Nge Pagan’um ngak Jehovah ni Ir “Fare Got ni Ma Fal’eg Lanin’uy”

“Ngad pininged e magar ngak Got ni Chitamangin e Somol rodad i Jesus Kristus, me ir e Chitamangiy nrib tarunguy e girdi’, ni ir fare Got ni ma fal’eg lanin’uy!”​—2 KOR. 1:3, NW.

1. Mang e ba t’uf rok urngin e girdi’?

 N’UMNGIN nap’an e yafas rodad mab t’uf ni ngaun fal’eg lanin’dad. Bitir e ra t’uf ni ngan fal’eg laniyan’, me yor. Ma yor ya sana baadag ni ngan dibey, fa ke yib e bilig ngak. Ku ra ke ilal bagadad, ma bay yu ngiyal’ nib t’uf ni ngan fal’eg laniyan’. Ba ga’ ni ma buch ni aray rogon ni faanra ke yib reb e magawon nib gel ngodad.

2. Mang e ke micheg Jehovah ngak e piin ni be pagan’rad ngak?

² Chon e tabinaw nge fager rodad e rayog ni ngar fal’eged lanin’dad u boch ban’en. Machane, bay boch e magawon ni ma yib ngodad ndabiyog ni ngar fal’eged lanin’dad riy. Kemus ni goo Got e rayog ni nge fal’eg lanin’dad ni yugu demtrug feni gel e magawon ni ke yib ngodad. Ke micheg e Bible ni gaar: “Ba chugur ngak urngin e piin ni yad ma non ngak, . . . ma rung’ag e tin yad ma wenignag ngak.” (Ps. 145:18, 19) Arrogon, Jehovah e “ma matanagiy e piin ni yad mmat’aw, ma ma motoyil ngorad ko tin ni yad ma wenignag ngak.” (Ps. 34:15) Machane, faanra nge ayuwegdad Got me fal’eg lanin’dad, ma thingari pagan’dad ngak. I tamilangnag David e re n’em ko tang rok ni gaar: “Somol e manaf rok e piin yibe gafgownagrad, ni aram gil’ e ayuw ko ngal’an e gafgow. Somol, piin ni yad manangem e ra pagan’rad ngom; cha’ nra yib ngom e ri dab mu n’ag.”​—Ps. 9:9, 10, BT.

3. Uw rogon ni tamilangnag Jesus gelngin e t’ufeg rok Jehovah ngak e girdi’ rok?

³ Pi tapigpig rok Jehovah e rib ga’ farad u wan’. I tamilangnag Jesus e re n’ey u nap’an ni gaar: “Gathi yira pi’ nchuway’ lal fa nochi arche’ ni sparrow fithingan ma ke mus ni l’agruw e salpiy nrow puluwon? Machane dariy taa bagayad ni ke pag Got talin. Mus nga piyan lolugmed ni ke m’ay i theeg. Ere dab mu rusgad, ya ka ba ga’ famed ngak boor fa nochi arche’ ni sparrow fithingan!” (Luke 12:6, 7) I non Jehovah ngak e girdi’ rok kakrom u daken Jeremiah ni profet ni gaar: “Yug gubin ngiyal’ ni ug par ni gimed ba t’uf rog, ere bay ug par ni gu be dag ngomed ni gimed ba t’uf rog.”​—Jer. 31:3.

4. Mang fan nrayog ni nge pagan’dad ko pi n’en ni ke micheg Jehovah?

⁴ Faanra pagan’dad ngak Jehovah nge pi n’en ni ke micheg, ma rayog ni nge fel’ lanin’dad u nap’an ni ke kireban’dad. Susun ni nge pagan’dad ngak Got ni bod rogon Joshua ni faani gaar: “Urngin e tin ni micheg [Jehovah] e goo ke rin’ ni rogon; dariy reb ni pag.” (Josh. 23:14) Maku reb e demtrug feni gel e kireban’ ni kad ted ni bochan e magawon nib gel ni ke yib ngodad, ma rayog ni nge pagan’dad ni “Got e dabi thiliyeg e tin ni ke yog nra rin’” ma dabi pag e pi tapigpig rok ni yad ba yul’yul’.​—Mu beeg e 1 Korinth 10:13.

