Ngad Ayuweged e Girdi’ ‘Ngar Odgad’

“Kam nanged e re awa ni ke taw ngay, ya ke taw nga nap’an ni ngam odgad.”​—ROM. 13:11.

RAYOG NI NGAM WELIY?

Mang fan nthingari par e piin Kristiano ni yad ba od?

Mang fan nsusun e ngaud tedan’dad u nap’an e machib?

Mang fan ni ngaud machibnaged e girdi’ u fithik’ e sumunguy?

1, 2. Mang e be rin’ yooren e girdi’ nu fayleng?

 GUBIN e duw ni ma yim’ bokum biyu’ e girdi’ ni yad be yan u otobay ni bochan e ke yib e chuchuw ngorad ara yad be mol. Ma boch e girdi’ e yima talegrad ko maruwel ni bochan e der yog ni nga ranod ko maruwel nib papey ya yad ma od ni ke misiw’, ara bochan ni yad be mol u nap’an e maruwel. Re n’ey e faan yira taareb rogonnag ko tirok Got ban’en ma bay e riya’ riy. Aram fan ni be yog e Bible ni gaar: “Ra felfelan’ e en ni ke par ni be od.”​—Rev. 16:14-16.

² Nap’an ni be chugur e Armageddon ma yooren e girdi’ nu fayleng e bod ni yad be mol. Mus ko pi tayugang’ ko pi yurba’ i teliw ni yad ma yog ni yad e Kristiano e ka rogned ni girdien e galesiya rorad e bod ni yad be mol. Mang e be yip’ e re n’ey fan? Mang nib ga’ fan ni nge par e tin riyul’ e Kristiano ni yad ba od? Uw rogon ni ngad ayuweged e pi girdi’ nem ni yad be mol?

UW ROGON E PIIN NDAR NANGED E TIN NIB M’AGAN’ GOT NGAY?

3. Uw rogon be’ nder rin’ e tin nib m’agan’ Got ngay?

³ Be’ ni be mol e de nang e n’en ni be buch u tooben. Aram rogon e girdi’ nu fayleng. Kar pared ni tirorad ban’en e ir e yad be lemnag, maku yad be rin’ e tin rayog rorad ni ngar felfelan’gad, me gilbugurad, me yoor e salpiy rorad. Bochan ni ireray e pi n’en ni kar mitgad riy, ma aram fan ndar nanged e tin nib m’agan’ Got ngay ni ngar rin’ed. Machane, piin ni yad be tedan’rad e taareb rogorad ngak be’ ni be par nib od ni bochan e yad manang ni gad be par ko ‘tin tomuren e rran.’ Ere aram fan ni yad be rin’ e tin nib m’agan’ Got ngay ni yad ba pasig.​—2 Pet. 3:3, 4; Luke 21:34-36.

4. Mang fan fare fonow ni gaar: “Dab ud molod ni bod boch e girdi’”?

⁴ Mu beeg e 1 Thessalonika 5:4-8. U roy e be yog apostal  Paul riy ko girdi’ ndab ur “molod ni bod boch e girdi’.” Mang e be yip’ fan? Reb e kanawo’ nrayog ni nge m’ug riy ni gad be ‘mol’ e faanra gad be darifannag e pi motochiyel rok Jehovah. Ku reb e kanawo’ nrayog ni nge m’ug riy ni gad be ‘mol’ e faanra ud lemnaged ndawori chugur ni nge thang Jehovah e piin ndarur folgad rok. Thingar da kol ayuwgad ndabi af e lem nge ngongol ko girdi’ ni aray rogon ngodad.

