Mu Tiyan’um ko Pigpig ni Ga Be Tay ni Fan Ngak Jehovah

“Demtrug e n’en ni gimed ra ngongliy ma ngam tedan’med ngay, ni gowa gimed be maruwel rok Somol, ma gathi rok e girdi’.”​—KOL. 3:23.

MU GUY KO RAYOG NI NGAM PI’ E FULWEG RIY:

Uw rogon nrayog ni ngad pininged e sorok ngak Jehovah ko pi n’en ni gad ma rin’ u gubin e rran?

Mang maligach e gad ma pi’ ko liyor rodad ngak Got?

Uw rogon nrayog ni ngad pied e pi n’en ni bay rodad ngak Jehovah?

1-3. (a) Bochan ni ke pi’ Jesus e yafas rok nib maligach, ma re n’ey e be yip’ fan ndaki t’uf ni ngad pied e maligach, fa? Mu weliy. (b) Mang deer e bay rogon ko maligach ni gad be pi’ e ngiyal’ ney?

 ULAN fa bin som’on e chibog me tamilangnag Jehovah ngak e girdi’ rok ni fare biyul ni pi’ Jesus e taleg fare Motochiyel ni kan pi’ ngak Moses. (Kol. 2:13, 14) Urngin e maligach ni ognag piyu Jew u lan bokum miriay e duw e daki t’uf e ngiyal’ ney. Fare Motochiyel ni ke “mang sensey ngodad nge yan i mada’ ko ngiyal’ ni yib Kristus riy” e daki t’uf ya ke yib Jesus.​—Gal. 3:24.

² Re n’ey e gathi be yip’ fan ni dakuriy fan e maligach u wan’ e Kristiano. Be weliy apostal Peter nib t’uf ni ngan pi’ e “pi maligach nib m’agan’ Got ngay u daken Jesus Kristus.” (1 Pet. 2:5) Miki tamilangnag apostal Paul ni yafas rok reb e Kristiano e ke mang ba “maligach nib fos.”​—Rom. 12:1.

³ Gad ma pi’ e maligach ngak Jehovah u nap’an ni gad ra ognag ban’en ngak ara ngad paged boch ban’en ya nge yog ni ngad pigpiggad ngak nib fel’ rogon. Bochan ni kad nanged murung’agen e maligach ni pi’ piyu Israel ngak Got, ma uw rogon ni nge mudugil u wan’dad nib m’agan’ Jehovah ko pi maligach ni gad be pi ngak?

PI N’EN NI GAD MA RIN’ U GUBIN E RRAN

4. Mang e thingar ud lemnaged u murung’agen e pi n’en ni gad ma rin’ u gubin e rran?

⁴ Sana ba mo’maw’ ni ngad nanged ni pi n’en ni gad ma rin’ u gubin e rran e bay rogon ko maligach ni gad ma pi’ ngak Jehovah. Boch ban’en ni bod e maruwel u tabinaw, nge skul, nge maruwel ni nge yog e salpiy riy, ara ngan chuw’iy e ti nib t’uf e gowa boch ban’en ni dariy rogon ko tha’ u thildad Got. Gubin ngiyal’ ni nge m’ug ni gad e Kristiano, ma ba t’uf ni ngad fanayed pi  kenggin e motochiyel u Bible ni nge pow’iydad. Aram fan ni ke yog Paul ni gaar: “Demtrug e n’en ni gimed ra ngongliy ma ngam tedan’med ngay, ni gowa gimed be maruwel rok Somol, ma gathi rok e girdi’.”​—Mu beeg e Kolose 3:18-24.

5, 6. Mang e rayog ni nge ayuwegdad ni ngad dugliyed rogon ni ngaud ngongolgad nge rogon e munmad rodad?