5. Mang e ke rin’ ma rayog ni ngad fal’eged laniyan’ boch e girdi’?

⁵ I yog apostal Paul ni Jehovah e “ir fare Got ni ma fal’eg lanin’uy.” (Mu beeg e 2 Korinth 1:3, 4.) Chitamangidad nu tharmiy e dariy e gin nra mus gelngin riy. Ere demtrug gelngin e kireban’ ni ke tay e piin ni yad ma t’ufeg, ma rayog ni nge fal’eg lanin’rad. Nap’an nra fal’eg Got lanin’dad, maku rayog ni ngad fal’eged  laniyan’ pi walagdad u ‘urngin e gafgow nge kireban’ ni ma yib ngorad.’ Dariy be’ nrayog ni nge fal’eg lanin’dad ni bod Jehovah!

Rogon ni Ngan Gel ko Pi N’en ni Ma K’aring e Kireban’

6. Mang boch ban’en ni ma gafgownag laniyan’ e girdi’?

⁶ Boor ban’en nib t’uf ni ngan fal’eg lanin’dad riy. Reb e ban’en nri ma gafgownag laniyan’ e girdi’ e baaray ni ke yim’ be’ nib t’uf rorad, nib ga’ ni en mabgol rorad ara bitir rorad. Ku bay boch e girdi’ nib t’uf ni ngan fal’eg lanin’rad ni bochan e yibe laniyan’ ngorad, maku boch e girdi’ e kar m’argad, ara kar pilibthirgad, ara yad ba gafgow, ara be gafgow lanin’rad ni bochan e kireb ni be buch u fayleng.

7. (a) Mang e ba t’uf rodad u nap’an ni ke kireban’dad? (b) Mang e rayog ni nge rin’ Jehovah ngak e piin ni ke “mulan’rad”?

⁷ Nap’an nra yib e magawon ngodad, ma boor e kanawo’ ni gad ma gafgow riy. Rayog ni nge gafgow lanin’dad, nge tafinay rodad, nge rarogon e lem rodad, maku rayog ni nge k’aring e m’ar ngodad, me warnag e michan’ rodad. Am lemnag rogon nra gafgow lanin’dad. Be yog e Bible nrayog ni nge ‘mulan’dad.’ (Ps. 34:18, BT) Kemus ni Jehovah e rayog ni nge fal’eg lanin’dad, ya ir e ma ‘golnag laniyan’ e piin ke kireban’rad me taflaynag e maad’ad rorad.’ (Ps. 147:3) Mus ko ngiyal’ ni ke yib e magawon ngodad nrib gel, ma rayog ni nge fal’eg Got lanin’dad ni faan gad ra meybil ngak u fithik’ e michan’, ma gad fol ko pi motochiyel rok.​—Mu beeg e 1 John 3:19-22; 5:14, 15.

8. Uw rogon nrayog ni nge ayuwegdad Jehovah ko ngiyal’ ni ke kireb e tafinay rodad?

⁸ Bochan ni boor mit e magawon ni ma yib ngodad, ma bay yu ngiyal’ ni ma kireb e tafinay rodad. Ba mudugil ndabiyog ni ngad gelgad ko pi skeng ney u gelngidad. I tang fare psalmist ni gaar: “Yu ngiyal’ ni der paslagan’ug ma ke magafan’ug, ma ga fal’eg lanin’ug nggu felan’.” (Ps. 94:19, BT) Miki yoloy Paul ni gaar: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Fil. 4:6, 7) Gad ra beeg e Bible ma gad fal’eg i lemnag e thin riy, ma rayog ni nge ayuwegdad.​—2 Tim. 3:15-17.

9. Mang e rayog ni ngad rin’ed u nap’an ni ke kireb e lem rodad?

⁹ Yu ngiyal’ e ma mulan’dad, mu ud pared ni ke kireb e lem rodad. Sana gad ra lemnag ndabiyog ni ngad rin’ed e tin ni baadag Jehovah ni ngad rin’ed, ara dabiyog ni ngad rin’ed e tin nib milfan ngodad u lan e ulung. Machane, ireray e ngiyal’ nrayog ni nge ayuwegdad Jehovah. Baaray rogon nrayog ni ngan susunnag: Nap’an ni yog Jehovah ngak Joshua ni nge pow’iy fare nam nu Israel ngar gelgad ko pi nam ni toogor rorad, me gaar Moses ngak fapi girdi’: “Mpired ni gimed ba gel ma damur rusgad. Dab mu tamdaggad ngorad. Ya Got romed, ni aram Somol e bayi un ngomed; dabi pagmed ngam wargad ara n’agmed.” (Deut. 31:6) Ke yog rok Joshua ni nge pow’iy e girdi’ rok Got nga lan fare Nam ni Kan Micheg, mar gelgad ko toogor rorad. Ku aram rogon ni ayuweg Got Moses u nap’an ni yad bay e girdi’ rok ko fare Red Sea.​—Ex. 14:13, 14, 29-31.

