Ngan Ayuweg e Piin Pumoon Ngar Mon’oggad ko Tirok Got Ban’en

“Chiney i yan ngaram e bay um yognag e girdi’.”​—LUKE 5:10.

1, 2. (a) Mang e rin’ boor e pumoon u nap’an ni kar rung’aged rogon e machib ni i tay Jesus? (b) Mang e gad ra weliy ko re article ney?

 NAP’AN e machib ni i tay Jesus nge pi gachalpen u lan e nug nu Galile, mi yad af nga bowoch nga ranod nga bangi ban’en ndariy e girdi’ riy ni ngar toffangad. Ma boor e girdi’ ni i yib u arow ni be lekrad. Urngin e pi girdi’ nem e “gonap’an e lal e biyu’ nda ni uneg e ppin nge bitir ngay.” (Matt. 14:21) Ku immoy bayay ni yib bogi girdi’ ngak Jesus ni nge golnag e piin nib m’ar u fithik’rad mi yad motoyil ngak ni nge machib. Pi girdi’ nem e “yad aningeg i biyu’, nda ni uneg e ppin nge bitir ko matheeg.” (Matt. 15:38) Ere, ba tamilang ni boor e pumoon ni ur moyed u fithik’ e piin ranod ngak Jesus, ya yad baadag ni ngar rung’aged e machib rok. Bin riyul’ riy e, boor e girdi’ ni manang Jesus ni ku yad ra un ko tin riyul’, ya tomuren ni ngongliy e maang’ang nge kol pi gachalpen e nig ni pire’ ni pire’, me yog ngorad ni gaar: ‘Chiney i yan ngaram e bay um yognaged e girdi’.’ (Luke 5:10) N’en ni yog Jesus e be yip’ fan ni machib nra i tay pi gachalpen e bod e fita’, ya ra ayuwegrad ngar yognaged boor e girdi’ nib muun e pumoon ngay.

² Ngiyal’ ney e ku boor e pumoon ni yad be motoyil ko fare thin nib fel’ ni gad be machibnag, maku boor i yad e be fil e Bible. (Matt. 5:3) Machane, boor i yad nder mon’og ko tirok Got ban’en. Ere uw rogon ni ngan ayuwegrad? Yugu aram rogon ni gathi yugu ba thil rogon ni i machibnag Jesus e pumoon, machane baadag ni nge ayuwegrad ni bochan e bay boch ban’en ni ma magafan’rad ngay. Re article ney e gad ra weliy riy rogon ni ayuweg Jesus e piin pumoon nge rogon ni ngad folwokgad rok ngad ayuweged e piin pumoon u dalip e magawon ni yad ma mada’nag ni aram e: (1) magafan’ ko salpiy nge maruwel, (2) marus ko n’en ni ma lemnag e girdi’ ngorad, nge (3) marus nri de yog rorad e n’en ni ka nog ngorad.

Magafan’ ko Salpiy nge Maruwel

3, 4. (a) Mang ban’en nri ma magafan’ e piin pumoon ngay? (b) Mang fan ni boch e pumoon e yad ma m’oneg e salpiy nge maruwel ko tirok Got ban’en?

³ I gaar reb e tamachib ko motochiyel ngak Jesus: “Tamachib, kug fal’eg rogog ni nggu un ngom ko yungi n’en ni ngam man ngay.” Machane, nap’an ni yog Jesus ngak ni “en ni Fak e girdi’ e dariy bang ni nge pag ir riy nga but’ nge toffan,” ma aram me thil laniyan’ fare moon. Ere ba tamilang ni ke magafan’ ko n’en ni nge kay nge gin ni nge par riy, ya der yog e Bible ni mang reb i gachalpen Kristus.​—Matt. 8:19, 20.

⁴ Piin pumoon e ba ga’ ni yad ma m’oneg e salpiy nge maruwel ko tirok Got ban’en. Boor i yad e ma nameg e skul nib tolang nge maruwel nib fel’ puluwon. Yad ma lemnag ni kab ga’ fan ni nge yoor e salpiy ko bin ni ngar filed e Bible me chugur e tha’ u thilrad Got. Sana yad baadag e machib nu Bible, machane “pi n’en ni ma magafan’ e girdi’ ngay ko biney e tamilang” e ir e ma talegrad ndab kur filed murung’agen Got ara ra folgad rok. (Mark 4:18, 19) Am lemnag rogon ni ayuweg Jesus pi gachalpen ni ngar dugliyed e tin nib ga’ fan ni nge m’on u wan’rad.

