Ngan Ayuweg e Girdi’ u Lan e Ulung Ngar Pared ni Yad Ba Pasig

“I Jesus Kristus ni ir e Somol rodad e ngi i ayuwegmed ni gimed gubin.”​—FIL. 4:23.

UW ROGON NRAYOG NI NGAD AYUWEGED E ULUNG U NAP’AN NI . . .

gad be chag ngak e pi walag?

gad be machib u fithik’ e pasig?

gad be yog e denen nib ubchiya’ ni ke rin’ be’ ngak e piin piilal?

1. Mang fan ni ke yog Paul murung’agen e ulung nu Filippi ngu Thyatira nib fel’?

 PI KRISTIANO nu Filippi ko bin som’on e chibog e yad ba gafgow. Machane yad ba gol ma yad ma t’ufeg pi walagrad. (Fil. 1:3-5, 9; 4:15, 16) Aram fan ni yog Paul e bin tomur e thin ko babyor ni yoloy nge yan ngorad ni gaar: “I Jesus Kristus ni ir e Somol rodad e ngi i ayuwegmed ni gimed gubin.” (Fil. 4:23) Ma pi Kristiano nu Thyatira e ku aram e n’en ni ur rin’ed, ere yog Jesus Kristus ngorad ni gaar: ‘Gu manang e n’en ni gimed be rin’. Gu manang rogon nib t’uf Got romed nge girdi’, nge fanmed yul’yul’, nge pigpig ni gimed be tay, nge fanmed gum’an’. Gu manang ni ke gel e maruwel ni gimed be tay e chiney ko som’on.’​—Rev. 2:19.

2. Uw rogon ni ngongol rodad e rayog ni nge kirebnag ara fal’eg laniyan’ e girdi’ u lan e ulung?

² Ba thilthil rarogon e ulung ko Pi Mich Rok Jehovah e ngiyal’ ney. Boch e ulung e ba ga’ ni yad ma dag e t’ufeg. Ma boch e ulung e ri yad ba pasig ko machib ma rib ga’ fan u wan’rad e pigpig ni yad ma tay u polo’ e tayim rorad. Faanra gad be athamgil ni ngad pared ni gad ba pasig ko tirok Got ban’en, ma aram e gad be ayuweg e ulung ni nge par nib taareban’ e girdi’ riy mar mon’oggad ko tirok Got ban’en. (1 Kor. 1:10) Machane faanra bay e girdi’ nib kireb e ngongol rorad ma rayog ni ngar warnaged e michan’ rok e tin ni ka bay e girdi’ u lan e ulung ma aram e dab kur pasiggad ko machib, ma ku rayog ndab ra yal’uweged e girdi’ u lan e ulung ni kar ngongliyed e denen nib ubchiya’. (1 Kor. 5:1; Rev. 3:15, 16) Uw rogon e ulung rom? Uw rogon ni ngam ayuweg e girdi’ u lan e ulung rom ni ngar pared ni yad ba pasig ko tirok Got ban’en?

 NGAN PI’ E ATHAMGIL NGA LANIYAN’ E GIRDI’ U LAN E ULUNG

3, 4. Uw rogon nrayog ni ngad ‘pininged e magar’ ngak Jehovah u lan e ulung?

³ I yon’ fare psalmist reb e tang ni gaar: “Bay gu pining e magar ngom u lan e muulung rok pi girdiem; Bay gu pining e sorok ngom u p’eowcherad ni yad gubin.” (Ps. 35:18, BT) Fare psalmist e pining e sorok ngak Jehovah u nap’an ni be chag ngak e pi tapigpig rok Got. Muulung rodad ni yima tay u gubin e wik ni bod e Fol Wulyang ko Damit e be pi’ e kanawo’ ngodad ni ngad daged e michan’ rodad ma gad ba pasig u daken e fulweg ni gad ma pi’. Ere thingar da fithed gadad ni nge lungudad: ‘Gu ma pi’ e fulweg u nap’an e muulung u rogon nrayog rog? Gu ma fal’eg rogog ni nge yog ni nggu pi’ e fulweg nib fel’? Gu ma ayuweg e bitir rog ni ngar fal’eged rogorad ma gu ma fil rogon ngorad ni ngar pied e fulweg nrogon ni kar nanged fan, fa?’

