Fonow nib Fel’ ni Fan Ngak e Piin Muchugbil nge Piin Mabgol

“Gu be yog e re bugithin ney,  . . ya gub adag ni ngam rin’ed e tin nib mat’aw ma ba fel’, mi gimed pi’med ni polo’ ko maruwel rok Somol ni ke puf rogomed.”​—1 KOR. 7:35.

1, 2. Mang fan ni thingar da gayed e fonow u Bible u murung’agen e piin muchugbil nge piin mabgol?

 FELFELAN’, nge magafan’, nge boch ban’en ni ma magawonnag lanin’uy e ba ga’ ni ma mada’nag e piin mabgol. Bochan e pi magawon ney, mab t’uf ni ngaud ninged e ayuw ngak Got ni nge pow’iydad, machane ku boor fan nib t’uf ni nge pow’iydad. Reb e Kristiano ni ke par nib fel’ u wan’ nib muchugbil e sana ra lemnag ni be towasariy chon e tabinaw nge pi fager rok ni nge un ko mabgol. Ma yugu reb e Kristiano e baadag ni nge un ko mabgol, machane dawori pirieg be’ nib fel’ ni nge leay. Ma boch e Kristiano e ba t’uf ni ngan fonownag u rogon ni nge nang e n’en nib milfan ngak u nap’an ni ke un ko mabgol. Ere piin muchugbil nge piin mabgol e ngar kol ayuwgad ni nge dab ra uned ko ngongol ni darngal.

² Pi n’ey e rayog ni nge magawonnag e felfelan’ rodad nge tha’ u thildad Jehovah. U lan e guruy ni 7 ko bin som’on e babyor ni pi’ Paul ngak e ulung nu Korinth e be fonownag e piin muchugbil nge piin mabgol. I lemnag rogon ni nge pi’ e athamgil nga laniyan’ e piin ni yad ra beeg e re ngi babyor nem ni ngar ‘rin’ed e tin nib mat’aw ma ba fel’, mi yad pi’rad ni polo’ ko maruwel rok Somol ni ke puf rogorad.’ (1 Kor. 7:35) Ga ra lemnag e re fonow nem, mag lemnag ni ngam pigpig ngak Jehovah u rogon nrayog rom ndemtrug ko gab muchugbil fa gab mabgol.

N’en Nib Mo’maw’ ni Ngan Dugliy

3, 4. (a) Mang e ra buch ni faanra pi tafager nge chon e tabinaw e ngar towasariyed be’ ni nge un ko mabgol? (b) Uw rogon nra ayuwegdad fare fonow rok Paul u murung’agen e mabgol?

³ Boor e girdi’ e ngiyal’ ney e yad ma lemnag nib ga’ fan ni ngan un ko mabgol ni bod rogon piyu Jew ko bin som’on e chibog. Nap’an nra pag nap’an ndawori un reb e pumoon fa reb e ppin ko mabgol, ma pi fager rok nge chon e tabinaw rok e yad ra lemnag rogon ni nge un ko mabgol. Nap’an ni yad ma sabethin ma yima yog ngak nib fel’ ni nge gay be’ ni nge leay. Rayog ni ngar weliyed murung’agen be’ ngak ni ke bung rogon ni nge un ko mabgol, mar fanayed boch e kanawo’ u rogon nrayog ni nge mada’ fagali cha’ riy. Pi n’ey e rayog ni nge k’aring e tamra’, me kirebnag e tha’ u thilin e girdi’, me kirebnag lanin’rad.

⁴ Paul e da i towasariy e girdi’ ni ngar uned ko mabgol ara ngar pared ni yad ba muchugbil. (1 Kor. 7:7) Ba fel’ u wan’ Paul ni nge pigpig ku Jehovah nib muchugbil, machane ma tayfan e piin ni kar uned ko mabgol. Piin Kristiano e ngiyal’ ney e bay mat’awrad ni ngar dugliyed ko ngar uned ko mabgol fa ngar pared ni yad ba muchugbil. Maku susun e dab da towasariyed be’ ni nge rin’ e re n’ey.

Nge Fel’ Rogom u Nap’an ni Gab Muchugbil

5, 6. Mang fan ni pi’ Paul e athamgil ngak e piin Kristiano ni ngar pared ni yad ba muchugbil?