5, 6. Mang e ayuweg Andrew, nge Peter, nge James, nge John ni ngar dugliyed e re maruwel nib ga’ fan ni nge m’on u wan’rad?

⁵ Andrew nge Simon Peter ni walagen e yow e tafita’. Maku er rogon John nge James ni walagen, nge Zebedee ni chitamangirow. Bochan nrib fel’  rogon e siyobay rorad ni be yan, ma aram mu kur feked boch e pumoon ni nge maruwel rorad. (Mark 1:16-20) Nap’an ni rung’ag Andrew nge John murung’agen Jesus rok John ni Tataufe, me mich u wan’row ni ir fare Messiah. Me yan Andrew i weliy murung’agen ngak Simon Peter ni walagen, ma sana ku aram e n’en ni rin’ John ngak James ni walagen. (John 1:29, 35-41) Tin migid e pul nga tomuren, mar uned ngak Jesus ngaur machibgad u Galile, ngu Judea, ngu Samaria. Tomuren e re n’ey mi yad sul ko maruwel rorad. Yad baadag e n’en ni i machibnag Jesus, machane fare maruwel ni machib e gathi aram e re maruwel nib ga’ fan u wan’rad e ngiyal’ nem.

⁶ Boch nga tomuren, me pining Jesus Peter nge Andrew ni ngar unew ngak i “yognag e girdi’.” Ere mang e kar rin’ew? “Ka chingiyal’ nem mi yow digey e nug rorow ngar unew ngak.” Maku aram rogon e n’en ni rin’ James nge John. “Ka chingiyal’ nem mi yow digey fare bowoch nge chitamangirow ngar unew ngak Jesus.” (Matt. 4:18-22) Mang e ayuweg e pi pumoon ney ni ngar dugliyed ni ngar machibgad ni polo’ e tayim? Gur, re n’ey e ban’en ni yugu ra dugliyed nib tomgin? Danga’, ya boor e pul ni ur rung’aged e machib rok Jesus, ma yad be guy e maang’ang ni i ngongliy nge feni pasig, nge urngin e girdi’ ni i motoyil ko machib ni i tay. Ere angin ni yib riy e gel e michan’ nge pagan’ rorad ngak Jehovah!

7. Uw rogon nrayog ni ngad ayuweged e piin ni gad ma fil e Bible ngorad ni nge pagan’rad ngak Jehovah?

⁷ Uw rogon ni ngad folwokgad rok Jesus ngad ayuweged e piin ni gad ma fil e Bible ngorad ni nge pagan’rad ngak Jehovah? (Prov. 3:5, 6) Rayog ni ngad ayuweged yad u rogon ni gad ma fil ban’en ngorad. Nap’an ni gad be fil e Bible ngorad, ma rayog ni ngad tamilangnaged ngorad ni ke micheg Got nra tow’athnagdad ni faan gad ra m’oneg e Gagiyeg rok u wan’dad. (Mu beeg e Malaki 3:10; Matthew 6:33.) Yugu aram rogon nrayog ni ngad daged boch e thin ngorad ni be weliy rogon ni ma ayuweg Jehovah e girdi’ rok, machane dab da paged talin ni kub ga’ fan ni ngar guyed ni aram e n’en ni gad be rin’. Gad ra weliy ngorad rogon ni ma ayuwegdad Jehovah u boch ban’en, ma rayog ni pi’ e athamgil nga lanin’rad ni ngki pagan’rad ngak. Ku rayog ni ngad weliyed ngorad murung’agen boch e tapigpig rok Jehovah ni bay murung’agrad u boch e babyor rodad. a

8. (a) Mang nib ga’ fan ko en ni be fil e Bible ni nge “gay nge pirieg feni manigil” Jehovah? (b) Uw rogon ni ngad ayuweged e en ni gad be fil e Bible ngak ni nge guy feni manigil Jehovah?