⁴ I yon’ David reb e tang ngak Jehovah ni gaar: “Got, rib pagan’ug ngom. Bay gu tang nggu pining e sorok ngom.” (Ps. 57:7) Pi tang nib ga’ ni yima yon’ u nap’an e muulung e ke bing e kanawo’ ngodad ni ngad ‘tanggad’ ngak Jehovah nib pagan’dad. Faanra dawori mit e pi tang ney ngodad ma rayog ni ngad filed u nap’an e Fol Bible ni Tabinaw ni gad ma tay. Ma yibe athapeg ni nge mudugil lanin’dad ni ngad ‘tangnaged Somol u n’umngin nap’an e yafos rodad; bay ud tangnaged e Got rodad u n’umngin nap’an e yafos rodad ni gad be pining e magar nge sorok ngak.’​—Ps. 104:33.

5, 6. (a) Uw rogon ni ngad golgad ngak boch e girdi’? (b) Uw rogon nra pi’ e re n’ey e athamgil nga laniyan’ e girdi’ u lan e ulung?

⁵ Ngan gol ngak e pi walag u lan e ulung e reb e kanawo’ ni ngan pi’ e athamgil nga laniyan’ e girdi’ ni ngar t’ufeged yad. Tin tomur e guruy ko fare babyor ni yoloy Paul ni yan ngak piyu Hebrew e bay e thin riy ni gaar: “Um pired ni ra bigimed ma ba t’uf bigimed rok nrogon e walag ni ma par u fithik’ Kristus. Dab mpaged talin ni ngam ayuweged e milekag ni kar bad nga tabinaw romed.” (Heb. 13:1, 2) Ggan ni yibe pi’ ni fan ngak e piin ni yad be lekag e ulung nge ppin rorad ara pi walagdad ni yad be pigpig u polo’ e tayim rorad e reb e kanawo’ nrayog ni ngan gol ngorad. Ngkud lemnaged e piin nib pin ni ke yim’ e pumoon rorad, nge tabinaw ni taareb e labthir riy. Rayog ni ngad ayuweged yad ni faan yad ra un ngodad ko abich yu ngiyal’ ara u nap’an e fol Bible ni tabinaw.

 ⁶ Ke yog Paul ngak Timothy ni nge pi’ e athamgil nga laniyan’ e pi walag ni “ngar ngongliyed e tin nib fel’, ma ngongol nib fel’ e nge yoor ni ngar ngongliyed, ma ngar golgad ni nge m’agan’rad ngay ni ngar pied boch e tin ni ba’ rorad ban’en ngak boch e girdi’. Ereray kanawoen mi yad kunuy e flaab ni fan ngorad ni ir e bay mang def ngorad nib gel ni fan ngorad e chiney i yan ngaram. Ma aram e ra yog ngorad e yafos ni ir e bin riyul’ e yafos.” (1 Tim. 6:17-19) Re thin ney ni ke yog Paul e be pi’ e athamgil nga laniyan’ e pi walag ni ngar golgad. Ere mus ko ngiyal’ ney ni ke gel e magawon ko salpiy, maku rayog ni ngad golgad ngak e girdi’. Reb e kanawo’ nrayog ni ngan rin’ e re n’ey riy e ngan fek e piin nib t’uf e ayuw rorad ko karrow nge yog ni ngar uned ko machib mu kun ayuwegrad nge yog ni ngar uned ko muulung. Ma uw rogon e pi girdi’ ney ni yibe ayuwegrad? Ku rayog ni ngar pied e ayuw nrogon rayog rorad ya nge yog ni ngan chuw’iy e pensin ko karrow nge boch ban’en riy ni kub t’uf. Maku rayog ni ngad ayuweged yad ni faanra ngad ted boch e tayim ni fan ngorad, mi yad ra nang ni yad ba t’uf rodad. Faan gad ra rin’ boor ban’en nib fel’ “ngak e piin ni kad manged girdien e tabinaw rok Got” ma ke m’agan’dad ngay ni ngad pied e tayim nge boch ban’en ni bay rodad ngorad, ma gathi kemus ni gad be gelnag e t’ufeg rodad ngorad, ya ku gad be ayuweged yad ni ngar pared ni yad ba pasig u lan e ulung.​—Gal. 6:10.