5. Uw rogon e lem rok e piin ndarur rin’ed e tin nib m’agan’ Got ngay?

⁵ Boch e girdi’ e yad ma lemnag ni dariy e Got ma dabi pufthinnagrad ko kireb ni yad be rin’. (Ps. 53:1) Maku boch i yad e ma lemnag nder ma lemnagdad Got, ere dariy rogon ni ngkud lemnaged. Ma boch i yad e ma lemnag ni faan yad ra un nga barba’ e teliw ma aram e yad ra mang fager rok Got. Girdi’ ni aray rogon e darur rin’ed e tin nib m’agan’ Got ngay. Ere uw rogon ni ngad ayuweged yad?

THINGAR DA PARED NI GAD BA OD

6. Mang fan nthingar da pared ni gad ba od?

⁶ Rayog ni ngad ayuweged boch e girdi’ ni ngar pared ni yad ba od ni faanra darud molod. Mang e ba muun ko re n’ey? Thingar da siyeged e ngongol ko piin ndarur rin’ed e tin nib m’agan’ Got ngay. Be yog e Bible ni girdi’ ni aray rogon e yad be rin’ “ngongolen fithik’ e lumor.” Pi n’ey e ba muun ngay e mur ni bay e muun rrum riy, nge chingaw nib pag rogon, nge ngongol ndarngal, nge puwlag, nge cham, nge awan’. (Mu beeg e Roma 13:11-14.) Gubin ngiyal’ ni gad ma guy e ngongol ni aray rogon. Ere ba ga’ fan ni ngad tedan’dad. Be’ ni be yan u karrow e thingar dabi pagtalin ni faanra mol ma rayog ni nge yim’. Ere ri kub ga’ fan ni nge nang e piin Kristiano ni faanra der rin’ be’ e tin nib m’agan’ Got ngay ma rayog ni nge mul e yafas rok u pa’!

7. Mang e rayog ni nge buch rodad ni faanra de puluw rogon ni gad ma lemnag e girdi’ ko gin ni gad ma machib riy?

⁷ Bod nrayog ni nge lemnag reb e Kristiano ndakuriy be’ ko gin ni ma machib riy ni baadag ni nge motoyil ko fare thin nib fel’ ma dab ra thilgad. (Prov. 6:10, 11) Rayog ni nge gaar, ‘Mang fan ni nggu athamgil ni nggu ayuweg e girdi’ ni faanra dariy bagayad nra motoyil?’ Riyul’ ni boor e girdi’ ndarur motoyilgad e ngiyal’ ney, machane rayog ni nge thil boch ban’en ko par rorad, miki thil e lem rorad, mi yad adag ni ngar motoyilgad. Ere rayog ni ngad ayuweged yad ni faan gad ra lemnag yugu boch e kanawo’ ni ngad weliyed fare thin nib fel’ riy ngorad. Re n’ey e kub muun ngay ni ngaud lemnaged feni ga’ fan e machib ni gad ma tay.

MANG NIB GA’ FAN E MACHIB NI GAD MA TAY?

8. Mang nib ga’ fan e machib ni gad ma tay?

⁸ Demtrug ko be motoyil e girdi’ fa danga’, ma dab mu pagtalin ni machib ni gad ma tay e be pining e sorok ngak Jehovah, maku aram reb e kanawo’ ni be lebguy riy e tin nib m’agan’ ngay. Dab ki n’uw nap’an ma bay ni pufthinnag e piin ndab ra motoyilgad ko fare thin nib fel’. Yira pufthinnag e girdi’ ni be yan u rogon e n’en ni kar rin’ed u nap’an nra rung’aged fare thin nib fel’. (2 Thess. 1:8, 9) Ere gad ba balyang ni faan gad ra lemnag nde t’uf ni ngad pasiggad ko machib ni bochan e bay ni “faseg urngin e girdi’ ko yam’, ni tin nib fel’ nge tin nib kireb.” (Acts 24:15) Kad filed u Bible ni piin ni kan pufthinnagrad ma kan pirieg ni yad bod e “kaming” e yira thangrad. Machib ni gad be tay e aram reb e kanawo’ ni be dag Got e runguy rok riy ni bochan e be pi’ e tayim ko girdi’ ni ngar thilyeged e ngongol rorad ya nge yog e “yafas ndariy n’umngin nap’an” ngorad. (Matt. 25:32, 41, 46; Rom. 10:13-15) Ere, uw rogon me rung’ag e girdi’ fare thin nib fel’ nra yognag e yafas ngorad ni faanra dab da machibnaged yad?

