Ngan Ayuweg e Pi Walag ni Pumoon ni Ngar Nameged Boch e Maruwel

“Gubin e girdi’ ni yibe skulnagrad e faanra mu’nag bagayad e skul ni yibe tay ngak, ma aram e ke bod rogon e cha’ ni ir e be skulnag.”​—LUKE 6:40.

1. Uw rogon ni skulnag ma be yarmiy Jesus boch e tamachib u nap’an ni immoy u fayleng?

 U TUNGUN e Gospel rok apostal John e yoloy ni gaar: “Ka boor boch ban’en ni rin’ Jesus, ni faan mang e yigoo ni yoloy nga babyor ntataareb, ma wun’ug e dabi taw ngaray nga fayleng urngin e re babyor nem ni yira yoloy.” (John 21:25) Ba gel e maruwel ni i tay Jesus ko chi ngiyal’ ni baaram ni immoy u fayleng. Ngiyal’ nem e ba t’uf ni nge gay boch e pumoon ni nge skulnagrad ni ngar ululgad ko re maruwel nem u tomuren ni ke sul nga tharmiy. Nap’an e duw ni 33 C.E. ma ke mu’ i skulnag bochi ulung i girdi’, machane mar yoorgad nib papey ngar manged ba ulung i tamachib ni yad bokum biyu’.​—Acts 2:41, 42; 4:4; 6:7.

2, 3. (a) Mang fan nib t’uf ni nge nameg e walag ni pumoon boch e maruwel u lan e ulung? (b) Mang e yira weliy ko re article ney?

² Bochan ni ke pag medlip milyon e girdi’ ni yad be machibnag fare thin nib fel’ u boor ko 100,000 e ulung u ga’ngin yang e fayleng e ngiyal’ ney, ma aram fan nib t’uf boch e walag ni pumoon ni ngar ayuweged e ulung. Bod nib t’uf boch e walag ni ngar manged piilal ko ulung. Piin ni yad be nameg e re maruwel ney e rib fel’ e n’en ni yad be rin’, ya yad be “nameg reb e maruwel ni ir e ba th’abi fel’.”​—1 Tim. 3:1.

 ³ Machane, bay boch ban’en nib t’uf ni nge rin’ reb e walag ni pumoon mfini yog ni ngan pag fan boch e maruwel ngak u lan e ulung. Skul, ara salap, ara tin nrayog rok be’ e gathi aram e n’en nra ayuweg nge yog e re maruwel ney ngak. Faanra nge pigpig reb e walag ni pumoon ni aray rogon, ma thingari puluw e ngongol rok ko pi n’en ni be yog e Bible nib t’uf ni nge rin’ be’ ni be nameg boch e maruwel u lan e ulung. Ere uw rogon nrayog ni ngan ayuweg e pi walag ni pumoon u lan e ulung ni ngar mon’oggad ko tirok Got ban’en me yog e pi maruwel ney ngorad? I gaar Jesus: “Gubin e girdi’ ni yibe skulnagrad e faanra mu’nag bagayad e skul ni yibe tay ngak, ma aram e ke bod rogon e cha’ ni ir e be skulnag.” (Luke 6:40) U lan e re article ney e gad ra weliy riy boch e kanawo’ ni ayuweg Jesus Kristus ni fare Sensey Nth’abi Fel’ pi gachalpen ni nge milfan boch e maruwel ngorad. Maku gad ra weliy boch ban’en ni gad ra fil ko n’en ni rin’.