⁵ Thin rok Paul ngak piyu Korinth e ra ayuwegdad ngad nanged fan ni piin muchugbil e rayog ni ngar pigpiggad ngak Got nib fel’ rogon. (Mu beeg e 1 Korinth 7:8.) Yugu aram rogon nde un Paul ko mabgol ma de lemnag ni kab fel’ ngak e piin ni kar uned ko mabgol ni bod rogon ni ma lemnag boch e tayugang’ ko pi yurba’ i teliw ni googsur. Ke tamilangnag Paul ni piin muchugbil e rayog ni ngar pigpiggad ngak Got u boor e kanawo’ ni yad ba felfelan’. Mang e be yip’ fan e re n’ey?

⁶ Reb e Kristiano nib muchugbil e rayog ni nge  rin’ boor e maruwel ni fan ko tirok Got ban’en ndabiyog ni nge rin’ be’ nib mabgol. I Paul e yog reb e tow’ath ngak ni nge mang “ba apostal ngak e piin ni gathi yad piyu Israel.” (Roma. 11:13) Mu beeg e guruy ni 13 nge mada’ ko guruy ni 20 ko fare babyor ni Acts ni be weliy murung’agen Paul nge piin ni ur uned ngak ko machib u boch e binaw nge rogon ni ur tababnaged boch e ulung ni Kristiano u lan reb e binaw ngu reb. Nap’an ni be rin’ e re maruwel ney, ma boor e magawon ni i mada’nag ni boor i gadad e ngiyal’ ney e dawori mada’nag e magawon ni aram rogon. (2 Kor. 11:23-27, 32, 33) Machane ba m’agan’ Paul ngay ni nge yan u fithik’ e pi magawon nem ya nge yognag boch e girdi’ ngar manged boch pi gachalpen Jesus, ma re n’ey e yibnag e felfelan’ ngak. (1 Thess. 1:2-7, 9; 2:19) Gur, rayog rok Paul ni nge rin’ e re maruwel ney ni faanra ba mabgol ara bay e tabinaw rok? Sana danga’.

7. Mu weliy e n’en ni buch rok l’agruw e walag ni pioneer ndawor ra unew ko mabgol ni kar rin’ew e tin nrayog rorow ni fan ko machib.

⁷ Boor e piin Kristiano nib muchugbil e yad ma rin’ e tin nrayog rorad ni fan ko machib. Sara nge Limbania ni yow l’agruw e pioneer nu Bolivia ndawor ra unew ko mabgol e ranow nga reb e binaw ni ke yoor e duw nda kun machib riy. Gur, bay e magawon ni bochan e dariy e gamig? Mi yow weliy ni lungurow: “Dariy e radio ara TV, ere ba ga’ ni ma beeg e girdi’ e babyor.” Boch e girdi’ ko re binaw nem e ra daged boch e babyor ko fagali walag ni ke n’uw nap’an ni kan pi’ ngorad ma ka yad ma beeg. Nap’an ni yow ma machib u mit e tabinaw, ma ba ga’ ni yow ma mada’nag e girdi’ ni yad baadag ni ngar filed e Bible ere ba n’uw nap’an mfin nra mu’nagew e gin ni ngar machibgow riy. Me yog reb e ppin nib pilibthir ngorow ni gaar: “Dabisiy ni ke chugur e tomur ni bochan e ke taw e Pi Mich Rok Jehovah ko re binaw ney.” Ere de n’uw nap’an me un boch e girdi’ ko fare binaw ko muulung.

8, 9. (a) Mang e lemnag Paul u nap’an ni weliy murung’agen e piin muchugbil? (b) Mang boch e tow’ath ni ma yib ngak e piin Kristiano ndawor ra mabgolgad?

⁸ Dabisiy ni piin Kristiano ni kar mabgolgad e ku ma yib angin e machib ni yad ma tay u boch e binaw nib mo’maw’ e machib riy. Machane ba mom rok e pi walag nib muchugbil ni ngar rin’ed boch e maruwel ko pi walag nib mabgol ma bay e tabinaw rorad. Nap’an ni yol Paul ngak e pi ulung ma manang ni ka boor ban’en ni ngan rin’ ni fan ko fare maruwel ni ngan machibnag fare thin nib fel’. Ere baadag ni nge felfelan’ urngin  e girdi’ ni bod ir. Bochan e re n’ey me yog Paul nib fel’ ni ngan pigpig ngak Jehovah ni yib muchugbil.