9. Uw rogon ni ke yib angin ngom e machib ni ga ma un ngay nge boch e girdi’?

⁹ Ku ra yib angin fare maruwel ni machib ngodad. (Mu beeg e 1 Timothy 4:16.) Gathi kam pirieg ni faan ga ra weliy murung’agen Jehovah  nge Gil’ilungun ma ma gel e michan’ nge t’ufeg rom ngak? Gathi ke ayuwegem e re n’ey ni ngam mon’og u rogon ni be m’ug fel’ngin e Kristiano ko ngongol rom? Ma gathi ga ma felfelan’ u nap’an ni ga ra weliy murung’agen e t’ufeg rom ngak Got u nap’an e machib? Boor e tapigpig rok Got ni kar filed e tin riyul’ ngak e girdi’ ni kar felfelan’gad ni bochan e kar guyed rogon ni ke ayuweg gelngin Got nib thothup e pi girdi’ ney ni ngar thilyeged e ngongol rorad.

PI TAMACHIB NIB FEL’ E YAD MA TEDAN’RAD

10, 11. (a) Uw rogon ni i tiyan’ Jesus nge Paul ko pi n’en nib t’uf ko girdi’? (b) Uw rogon ni ngad tedan’dad u nap’an e machib?

¹⁰ Boor e kanawo’ nrayog ni ngad machibnaged fare thin nib fel’ riy nra adag e girdi’ ni ngar motoyilgad ngay. Ere thingar da tedan’dad u nap’an e machib. Jesus e ir e dag e bin th’abi fel’ e kanawo’ ni ngad folwokgad riy. Bochan nib flont, ma aram fan nnap’an ni guy reb e Farise ni ke damumuw, me nang, ni yugu aram rogon ndariy ban’en ni ke yog, maku nap’an ni guy be’ nib pin ni tadenen ni ke kalngan’ me nang, maku er rogon fare pin ni ke yim’ figirngin ni ke guy ni ke pi’ urngin ban’en ni bay rok. (Luke 7:37-50; 21:1-4) Rayog ni nge ayuweg Jesus e girdi’ ni bochan e manang e tin nib t’uf rorad. Machane, gadad e de t’uf ni ngad flontgad mfini yog ni ngad nanged e tin nib t’uf ko girdi’. Ke dag apostal Paul e kanawo’ nrayog ni ngad folwokgad riy u rogon ni ngad rin’ed e re n’ey. Boor e kanawo’ ni i machib riy ya nge yog ni ayuweg urngin e girdi’.​—Acts 17:22, 23, 34; 1 Kor. 9:19-23.

¹¹ Faan gad ra athamgil ngad folwokgad rok Jesus nge Paul, ma aram e rayog ni ngad nanged rogon ni ngad ayuweged e girdi’. Bod nnap’an ni ga be non ngak be’ mag fal’eg i yaliy boch ban’en nra ayuwegem ni ngam nang rarogon e yalen rok, nge pi n’en ni baadag, nge rogon e tabinaw rok. Sana rayog ni ngam nang e n’en ni be rin’ e ngiyal’ nem, ere rayog ni ngam weliy ban’en riy u nap’an ni ga ra non ngak.

