Ragag e Deer u Murung’agen e Par ko Pumoon nge Ppin Ni Kan Pirieg e Fulweg Riy

1 Gur, par ko pumoon nge ppin e aram e bin som’on e denen ni rin’ Adam nge Efa?

▪ Fulweg riy: Boor e girdi’ e ma lemnag ni fare wom’engin e gek’iy nnog ngorow ndab ra kew u lan e milay’ nu Eden e be yip’ fan e par ko pumoon nge ppin. Machane, gathi ireray e n’en ni be fil e Bible.

Mu lemnag: U m’on ni kan sunmiy Efa, me yog Got ngak Adam ndabi kay wom’engin “fare gek’iy ni ma tamilangnag an’uy ko tin nib fel’ nge tin nib kireb.” (Genesis 2:15-18) Bochan ni kemus ni Adam e immoy e ngiyal’ nem, ma re motochiyel nem e gathi be yip’ fan e par ko pumoon nge ppin. Miki pi’ Got reb e motochiyel ngak Adam nge Efa nib tamilang ni ngar ‘diyengow nge yoor pi fakrow, nge wer e piin ni owcherow nga gubin yang u fayleng.’ (Genesis 1:28) Gur, ra yog Got ngak Adam nge Efa ni ngar diyengow nge yoor pi fakrow me ‘wer e piin owcherow nga gubin yang u fayleng,’ ngemu’ me yog ni ngar m’ow ya kar folgow ko motochiyel rok?​—1 John 4:8.

Maku nap’an nde moy Adam rok Efa “ma aram me t’ar boch i wom’engin [fare ke gek’iy] nge kay. Ma aram me pi’ boch ngak e pumoon rok me ki kay.”​—Genesis 3:6.

Dan puwan’ ngak Adam nge Efa u nap’an nra fakayew e bitir. (Genesis 4:1, 2) Ba tamilang ni fare wom’engin e gek’iy ni kay Adam nge Efa e gathi be yip’ fan e par ko pumoon nge ppin ya riyul’ ni wom’engin e gek’iy.

2 Be yog e Bible nib kireb e par ko pumoon nge ppin, fa?

▪ Fulweg riy: Bin som’on e babyor u Bible e be dag ni ke sunmiy Got “be’ nib moon nge be’ ni ppin.” Me yog Got ni “rib fel’ u wan’.” (Genesis 1:27, 31) Munmun me thagthagnag Got nga laniyan’ be’ ni yoloy bang u Bible ni fan ko piin figirngiy ni gaar: “Nge fel’ u wun’um leengim me par e felfelan’ rom ko re pin ni kam leay . . . Ngam par ni gab felfelan’ nga fel’ngin; mu pag nge longbiyem e t’ufeg rok.” (Proverbs 5:18, 19, BT) Ere gur,  be tamilangnag e re thin nu Bible ney nib kireb e par ko pumoon nge ppin?

Gathi kemus ni ke sunmiy Got yu yang nib mith u dowey ya nge yog nni fakay e bitir, ya ku aram reb e kanawo’ ni nge dag e piin mabgol e t’ufeg nge felfelan’ rorad ngorad. Re n’ey e rayog ni nge gamaneg e tin nib t’uf rok l’agruw ni’ nib t’uf bagayow rok bagayow.

3 Be yog e Bible nib fel’ ni nge par e pumoon nge ppin u taabang ndawor ni mabgol, fa?

▪ Fulweg riy: Ba tamilang ni be yog e Bible ni “ra gechignag Got e pi arorad ni be ngongliy e ngongol ko darngal.” (Hebrews 13:4) Fare bugithin ni Greek ni por·neiʹa e be yip’ fan e ngongol ni be rin’ e girdi’ ndawor ra mabgolgad ni yibe fanay yu yang u dowey nib mith u reb e kanawo’ nde yalen. a Ba kireb u wan’ Got ni nge par l’agruw ni’ u taabang ni yugu aram rogon ni yow be lemnag e mabgol ko tomur.