⁹ Reb e walag nib pin u Meriken nib muchugbil e yoloy ni gaar: “Boch e girdi’ e ma lemnag ndariy e felfelan’ ni faanra dab ni mabgol. Machane kug guy ni bin riyul’ e felfelan’ ni ma yib ngak be’ e be yan u rogon e tha’ u thilrow Jehovah. Ere muchugbil e aram reb e tow’ath ni faanra ni maruwel ngay nib fel’ rogon.” Be’ ni be par nib muchugbil e aram reb e kanawo’ ni be par nib felfelan’. Miki yoloy ni gaar: “Gu manang ni Jehovah e gubin e girdi’ nib ga’ fan u wan’, ma yad ba t’uf rok.” Re walag nib pin ney e be pigpig u fithik’ e felfelan’ u reb e binaw nib t’uf e ayuw riy. Faanra gur be’ ni gab muchugbil, ma rayog ni ngam rin’ e tin nrayog rom ni ngam ayuweg boch e girdi’ ngar nanged e tin riyul’, fa? Sana ga ra pirieg ni muchugbil e ba tow’ath ni yib rok Jehovah.

Piin Muchugbil ni Yad Baadag ni Ngar Uned ko Mabgol

10, 11. Uw rogon ni ma ayuweg Jehovah e piin ni yad be athapeg ni ngar uned ko mabgol, machane dawor ra pirieged be’ nib manigil?

¹⁰ Tomuren ni ke par boch e tapigpig rok Jehovah nib yul’yul’ ni yad ba muchugbil, ma aram mar dugliyed ni ngar gayed be’ ni nge mang e en mabgol rorad. Bochan ni yad manang nib t’uf be’ ni nge pow’iyrad, mar ninged e ayuw ngak Jehovah ni nge ayuwegrad ni ngar gayed be’ nib manigil.​—Mu beeg e 1 Korinth 7:36.

¹¹ Faanra ga be athapeg ni ngam un ko mabgol ma ngam gay be’ ni baadag ni nge pigpig ngak Jehovah ni bod gur, mag ulul ngam meybil ngak Jehovah u murung’agen e re n’ey. (Filippi. 4:6, 7) Yugu aram rogon ni ga be lemnag ni kam son ni ke n’uw nap’an ma dabi mulan’um. Nge pagan’um ngak Jehovah ya manang e n’en nib t’uf rom, ma ra ayuwegem ni ngam athamgil u fithik’ e pi magawon rom.​—Heb. 13:6.

12. Mang fan nthingari lem reb e Kristiano nib fel’ rogon ni faanra ke yib be’ i yog ngak ni ngar mabgolgow?

¹² Uw rogon ni faanra gur be’ ni ga baadag ni ngam un ko mabgol, me yib be’ nib war e michan’ rok ara be’ nder ma pigpig ngak Jehovah i yog ngom ni ngam mabgolgow? Faanra de fel’ rogon e n’en ni kam dugliy, ma rib gel e kireban’ nra yib ngom ko ngiyal’ ni baaram ndawor mu mabgol. Ma nap’an ni ga ra mabgol ma aram e kam pirew e en mabgol rom u taabang u n’umngin nap’an e yafos romew. (1 Kor. 7:27) Dab mu leay be’ ni bochan e ga be lemnag nri da kum pirieg be’ nrayog ni ngam leay, ya rayog ni nge tomur riy mag kalngan’um.​—Mu beeg e 1 Korinth 7:39.

Ngan Fal’eg Rogoy ni Fan ko Mabgol

13-15. Mang boch e magawon nrayog ni nge sum u tomuren ni ke mabgol l’agruw ni’ nib t’uf ni ngan weliy u m’on riy?

¹³ Yugu aram rogon nib m’agan’ Paul ngay ni nge pigpig ngak Jehovah nib muchugbil, machane de sap nga but’ ngak e piin ni kar dugliyed ni ngar mabgolgad. Baadag Paul ni nge ayuweg e piin mabgol, ma fonow ni yoloy e ra ayuwegrad ni ngar nanged fan e pi n’en nra buch u tomuren ni kan mabgol nge rogon ni nge dabi dar e mabgol.

¹⁴ Boch e girdi’ ni yad be puruy’nag e mabgol e ba t’uf ni ngar yal’uweged e lem rorad ni fan ko gabul nge langlath. Sana yad be lemnag ni adag rorad e yugu ba thil, fa kemus ni goo yad e kar pirieged ban’en ni aram rogon. Nap’an ni yad ra mabgol maku aram rogon ni yad be lemnag ndariy ban’en nra kirebnag e felfelan’ rorad. Biney e lem e de puluw. Fare lem ni um dagew u nap’an ni gimew be puruy’nag e mabgol e ba gel e felfelan’ riy, machane re lem nem e de gaman ni nge ayuweg fagali cha’ ko pi magawon ni ma yib u nap’an ni kar mabgolgow.​—Mu beeg e 1 Korinth 7:28. a