7. Uw rogon nra yib angin ko ulung ni faanra dab da weliyed boch ban’en nib mith u murung’agen pi walagdad?

⁷ Rogon ni nge par e tha’ u thildad pi walagdad nib fel’ e dab da weliyed boch ban’en nib mith u murung’agrad, ma re n’ey e ra gelnag e t’ufeg u thildad. (Mu beeg e Proverbs 18:24.) Tin riyul’ e fager e darur ma weliyed boch ban’en nib mith u murung’agen e girdi’. Nap’an nra yog reb e walag boch ban’en ngodad ma be pagan’ ngodad ndab da weliyed ngak boch e girdi’. Re n’ey e ra gelnag e t’ufeg u thildad. Ngad athamgilgad ndab da weliyed e tin nib mith u murung’agen pi walagdad ma ngad ayuweged e ulung rodad nge mang ba tabinaw ni bay e t’ufeg riy.​—Prov. 20:19.

NGAUN PASIG KO MACHIB

8. Mang e kan fonownag e pi Kristiano nu Laodicea riy, ma mang fan?

⁸ Nap’an ni non Jesus ngak fare ulung nu Laodicea, me gaar: “Gu manang e n’en ni kam rin’; gu manang nda mu garbeb ma da mu gowel. Gu be athapeg ni manga yugu mmang reb e gali n’ey! Machane bochan e gab mathilin ni gathi ri gab gowel, ma ku da mu garbeb, ma aram e gu be n’en ni nggu thuwegem ngam chuw u lan l’ugunag!” (Rev. 3:15, 16) Re ulung nem e gathi ri yad ba pasig ko machib, ma bochan e re n’em ma ke magawon e tha’ u thilrad. Ere ke fanownagrad Jesus ni gaar: “Gu ma puwan’ ma gu ma gechignag urngin e piin ni yad ba t’uf rog. Ere  mu tiyan’um ngam pi’ keruum ko denen ni ga be rin’.”​—Rev. 3:19.

9. Faanra gad ba pasig ko machib, ma uw rogon nra yib angin ko ulung rodad?

⁹ Faanra gad baadag ni nge mon’og e ulung rodad ko tirok Got ban’en, ma thingar da pasiggad ko machib. Kan yarmiy e ulung ni nge gay e piin ni baadag e machib, min ayuwegrad ni ngar mon’oggad ko tirok Got ban’en. Aram fan nib t’uf ni ngad filed e thin rok Got ngak e girdi’ u fithik’ e pasig ni bod e n’en ni rin’ Jesus. (Matt. 28:19, 20; Luke 4:43) Gad ra rin’ ma rayog ni ngad ‘maruwelgad Got u taabang’ ni ke taareban’dad. (1 Kor. 3:9) Nap’an ni gad be guy pi walagdad ni yad be weliy ngak e girdi’ murung’agen e michan’ rorad ma yad be dag nib ga’ fan e tirok Got ban’en u wan’rad ma re n’ey e ra k’aringdad ni ngad t’ufeged yad ma gad tay farad. Maku gad ra pigpig ngak Got ‘u taabang’ u nap’an e machib ma ra ayuweg ni nge taareban’ e girdi’ u lan e ulung.​—Mu beeg e Zefaniah 3:9, NW.

10. Faanra kad m’onoggad u rogon e machib ni gad ma tay ma mang angin nra yib ngak boch e girdi’ u lan e ulung?

¹⁰ Faan gad ra athamgil ni ngad m’onoggad u rogon e machib ni gad ma tay ma ra yib angin ngak boch e girdi’. Faanra riyul’ ni gad ma lemnag rarogon e girdi’ ni kad mada’naged u nap’an e machib, ma gad guy rogon ni nge taw e thin rok Got nga gum’ircha’rad, ma ra gel e pasig rodad ko machib. (Matt. 9:36, 37) Faanra gadad e tamachib ni gad ba pasig, ma girdi’ ni yad be un ngodad e ku yad ra pasig. Aram fan ni ke l’og Jesus pi gachalpen ni nga ranod ko machib ni yad lal’agruw. (Luke 10:1) Re n’ey e gathi kemus ni ke pi’ e athamgil nga lanin’rad ya kur pasiggad boch ko machib. Ya dabisiy ni gad baadag ni ngad maruwelgad pi walagdad ni yad ba pasig u taabang. Bochan e lem rorad nib pasig, ma ku ra k’aringdad ni ngkud pasiggad.​—Rom. 1:12.