Yugu aram rogon ni l’agruw ni’ ni yow baadagew yow, ma baadag Got ni ngar mabgolgow u m’on ni ngar parew. Got e ke sunmiydad. Ere bay rogon ni ngad daged e t’ufeg, ya t’ufeg e aram e bin th’abi ga’ i fel’ngin Got. Bay fan ni nge pi’ e motochiyel ni fan ko pumoon nge ppin nge fan ko piin ni kar mabgolgad. Ireray e n’en ni gad ra weliy ko bin migid e article.

4 Ba fel’ ni nge yoor e ppin ara pumoon rok be’, fa?

▪ Fulweg riy: Immoy ba ngiyal’ ni pag Got ni nge yoor e ppin rok reb e pumoon. (Genesis 4:19; 16:1-4; 29:18–30:24) Machane, gathi Got e tababnag e re ngongol nem. Kemus ni taareb e ppin e pi’ ni fan ngak Adam.

Ke pi’ Got mat’awun Jesus Kristus ni nge tamilangnag e motochiyel Rok u murung’agen e re n’ey. (John 8:28) Nap’an ni fith be’ Jesus u murung’agen e mabgol, me fulweg ni gaar: “Som’on ko tabolngin e sunumiyrow e en ni Tasunumiy ni bagayow e be’ nib pumoon ma bagayow e be’ ni ppin. Me gaar, ‘Ereray fan nra digey e pumoon e chitamangin nge chitiningin ngar pirew leengin, mi yow par ni kar taab girdi’gow.’”​—Matthew 19:4, 5.

 I thagthagnag Got nga laniyan’ reb i gachalpen Jesus nge yoloy ni gaar: “Gubin e pumoon nra be’ ma nge par ni ba’ leengin, ma gubin e ppin nra be’ ma nge par ni ba’ figirngin.” (1 Korinth 7:2) Maku be yog e Bible ni piin pumoon ni yad ba mabgol ni kan pi’ e maruwel ngorad u lan e ulung e “thingari par ni taareb e ppin” rorad.​—1 Timothy 3:2, 12.

5 Gur, ba kireb ni nge fanay e piin mabgol boch ban’en ni nge dab ni diyen?

▪ Fulweg riy: De tay Jesus chilen ngak pi gachalpen ni ngar fakayed e bitir. Maku dariy reb i gachalpen Jesus ni yog e re n’ey. Dariy bang u Bible ni be yog nib kireb ni ngan siyeg ndab ni diyen.

Ere piin mabgol e bay mat’awrad ni ngar dugliyed ko ngar fakayed e bitir fa danga’. Maku rayog ni ngar dugliyed ko in e bitir ni ngar fakayed nge mingiyal’. Faanra ke dugliy ba wu’ e mabgol ni ngar fanayew boch ban’en ni nge dabi diyen fare pin, ma yow e ba milfan ngorow ni ngar dugliyew. Susun ndariy be’ ni nge gathibthibnagrow ko n’en ni kar dugliyew.​—Roma 14:4, 10-13.

6 Ba kireb e mali’ bitir u meyal, fa?

▪ Fulweg riy: Yafos e ba thothup u wan’ Got, ma bitir ni ka fini sum u meyal e aram reb e yafos. (Psalm 139:16) I yog Got nra gechignag be’ ni faanra yim’ reb e bitir u meyal ni ir e kireb rok. Ere u p’eowchen Got e yira li’ reb e bitir u meyal, ma aram e kan thang reb e pogofan.​—Exodus 20:13; 21:22, 23.

Ma uw rogon ni faanra buch ban’en u nap’an ni ngan gargeleg reb e bitir, ma ba t’uf ni nge dugliy fa gal mabgol ko fare matin e ngan ayuweg fa fare tir? Ra aram rogon ma aram e yow e ke milfan ngorow ni ngar dugliyew.

