Mu Folwok rok Jesus u Rogon ni i Par ni Be Tiyan’
Mu Folwok rok Jesus u Rogon ni i Par ni Be Tiyan’
“Um odgad nguum meybilgad ngak Got.”—MATT. 26:41.
UW ROGON NI GA RA FULWEG?
Uw rogon ni nge m’ug ko meybil rodad ni gad be tedan’dad?
Mang boch e kanawo’ nrayog ni nge m’ug riy ni gad be tedan’dad ko machib?
Mang nib ga’ fan ni ngaud pared ni gad be tedan’dad u nap’an ni ke yib e skeng ngodad, ma uw rogon nrayog ni ngad rin’ed e re n’ey?
1, 2. (a) Mang boch e deer nrayog ni nge sum u murung’agen rogon ni i tiyan’ Jesus ko tirok Got ban’en? (b) Rayog ni nge folwok e girdi’ ni tadenen ko n’en ni rin’ Jesus, fa? Mu susunnag.
SANA ra lungum: ‘Gur, rayog ni ngad folwokgad rok Jesus u rogon ni i par ni be tiyan’? Ya Jesus e ba flont, maku immoy yu ngiyal’ ni i yog rok ni nge nang e n’en ni bay u lan bokum biyu’ e duw nga m’on! Ere, gur rib t’uf ni nga i par ni be tiyan’?’ (Matt. 24:37-39; Heb. 4:15) Som’on e ngad guyed e fulweg ko gal deer ney ya nge yog nda nanged feni ga’ fan ni ngaud pared ni gad be tedan’dad.
2 Rayog ni nge folwok e girdi’ ni tadenen rok be’ nib flont, fa? Rayog ni bochan e rayog ni ngan fil ban’en rok reb e sensey nib fel’ min folwok rok. Am lemnag be’ ni be fil rogon e daiksang. Som’on e dabiyog ni nge goloychiy ban’en nib fel’ rogon mab k’iy. Ere n’en ni ke rin’ e ke fil rok reb e daiksang nib salap rogon ni nge rin’ e re maruwel nem. Ke fal’eg i yaliy rogon ni be maruwel fare sensey ko fare goloyoch, nge rogon ni ke par, nge rogon pa’ ni ke tay, nge rogon ni be kol fa gi palang, nge rogon ni be goloyoch. Ma de n’uw nap’an nga tomuren ma ke nang rogon ni nge maruwel ko fare goloyoch, me athamgil ni ngki salap boch. Bochan ni ke folwok ko fare daiksang nib salap, ma aram me nang rogon ni nge goloychiy ban’en nib k’iy. Ere, ku er rogodad nrayog ni ngad mon’oggad ni faan gad ra fol ko pi fonow rok Jesus mu ud folwokgad rok.
3. (a) Mang e yog Jesus ni be dag ni manang nib t’uf ni nga i par ni be tiyan’? (b) Mang e gad ra weliy ko re article ney?
3 Gur, rib t’uf ni nga i par Jesus ni be tiyan’? Arrogon, ya fare nep’ u m’on ni nge yim’ me yog ngak e pi apostal rok ni yad ba yul’yul’ ni gaar: “Nguum uned ngog ko mood.” Miki gaar: “Um odgad nguum meybilgad ngak Got, nge siy mpaged gimed ngak e pi n’en ni ma pingeg e girdi’ nge denen.” (Matt. 26:38, 41) Yugu aram rogon ni gubin ngiyal’ ni ma par ni be tiyan’, machane ngiyal’ nem e ri baadag ni nga i par ni be tiyan’ mab chugur ngak e Chitamangin nu tharmiy. Ku manang nib t’uf ni ngki folwok pi gachalpen rok, ni gathi goo ngiyal’ nem, ya gubin ngiyal’. Ere chiney e ngad weliyed fan ni baadag Jesus ni ngaud pared ni gad be tedan’dad. Ngemu’ mu kud weliyed dalip e kanawo’ nrayog ni ngad folwokgad rok Jesus riy u rogon ni i par ni be tiyan’.