⁵ Gathi gubin ban’en ni gad ma rin’ u gubin e rran e bang ko pigpig rodad ngak Jehovah. Machane bochan ni ke pi’ Paul e athamgil nga lanin’dad ni ngad ‘ngongliyed ban’en ma gad tedan’dad ngay ni gowa gadad be maruwel rok Somol’ e be k’aringdad ni ngad lemnaged ko uw rogon e ngongol rodad ni gubin ngiyal’. Ere mang e gad ra fil ko re n’ey? Gubin ngiyal’ ni gad ma ngongol ara gad ma munmad ni rogon nib puluw ko piin Kristiano? Ara gad be tamra’ ni nga dogned ni gadad e Pi Mich Rok Jehovah ya bochan e ngongol rodad ara bochan e munmad rodad? Dariy ba ngiyal’ ni ngad paged ni nge buch ban’en ni aram rogon. Dubdad ni ngad rin’ed ban’en ni rayog ni nge kirebnag fithingan Jehovah.​—Isa. 43:10; 2 Kor. 6:3, 4, 9.

⁶ Gad ra weliy rogon ni faan gad ra ‘tiyan’’ ko pigpig ni fan ngak Jehovah ma ra ayuwegdad ni nge puluw e lem rodad nge ngongol rodad. Nap’an ni gad ra weliy e re n’ey, ma ba t’uf ni ngad lemnaged ni urngin e maligach ni pi’ piyu Israel ngak Jehovah e aram e kar pied e n’en ni th’abi fel’ rorad.​—Ex. 23:19, BT.

ROGON ANGIN KO YAFOS ROM

7. Mang e ba muun ngay ni ngad ognaged e yafos rodad ngak Got?

⁷ Nap’an ni kam ognag e yafos rom ngak Jehovah, ma kam dugliy ban’en nib fel’. Kam micheg ni ngam tay Jehovah nib m’on u lan e yafas rom ni gubin ngiyal’. (Mu beeg e Hebrew 10:7.) Dariy e maruwar riy ni ke yib angin ngom u nap’an ni kam athamgil ni ngam nang rogon e lem rok Jehovah u murung’agen boch ban’en, ma kam ngongol u rogon nib puluw ko n’en nib m’agan’ ngay. (Isa. 48:17, 18) Gadad ba ulung i girdi’ nib beech mab felfelan’ ya gad ma folwok rok Jehovah ni ir e sensey rodad.​—Lev. 11:44; Psalms 104:31.

8. Mang nib ga’ fan ni ngad lemnaged ni maligach ni pi’ piyu Israel ngak Jehovah e ba thothup?

⁸ I lemnag Jehovah ni maligach ni ma pi’ piyu Israel ngak e ba thothup. (Lev. 6:25; 7:1) Fare thin ni Hebrew ni kan piliyeg ni “thothup” e be yip’ fan ban’en ni kan kieg ara kemus ni Jehovah e ba milfan ngak. Faanra gad baadag ni nge fel’ e maligach rodad u wan’ Jehovah, ma thingar da paloggad ko urngin ban’en nib alit ko re fayleng ney. Dabiyog ni nge t’uf rodad e pi n’en ni ma fanenikay Jehovah. (Mu beeg e 1 John 2:15-17.) Re n’ey e be yip’ fan ndab da chaggad ngak e girdi’ nib kireb e ngongol rorad ara ngad uned  nga boch ban’en ni dabun Jehovah. (Isa. 2:4; Rev. 18:4) Maku re n’ey e be yip’ fan ndab ud uned i yaliy ara ud lemnaged boch ban’en ni yaan e puwlag.​—Kol. 3:5, 6. 

9. Uw feni rib ga’ fan e ngongol rodad ngak e girdi’?

⁹ Ke pi’ Paul e athamgil nge laniyan’ e pi walag ni gaar: “Dab mpaged talin ni ngam rin’ed e tin nib fel’ ma nge bigimed mi i ayuweg bigimed, ya ereray e pi maligach nib m’agan’ Got ngay.” (Heb. 13:16) Ere faanra gubin ngiyal’ ni gad ma rin’ e tin nib fel’ ma gad ma ayuweg e girdi’ ma ra bod e maligach nib fel’ u wan’ Jehovah. Gad ra rin’ ni aray rogon ma aram e be m’ug ni gad e tin riyul’ e Kristiano.​—John 13:34, 35; Kol. 1:10.