12. Mang fan ni ngad kol ayuwgad ko n’en ni gad ma weliy u nap’an ni gad be yan ko machib?

¹² Be’ ni ma tiyan’ ko machib e der ma pag boch ban’en ni nge magawonnag. Pi n’en ni gad ma weliy u nap’an ni gad be yan ko machib e rayog ni nge pi’ e athamgil nga lanin’dad. Machane, susun ndab da paged talin ni fan ni gad be un ko machib e ngad weliyed e thin rok Got ko girdi’. (Ekl. 3:1, 7) Ere ngad guyed rogon ni pi n’en ni gad be weliy u nap’an ni gad be yan u reb e tabinaw nga reb e dabi magawonnag e machib ni gad be tay. Faan gad ra weliy e pi n’en ni gad baadag ni ngad weliyed ko girdi’ u nap’an e machib ma aram reb e kanawo’ nrib fel’ nra ayuwegdad ni ngad tedan’dad ko n’en ni gad be rin’. Maku reb e yugu aram rogon ni bay angin e cell phone u nap’an e machib, machane susun e ngad guyed rogon ndabi magawonnagdad u nap’an ni gad be machibnag be’.

MU DAG KO GIRDI’ NI GA BE LEMNAGRAD

13, 14. (a) Uw rogon ma gad nang e n’en ni baadag be’? (b) Mang boch ban’en nra k’aring e girdi’ ni ngar adaged e tirok Got ban’en?

¹³ Pi tamachib ni yad be tedan’rad e yad ma motoyil ngak e piin ni yad ma mada’nag. Mang boch e deer ni ga ra fith ngak be’ ko gin ni ga ma machib riy ma ra k’aring ni nge weliy laniyan’? Be magafan’ ni bochan e ke yoor raba’ e teliw, ara ke yoor e cham, ara be kireb e am i yan, fa? Rayog ni ngam ayuweg be’ ni nge fil murung’agen Got ni aram e ngam weliy ngak rogon ni kan sunmiy urngin ban’en ara rogon angin e fonow nu Bible ngodad, fa? Meybil e aram ban’en ni baadag e girdi’ ni ngan weliy murung’agen ni ki mada’ ngak e piin nde mich Got u wan’rad. Boor e girdi’ ni yad ma lemnag ko bay be’ u bang ni ma rung’ag e meybil fa dariy. Maku boch e girdi’ e yad baadag ni ngar nanged e fulweg ko fa gal deer ni gaar: Gur, ma rung’ag Got gubin e meybil? Faanra danga’, ma mang e susun ni ngad rin’ed me rung’ag e meybil rodad?

¹⁴ Ku rayog ni ngad nanged rogon ni ngad nonad ngak e girdi’ ni faan gad ra fal’eg i yaliy rogon  ni ma rin’ boch e tamachib ni yad ba salap ko machib e re n’ey. Mu tay fanam i yan u rogon ni yad ma fith e deer ndarur k’aringed e damumuw ara tamra’ ko girdi’. Kum tay fanam i yan u rogon ni be non nge rogon ni be sap ngak facha’ u nap’an ni be guy rogon ni nge nang e n’en ni be lemnag.​—Prov. 15:13.

NGAD SUMUNGUYGAD MA GAD FANAY E SALAP RODAD

15. Mang fan nsusun e ngad machibgad u fithik’ e sumunguy?

¹⁵ Ga baadag nnap’an ni ga be mol me yib be’ i pugem? Boor e girdi’ e dubrad ni ngan pugrad nib tomgin. Ku rayog ni ngan taareb rogonnag e re n’ey ko n’en ni ma buch rodad u nap’an e machib. Bay boch e girdi’ ni yad ma puwan’ u nap’an ni ka darod nga taferad. Ere mang e ba t’uf ni ngad rin’ed? Ba fel’ ni ngad nonad ngak u fithik’ e sumunguy ma gad dag ngak ni gad be tayfan, ngemu’ ma gad pining e magar ngak, ma gad chuw. (Prov. 15:1; 17:14; 2 Tim. 2:24) Faan ga ra sumunguy ngak ma dabisiy nra yay ni migid nni yan nga tafen, ma dab ki puwan’.

16, 17. Uw rogon ni ngad machibgad u fithik’ e gonop?

