun chon e tabinaw rodad ngay. Machane, faanra gad baadag ni nge n’ag Got fan e kireb rodad, maku thingar ud n’aged fan e kireb rok boch e girdi’ u wan’dad.—Matthew 6:14, 15.
Mang fan ni ngaud yul’yul’gad ma gad sumunguy?
◼ N’en ni be fil e Bible: “Dab ku un lifith l’uguney! Ra be’ ma thingari yog e tin nib riyul’ ngak walagen, ya gadad gubin ni goo gadad yu yang u downgin Kristus.”—Efesus 4:25.
N’en ni yira fil riy: Gad ra yog e tin riyul’, ma aram e gad be folwok rok Got ma gad be felfelan’nag. Machane, faanra ke mecham ngodad ni ngaud lifithed l’ugundad, ma aram e kad boded Moonyan’ ni toogor rok Got ni ir “chitamangin urngin e malulifith.”—John 8:44; Titus 1:2.
◼ N’en ni be fil e Bible: “Mu rin’ed ngak e girdi’ e tin ni gimed ba adag ni ngar rin’ed ngomed.”—Matthew 7:12.
N’en ni yira fil riy: Susun ni ngaud lemnaged laniyan’ chon e tabinaw rodad nge girdi’ u lan binaw nge tin nib t’uf rorad. Gad ra dag e ‘sobut’an’,’ ma ra i sumunguy e girdi’ ngodad.—1 Peter 3:8; Luke 6:38.
Kad filed ni pi n’en ni be fil e Bible e rayog ni nge ayuweg e piin bitir ni ngaur pininged e magar, ma yad be tayfan, ma yad be yan nga laniyan’ e girdi’ u nap’an ni kar ilalgad. Machane, mini’ e susun ni nge fil e pi n’ey ko bitir?