FAN NI BAADAG JESUS NI NGAUD TEDAN’DAD
4. Mang fan nib t’uf ni ngaud pared ni gad be tedan’dad?
4 Baadag Jesus ni ngaud pared ni gad be tedan’dad ni bochan e pi n’en ni gad manang nge pi n’en ni dad nanged. Nap’an ni immoy Jesus u fayleng ma gubin ban’en ni i buch nga m’on ma manang, fa? Danga’, ya yog ni gaar: “Re rran nem nge re awa nem e dariy be’ ni manang e ngiyal’ nra taw riy ni mus ko pi engel ni yad bay u tharmiy, ara en ni Fak Got; ya ke mus ni en ni Chitamangiy e manang.” (Matt. 24:36) Ngiyal’ nem e de nang Jesus ni “Fak” Got e ngiyal’ ni yira thang e re m’ag nib kireb ney. Ma uw rogodad e ngiyal’ ney? Rayog ni ngad nanged e n’en ni bay nga m’on, fa? Dabiyog. Dad nanged e ngiyal’ nra l’og Jehovah fak ni nge thang e re m’ag nib kireb ney, ya faan manga gad manang ma de t’uf ni ngaud pared ni gad be tedan’dad. I yog Jesus nra yib e tomur nib tomgin u ba ngiyal’ ndan lemnag. Ere ba t’uf ni ngaud pared ni gad be tedan’dad.—Mu beeg e Matthew 24:43.
5, 6. (a) Uw rogon ni be ayuwegdad e pi n’en ni kad nanged u murung’agen Gil’ilungun Got ni ngaud pared ni gad be tedan’dad? (b) Mang fan ni ngad adaged ni ngaud tedan’dad ni bochan e pi n’en ni kad nanged u murung’agen Satan?
5 Machane, boor ban’en ni i buch nga m’on ni manang Jesus, ni boch ban’en ni yooren e girdi’ e ngiyal’ nem e dar nanged. Dabiyog ni nge taareb rogon urngin ban’en ni gad manang ngak Jesus. Machane, ngaud pininged e magar ngak ya boor ban’en ni ke fil ngodad u murung’agen Gil’ilungun Got nge n’en nra rin’ boch nga m’on. Yooren e girdi’ u toobdad ndemtrug ko girdi’ u skul, ara tabon e maruwel, ara gin ni gad be machib riy e dar nanged e pi n’ey. Ere, aram reb i fan ni ngaud pared ni gad be tedan’dad. Ba t’uf ni ngad folwokgad rok Jesus ngad gayed boch e kanawo’ nrayog ni ngad weliyed ngak e girdi’ riy e tin ni kad nanged u murung’agen Gil’ilungun Got. Re maruwel ney e rib ga’ fan, ma dubdad ni ngad digeyed boch e girdi’ ya bay e yafas rorad u thatharen e riya’!—1 Tim. 4:16.
6 Ku immoy ban’en ni manang Jesus ni aram ban’en ni ayuweg ni nge par ni be tiyan’. Manang ni ke dugliy Satan u wan’ ni nge waliy ko kireb, me gafgownag, me guy rogon ni nge dab ki par nib yul’yul’. I par Moonyan’ ni be guy e ngiyal’ nib fel’ ni nge skengnag Jesus riy, ere aram fan ni “pag nge yan nib ngoch nap’an.” (Luke 4:13) Gubin ngiyal’ ni i par Jesus ni be tiyan’, ya nge yib e skeng ngak ma rayog ni nge par nib gel ndemtrug ko yibe waliy ko kireb, ara yibe togopuluw ngak, ara yibe gafgownag. Ere, ku er rogodad. Gad manang ni ka be yan Satan ni “bod ba layon ni be tolul, ni be gayiy be’ ni nge longuy.” Aram fan ni be fonownag e Bible e piin Kristiano ni gaar: “Mu tedan’med mi gimed ayuwegmed.” (1 Pet. 5:8) Uw rogon ni ngad rin’ed e re n’ey?
ROGON NRA AYUWEGDAD E MEYBIL NI NGAUD PARED NI GAD BE TEDAN’DAD
7, 8. (a) Mang e fonow ni pi’ Jesus u murung’agen e meybil? (b) Mang e gad ra fil u rogon e meybil ni i tay Jesus?
7 Be yog e Bible nib ga’ fan e meybil ya ra ayuwegdad ni ngaud pared ni gad be tedan’dad ma gad ayuweg e tha’ u thildad Jehovah. (Kol. 4:2; 1 Pet. 4:7) De n’uw nap’an nga tomuren ni yog Jesus ngak pi gachalpen ni ngar uned ngak ko mood, me gaar ngorad: “Um odgad nguum meybilgad ngak Got, nge siy mpaged gimed ngak e pi n’en ni ma pingeg e girdi’ nge denen.” (Matt. 26:41) Gur, re fonow ney ni yog Jesus e kemus ni fan ko ngiyal’ nem? Danga’, ya re fonow nem e ban’en nthingar ud folgad riy ni gubin ngiyal’.