¹⁶ Yu ngiyal’ e rayog ni ngad machibnaged be’ ni yugu aram rogon ni ke yog ni dabun e machib fa bay e teliw rok. Rayog ni kemus ni be non ni aram rogon ni bochan e be guy rogon ni nge dab da nonad. Machane, rayog ni ngad fithed reb e deer u fithik’ e gonop nge sumunguy nra k’aring ni nge motoyil.​—Mu beeg e Kolose 4:6.

¹⁷ Yu ngiyal’ e faanra kad mada’naged be’ ndariy e tayim rok ni nge motoyil, mab fel’ ni ngad chuwgad ya nge m’ug ni gad be tayfan. Machane, bay yu ngiyal’ nrayog ni nga dogned buchuuw ban’en nib ga’ fan. Boch e walag e yad ma weliy reb e thin nu Bible ndabi gaman reb e minit. Ba ga’ ni yad ma beeg reb e thin nu Bible, mu m’on ni nga ranod mi yad fith reb e deer ni yad ra weliy e fulweg riy u nap’an ni yad ra sul. Ke yib angin e re n’ey ya boor e girdi’ ni kar adaged ni ngar motoyilgad. Ere, mang ndab mu gay rogon ni ngam rin’ e re n’ey?

18. Mang e rayog ni ngad rin’ed ma gad mon’og ko machib u fithik’ e sabethin?

¹⁸ Faanra kad fal’eged rogodad ni ngad machibgad u fithik’ e sabethin, ma rayog ni ngad ayuweged e girdi’ ni gad ma mada’nag u gubin e rran ni ngar adaged fare thin nib fel’. Boor e walag ni yad ma tay boch e babyor nga paketo rorad ara nga kabang rorad ni ngar pied ko girdi’. Ku yad ma lemnag reb e thin nu Bible ni ngar beeged ko ngiyal’ ni ke mab e kanawo’ ngorad riy. Ere rayog ni ngam fith e en ni ir e service overseer ara boch e pioneer ara walag ni yad ma machib u polo’ e tayim u lan e ulung rom u rogon nrayog ni ngam rin’ e re n’ey.

NGAD AYUWEGED E GIRDI’ RODAD NGAR NANGED E TIN NIB M’AGAN’ GOT NGAY

19. Mang ndab da talgad i guy rogon ni ngad ayuweged e girdi’ rodad?

¹⁹ Gad gubin ni gad baadag ni ngad ayuweged e girdi’ rodad ni ngar adaged e tin riyul’. (Josh. 2:13; Acts 10:24, 48; 16:31, 32) Machane, faanra kad gayed rogon ni ngad ayuweged yad ma dubrad, ma sana gad ra dabuy ni ngkud gayed rogon bayay. Sana gad ra lemnag ndabiyog ni ngad thilyeged lanin’rad. Machane, rayog  ni nge buch boch ban’en nra thilyeg lanin’rad. Maku reb e rayog ni kam mon’og u rogon ni ga be weliy e tin riyul’, ma re n’ey e rayog ni nge yib angin ngorad.

20. Mang nib ga’ fan ni ngaud nonad ko girdi’ rodad u fithik’ e tayfan?

²⁰ Susun e ngad ted fan laniyan’ e girdi’ rodad. (Rom. 2:4) Susun e ngad nonad ngorad ni bod rogon ni gad ma non ko girdi’ u nap’an e machib. Mu non ngorad u fithik’ e sumunguy nge tayfan. De t’uf ni nga yugum par ni ga be machibnagrad, ya rayog ni ngar nanged rogon ni ke ayuwegem e tin riyul’ u daken e ngongol rom. (Efe. 4:23, 24) Mu ayuwegrad ngar nanged ni ke thil e par rom ni bochan e ke fil Jehovah e “tin nib fel’” ngom. (Isa. 48:17) Mu dag ko ngongol rom rogon e par ko tin riyul’ e Kristiano.