NGAN KOL AYUW KO GUN’GUN’ NGE NGONGOL NIB KIREB

11. Uw rogon e ngongol rok piyu Israel u nap’an Moses, ma mang wenegan ni yib ngorad?

¹¹ In e wik nga tomuren ni ke mel’eg Jehovah piyu Israel ni ngar manged ba nam, mar tababgad ko gun’gun’. Re n’ey e ke k’aringrad ni ngar togopuluwgad ngak Jehovah, nge Moses, nge Aron. (Ex. 16:1, 2) Kemus ni buchuuw e girdi’ nu Israel ni kar chuwgad u Egypt e ke yog ni ngar guyed fare Nam ni Kan Micheg. Mus ngak Moses ma dan pag ni nge yan nga lan fare binaw ni bochan e n’en ni ke rin’ u nap’an ni togopuluw piyu Israel ngak. (Deut. 32:48-52) Mang e rayog ni ngad rin’ed e ngiyal’ ney ya nge yog ni ngad adaged ni ngad rin’ed e tin nib fel’?

12. Uw rogon ni ngad kol ayuwgad ni nge dab kud gun’gun’gad?

¹² Thingar da kol ayuwgad ndab kud pared ni gad be gun’gun’. Sobut’an’ nge tayfan ngak e piin ni yad bay u reb e liw e ra ayuwegdad. Maku ra ayuwegdad ni faan gad ra mel’eg e piin ni ngaud chaggad ngorad. Bay wenegan ni faanra ngad mel’eged e n’en ni yima chuweg e chalban rodad ngay nib kireb, ara boor e tayim ni gad ma chag ngak e girdi’ u taban e maruwel, ara girdi’ u skul ni darur folgad ko motochiyel rok Jehovah. Gadad ba gonop ni faanra dab da fanayed boor e tayim ni ngad chaggad ngak e girdi’ nib kireb e ngongol rorad ara piin ni ma k’aringdad ni nge dab da folgad rok Got.​—Prov. 13:20.

13. Mang magawon e ra sum u lan e ulung ni bochan e girdi’ ni ma gun’gun’ nib togopuluw ngak e pi walag?

¹³ Nap’an nra gun’gun’ e girdi’ u lan e ulung ni gubin ngiyal’, ma re n’ey e rayog ni nge k’aringrad ni ngar rin’ed e ngongol nra kirebnag e tha’ u thilrad Jehovah. Ni bod ni rayog ni nge kirebnag e gapas nge taareban’ u lan e ulung. Maku faanra ngan weliy boch ban’en nib togopuluw ngak e pi walag  ma gathi kemus nra amithnag lanin’rad, ya rayog ni nge ga’ fare magawon ni bochan e yad be t’ar e thin nga dakenrad maku yad be fanenikayrad. (Lev. 19:16; 1 Kor. 5:11) Boch e girdi’ ko bin som’on e chibog e yad ma gun’gun’ ma yad ma “darifannag e piin ni ma yog e thin ma ku yad ma yog e thin nib togopuluw ngak e pi walag.” (Jude 8, 16, NW) Dariy e maruwar riy ni girdi’ ni ma rin’ boch ban’en ni aram rogon e dabiyog ni nge fel’ e tha’ u thilrad Jehovah.

14, 15. (a) Mang e ra buch ko ulung nfaanra dab ni yal’uweg e kireb riy? (b) Mang e thingar da rin’ed nfaanra gad manang ni bay be’ u lan e ulung ni be rin’ ban’en nib kireb nib mith?

¹⁴ Uw rogon ni faanra kad nanged ni bay reb i walagdad ni be rin’ ban’en nib kireb ndan nang, ni bod ni be unum e rrum nib pag rogon, ara ma yaliy e kachido ni yaan e puwlag, ara ma un ko ngongol ni darngal? (Efe. 5:11, 12) Faanra dab dogned e tin nib kireb ni ke rin’ ma rayog ni nge chuweg Jehovah gelngin nib thothup u lan fare ulung. (Gal. 5:19-23) Ke yog Paul ngak e Kristiano nu Korinth ni thingar ra “n’iged” e is ni ke n’uw nap’an. Maku arrogon e ngiyal’ ney ni thingar da chuweged e tin nib kireb u lan e ulung, ya nge yog ni nge par e girdi’ ni bay riy ni yad ba pasig. Mang e rayog ni ngam rin’ ya nge par ni bay e gapas u lan e ulung?