“Nggog ni Gimed e Tafager Rog”

4. Uw rogon ni dag Jesus ni ir e bin riyul’ e fager rok pi gachalpen?

⁴ Da i lemnag Jesus ni kab fel’ ngak pi gachalpen, ya yad e fager rok. I par rorad, ma i pagan’ ngorad, ma i ‘weliy ngorad urngin e tin ni ke rung’ag rok e Chitamangin.’ (Mu beeg e John 15:15.) Am lemnag gelngin e felfelan’ nra ted u nap’an ni fulweg Jesus fare deer rorad ni: “Mang e pow ko ngiyal’ ni ga bay nge ngiyal’ ni ke chugur nga tomuren e re m’ag ney?” (Matt. 24:3, 4, NW) Ku ma weliy laniyan’ ngorad. Bod ni fare nep’ nni yognag me fek Peter, nge James, nge John nga lan fa gi milay’ nu Gethsemane, mu rom e i meybil riy ni kari magawon laniyan’. Dabisiy nde nang fa dalip i apostal e n’en ni be yibilay Jesus, machane kar nanged ni kari magafan’ nib gel. (Mark 14:33-38) Kum lemnag rogon lanin’rad ko fa ngiyal’ nem ni thil yaan Jesus. (Mark 9:2-8; 2 Pet. 1:16-18) Tha’ nrib fel’ ni immoy u thilin Jesus nge pi gachalpen e ir e pi’ gelngirad ni ngar ululgad i rin’ e maruwel ni kan pi’ ngorad.

5. Uw rogon ni ma ayuweg e piin piilal boch e girdi’?

⁵ Piin piilal ni Kristiano e ngiyal’ ney e yad ma ayuweg pi walagrad, ma yad baadag ni ngar manged fager rorad ni bod rogon Jesus. Yad ba t’uf rorad ma yad ma dag ngorad ni yad ma lemnagrad. Yu ngiyal’ e bay boch ban’en ni ma buch ndabiyog ni nge yog e piin piilal. Machane yad ma weliy ngak pi walagrad e pi n’en ni kar filed ko Thin rok Got. Darur lemnaged ni kab ga’ farad ngak e pi ministerial servant ni yad bbitir ngorad. Yad manang ni pi walag ney e kar mon’oggad ko tin riyul’, ma ka yad be mon’og i yan. Yad manang nib t’uf Jehovah rorad, ma yad be rin’ reb e maruwel nib ga’ fan ni fan ko ulung.

“Kug Dag Ngomed e N’en ni Nguum Rin’ed”

6, 7. Mu weliy rogon ni dag Jesus e kanawo’ nib fel’ ngak pi gachalpen nge angin ni yib ngorad.

⁶ Yugu aram rogon nib ga’ fan e tirok Got ban’en u wan’ pi gachalpen Jesus, ma yu ngiyal’ e i magawon lanin’rad ni bochan rogon nni chuguliyrad nge yalen rorad. (Matt. 19:9, 10; Luke 9:46-48; John 4:27) Machane da i puwan’ Jesus ngorad fe damumuw ngorad. Ku der ma yog ngorad ni ngar rin’ed ban’en ndabiyog rorad fe yog ban’en ni ngar rin’ed me rin’ ban’en ni yugu ba thil. Ere, ma fil ban’en ngorad ko ngongol rok nib fel’.​—Mu beeg e John 13:15.

⁷ Uw rogon ni dag Jesus ngak pi gachalpen rogon ni ngaur folwokgad rok? (1 Pet. 2:21) De yoornag pa’ nga puluwon ya nge yog ni yoor e tayim rok ni fan ko machib. (Luke 9:58) Jesus e manang e gin ni nge mus riy ma i fanay e thin nu Bible u nap’an ni i machib. (John 5:19; 17:14, 17) Ba mom ni ngan non ngak mab gol. Gubin ban’en ni i rin’ u fithik’ e t’ufeg. (Matt. 19:13-15; John 15:12) Ngongol rok Jesus nib fel’ e yib angin ngak e pi apostal rok. Bod rogon James nde rus ma i pigpig ngak Got nge mada’ ko ngiyal’ nni li’ nge yim’. (Acts 12:1, 2) John e i lek luwan ay Jesus nib yul’yul’ nib pag 60 e duw.​—Rev. 1:1, 2, 9.