8 N’en ni rin’ Jesus e be dag ngodad feni ga’ fan e meybil. Sana ra yib ngan’um fa ngiyal’ nem ni par nib polo’ reb e nep’ ni be meybil ngak e Chitamangin. Ngad lemnaged e n’en ni buch. (Mu beeg e Luke 6:12, 13.) Ngiyal’ nem e sana bay Jesus u tooben fare binaw ni Kapernaum ni aram e gin nib ga’ ni ma par riy. Nap’an ni aw e lumor, me yan nga daken bburey ni bay u tooben fare lipath nu Galile. Nap’an ni be sap nga but’ nga daken e binaw, me guy raen e magal ko naun ko girdi’ u Kapernaum nge ku boch e binaw ni bay u tooben. Machane, nap’an ni tabab ko meybil ma dakuriy ban’en u tooben ni tiyan’ ngay. Boor e awa ni meybil. Bochan ni kari tiyan’ ko meybil, ma de guy e magal ko girdi’ ni math, ara pul, ara rung’ag lungun e gamanman. Dabisiy ni i yibilay ban’en nib mo’maw’ nthingari dugliy, ni aram e nge mel’eg 12 e girdi’ ni ngar manged apostal rok. Rayog ni ngad lemnaged rogon e meybil ni i tay ni ngan pow’iy, min pi’ e gonop ngak. Maku rayog ni ngad lemnaged rogon laniyan’ nge magafan’ rok ni i weliy ngak e Chitamangin.
9. Mang e gad ra fil ko meybil ni tay Jesus nib polo’ reb e nep’?
9 Mang e gad ra fil ko n’en ni rin’ Jesus? Gur, gad be fil ni thingar ud meybilgad ni boor e awa? Danga’, ya baaray e n’en ni yog u murung’agen pi gachalpen ni gaar: “Lanin’uy e ba adag, ma dowef e mmeewar.” (Matt. 26:41) Machane, rayog ni ngad folwokgad rok Jesus. Bod nu m’on ni ngad dugliyed ban’en ni bay rogon ko michan’ rodad, nge rogon ni ngad pared ni gad ba yul’yul’, nge chon e tabinaw rodad, nge girdi’ u lan e ulung, ma gad ma weliy ngak Jehovah, fa? Gad ma yibilay pi walagdad u lan e ulung, fa? Gad ma meybil ni yib u gum’ircha’dad, fa gad ma sul u daken taab n’en ko meybil rodad? Mu tay fanam i yan riy nib ga’ fan u wan’ Jesus e ngiyal’ ni ma non ko Chitamangin ni goo ir. Ngiyal’ ney ni kari yoor pa’ u puluwon e girdi’ e ba mom ni ngad paged talin e n’en th’abi ga’ fan. Faanra ud ted e tayim ni fan ko meybil ni yib u gum’ircha’dad ngak Jehovah, ma aram e rayog ni ngad pared ni gad be tedan’dad ko tirok Got ban’en. (Matt. 6:6, 7) Rayog ni ngari chugur e tha’ u thildad Jehovah, ma gad siyeg e pi n’en nrayog ni nge warnag e michan’ rodad.—Ps. 25:14.
ROGON NI NGAD TEDAN’DAD KO FARE MARUWEL NI MACHIB
10. Mang e buch ni be dag ni i par Jesus ni be tiyan’ ma be gay e kanawo’ nrayog ni nge machibnag e girdi’ riy?
10 I par Jesus ni be tiyan’ ko fare maruwel ni pi’ Jehovah ngak ni nge rin’. Bay boch e maruwel nrayog ni ngan rin’ ma ka yibe lemnag boch ban’en, ma dabi magawon fare maruwel. Machane, boor e maruwel nra nge rin’ be’ ma thingari tiyan’ ngay, ma dab ki lemnag yugu boch ban’en. Aram rogon e machib ni ma tay e piin Kristiano. Jesus e i tiyan’ ko maruwel ni kan pi’ ngak ma i gay e kanawo’ nrayog ni nge machibnag fare thin nib fel’ riy. Bod nnap’an nra tawgad pi gachalpen ko fare binaw nu Sykar ni ka ranod u but’ nib n’uw woerad, me yan pi gachalpen ni ngar chuw’iyed e ggan. Me par Jesus u tooben ba luwed ko re binaw nem ni nge toffan, machane ke par ni be tiyan’ ya nge yib be’ me machibnag. Ma aram me yib be’ nib pin nu Samaria ni nge l’ing e ran. Rayog ni nge mol Jesus fa rin’ ban’en ya nge dabi non ngak fare pin. Machane, gathi aram e n’en ni rin’, ya tabab ni nge machibnag fare pin, me yog ni ayuweg boor e girdi’ u lan fare binaw. (John 4:4-26, 39-42) Gur, rayog ni ngad folwokgad ko n’en ni rin’ Jesus ni aram e ngad guyed rogon ni ngad machibnaged e girdi’ ni gad ma mada’nag ni gubin e rran?