⁸ Ra nge gel e michan’ rok be’ ni gad be fil e Bible ngak ma gathi kemus ni nga i beeg ma yibe weliy ngak rogon ni ke tow’athnag Jehovah boch e girdi’, ya kub t’uf ni nge guy feni manigil Jehovah. I tang fare psalmist ni gaar: “Mu gay ngam pirieg feni manigil Somol, ba felan’ e cha’ ni be naf nga tan pa’.” (Ps. 34:8, BT) Uw rogon ni ngad ayuweged e en ni gad be fil e Bible ngak ni nge guy feni manigil Jehovah? Susun e bay e magawon rok ko salpiy, maku be gay rogon ni nge pag boch ban’en ni ke mecham ngay ni bod e tamagow, ara langad, ara chingaw. (Prov. 23:20, 21; 2 Kor. 7:1; 1 Tim. 6:10) Gathi ga ra fil ngak ni nga i meybil ngak Got ni nge ayuweg nge pag e pi n’en ni ke mecham ngay, ma aram e ga be ayuweg ni nge guy feni manigil Jehovah? Kum lemnag angin nra yib riy ni faanra  ud pied e athamgil nga laniyan’ ni nge m’on e tirok Got u wan’ ni aram e nga i tay e tayim u gubin e wik ni fan ko fol Bible, ma be fal’eg rogon ni fan ko muulung, ma be un ngay ni gubin ngiyal’. Nap’an nra guy ni be tow’athnag Jehovah ko athamgil ni be tay, ma aram e ra gel e michan’ rok!

Marus ko N’en ni Ma Lemnag e Girdi’

9, 10. (a) Mang fan nde yog Nikodemus nge Josef ni be’ nu Arimathea ko girdi’ ni yow l’agruw i gachalpen Jesus? (b) Mang fan ni bay boch e pumoon e ngiyal’ ney ni yad be rus ni ngar manged boch i gachalpen Jesus?

⁹ Boch e pumoon e der yog ni ngar manged boch i gachalpen Jesus ni bochan e be magafan’rad ko n’en nra i lemnag e girdi’ ngorad. Nikodemus nge Josef ni be’ ko binaw nu Arimathea e ur guyew rogon ndabi nang e girdi’ ni yow l’agruw i gachalpen Jesus ni bochan e yow be rus ko n’en nra yog boch e Jew ni faan yira nang. (John 3:1, 2; 19:38) Bay fan ni kar rusgow. Rib fanenikan e pi tayugang’ ko teliw daken Jesus, ere dakur paged e piin ni mich Jesus u wan’rad ni ngar uned nga lan tafen e muulung rok piyu Jew.​—John 9:22.

¹⁰ U boch e nam e ngiyal’ ney, e faanra m’ug ni baadag reb e pumoon ni nge nang murung’agen Got, ara Bible, ara teliw, ma ra i togopuluw chon e maruwel rok, ara fager rok, ara girdi’ rok ngak. Maku boch e nam e bay e riya’ riy ni faanra yog be’ ni baadag ni nge thilyeg e teliw rok. Maku ba gel e gathibthib ni yira tay ngak reb e pumoon ni ma un ko salthaw, ara ir reb i girdien e am, ara ir be’ nib ga’ fan u lan e binaw rok ni faanra i weliy murung’agen e teliw. I yog reb e pumoon u Chiyamen ni gaar: “N’en ni gimed ma machibnag e Pi Mich u murung’agen e Bible e rriyul’. Machane, faan gu ra mang reb e Mich Rok Jehovah e daba’, ma ra gabul ma urngin e girdi’ ni ke nang. Mang e yira lemnag u tabon e maruwel rog, ngu lan binaw, nge re ulung ni baaram ni gamad ma un chon e tabinaw rog ngay? Dabiyog ni nggu athamgiliy e re n’ey.”

11. Uw rogon ni ayuweg Jesus pi gachalpen ni nge dab kur lemnaged laniyan’ e girdi’?

¹¹ Yugu aram rogon nib ga’ nder ma rus e pi apostal rok Jesus, machane immoy yu ngiyal’ ni ur rusgad ko girdi’. (Mark 14:50, 66-72) Uw rogon ni ayuwegrad Jesus ni ngar mon’oggad ko tirok Got ban’en ni yugu aram rogon ni i togopluw e girdi’ ngorad? I ayuwegrad Jesus ngar nanged rogon ni ngar pared ni yad ba gel u nap’an ni yad ra mada’nag e togopluw. I yog ni gaar: “Ngam felan’gad ko ngiyal’ nra fanenikaymed e girdi’ riy, ngar chuweged gimed u fithik’rad, mi yad yog e thin nib kireb ngomed, mi yad yog ni gimed ba kireb, ni bochan e en ni Fak e Girdi’!” (Luke 6:22) I yog Jesus ngak pi gachalpen u m’on riy ni yad ra mada’nag e togopluw ni bochan e en “Fak e Girdi’.” Ki micheg Jesus ngorad nra ayuwegrad Got ni faan yad ra meybil ngak ni nge ayuwegrad me pi’ gelngirad. (Luke 12:4-12) Ki pining Jesus boch e girdi’ ni ka fin ra manged boch i gachalpen ni ngar chaggad ngak e tin baaram i gachalpen ngar pared ni kar fagergad.​—Mark 10:29, 30.