¹⁵ Boor e piin ni kafin ra uned ko mabgol e yad ra gin ngay ara ma kireb lanin’rad u nap’an ni yad ra nang nib thil rogon e lem rok e en ni mabgol rorad u boch ban’en nib ga’ fan. Bod nde m’agan’rad nga rogon ni ngan fanay e salpiy nge rogon e pi n’en ni yima chuweg e chalban ngay, nge gin ni ngan par riy, nge urngin yay ni nga  ranod ra guyed boch e girdi’ rorad. Ere ra bagayad ma bay e n’en ni ma oloboch riy, nrayog ni nge k’aring e damumuw ngak bagayad. Nap’an ni be puruy’nag l’agruw ni’ e mabgol, ma rib ga’ fan ni ngar weliyew murung’agen e pi n’ey, machane faanra dab ni weliy e pi n’ey u m’on, ma nap’an ni kar mabgolgow, ma ra sum e magawon riy.

16. Mang fan thingari taareban’ ba wu’ e mabgol u rogon ni ngar pithigew e pi magawon rorow?

¹⁶ Ra nge yog e felfelan’ nga lan e mabgol, ma ba t’uf ni nge puruy’nag fa wu’ i mabgol murung’agen e pi n’en nib milfan ngorow. Susun e nge taareban’row nga rogon ni ngar llowan’nagew pi fakrow nge rogon ni ngar ayuwegew e gallabthir rorow. Pi magawon ni ma sum u lan reb e tabinaw e susun e dabi dareg l’agruw e mabgol. Ere faanra ngar folgow ko fonow u lan e Bible, ma aram e rayog ni ngar pithigew e pi magawon rorow, mu ur athamgilgow u fithik’ e pi magawon nib mo’maw’ i pithig, me yog ni ngar parew ni yow ba felfelan’.​—1 Kor. 7:10, 11.

17. Mang fan ni piin ni kar mabgolgad e thingar ra ‘tiyan’rad ko tin nu fayleng ban’en’?

¹⁷ I weliy Paul boch murung’agen rogon e piin ni kar mabgolgad ko 1 Korinth 7:32-34. (Mu beeg.) Piin ni kar mabgolgad e yad ma “tiyan’ ko tin nu fayleng ban’en,” ni bod rogon e ggan, nge mad, nge gin ni ngan par riy, nge ku boch ban’en ndariy rogon ko tirok Got. Mang fan ni aray rogon? Nap’an ni kab muchugbil reb e walag ni pumoon ma sana boor e tayim ni i fanay ko pigpig ngak Jehovah. Machane nap’an ni un ko mabgol ma ba t’uf ni thingari fanay boch e tayim ni fan e nge ayuweg e ppin rok. Maku er rogon fare pin ni ngki ayuweg e pumoon rok. Manang Jehovah ni fa wu’ i mabgol e yow baadag ni ngaur felfelan’agew yow. Maku manang ni nap’an ni kar mabgolgow ma ke lich e tayim nrayog ni ngar fanayew ko pigpig ngak, ya ba t’uf ni ngar gelnagew e tha’ u thilrow.

18. Mang boch ban’en nib t’uf ni nge yarmiy ba wu’ e mabgol ni fan ko pi n’en ni yima felfelan’ ngay?

¹⁸ Machane uw rogon ni i fanay fa wu’ i mabgol  e tayim rorow ko pi n’en ni yima felfelan’ ngay u nap’an ni ka yow ba muchugbil? Faanra ba t’uf rok ba wu’ e mabgol ni ngar fanayew e tayim nge gelngirow ni ur pigpiggow ngak Jehovah ni fan e ngar gelnagew e tha’ u thilrow, ma ere ku er rogon nib t’uf ni ngar lichnagew e tayim ni yow ma fanay ko pi n’en ni yima felfelan’ ngay. Uw rogon e lem rok fa en leengiy ni faanra fare pumoon rok e yugu yad ma yan e pi fager rok nga boch e gosgos? Ara uw rogon nra lemnag fare pumoon ni faanra fare ppin rok e yugu ma tay e tayim ni ngaur rin’ed e pi fager rok boch ban’en u taabang? Ere fare wu’ i mabgol e dabisiy nra munmun mi yow lemnag darur t’ufegew yow. Rayog ni ngan siyeg e re n’ey ni faanra piin ni kar mabgolgad e ngar rin’ed urngin ban’en ni fan e nge yog ni gel e tha’ u thilrad.​—Efe. 5:31.

