Abraham​—e Ir Be’ nib Gel e Michan’ Rok

Reb e nep’ nib tamilang lan e lang ma immoy Abraham nib sak’iy u wen. Me changar nga lang me guy e pi t’uf, me yib ngan’ e n’en ni ke micheg Got ngak nra yoor e piin owchen ni bod urngin e pi t’uf. (Genesis 15:5) Pi t’uf nem e be puguran ngak Abraham e n’en ni ke micheg Jehovah. Maku faanra bay gelngin Jehovah ni nge sunmiy e palpalth’ib nge urngin ban’en ni bay riy, me ere gathi ku bay gelngin ni nge ayuweg Abraham nge Sarah ni ngar fakayew e bitir? Aram fene rib gel e michan’ rok Abraham.

MANG E MICHAN’? Rogon ni bay ko Bible e fare bugithin ni “michan’” e nge pagan’uy nga ban’en ndawor ni guy. Michan’ ni aray rogon e bay e mich riy nib tamilang. Be’ nib mich Got u wan’ e ma tiyan’ nga rogon nra lebguy Jehovah e tin ni ke micheg, ya ri manang nra yib i m’ug nib riyul’.

UW ROGON NI DAG ABRAHAM E MICHAN’ ROK? I dag Abraham ni ke mich u wan’ e tin ni ke micheg Got. Bochan nib gel e michan’ rok, me pag e nam rok, ya be pagan’ ngak Jehovah ni nge rin’ e n’en ni ke micheg nra dag ngak reb e binaw nib beech. I yan u lan fare binaw nu Kanaan nib pagan’ ni piin owchen e yad ra tafanay e re binaw nem. Me guy rogon ni nge pi’ Isak ni maligach ya ke mudugil laniyan’ ni faanra ba t’uf ma ra faseg Jehovah Isak ko yam’.​—Hebrews 11:8, 9, 17-19.

I tiyan’ Abraham ko tin ni bay nga m’on ma gathi tin ke m’ay. Yugu aram rogon ni kab mom e yafas rok Abraham nge Sarah u Ur ko yafas rorow u Kanaan, ‘ma daki sul e lem rorow ko fare nam ni kar chuwgow riy.’ (Hebrews 11:15) Ya ur tiyan’row u rogon nra tow’athnag Jehovah e piin owcherow boch nga m’on.​—Hebrews 11:16.

Gur, bay fan ni nge mich u wan’ Abraham e tin ni ke micheg Jehovah? Arrogon. Ke lebguy Jehovah e tin ni ke micheg. Ke yoor e piin owchen Abraham ma kar manged ba nam nib ga’ ni aram yu Israel. Me munmun mi yad par u Kanaan, ni aram fare binaw ni micheg Jehovah ngak Abraham. ​—Joshua 11:23.

MANG E GAD RA FIL RIY? Rayog ni nge mudugil u wan’dad nra lebguy Jehovah e tin ni ke micheg ngodad. Yugu aram rogon ni bay boch ko tin ni ke micheg ni gowa dabiyog ni nge riyul’, machane ke mich u wan’dad ni “Got e urngin ban’en ma rayog rok.”​—Matthew 19:26.

N’en ni ke rin’ Abraham e ku be fil ngodad ni ngaud tedan’dad ko tin ni bay nga m’on ma dab kud lemnaged e tin ni kad paged nga tomur. Ma ireray e n’en ni ke rin’ Jason. Ke yib bmit e m’ar ngak nib gel ma dabkiyog ni nge mithmith. Ke  yog Jason ni gaar: “Riyul’ ni yu ngiyal’ e ma yib ngan’ug e tayim dawori yib e re m’ar ney ngog.” Me ulul ngay ni gaar: “Ba ga’ ni tin baaray ban’en nib achig ni bod ni nggu hugnag Amanda ni ppin rog e ir e ke kireban’ug ngay ni dakir yog ni nggu rin’.”

Yugu aram rogon ma kari mich u wan’ Jason nra lebguy Jehovah e tin ni ke micheg, nib muun ngay nra paradisnag e fayleng ma ra pi’ e yafas ni manemus ngak e pi tapigpig rok nib yul’yul’ maku dab kun m’ar. * (Psalm 37:10, 11, 29; Isaiah 35:5, 6; Revelation 21:3, 4) Miki yog Jason ni gaar: “Gu ma tay nga lanin’ug ni boch nga m’on e dakuriy e magawon ni bod e mochuch, nge magafan’, nge kireban’, ma dab ki magawonnagdad e nangan’ rodad.” Rib gel e michan’ rok ni bod Abraham.

[Footnote]