12. Mang boch e kanawo’ ni ngad ayuweged e piin gad ma fil e Bible ngorad nge dab ku ur lemnaged e n’en ni be lemnag e girdi’ ngorad?

¹² Ku er rogodad nib t’uf ni ngad ayuweged e piin gad ma fil e Bible ngorad nge dab ku ur lemnaged e n’en ni be lemnag e girdi’ ngorad. Reb e kanawo’ nrayog ni ngad rin’ed e re n’ey riy e ngad ayuweged nge nang ko mang e nge rin’ u nap’an  nra mada’nag e togopluw. (John 15:19) Rayog ni ngam ayuweg nge yoloy e fulweg u boch e deer nrayog ni nge fith e piin yad nga maruwel ara yugu boch e girdi’ ngak. Rayog ni ngad manged fager rok, maku rayog ni ngad guyed rogon nge mada’nag boch e girdi’ u lan e ulung nib ga’ ni piin gad manang ni bay ban’en rorad nib taareb rogon. Ma bin th’abi ga’ fan riy, e ngad filed ngak ni nga i meybil ni gubin ngiyal’ ni nge yib u gum’irchaen. Re n’ey e ra ayuweg ni nge chugur ngak Jehovah me par ni bod e war nrayog ni nge Nab nga fon.​—Mu beeg e Psalm 94:21-23; James 4:8.

Marus Nri De Yog Rorad e N’en ni Ka Nog Ngorad

13. Mang fan ni bay boch e pumoon ni kar turguyed ndab ra uned i fil e tin riyul’?

¹³ Boch e pumoon e darur filed e tin riyul’ ni bochan e gathi ri yad ba salap ko beeg babyor, ara welthin, ara yad ba tatamra’. Maku bay boch e pumoon ndabun ni nge weliy laniyan’ u fithik’ e girdi’ ni yoor. Ere rib mo’maw’ ngorad ni ngar filed e Bible, ara ngar pied e fulweg u nap’an e muulung, ara ngar machibgad. Bay reb e walag ni pumoon ni gaar: “Nap’an ni ku gub bitir, ma bay ni yan ko machib ma gu ma papey nggu wan ko mab nggu dake kug chubeg e bell riy, ngemu’ mug papey nggu chuw ni gu be athapeg ndariy be’ ni ke rung’ag lingag fa ke guyeg. . . . Gu ra lemnag ni nggu machib u mit e tabinaw ma ma k’aring e m’ar ngog.”

14. Mang fan nde yog rok pi gachalpen Jesus ni ngar golnaged reb e pagel ni ke ying e moonyan’ ngak?

¹⁴ Am lemnag rogon laniyan’ pi gachalpen Jesus u nap’an nde yog rorad ni ngar golnaged reb e pagel ni ke ying e moonyan’ ngak. I yib e chitamangin i gaar ngak Jesus: “[Fakag e] ma yib e m’ar ni epilepsy ngak nib gel nra yib ngak me thay nga mit e nifiy fa nga fithik’ e ran. Kug fek i yib ngak pi gachalpem, ma de yog ni ngar golniged.” Ma aram me tuluf Jesus fare moonyan’ nge chuw ko fare pagel me gol. Tomuren me yib pi gachalpen ra fithed ngak ni lungurad: “Mang nde yog romad ni nggu tulufed fare moonyan’ nge chuw u fithik’ facha’?” Me fulweg Jesus ni gaar: “Bochan e de gaman e michan’ romed ngak Got. Mu ted fanmed i yan ko re bugithin ni baaray! Faanra ba’ e michan’ romed ngak Got ni bod mam’ungun ba awochngin e mustard, ma rayog ni nge lungumed ko re burey ney, ‘Mman u roy i iram!’ ma ra yan. Ma demtrug ban’en ma rayog romed!” (Matt. 17:14-20) Faanra rib mich Jehovah u wan’ be’, ma aram e rayog ni nge rin’ boch ban’en ni be lemnag ndabiyog rok. Machane, faanra pagan’ ko salap rok, ma aram e dabiyog ni nge mon’og, me lemnag ndabi fel’ ni nge pigpig ngak Jehovah.

15, 16. Uw rogon nrayog ni ngad ayuweged be’ ni gad be fil e Bible ngak ni be lemnag ndabiyog ni nge pigpig ngak Jehovah ni bod boch e girdi’?