8. Mang ngongol nib fel’ e ma dag e piin piilal nrayog ni nge folwok e piin pagel riy nge yugu boch e girdi’?

⁸ Piin piilal ni yad ma pag farad, ma yad ba sobut’an’, ma yad ma t’ufegey e yad ma dag e kanawo’ nib fel’ ni nge folwok e piin pagel riy. (1 Pet. 5:2, 3) Maku reb e, piin piilal e yad ba felfelan’ nrayog ni nge folwok e pi walag ni pumoon ko michan’ rorad, nge rogon ni yad ma fil ban’en ko  girdi’, nge rogon e par rorad ni yad e Kristiano, nge rogon ni yad ma machib.​—Heb. 13:7.

‘Jesus e L’ograd, Me Yog Boch Ban’en ni Ngar Rin’ed’

9. Uw rogon ni kad nanged ni skulnag Jesus pi gachalpen ni fan ko fare maruwel ni machib?

⁹ Tomuren ni ke machib Jesus u lan l’agruw e duw nib pasig, ma aram me l’og fa 12 i apostal rok ni nga ranod ko machib. Machane, som’on e bay boch ban’en ni yog ngorad ni ngar rin’ed. (Matt. 10:5-14) Maku nap’an ni be n’en ni nge ngongliy e maang’ang ni nge duruw’iy bokum biyu’ e girdi’, me yog ngak pi gachalpen rogon ni baadag ni ngan yarmiy fapi girdi’ ni kar muulunggad, nge rogon ni ngan f’oth fapi ggan u dakenrad. (Luke 9:12-17) Ere ba tamilang ni i fil ngak pi gachalpen e n’en ni ngar rin’ed nge rogon ni ngar rin’ed. Bochan e pi n’en ni i fil Jesus ngorad, nge ayuw ni i yib ngorad u daken gelngin Got nib thothup, ma aram mar yarmiyed ba maruwel nib gel ni ngan tay ni fan ko machib ni tabab ko duw ni 33 C.E.

10, 11. Uw rogon ni nge skulnag e piin piilal nge ku boch e walag u lan e ulung e pi walag ni pumoon ni ngar rin’ed boch e maruwel u lan e ulung?

¹⁰ Ngiyal’ ney e yima skulnag reb e pumoon u nap’an ni yira tabab i fil e Bible ngak. Sana ba t’uf ni ngan ayuweg ni nge salap ko beeg babyor. Nap’an ni gad ra ulul i fil e Bible ngak, maku boor e kanawo’ nrayog ni ngad ayuweged riy. Ma nap’an nra tabab ni nga i un ko muulung, ma aram e rayog ni nge nang e n’en nib t’uf ni nge rin’ me un i pi’ e welthin u nap’an e muulung me mang reb e publisher. Tomuren ni ke un ko taufe, ma aram e rayog ni ngan skulnag u boch e kanawo’, ni bod ni nge pi’ e ayuw u boch e maruwel ni yima tay ni fan ko Kingdom Hall. Ra munmun ma rayog ni ngan ayuweg ni nge nang e n’en nib t’uf ni nge rin’ me yog ni nge mang reb e ministerial servant.

¹¹ Nap’an nra pi’ e piin piilal reb e maruwel ngak reb e walag ni pumoon maku yad baadag ni ngar ayuweged u rogon ni nge rin’. Yad ma weliy rogon ni yima rin’ e re maruwel ney, mi yad yog ngak e tin nib t’uf ni nge rin’. Fare walag ni yibe skulnag e thingari nang ko mang e nge rin’. Faanra ba mo’maw’ rok ni nge rin’ e n’en ni ka nog ngak ma dabi gur e piin piilal ngar lemnaged ndabiyog rok e re maruwel nem, ya ngar weliyed ngak e n’en nib t’uf ni nge rin’ nge rogon ni nge rin’. Ri ma felfelan’ e piin piilal ni ngar ayuweged reb e walag ni pumoon ni nge rin’ e maruwel ni kan pag fan ngak, ya yad manang nra rin’ boch ban’en ni fan ngak boch e girdi’, ma ra yibnag e felfelan’ ngak.​—Acts 20:35.