7 Be yog e Bible nrayog ni nge dar e mabgol, fa?

▪ Fulweg riy: Be yog e Bible nrayog ni nge dar e mabgol. Machane ke yog Jesus ni kemus ni taa ban’en e rayog ni nge dareg e mabgol ni gaar: “En nra chuweg leengin ni gathi ban’en ni ke par fare pin nge be’ ngki leengiy yugu reb e ppin, e aram e ke th’ab e motochiyel, ya kar pirew yugu reb e ppin ni gathi mabgol rok.”​—Matthew 19:9.

Ma fanenikay Got ni nge chuw be’ ko en mabgol rok u fithik’ e sasalap. Ra gechignag Got e piin ni yad ma chuw ko en mabgol rorad ngkur uned ngak be’ ni gathi mabgol rorad.​—Malaki 2:13-16; Mark 10:9.

  8 Gur, ba fel’ wan’ Got e pumoon ni ma darngalnag e pumoon nge ppin ni ma darngalnag e ppin?

▪ Fulweg riy: Ba tamilang ni be yog e Bible nib kireb e ngongol ndarngal nib muun ngay e pumoon ni be darngalnag e pumoon nge ppin ni be darngalnag e ppin. (Roma 1:26, 27; Galatia 5:19-21) Be yog e Bible ndabun Got e mit ney e ngongol, machane gad manang ni “rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.”​—John 3:16.

Yugu aram rogon ni tin riyul’ e Kristiano e dubrad e mit ney e ngongol, machane yad ma gol ngak urngin e girdi’. (Matthew 7:12) Baadag Got ni ngaud ‘ted fan urngin e girdi’.’ Aram fan ni tin riyul’ e Kristiano e darur ma darifannaged e girdi’ ni yad ma un ko ngongol ni aram rogon.​—1 Peter 2:17.

9 Ba kireb e phone sex, ara “sexting,” ara cybersex, fa?

▪ Fulweg riy: Phone sex e ba muun ngay ni ngaun weliy murung’agen e par ko pumoon nge ppin u reb e kanawo’ nde puluw ara yibe motoyil ko thin u murung’agen e re n’ey u telefon. “Sexting” e yibe fanay e cell phone ni ngan textnag yaan e puwlag nge thin ni puwlag ngak boch e girdi’. Cybersex e ba muun ngay ni yima weliy e thin ni puwlag u Internet.

Der weliy e Bible murung’agen e pi n’ey. Machane be gaar: “De mat’aw ni nge un u l’ugunmed e thin ko darngal, ara thin nib golong, ara thin ko chogow, ni bochan e gimed girdien Got. Ma ku de m’ag ngomed ni nga mogned e thin nib puwlag, ara thin ni ma yog e balyang, ara thin ni yima tamra’ ngay.” (Efesus 5:3, 4) Pi n’ey e ba muun ngay e lem nde puluw u murung’agen e par ko pumoon nge ppin, ma be k’aring e girdi’ ni ngar uned ko ngongol ndarngal nga wuru’ e mabgol rorad. Re n’ey e be k’aring e girdi’ ni ngar uned ko pi ngongol ney.

10 Mang e be yog e Bible u murung’agen e masturbation?

▪ Fulweg riy: Der weliy e Bible murung’agen e masturbation ara ngan rin’ boch ban’en ko yungi n’en nib mith u dowey ya nge pug e ar’ar. Machane Thin rok Got e be fonownag e pi Kristiano ni gaar: “Thingar mu lied ngem’ e ar’ar nu fayleng ni be maruwel u fithik’ i dowmed, ni aram e darngal, nge puwlag.”​—Kolose 3:5.

Masturbation e ma k’aring e girdi’ ni ngar lemnaged e par ko pumoon nge ppin ara k’aring be’ ni nge par ni yigoo ir e be lemnag ir. Be micheg e Bible ngodad nra pi’ Got fare ‘gelngin ni ir e ba th’abi gel’ ngak e piin ni yad be athamgil ni ngar digeyed e biney e ngongol.​—2 Korinth 4:7; Filippi 4:13.

[Footnote]