PI N’EN NI GAD MA RIN’ NI FAN KO LIYOR

10, 11. Uw rogon u wan’ Jehovah e machib nge pigpig ni gad ma tay, ma re n’ey e ra k’aringdad ni ngad rin’ed e mang?

¹⁰ Reb e kanawo’ nrayog ni ngad rin’ed e tin nib fel’ ngak e girdi’ e aram e nga ‘dogned’ murung’agen e athap rodad ngorad. Gur, ga ma machib ni gubin ngiyal’ ni ke mab a kanawo’ ngom? Ke yog Paul nib t’uf ni “nguud pininged e magar nge sorok ngak Got ni gubin ngiyal’ ni ir e maligach rodad ngak u daken Jesus; ni aram e re maligach ni gad be pi’ u dap’ilangdad ni gadad be yog ni ir e Somol.” (Heb. 10:23; 13:15, BT; Hos. 14:2) Rayog ni nge ayuwegdad ni faanra ngad lemnaged feni yoor e tayim ni gad ma machibnag fare thin nib fel’ nge rogon ni ngad salapgad ko machib. Boor e welthin u nap’an e service meeting nrayog ni nge ayuwegdad. Machane n’en ndab da paged talin e aram e machib ni gad ma tay e aram e “maligach,” ni bang ko liyor rodad ere thingar da rin’ed e tin th’abi fel’ rodad. Riyul’ nib thilthil rarogodad, machane feni yoor e tayim ni gad ma tay ni ngad machibnaged fare thin nib fel’ e be m’ug riy feni ga’ fan e tirok Got ban’en u wan’dad.

¹¹ Gad ma liyor ngak Jehovah ni demtrug ko gad bay u tabinaw rodad ara u lan e ulung rodad ya ke tay chilen ngodad ni ngad rin’ed e re n’ey. Yugu aram rogon ni daki t’uf ni ngad madnomnaged e Sabbath maku daki t’uf ni nga darod nga Jerusalem ni ngad uned ko pi madnom rorad, machane rayog ni ngad filed ban’en ko pi motochiyel nem. Gubin e rran ni boor ban’en ni gad ma rin’, machane baadag Got ni ngad fanayed boch e tayim rodad ni ngad filed e Bible, ma ngaud meybilgad, ma ngad uned ko muulung rodad. Ma en ni lolugen e tabinaw e ke milfan ngak ni nge fil e Bible ngak chon e tabinaw  rok. (1 Thess. 5:17; Heb. 10:24, 25) Rib fel’ nra bagadad me fith ir ni gaar: Gur, rayog ni nge mon’og rogon e pigpig ni gu be tay ngak Got?

12. (a) Bogi ban’en nib fel’ bon ni yima urfiy kakrom e rayog ni ngan taarebrogonnag ko mang e ngiyal’ ney? (b) Uw rogon ma meybil rodad e bod bogi ban’en nib fel’ bon ni yima urfiy?

¹² I yon’ David reb e tang ngak Jehovah ni gaar: “Nge fel’ u wun’um e meybil rog ni bod e incense.” (Ps. 141:2) Ba fel’ ni ngad lemnaged urngin yay ni gad ma meybil nge n’en ni gad ma yibilay. Fare babyor ni Revelation e be taarebrogonnag e “meybil rok girdien Got” ko incense. Re verse ney e be yog ni meybil nib fel’ e ra yan ngak Jehovah ni bod bogi ban’en nib fel’ bon ni yima urfiy. (Rev. 5:8) Nap’an piyu Israel kakrom, ma fare incense ni yima tay nga daken e altar rok Jehovah e thingar nni fal’eg rogon nib puluw ko n’en nib m’agan’ ngay. Ra fel’ u wan’ Jehovah e meybil ni faanra ba puluw ko n’en nib m’agan’ ngay. (Ex. 30:34-37; Lev. 10:1, 2) Maku er rogodad, faan gad ra meybil nib puluw ko n’en ni ke yog Jehovah ngodad mab mutrug nra fel’ u wan’.

PI N’EN NI GAD MA PI’ NGE PI N’EN NI MA YOG NGODAD

13, 14. (a) Mang ayuw e pi’ Epafroditus nge fare ulung nu Filippi ngak Paul, ma uw rogon u wan’ Paul e re nem? (b) Uw rogon ni ngad folgad ko n’en ni rin’ Epafroditus nge fare ulung nu Filippi?