“Ba Tafinay Nni Weliy nib Fel’ Rogon nge Tamilangan’uy Riy”

12. Mang fan ni bay angin e fonow ni pi’ Jesus?

¹² Reb e kanawo’ ni i skulnag Jesus pi gachalpen riy e aram e i pi’ e fonow nib m’ag ko tin nib t’uf rorad. Bod nnap’an ni yog James nge John ni yow baadag ni ngar piningew e nifiy nge yib u tharmiy nga but’ nge li’ fapi girdi’ nu Samaria ni dubrad ni ngar ayuweged Jesus, me chel Jesus nge puwan’ ngorow. (Luke 9:52-55) Ma nap’an ni yib e chitiningrow i yog ngak Jesus ni nge tay tagil’row ko gagiyeg rok, me non Jesus ngak fa gal walag ni gaar: “Dariy mat’awug ni nggu dugliy e en ni nge par nga ba’ ni mat’aw nge en ni nge par nga ba’ ni gilay’ rog. Ya gali yang i n’ey e tagil’ e gali cha’ ni ke ngongliy e Chitamag rogon ni ngar tagil’iyew.” (Matt. 20:20-23) Gubin e fonow ni ma pi’ Jesus, mab tamilang, mab puluw, ma ke fek ko pi kenggin e motochiyel nu Bible. Ma i fil ngak pi gachalpen rogon ni ngaur fal’eged i lemnag e pi kenggin e motochiyel nem ma ur ngongolgad nib puluw ngay. (Matt. 17:24-27) Ku manang Jesus ni bay boch ban’en ndabiyog rok pi gachalpen. Ere da i lemnag ni ngar rin’ed gubin ban’en nib fel’ rogon. I fonownagrad ni bochan e ri yad ba t’uf rok.​—John 13:1.

13, 14. (a) Mini’ e ba t’uf ni ngan fonownag? (b) Mu weliy boch ban’en nrayog ni nge fonownag e piin piilal reb e walag ni pumoon riy.

¹³ Gubin e pumoon ni yad be nameg reb e maruwel u lan e ulung ni Kristiano e bay yu ngiyal’ nib t’uf ni ngan fonownagrad. Be gaar e Proverbs 12:15, BT: “Girdi’ nib gonop e yad ma motoyil ko fonow.” I yog reb e walag ni kab pagel ni gaar: “Kug pirieg nreb e magawon rog nib ga’ e gu ma lemnag ndab gu fel’ ni nggu un i ayuweg e ulung. Machane, fonow ni pi’ reb e piilal ngog e ir e thilyeg e lem rog.”

 ¹⁴ Faanra ke guy e piin piilal ni bay boch ban’en ni be taleg reb e walag ni pumoon nder mon’og, ma yad ra guy rogon ni ngar ayuweged u fithik’ e sumunguy. (Gal. 6:1) Ku bay yu ngiyal’ nib t’uf ni nge fonownag e piin piilal be’ ni nge thilyeg boch ban’en ko ngongol rok. Bod ni faanra kar guyed ni gathi rib pasig ko machib ma rayog ni nga nog ngak ni Jesus e ba pasig ko machib ma ke tay chilen ngak pi gachalpen ni ngar pingeged boch e girdi’ ngar manged pi gachalpen. (Matt. 28:19, 20; Luke 8:1) Faanra bay reb e walag ni baadag ni nge ga’ fan ko tin ka bay e girdi’ ma rayog ni nge yog e piin piilal ngak ni yog Jesus ngak pi gachalpen ni dab ra lemnaged ni yad ba tolang ko tin ni ka bay e girdi’. (Luke 22:24-27) Ma uw rogon ni faanra bay reb e walag nib mo’maw’ ni nge n’ag fan e kireb rok be’? Rayog ni nge ayuweg e piin piilal u daken fare fanathin ni murung’agen fare sib ni kan n’ag fan e malfith rok nib ga’, machane dabun ni nge n’ag fan e malfith rorow be’ nib achig. (Matt. 18:21-35) Nap’an nra t’uf ni nge pi’ e piin piilal e fonow, ma susun e ngar pied u rogon feni papey nrayog.​—Mu beeg e Proverbs 25:11.