¹⁵ Bod ni kan weliy faram, ba ga’ fan ndab ni weliy boch ban’en nib mith ni ke yog boch e girdi’ ngodad u murung’agrad. Rayog ni ngan kirebnag laniyan’ be’ ni faanra un weliy e tin nib mith u murung’agen. Machane, faanra bay be’ ni ke ngongliy e denen nib ubchiya’ ma thingar nog ngak e piin piilal. (Mu beeg e Levitikus 5:1.) Ere faanra kad nanged ni bay reb e walag ni ke ngongliy e denen ni aram rogon, ma thingar dogned ngak ni nge non ngak e piin piilal me ning e ayuw ngorad. (Jas. 5:13-15) Machane faanra dabi rin’ ma susun e gadad e nga dogned ngak e piin piilal.

16. Faanra nga dogned reb e denen nib ubchiya’ ni ke rin’ be’ ngak e piin piilal, ma uw rogon nra ayuweg e re n’ey e ulung?

¹⁶ Ulung ko Kristiano e susun ni bay e pagan’ riy, ere thingar u dogned e denen nib ubchiya’ ni ke rin’ be’ ya nge yog ni ngad ayuweged e ulung. Faanra rayog ni nge ayuweg e piin piilal facha’ nge kalngan’ me adag ni nge fol ko fonow ni kan pi’ ngak ma aram e dabki magawonnag e ulung. Machane faanra dabi kalngan’ maku dabun ni nge fol ko fonow ni ke pi’ e piin piilal ngak, ma uw rogon? Ngan tharbog ko ulung. Ma aram e rayog ni nge ayuweg e piin piilal ni dabkiyog ni nge af e ngongol rok nib kireb ngak e pi walag u lan e ulung. (Mu beeg e 1 Korinth 5:5.) Ere faanra kad nanged ni bay reb e walag ni ke rin’ e denen nib ubchiya’ ma aram e ke milfan ngodad ni nga dogned ngak e piin piilal ma ngad folgad ko n’en ni yad ra yog ngodad. Ngad rin’ed e tin th’abi fel’ rodad ni fan ngak pi walagdad u lan e ulung.

UM PIRED NI GIMED “TAAB GIRDI’”

17, 18. Mang e ra ayuwegdad ni nge yog ni ngad pared ni ‘gadad taab girdi’’?

¹⁷ Pi gachalpen Jesus kakrom e ur folgad ko ‘machib’ rok e pi apostal, ma re n’em e ke ayuwegrad ni ngar pared ni ke taareban’rad. (Acts 2:42) Ba ga’ fan u wan’rad e fonow ni i pi’ e piin piilal ngorad. Ku arrogon e ngiyal’ ney ni bay e ayuw ni yima pi’ ko ulung ni ngar pared nib taareban’rad ya bay e piin piilal ni be ayuwegrad ma yad be fol ko n’en ni be yog fare tapigpig nib yul’yul’ mab gonop. (1 Kor. 1:10) Nap’an ni gad ra fol u rogon ni be pow’iydad e ulung rok Jehovah ma gad be fol ko n’en ni be yog e piin piilal ngodad ma ra m’ug riy ni gadad be ‘athamgil ni ngaud pared ni gadad taab girdi’.’​—Efe. 4:3.

¹⁸ Ere ngad rin’ed e tin rayog rodad ni nge yog ni ngad ayuweged e ulung ni nge par nib pasig ko tirok Got ban’en. Faan gad ra rin’ ni aram rogon ma ke mudugil ni ‘Jesus Kristus ni ir e Somol rodad e ngi i ayuwegdad.’​—Fil. 4:23.

[Study Questions]

[Picture on page 24]

Gur, ga be ayuweg e ulung u nap’an ni ga be fal’eg rogom ni ngam pi’ e fulweg u nap’an e muulung?

[Picture on page 25]

Gad be ayuweg e ulung ni faanra ngad athamgilgad nge mit e pi tang ko ulung ngodad