21, 22. Mu weliy ban’en ni ke buch ni be dag feni ga’ fan ndab da talgad i guy rogon ni ngad ayuweged e girdi’ rodad.

²¹ Dawori n’uw nap’an me yog reb e walag nib pin ni gaar: “Yug gu ma gay rogon ni nggu machibnag gubin e pumoon nge ppin ni walageg ni yad 13 u gubin. Gu ma gay rogon ni nggu rin’ e re n’ey u daken e thin nge ngongol rog. Gubin e duw ni gu ma yol ngorad, machane ke gaman 30 e duw ma ka yigoo gag e Pi Mich u lan e tabinaw rog.”

²² Ki yog ni gaar: “Immoy reb e rran ni gu call nag reb e ppin ni walageg ni ma par u bang nib palog ko gin ni gu ma par riy. Ma aram me yog ngog ni ke yog ngak reb e tamachib ko teliw rok ni nge fil e Bible ngak, ma dawori rin’. Nap’an ni gog ni gu baadag ni nggu ayuweg, me gaar: ‘Ke fel’, machane nggog ngom ndariy e rofen ni gu ra mang reb e Mich Rok Jehovah.’ Tomuren ni gu pi’ ba ken fare babyor ni Mang e Ri Be Fil e Bible? nge yan ngak, ma aram mu gguy rogon ni nggu call nag, machane mi i yog ngog ndawori beeg fare ke babyor. Tomur riy mu gog ngak ni nge fek e re babyor nem, ma aram mu gu weliyew boch e thin nu Bible ni bay riy u lan 15 e minit u telefon. Tomuren in yay ni gu call nag, ma aram me yog ngog ni baadag ni nge yoor ko 15 e minit ni ngaug filew e Bible riy. Ma aram me tabab i call nageg ni nggu filew e Bible. Bay yu ngiyal’ ni ma call ndawor gu od ni kakadbul, ma yu ngiyal’ e l’agruw yay u reb e rran ni ma call. Faani bin migid e duw nga tomuren, me un ko taufe, miki bin migid e duw nga tomuren, me un ko pioneer ara machib u polo’ e tayim.”

23. Mang fan ndabi chalbadad i ayuweg e girdi’ ndar nanged e tin nib m’agan’ Got ngay?

²³ Ba t’uf ni ngad maruwelgad ko salap rodad ya nge yog nda ayuweged e piin ndarur rin’ed e tin nib m’agan’ Got ngay. Yugu aram rogon ma ka boor e girdi’ ni yad be motoyil ko fare thin nib fel’. Ba ga’ nra reb e pul mab pag 20,000 e girdi’ ni kar uned ko taufe ma kar manged boch e Pi Mich Rok Jehovah. Ere ngad athamgil ngad folgad ko fare fonow ni pi’ Paul ngak Arkippus ni gaar: “Mu guy rogon ngam mu’nag fare maruwel ni kan pi’ ngom ko maruwel rok Somol.” (Kol. 4:17) Bin migid e article e gad ra weliy riy e n’en ni be yip’ fan ni ngad machibgad ndemtrug ko kari mab e kanawo’ ngodad fa dawor.

[Study Questions]

[Box on page 13]

ROGON NI NGAUD PARED NI GAD BA OD

▪ Ngad pasiggad i rin’ e tin nib m’agan’ Got ngay

▪ Ngad siyeged ngongolen fithik’ e lumor

▪ Ngaud lemnaged wenegan nra yib riy ni faan gad ra bod e girdi’ nu fayleng ndar nanged e tin nib m’agan’ Got ngay

▪ Dab da lemnaged ndakuriy be’ ni baadag ni nge motoyil ngodad

▪ Ngad guyed rogon ni ngad machibnaged e girdi’ u yugu boch e kanawo’

▪ Ngad lemnaged feni ga’ fan e machib ni gad be tay