“Um Par Ma Ga Be Muruwliy”

15. Mang ayuw e rayog ni nge pi’ chon e tabinaw rok reb e pumoon ngak ya nge yog ni rin’ boch e maruwel u lan e ulung?

¹⁵ Piin piilal e yad ma ayuweg e walag ni pumoon ni ngar nameged boch e maruwel u lan e ulung, machane ku rayog ni nge pi’ boch e girdi’ e ayuw. Bod ni rayog maku susun ni nge ayuweg chon e tabinaw reb e walag ni pumoon ni nge nameg boch e maruwel u lan e ulung. Ma faanra ke mang reb e piilal ma ra yib angin e ayuw ni be pi’ leengin nge pi fakrow ngak. Yad manang nthingari tay boch e tayim ni fan ngak yugu boch e girdi’. Ra felfelan’ ni faanra guy chon e tabinaw rok ni yad be pag farad ya nge yog ni rin’ fare moon e maruwel rok nib fel’ rogon. Yugu aram rogon nrayog ni nge pi’ yugu boch e girdi’ e ayuw machane fare walag e ba milfan ngak ni nge dag ni baadag ni nge yog e pi maruwel nem ngak.​—Prov. 15:20; 31:10, 23.

16. (a) Mini’ e ba milfan ngak ni nge dag ni baadag ni nge nameg boch e maruwel u lan e ulung? (b) Mang e ba t’uf ni nge rin’ reb e walag ni pumoon ni faanra baadag ni nge mang reb e ministerial servant ara reb e piilal?

¹⁶ Yugu aram rogon nrayog ni nge pi’ boch e girdi’ e ayuw, machane fare walag e ba milfan ngak ni nge dag ni baadag ni nge yog e pi maruwel ney ngak. (Mu beeg e Galatia 6:5.) Riyul’ nde t’uf ni nge mang reb e walag ni pumoon reb e ministerial servant ara reb e piilal ni nge ayuweg e girdi’ me rin’ e tin ni rayog rok ni fan ko machib. Machane, faanra be nameg be’ boch e maruwel u lan e ulung ma thingari rin’ gubin ban’en ni be yog e Bible ni nge rin’ e piin ni yad be nameg e binem e maruwel. (1 Tim. 3:1-13; Titus 1:5-9; 1 Pet. 5:1-3) Ere faanra baadag reb e walag ni pumoon ni nge mang reb e ministerial servant ara reb e piilal ma dawor ni dugliy ni nge mang reb, ma thingari fal’eg i lemnag e pi n’en ni nge rin’ ya nge yog ni  mon’og ko tirok Got ban’en. Re n’ey e ba muun ngay ni nga i beeg e Bible ni gubin e rran, ma be fil nib fel’ rogon, ma be fal’eg i lemnag, ma be meybil, mab pasig ko machib. Faanra rin’ e pi n’ey, ma aram e be fol ko fonow ni pi’ Paul ngak Timothy ni gaar: “Um par ma ga be muruwliy ni ngi i par pangim nib m’agan’ Got ngay.”​—1 Tim. 4:7.

17, 18. Mang e rayog ni nge rin’ reb e walag ni pumoon ni faanra der nameg boch e maruwel u lan e ulung ni bochan e be lemnag ndabiyog ara dabun ni nge rin’?