10. Faanra magawon rodad e be k’aring e m’ar ngodad, ma mang e rayog ni nge ayuwegdad?

¹⁰ Magawon nib gel e rayog ni nge k’aring e m’ar ngodad. Ba t’uf ni ngam koy e ggan nib fel’ nga fithik’ i dowam, ma nga i gaman e toffan rom, ma ga be rin’ boch ban’en nib chamag ngom, mu um par ni gab beech nge tabinaw rom. Ma faan ku gad ra lemnag e athap rodad ni bay u Bible, ma rayog ni nge ayuwegdad. Ere faanra ke gafgow lanin’dad ni bochan e magawon ara skeng nib gel ni ke yib ngodad, mab fel’ ni ngad lemnaged e n’en ni buch rok Paul nge n’en ni yog nra pi’ e athamgil nga lanin’uy ni gaar: “Pire’ yay ni ke ingmad e gafgow ke pir’iymad u gubin yang, machane da gu masengsenggad; yu ngiyal’ e bay n’en ma da ku gu nanged e n’en ni nggu rin’ed, machane der  mulan’mad; pire’ e girdi’ ni be togopluw ngomad, machane dariy ba ngiyal’ ndariy taabe’ ni fager romad; ba gel e maad’ad ni yibe tay ngomad yu ngiyal’, machane dawor nthang e fan romad.”​—2 Kor. 4:8, 9. 

11. Mang e ngad rin’ed ni faanra kad guyed ni be war e michan’ rodad?

¹¹ Bay boch e skeng ni ma warnag e michan’ rodad. Machane rayog ni nge ayuwegdad Jehovah. Ke micheg e Bible ni gaar: “Ma ayuweg urngin e piin ke yib e gafgow ngorad; ma pi’ e athamgil nga laniyan’ e piin ke mulan’rad.” (Ps. 145:14) Faanra kad guyed ni ke war e michan’ rodad, ma ngad ninged e ayuw ngak e piin piilal. (Jas. 5:14, 15) Ma faanra ud lemnaged e athap rodad ko yafas ni manemus ni bay u Bible, ma rayog ni nge ayuwegdad u nap’an ni kad mada’naged boch e magawon ni be skengnag e michan’ rodad.​—John 17:3.

Boch e Girdi’ ni i Fal’eg Got Lanin’rad

12. Mu weliy rogon ni fal’eg Jehovah laniyan’ Abraham.

¹² Kan thagthagnag nga laniyan’ reb e psalmist ni nge yoloy ni gaar: “Mu lemnag e michmich ni mu tay ngog, I gag e tapigpig rom; ya ke pi’ e l’agan’ ngog. Mus u fithik’ e gafgow rog mab aw e gapas u lanin’ug ni bochan e n’en ni mmicheg e ke pi’ e yafos ngog.” (Ps. 119:49, 50, BT) Ngiyal’ ney e bay e Thin rok Jehovah ni ke m’ay i yoloy ni aram e Bible ni be weliy murung’agen boch e tapigpig rok ni i fal’eg lanin’rad. Bod ni kireban’ Abraham u nap’an ni nang ni bayi thang Jehovah fare nam nu Sodom nge Gomorrah. I fith ngak Got ni gaar: “Mog, ngari mu chagiy e piin ndawor ra ngongliyed e kireb ngak e piin ni kar ngongliyed e kireb ngam thang e fan rorad?” I fal’eg Jehovah laniyan’ Abraham, me yog ngak ni faanra pirieg 50 e girdi’ u rom ndarir ngongliyed e kireb, ma dabi thang yu Sodom. Miki fith Abraham Jehovah lal yay ni gaar: Ma uw rogon ni faanra kemus ni 45 e girdi’ riy ndarir ngongliyed e kireb? Ara 40? ara 30? ara 20? ara 10? I gum’an’nag Jehovah ir, me yog ngak Abraham ni faanra bay ragag e girdi’ u Sodom ndarir ngongliyed e kireb, ma dabi kirebnag e re binaw nem. Yugu aram rogon nde gaman ragag e girdi’ nib fel’ ko re binaw nem, machane ke ayuweg Jehovah Lot nge fa gal rugod ni fak.​—Gen. 18:22-32; 19:15, 16, 26.