Baadag Jehovah ni Nge Beech e Ngongol

19, 20. (a) Mang fan ni piin ni kar mabgolgad e ba t’uf ni ngar kol ayuwgad ni nge dab ra uned ko ngongol ndarngal? (b) Mang magawon e ma sum u thilin e piin ni mabgol nra bagayad ma be par u bang?

¹⁹ Pi tapigpig rok Jehovah e yad ma rin’ urngin e tin nrayog rorad ni ngar pared ni yad ba beech. Boch i yad e ke dugliy ni nge un ko mabgol ni fan e nge dabi un ko ngongol ndarngal. Ma be’ ni aray rogon e ba t’uf ni ngki kol ayuw. Kakrom e girdi’ ni ur pared u lan e mach ni bay e yoror riy e dabiyog ni nge buch ban’en rorad. Faanra yan be’ nga wuru’ fare mach ma rayog ni nge buch ban’en rok. Ku er rogon e piin ni kar mabgolgad ni ngar ayuweged yad ko ngongol ndarngal ni faan yad ra fol ko motochiyel rok Jehovah.

²⁰ Ke tamilangnag Paul ko 1 Korinth 7:2-5 ni bay e gin ni nge mus e piin ni mabgol riy. Ra ba wu’ e mabgol ma kemus ni goo yow e rayog ni ngaur parew. Ma dabiyog ni nge par bagayow nge be’ ni gathi mabgol rok. Ere ra bagayow ma thingari pi’ “ir” ngak bagayow. Machane bay boch e piin figirngiy nge piin leengiy nra bagayad ma be par u bang, ara ke fek e matal rok ko maruwel, fa ra bagayow ma gin ni ma maruwel riy. Ere ke mo’maw’ ni nge bagayow me pi’ “ir” ngak bagayow. Am lemnag e magawon nra sum ni faanra ‘dakiyog rok bagayow ni nge k’adan’,’ ma aram e ra munmun me un bagayow ko ngongol ndarngal. Ma tow’athnag Jehovah e piin lolugen e tabinaw ni yad ma pi’ e tin nib t’uf ko tabinaw rorad maku yad be guy rogon ni nge dabi kireb e mabgol rorad.​—Ps. 37:25.

Angin ni Ma Yib ni Faanra ni Fol ko Fonow nu Bible

21. (a) Mang fan nib mo’maw’ ni ngan dugliy e pi n’en ni bay rogon ko ngan par ni yib muchugbil nge ngan un ko mabgol? (b)  Uw rogon nrayog ni nge ayuwegdad fare fonow ni bay ko 1 Korinth ko guruy ni 7?

²¹ Pi n’en ni ngan dugliy u murung’agen e muchugbil nge mabgol e rib gel e mo’maw’ riy. Bochan e dawor da flontgad ma ra sum boor e magawon. Ere yugu aram rogon ma ra tow’athnag Jehovah e piin ni yad ra fol ko pi motochiyel rok, ma yu ngiyal’ e ra i kireban’rad nga boch ban’en nra i buch u lan e yafos rorad. Faan ga ra fol ko fare fonow ko 1 Korinth ko guruy ni 7, ma ra ayuwegem ni ngam siyeg fapi magawon ni kad weliyed murung’agen. Ere yugu demtrug ko gab muchugbil ara gab mabgol, ma rayog ni ngam felfelan’nag Jehovah. (Mu beeg e 1 Korinth 7:37, 38.) Bin th’abi ga’ e tow’ath ni bay rodad e ngad fel’gad u wan’ Jehovah. Bochan e re n’ey, ma ngam athamgil ngam ulul ngam nameg e yafos u lan e bin beech e m’ag ni bay yib. Ma ngiyal’ nem e dabki mada’nag e pumoon nge ppin e magawon ni bod e ngiyal’ ney.

[Footnote]

Rayog ni Ngam Fulweg?

• Mang fan ndab ni towasariy be’ ni nge un ko mabgol?

• Uw rogon nrayog ni ngam fanay e tayim rom nib fel’ rogon ko pigpig ngak Jehovah u nap’an ni gab muchugbil?

• Uw rogon me yog rok l’agruw ni’ ni yow be puruy’nag e mabgol ni ngar fal’egew rogorow ni fan ko magawon nra sum u nap’an ni kan mabgol?

• Mang fan ni piin mabgol e ba t’uf ni ngar ayuweged yad ko ngongol ndarngal?

[Study Questions]

[Picture on page 16]

Ma felfelan’ e piin ni yad ba muchugbil ni yad ma fanay e tayim rorad ni fan ko tirok Got ban’en

[Picture on page 18]

Mang boch ban’en ni ngan dugliy u tomuren ni kan mabgol?