Bay Be’ ni Ir e Be K’aring Urngin e Kireb, Fa?

BOCHAN e cham nib pag rogon ni guy reb e ga’ ko salthaw ko United Nation u Rwanda ko duw ni 1994, me yog ni gowa ke guy Moonyan’ nga owchen. De yog ni ngan taleg e cham ni yibe tay ko re binaw nem ni boor e girdi’ ni be yim’ riy. Ki yog reb e pumoon ni gaar: “Faanra der riyul’ Satan u wan’ be’, ma gamow mada’ nga reb e teliw ko yam’ u Rwanda.” Riyul’ ni Moonyan’ e ir e be gagiyegnag e pi cham ney, fa?

Yooren e girdi’ e darur lemnaged ni pi cham ney ni kaygi pag rogon e bay reb e kan nib kireb ndanir guy ni ir e be k’aring. Maku boch e girdi’ e yad ma lemnag ni pi n’ey e ma buch ni bochan e kireb ni bay u fithik’ i dow e girdi’. Maku boch e girdi’ e yad ma yog ni bay reb e ulung nib flaab e girdi’ riy mab gel lungurad u roy u fayleng ndariy be’ ni manang murung’agen ni kab kafram i yib ni yad be gay rogon ni ngar gagiyegniged e fayleng. Maku bay boch e girdi’ ni ka ron’ed e kireb nga daken e pi am nge piin ni yad be gagiyeg ni bochan e gafgow nge pi n’en nde mat’aw ni yad be guy ni be buch.

Mang e ke mich u wan’um? Mang fan ni kari yoor e kireb, nge cham, nge gafgow u fayleng ni yugu aram rogon ni yibe guy rogon ni ngan lichnag? Mang fan ni gad be sor i yan ko magothgoth nib papey, ma darud motoyilgad ko ginang ni yibe pi’ ngodad? Gur, bay be’ u bang ni ir e be k’aring urngin e kireb, fa? Mini’ e riyul’ ni be gagiyegnag e fayleng? Sana ga ra gin ko fulweg riy.