13. Uw rogon ni m’ug ni be pagan’ Hannah ngak Jehovah?

¹³ Hannah ni leengin Elkanah e ke yim’ ni bochan ni nge fakay reb e bitir. Machane, kari kireban’, ya der diyen. Ere ke yibilay e magawon rok ngak Jehovah, ma aram me yog Eli ni ir e Th’abi Tolang ko Prist ni gaar: “Got rok piyu Israel e nge pi’ ngom e tin ni ga be wenignag ngak.” Ke fel’ laniyan’ Hannah ma aram me “chuw e kireban’ rok.” (1 Sam. 1:8, 17, 18) Kari  pagan’ Hannah ngak Jehovah, me pag fan e magawon rok ngak. Ki gapas laniyan’ ni yugu aram rogon nde nang ko mang e ra buch. Faani taw nga nap’an, me fulweg Jehovah taban e meybil rok, ma aram me diyen nge gargeleg bochi pagel, me tunguy Samuel ngak.​—1 Sam. 1:20.

14. Mang fan ni t’uf rok David ni ngan fal’eg laniyan’, me mini’ e ning e ayuw ngak?

¹⁴ David ni Pilung nu Israel kakrom e ku ir be’ ni fal’eg Got laniyan’ ba ngiyal’. Jehovah e ma guy e “gum’ircha’.” Ere nap’an ni mel’eg David ni nge mang pilung nu Israel, ma manang ni baadag ni nge rin’ e tin nib mat’aw, mab yul’yul’ ko pigpig ni be tay. (1 Sam. 16:7, BT; 2 Sam. 5:10) Machane, boch nga tomuren me par David nge Beth-sheba ni leengin be’, me makathnag ni ngan li’ figirngin ya nge mith e denen rok. Nap’an ni nang David feni ubchiya’ e denen rok, me meybil ngak Jehovah ni gaar: “Mu chuweg e denen rog, ya ba ga’ e runguy rom! Mmaluknigeg nge chuw urngin e kireb rog, ma ga chuweg e denen rog ngam machalbognigeg! Kug nang e kireb rog; gubin ngiyal’ ni gu manang e denen rog.” (Ps. 51:1-3) Kari kal David ngan’, me n’ag Jehovah fan e denen rok. Machane, thingari gafgow ni bochan wenegan e denen rok. (2 Sam. 12:9-12) Yugu aram rogon ma i par ni ke gapas laniyan’ ni bochan e runguy rok Jehovah.

15. Mang ayuw e pi’ Jehovah ngak Jesus u m’on ni nge yim’?

¹⁵ Nap’an ni immoy Jesus u fayleng, ma boor e skeng ni i yib ngak. Machane, ke pag Got ni nge yan u fithik’ e pi skeng nem. Yugu aram rogon ma i par Jesus nib yul’yul’. Ir be’ nib flont ma ma pagan’ ngak Jehovah ma i tayfan mat’awun e gagiyeg Rok. U m’on nni yognag ni ngan li’ nge yim’, me meybil ngak Jehovah ni gaar: “Gathi tin nib m’agan’ug ngay e ngam rin’, ya tin nib m’agan’um ngay.” Ma aram me m’ug reb e engel ngak nge pi’ gelngin. (Luke 22:42, 43) I fal’eg Got laniyan’ Jesus, me pi’ gelngin, me ayuweg ko ngiyal’ ni ke t’uf e ayuw rok.

16. Uw rogon nrayog ni nge ayuwegdad Got ni faanra ke par e yafas rodad nga thatharen e riya’ ni bochan e michan’ rodad?

¹⁶ Mus ni faanra ke par e yafas rodad nga thatharen e riya’ ni bochan e michan’ rodad, ma ra ayuwegdad Jehovah ni ngad pared ni gad ba yul’yul’. Fare athap ko fas ko yam’ e ma fal’eg lanin’dad. Ma gad be athapeg e ngiyal’ nra chuw e “bin th’abi tomur e toogor” ni aram e yam’. (1 Kor. 15:26) Pi tapigpig rok Got ni yad ba yul’yul’ ni kar m’ad, nge ku boch e girdi’, e yad ra fas ko yam’ ni bochan e yad bay u laniyan’ Jehovah, ma dabi pagtilrad. (John 5:28, 29; Acts 24:15) Ra pagan’dad ko fas ko yam’ ni ke micheg Jehovah, ma aram e rayog ni ngad pared nib fel’ lanin’dad, mab mudugilan’dad u nap’an ni yibe gafgownagdad.