11, 12. (a) Mang e yog Jesus ngak e piin ni ur gayed rogon ni ngar magawonnaged ko maruwel rok? (b) Mang e be dag nda i rin’ Jesus e maruwel rok nge pag rogon?
11 Immoy yu ngiyal’ ni guy boch e girdi’ rogon ni ngar magawonnaged Jesus ko maruwel rok. Nap’an ni immoy u Kapernaum, mi ri gin e girdi’ ko maang’ang ni i ngongliy, ma aram mar adaged ni nge par rorad. Gad manang ko mang fan ni kar lemgad ni aram rogon. Machane, maruwel rok Jesus e nge machibnag urngin e “girdi’ nu Israel ni ke malog ni bod e saf,” ma gathi kemus ni girdi’ u lan taareb e binaw. (Matt. 15:24) Ere, gaar ngorad: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:40-44) Ba tamilang ni machib e aram e n’en nib ga’ fan u wan’ Jesus, ma de pag ban’en ni nge magawonnag.
12 Gur, i par Jesus ni goo maruwel e i tay ndakuriy e tayim ni nge rin’ ban’en ni nge felfelan’ ngay? Fa i par ni goo machib e be tay ma daki nang e n’en nib t’uf ko girdi’? Danga’, ya ku ma rin’ boch ban’en ni ngar felfelan’gad e pi fager rok ngay. Ba ga’ fan e tabinaw u wan’, ma i dag ni be lemnag e tin nib t’uf rorad nge magawon rorad, maku ma t’ufeg e piin bitir.—Mu beeg e Mark 10:13-16.
13. Uw rogon nrayog ni ngad folwokgad rok Jesus u rogon ni i par ni be tiyan’ ma da i rin’ e maruwel rok nge pag rogon?
13 Uw rogon ni nge dabi magawonnagdad boch ban’en u nap’an ni gad be folwok rok Jesus u rogon ni i par ni be tiyan’? Dab da paged e tin nu fayleng ban’en ni nge magawonnag e maruwel rodad. Mus ko pi fager rodad nge girdi’ rodad e rayog ni nga rogned ngodad ni ngad lichnaged e tayim rodad ko machib ara da uned ngorad ko birorad e par. Machane, faan gad ra folwok rok Jesus ma ra ga’ fan e machib ni gad be tay u wan’dad ni bod e ggan. (John 4:34) Machib ni gad ma tay e ir e ma ayuwegdad ni ngad pared nib fel’ e tha’ u thildad Jehovah ma gad ba felfelan’. Machane, de fel’ ni ngad rin’ed nge pag rogon me m’ug ni gad be lemnag ni gadad e gad ba fel’ ma dakuriy e tayim rodad ni ngad felfelan’gad nga yugu boch ban’en. Gad baadag ni ngaud pared ni gad ba felfelan’ ni bod Jesus ni gad be pigpig ngak Jehovah ni fare Got nib felfelan’.—1 Tim. 1:11.
ROGON NI NGAUD TEDAN’DAD KO NGIYAL’ NI KE YIB E SKENG NGODAD
14. Nap’an nra yib e skeng ngodad, ma mang e susun ndab da paged talin, ma mang fan?
14 Rogon ni kad filed e bay boch e fonow ni pi’ Jesus u murung’agen rogon ni ngan par ni yibe tiyan’uy ni fini pi’ ko ngiyal’ ni ke yib e skeng nib gel ngak. (Mu beeg e Mark 14:37.) Nap’an nra yib e skeng nib gel ngodad, mab t’uf ni ngad lemnaged e n’en ni rin’ Jesus. Boor e girdi’ e nap’an ni yad ra mada’nag e skeng mi yad pagtalin ban’en nrib ga’ fan ni l’agruw yay nni sul u daken u Proverbs ni be gaar: “Re kanawo’ ni ga be lemnag nib manigil e rayog ni nge sor ko yam’.” (Proverbs 14:12, BT; 16:25) Faan gad ra taga’ ko n’en ni gad be lemnag, nib ga’ nu nap’an ni ke yib e magawon nib gel ngodad, mab mom ni ngad rin’ed ban’en ni gad ra gafgow e piin nib t’uf rodad riy.