¹⁵ Reb e kanawo’ nib fel’ nrayog ni ngan ayuweg be’ riy ni be lemnag ndabiyog ni nge pigpig ngak Jehovah ni bod boch e girdi’ e ngan pi’ e athamgil nga laniyan’ ni nge dab ki par ni goo ir nge tin rayog rok e be lemnag, ya nge pagan’ ngak Jehovah nra ayuweg. I yoloy Peter ni gaar: “Mu sobut’niged lanin’med u tan pa’ Got nib gel gelngin, me fal’eg lanin’med ko ngiyal’ ni be finey. Mpaged fan urngin e magafan’ romed ngak, ya be lemnag rogomed.” (1 Pet. 5:6, 7) Ba t’uf ni ngad ayuweged ni nge t’uf Jehovah rok me adag ni nga i fol rok. Re n’ey e be yip’ fan ni thingari adag e n’en ni be fil u Bible mi i m’ug “wom’engin gelngin Got nib thothup” ko ngongol rok. (Gal. 5:22, 23, NW) Thingari ga’ fan e meybil u wan’. (Fil. 4:6, 7) Ma thingar ki sap ngak Got ni nge ayuweg ni nge dab ki rus me yib gelngin ni nge rin’ e tin ni ke yog ngak.​—Mu beeg e 2 Timothy 1:7, 8. 

¹⁶ Sana ku bay boch i yad nib t’uf ni ngan ayuweg nge mon’og ko beeg babyor, me salap ko welthin. Ma boch i yad e sana be lemnag ndabiyog ni nge pigpig ngak Got ni bochan e ngongol nib  kireb ni i rin’ u m’on ni nge fil murung’agen Jehovah. Demtrug rogon, ma rayog ni ngad ayuweged e en ni gad be fil e Bible ngak ni faan gad ra t’ufeg ma gad be gum’an’ u puluwon. I gaar Jesus: “Piin ni yad ba gol e dariy fan e togta ngorad, ya ke mus ni piin ni yad mm’ar e ba’ fan e togta ngorad.”​—Matt. 9:12.

Ngan ‘Yognag’ Boor e Pumoon

17, 18. (a) Uw rogon me yog ni ngad machibnaged boor e pumoon? (b) Mang e gad ra fil ko bin migid e article?

¹⁷ Ri gad baadag ni nge yoor e pumoon ni nge un i fil e tin riyul’ u Bible. (2 Tim. 3:16, 17) Ere, uw rogon me yog ni ngad machibnaged boor e pumoon? Rayog ni ngad yoornaged e tayim ni ngad machibgad riy ko blayal’, ara Sabado nge Madnom ko mithigyal’, ara nap’an ndariy e maruwel, ya aram e ngiyal’ ni boor e pumoon ni bay u tabinaw rok. Nap’an ni gad ra yan nga reb e tabinaw, mab fel’ ni ngad guyed rogon ngad nonad ngak e en lolugen fare tabinaw. Ma ngkud guyed rogon ngad machibnaged e piin pumoon ni gad ma maruwel u taabang, mu kud guyed rogon ngad ayuweged pi figirngin e pi walag ni ppin u lan e ulung nde michan’rad.

¹⁸ Nap’an ni gad be machib, ma rayog ni nge pagan’dad nra motoyil e piin nib fel’ lanin’rad. Ere ngad gum’an’gad ngad ayuweged urngin e girdi’ ni yad baadag ni ngar filed e tin riyul’. Machane, uw rogon nrayog ni ngad ayuweged boch e walag ni pumoon ni nge milfan boch e maruwel u lan e ulung ngorad? Bin migid e article e ra pi’ e fulweg ko re deer ney.

[Footnote]

Uw Rogon ni Ga Ra Fulweg?

• Uw rogon ni ngan ayuweg e piin pumoon ni nge m’on e tirok Got u wan’rad?

• Uw rogon nrayog ni ngad ayuweged e piin ni yad be fil e Bible ni nge dab ku ur lemnaged e n’en ni be lemnag e girdi’ ngorad?

• Mang e rayog ni nge ayuweg be’ ni be lemnag ndabiyog ni nge pigpig ngak Jehovah ni bod boch e girdi’?

[Study Questions]

[Picture on page 25]

Ga ma guy rogon ni ngam machibnag e piin pumoon, fa?

[Picture on page 26]

Uw rogon ni ngam ayuweg e en ni ga be fil e Bible ngak ni nge fal’eg rogon ko togopuluw nra yib ngak?