¹³ Salpiy ni gad ma pi’ ni fan ko maruwel ni ma rin’ e ulung rodad u ga’ngin yang u fayleng e bod ba maligach, ni yugu demtrug ko boor fa buchuuw. (Mark 12:41-44) U nap’an e bin som’on e chibog, me pi’ fare ulung nu Filippi Epafroditus ni nge yan nga Roma ni nge ayuweg Paul ko tin nib t’uf rok. Re ulung nem e kar pied boch e salpiy ngak Epafroditus ni nge pi’ ngak Paul. Gathi ireray e yay ni som’on ni kar pied e salpiy ngak Paul. Yad baadag ni nge dabi magafan’ Paul u rogon ni nge yog e salpiy ngak ya nge yog ni fanay boor e tayim rok ni fan ko machib. Uw rogon u wan’ Paul e re tow’ath nem? Ke yog ni “pi tow’ath ney e bod e n’en nib fel’ bon ni yima pi’ ngak Got ni ba maligach ni ba adag Got ma ba fel’ u wan’.” (Mu beeg e Filippi 4:15-19.) Riyul’ ni ke felfelan’ Paul ko n’en ni ke rin’ e pi walag nu Filippi ngak, maku er rogon Jehovah.

¹⁴ Maku arrogon e ngiyal’ ney, ma felfelan’ Jehovah ko ayuw ni gad ma pi’ ni fan ko maruwel rodad u ga’ngin yang e fayleng. Ke micheg ni faanra ngad ululgad ngad m’oneged e gagiyeg rok ko yafas rodad, ma ra pi’ urngin ban’en nib t’uf rodad.​—Matt. 6:33; Luke 6:38.

NGE M’UG NI GA BE PINING E MAGAR

15. Mang boch ban’en ni ga ma pining e magar ngak Jehovah riy?

¹⁵ Boor fan ni ngad pininged e magar ngak Jehovah. Gubin e rran ma thingar da pininged e magar ngak Jehovah ko yafas ni ke pi’ ngodad nib tow’ath. Ma pi’ urngin ban’en nib t’uf rodad, ni bod e ggan, nge mad, nge naun, nge nifeng. Maku gad be pining e magar ko tamilangan’ ko tin riyul’ u Bible ni be gelnag e michan’ rodad nge athap rodad boch nga m’on. Ere thingar da pigpiggad ngak Jehovah ma ngad pied e maligach ngak ni bochan ni ir e Got rodad, maku bochan e pi n’en ni ke rin’ ni fan ngodad.​—Mu beeg e Revelation 4:11.

16. Uw rogon ni nge m’ug ni gad ma pining e magar ko maligach ni ke pi’ Kristus?

¹⁶ Fare article ni kan mu’ i weliy murung’agen e be tamilangnag ni fare maligach ni ke pi’ Jesus e aram e tow’ath nib tolang puluwon ni ke pi’ Got ngak e girdi’. Re tow’ath ney e be m’ug riy feni ri gadad ba t’uf rok Got. (1 John 4:10) Uw rogon ni ngad daged ni gad be pining e magar ya ke pi’ Got e re maligach nem ngodad? I gaar Paul: “Gelngin fanmad t’uf rok Kristus e ir e be gagiyegnagmad, ya kug nanged ni taareb e girdi’ e yim’  ni fan ngak urngin e girdi’.” Me ulul ngay ni gaar: “I yim’ ni fan ngak e girdi’ ni urngin ni bochan e piin ni yad ba fos e nge dab ku ur ngongolgad ni yad be yan nga tabon lanin’rad, machane ngar ngongolgad ni yad be yan ngan’ faanem ni ir e ke yim’ ni fan ngorad ma kan faseg ko yam’ ni fan ngorad.” (2 Kor. 5:14, 15) Ke yog Paul ni faanra riyul’ ni gad be pining e magar ngak Got ni bochan e n’en ni ke rin’ ni fan ngodad, ma aram e thingar da fanayed e yafos rodad ni ngad pininged e sorok ngak Got nge Fak. Rayog ni ngad rin’ed e re n’ey ni faanra ngad folgad rorow ma ngad machibgad ngad pingeged e girdi’ ngar manged pi gachalpen Jesus.​—1 Tim. 2:3, 4; 1 John 5:3.