17. Uw rogon nra fal’eg Jehovah lanin’dad u nap’an ni ke yim’ be’ nib t’uf rodad?

¹⁷ Faan gad ra lemnag e athap rok e piin nib t’uf rodad ni kar m’ad, ma ri ma fel’ lanin’dad. Ma rib tow’ath fare ulung nib ga’ “ni pire’ ni pire’” girdien ni yad ra magey ni yad ba fas u tomuren ni kan thang e re m’ag nib kireb ney, ma yad ra mada’nag e piin ni yira fasegrad ko yam’, mar skulnaged yad!​—Rev. 7:9, 10.

Pa’ Got ni Bayi Par e Ir e Be Ayuwegdad

18, 19. Uw rogon ni ke par boch e tapigpig rok Got nib fel’ lanin’rad u nap’an ni yibe gafgownagrad?

¹⁸ I tunguy Moses ni profet reb e tang ni nge pi’ gelngin piyu Israel me fal’eg lanin’rad ni gaar: “Ka faram i yib ni be par Got ni ir e yoror romed, pa’ ni bay i par ni manemus e be ayuwegmed ngay.” (Deut. 33:27) Boch nga tomuren, me yog Samuel ni profet ngak piyu Israel ni gaar: “Dab mu pied keru’med ngak Somol, ya nguum rin’ed e tin nib m’agan’ ngay u polo’ i lanin’med. . . . Got e ke micheg ndabi n’agmed,  ya ke dugliy u wan’ ni nge ta’med ni gimed girdien.” (1 Sam. 12:20-22) N’umngin nap’an ni gad be par ni gad ba yul’yul’ ngak Jehovah, ma dabi pagdad ya ra i ayuwegdad.

¹⁹ Be ayuweg Got e girdi’ rok, ma be fal’eg lanin’rad ko ngiyal’ ney ko tin tomuren e rran ni ke mo’maw’ e par. Ke yoor e duw ni yibe gafgownag boch e walag, ma yibe kalbusnagrad ni bochan e yad be pigpig ngak Jehovah. Pi n’en ni ke buch rorad e be micheg ni ma fal’eg Jehovah laniyan’ e pi tapigpig rok u nap’an ni ke yib e skeng ngorad. Immoy reb e walag u Soviet Union nni kalbusnag u lan 23 e duw ni bochan e michan’ rok. Ma nap’an ni immoy u kalbus, ma immoy boch e babyor rodad ni bay e thin nu Bible riy ni i beeg ma i pi’ gelngin ma be fal’eg laniyan’. I gaar: “Nap’an e pi duw nem mu gu nang rogon ni ngaug par ni be pagan’ug ngak Jehovah, ma i pi’ gelngig.”​—Mu beeg e 1 Peter 5:6, 7. 

20. Mang fan nrayog ni nge pagan’dad ndabi pagdad Jehovah?

²⁰ Demtrug e miti magawon ni gad ma mada’nag ma dab da paged talin e thin ni yog fare psalmist ni gaar: “I Somol e dabi n’ag e girdi’ rok.” (Ps. 94:14, BT) Yugu aram rogon ni bay yu ngiyal’ nib t’uf ni ngan fal’eg lanin’dad, machane ku rayog ni ngad fal’eged laniyan’ yugu boch e girdi’. Bin migid e article e gad ra weliy riy rogon nrayog ni ngad fal’eged laniyan’ e piin ni yad be gafgow u lan e re fayleng nib kireb ney.

Uw Rogon ni Ga Ra Fulweg?

• Mang boch ban’en nrayog ni nge k’aring e kireban’ ngodad?

• Uw rogon ni ma fal’eg Jehovah laniyan’ e pi tapigpig rok?

• Mang e rayog ni nge fal’eg lanin’dad ko ngiyal’ ni ke par e yafas rodad nga thatharen e riya’?

[Study Questions]

[Box/​Picture on page 26]

ROGON NI NGAN ATHAMGIL U FITHIK’ E PI N’EN NRAYOG NI NGE . . .

▪ gafgownag lanin’uy Ps. 147:3; 1 John 3:19-22; 5:14, 15

▪ gafgownag e tafinay Ps. 94:19; Fil. 4:6, 7

▪ gafgownag rarogon e lem Ex. 14:13, 14; Deut. 31:6

▪ k’aring e m’ar 2 Kor. 4:8, 9

▪ warnag e michan’ Ps. 145:14; Jas. 5:14, 15