¹⁷ Machane uw rogon ni faanra be lemnag reb e walag ndabiyog rok e re maruwel ney? Faanra aram rogon mab t’uf ni nge lemnag urngin ban’en ni ke rin’ Jehovah Got nge Jesus Kristus ni fan ngodad. Ke micheg Jehovah nra “fek e gilab rodad u reb e rran ngu reb.” (Ps. 68:19, BT) Ere rayog ni nge ayuweg Jehovah reb e walag ni pumoon ni nge yog boch e maruwel ngak u lan e ulung. Faanra bay reb e walag ni gathi ir reb e ministerial servant ara piilal, mab fel’ ni nge lemnag nrib t’uf boch e walag ni pumoon ni ngar ayuweged e ulung. Pi n’ey e rayog ni nge pi’ e athamgil nga laniyan’ reb e walag ni be lemnag ndabiyog e pi maruwel ney rok. Rayog ni nge yibilay gelngin Got nib thothup, ya ireray e n’en nra pi’ e gapas nge t’ar laniyan’ ngak. Ma re n’ey e rayog ni nge ayuweg ni nge dabki lemnag ndabiyog rok e pi maruwel ney. (Luke 11:13; Gal. 5:22, 23) Ma gad manang nra tow’athnag Jehovah e piin ni yad baadag ni ngar ayuweged e girdi’.

¹⁸ Sana bay reb e walag ni pumoon ni dabun ni nge nameg boch e maruwel u lan e ulung. Ere mang e rayog ni nge ayuweg nge adag ni nge nameg boch e pi maruwel ney? I yoloy apostal Paul ni gaar: “Got e gubin ngiyal’ ni be maruwel u fithik’ i lanin’med ni be pingeg lanin’med ni nge m’agan’med ngay ni ngam folgad ko tin ni be finey.” (Fil. 2:13) Got e ir e ra pingeg laniyan’ be’ ni nge adag me yib gelngin ni nge ayuweg e girdi’ me rin’ e tin nib m’agan’ ngay. (Fil. 4:13) Maku reb e rayog ni nge meybil reb e Kristiano ngak Got ni nge ayuweg nge rin’ e tin nib mat’aw.​—Ps. 25:4, 5.

19. Mang e be micheg e Mikah 5:5 ngodad?

¹⁹ Ma tow’athnag Jehovah e piin piilal ko athamgil ni yad ma tay ni ngar skulnaged boch e girdi’. Maku ma tow’athnag e piin ni yad be nameg boch e maruwel u lan e ulung. Be micheg e Bible ngodad ni bay boch e pumoon ni yad ra yog e thin u lan e ulung rok Jehovah. (Mik. 5:5) Boor e pumoon ni Kristiano ni yad be nameg boch e maruwel u lan e ulung maku yibe skulnagrad u rogon ni ngar rin’ed e pi maruwel ney. Re n’ey e yira pining e sorok riy ngak Jehovah ma boor e tow’ath nra yog riy ngodad.

Uw Rogon ni Ga Ra Fulweg?

• Uw rogon ni ayuweg Jesus pi gachalpen ni nge milfan boch e maruwel ngorad?

• Uw rogon ni nge folwok e piin piilal rok Jesus u nap’an ni yad be ayuweg boch e pumoon ni ngar nameged boch e maruwel u lan e ulung?

• Faanra be nameg reb e pumoon boch e maruwel u lan e ulung, ma uw rogon nrayog ni nge pi’ chon e tabinaw rok e ayuw?

• Mang e ba t’uf ni nge rin’ reb e pumoon ya nge m’ug ni baadag ni nge rin’ boch e maruwel u lan e ulung?

[Study Questions]

[Pictures on page 31]

Uw rogon nrayog ni ngam ayuweg reb e pumoon ni ga be fil e Bible ngak ni faanra ga be guy ni be athamgil ni nge mon’og?

[Picture on page 32]

Uw rogon ni nge m’ug ni be nameg reb e walag ni pumoon boch e maruwel u lan e ulung?