17, 18. Mang boch e kanawo’ ni ke yoornag boch e walag e tayim rorad ni fan ko pigpig ngak Jehovah? Mu weliy ko mang e ke rin’ reb e walag.

¹⁷ Gur, rayog ni ngam yoornag e tayim ni ga ma fanay ni fan ko pigpig ngak Got? Boor e girdi’ ni kar fal’eged i lemnag murung’agen urngin ban’en nib fel’ ni ke rin’ Jehovah ni fan ngorad e ke k’aringrad ni ngar yoornaged e tayim rorad ni fan ko machib nge boch e maruwel u lan e ulung rok Jehovah. Boch i yad e kar uned ko pioneer ni ayuw u lan taareb ara u lan in e pul u gubin e duw, ma boch i yad e kar uned ko regular pioneer. Boch i yad e kar pied e ayuw ko dimow naun ni ngan fanay ni fan ko pigpig ngak Jehovah. Ireray boch e kanawo’ nib fel’ nrayog ni ngad pininged e magar riy ngak Got. Faanra gad be pigpig ku Got ya bochan nib t’uf rodad ma aram e gad be pining e magar ngak, ma ra fel’ u wan’ e n’en ni gad be rin’ ni fan ngak.

¹⁸ Boor e Kristiano ni kan k’aringrad ni ngar pininged e magar ngak Jehovah. Morena e bagayad e pi girdi’ nem. Kan chuguliy u ba tabinaw nib m’ing ko teliw ni Katolik, machane boor e deer rok u murung’agen Got nge fan e yafos. I fal’eg i gay e fulweg ko deer rok ko teliw rok nge llowan’ ko girdi’ nu Asia. Machane nap’an ni fil e Pi Mich Rok Jehovah e Bible ngak ma aram e ngiyal’ ni ke pirieg e fulweg ko pi deer rok nib tamilang. Kari pining Morena e magar ngak Jehovah ya n’en ni ke fil u Bible e riyul’ ni ke k’aring e felfelan’ ngak. Ere baadag ni nge pigpig ngak Jehovah u polo’ i gelngin. Dawori n’uw nap’an nga tomuren ni ke un ko taufe me un ko pioneer ni ayuw ni gubin e pul, ma nap’an ni ke mab e kanawo’ ngak me un ko regular pioneer. Ke gaman 30 e duw ni ke yan, ma ka be un ko pioneer.

19. Uw rogon ni nge mon’og e pigpig ni ga be tay ni fan ngak Jehovah?

¹⁹ Boor e tapigpig rok Jehovah nib yul’yul’ ndabiyog ni ngar uned ko pioneer. Demtrug rarogodad ma rayog ni ngad pigpiggad ngak Jehovah u rogon nib m’agan’ ngay. Ngaud puluwniged e ngongol rodad ko pi kenggin e motochiyel u Bible, ma dab da paged talin ni gad be fek fithingan Jehovah ni gubin ngiyal’. Ba t’uf ni nge pagan’dad nra lebguy Got e tin nib m’agan’ ngay ya ireray e kanawo’ ni ngad daged e michan’ rodad riy. Ma ngad uned i wereg fare thin nib fel’ ya ireray e n’en nra m’ug riy ni gad be rin’ e maruwel nib fel’. Gad be dag nriyul’ ni gad be pining e magar ko urngin ban’en ni ke rin’ Jehovah ni fan ngodad. Ere ngaud tedan’dad ko pigpig ni gad be tay ngak Jehovah.

[Study Questions]

[Blurb on page 27]

Bochan e ngongol nib fel’ ni ke dag Jehovah ngom, ma re n’ey e ke k’aringem ni ngam yoornag e tayim rom ni fan ko pigpig ngak, fa?

[Picture on page 25]

Ga be rin’ urngin ban’en ni rayog rom ni fan ko machib, fa?