15. Mang e ba mom nra rin’ be’ ni lolugen e tabinaw u nap’an ni be mo’maw’ ni nge yognag e tin nib t’uf ko tabinaw rok?
15 Bod nrayog ni nge magawon be’ ni lolugen e tabinaw u rogon ni nge yognag e tin nib t’uf rok “girdien e tabinaw rok.” (1 Tim. 5:8) Ere ba mom ni nge adag ni nge un nga reb e maruwel nra mo’maw’nag ngak ni nga i un ko muulung, ara i ayuweg e tabinaw rok ko fol Bible, ara i un ko machib. Faanra rin’ e n’en ni be lemnag, ma aram e rayog ni nge lemnag nib fel’ ni nge un ko re maruwel nem. Machane, rayog ni nge magawonnag e tha’ u thilrow Jehovah ara rin’ ban’en nib togopuluw ko motochiyel rok. Ere, ba fel’ ni nge fol ko fare fonow ni pi’ Solomon u Proverbs 3:5, 6 ni gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.”
16. (a) Mang e kanawo’ ni dag Jesus nib fel’ ni ngan folwok riy u rogon ni i pagan’ ko gonop rok Jehovah ma gathi lem rok? (b) Uw rogon ni be folwok e piin lolugen e tabinaw rok Jesus u rogon ni i pagan’ ngak Jehovah u nap’an ni yib e magawon ngak?
16 Nap’an ni yib e skeng ngak Jesus, ma de taga’ ko tin ni be finey ni manang. Aygum lemnag! Re moon nth’abi gonop ni immoy u fayleng e dugliy u wan’ ndabi tor ko gonop rok. Bod nnap’an ni guy Satan rogon ni nge waliy ko kireb, ma boor yay ni fulweg ni gaar: “Babyor nib thothup e be gaar.” (Matt. 4:4, 7, 10) I taga’ nga daken e gonop rok e Chitamangin ya nge yog ni siyeg e n’en ni yibe waliy ngay me dag nib sobut’an’, ni aram ban’en ndariy rok Satan. Gad ma rin’ ni aram rogon, fa? Be’ ni lolugen e tabinaw ni ma folwok rok Jesus u rogon ni i par ni be tiyan’ e ma pag e Thin rok Got ni nge pow’iy, nib ga’ nu nap’an ni ke mada’nag e skeng. Boor e pumoon ni lolugen e tabinaw u ga’ngin yang e fayleng ni yad be rin’ e re n’ey. Yad be m’oneg Gil’ilungun Got nge bin riyul’ e liyor u wan’rad, ma gathi chugum. Bochan ni yad ma rin’ e pi n’ey, ma aram fan ni yad ma ayuweg e tabinaw rorad nib fel’ rogon, ma ma tow’athnagrad Jehovah ni aram e ma pi’ e tin nib t’uf rorad ni bod rogon ni ke micheg.—Matt. 6:33.
17. Mang e be k’aringem ni ngam folwok rok Jesus u rogon ni i par ni be tiyan’?
17 Dariy e maruwar riy ni ke dag Jesus e bin th’abi fel’ e kanawo’ u rogon ni ngan par ni yibe tiyan’uy. N’en ni i rin’ e rayog ni nge ayuwegdad, me yib angin ngodad, me ayuweg e yafas rodad. Dab mu pagtalin ni be guy Satan rogon ni nge dab kum tiyan’um ko tirok Got ban’en, me war e michan’ rom, ma dab kum pigpig ngak Jehovah ni gab pasig, ma dab kum par ni gab yul’yul’. (1 Thess. 5:6) Dab mu pag ni nge gel ngom! Um par ni ga be tiyan’um ko meybil, nge machib, ma ga pagan’um ngak Jehovah u nap’an ni ke yib e skeng ngom ni bod ni rin’ Jesus. Faan ga ra rin’ ni aray rogon, ma aram e rayog ni ngam par ni gab felfelan’ u lan e re fayleng nib kireb ney ni ke chugur ni ngan thang. Faanra um par ni ga be tiyan’um, ma nap’an nra yib Jesus ni nge thang e re m’ag ney, ma ra guy ni ga be par ni gab pasig ni ga be rin’ e tin nib m’agan’ e Chitamangin ngay. Rra felfelan’ Jehovah ni nge tow’athnagem ni bochan e kam par ni gab yul’yul’!—Rev. 16:15.
[Study Questions]
[Picture on page 16]
I machibnag Jesus fare pin u tooben e luwed. Ere, mang boch e kanawo’ ni ga ma machib riy u gubin e rran?
[Picture on page 17]
Ga ra ayuweg chon e tabinaw rom ko tirok Got ban’en ma aram e be m’ug ni ga be par ni ga be tiyan’um
