Ngaum Machib Ndemtrug ko Kari Mab e Kanawo’ Ngom fa Dawor

“Ngam machibnag e thin rok Got ko girdi’ ndemtrug ko kari mab e kanawo’ ngom fa dawor.”​—2 TIM. 4:2.

RAYOG NI NGAM WELIY?

Mang fan ni i machibnag e pi Kristiano ko bin som’on e chibog fare thin nib fel’ ndemtrug ko kari mab e kanawo’ ngorad fa dawor?

Uw rogon ni nga i par nib ga’ fan e machib u wan’dad?

Mang nrib ga’ fan ni ngan machibnag murung’agen Gil’ilungun Got e ngiyal’ ney?

1, 2. Mang boch e deer ni ke sum u murung’agen fare fonow ni ngad ‘machibnaged e thin rok Got ko girdi’ ndemtrug ko kari mab e kanawo’ ngodad fa dawor’?

 GIRDI’ ni maruwel rorad e ngar ayuweged yugu boch e girdi’ ni bay e yafas rorad u thatharen e riya’ e yad manang nrib ga’ fan e maruwel rorad. Bod ni girdien e mathang nifiy e nap’an ni yira piningrad ni nga ranod ra thanged e nifiy u bang mi yad gur ni nga ranod ngay ya yad manang nrayog ni nge yim’ be’ riy.

² Gadad e Pi Mich Rok Jehovah e gad be athapeg ni ngad ayuweged e girdi’ nge yog e yafas ngorad. Aram fan nrib ga’ fan u wan’dad fare maruwel rodad ni ngad machibnaged fare thin nib fel’ ni murung’agen Gil’ilungun Got. Yugu aram rogon nrib ga’ fan e re maruwel ney, machane darud gurgad ngad rin’ed ndawor da lemgad ko som’on. Ere mang e be yib Paul fan u nap’an ni pi’ fare fonow ni gaar: “Ngam machibnag e thin rok Got ko girdi’ ndemtrug ko kari mab e kanawo’ ngom fa dawor”? (2 Tim. 4:2) Uw rogon ni ngad machibgad ndemtrug ko kari mab e kanawo’ ngodad fa dawor? Ma mang nrib ga’ fan e re maruwel ney ni gad be rin’?

MANG NIB GA’ FAN E MACHIB NI GAD BE TAY?

3. Mang e ra buch nfaanra motoyil e girdi’ ko fare thin nib fel’ ara dab ra motoyilgad ngay?

³ Nap’an ni ga ra lemnag rogon nra ayuweg e machib ni gad be tay e girdi’ ni bay e yafas rorad u thatharen e riya’, ma sana ga ra nang feni ga’ fan ni ngam weliy fare thin nib fel’ ngorad. (Rom. 10:13, 14) Be gaar e Bible: “Faanra gu ginang be’ nib kireb ni gu be yog ngak nra yim’, me tal ndab ki denen me rin’ e tin nib mat’aw ma ba fel’, . . . ma dab kun gechignag faanem, ya ke yog e yafos ngak. Ma gu ra n’ag fan u wun’ug e pi denen ni i rin’. Ra par ni ke yog e yafos ngak ni bochan e ke rin’ e tin nib mat’aw ma ba fel’.” (Ezek. 33:14-16) Be yog e Bible ngak e piin ni yad be machibnag fare thin nib fel’ ni be gaar: “Ga ra ayuwegem nge piin ni yad ma motoyil ngom ngar thapgad ngak Got.”​—1 Tim. 4:16; Ezek. 3:17-21.

4. Nap’an ni digey boch e girdi’ e bin riyul’ e liyor mar chelgad ngar togopuluwgad ngay, ma mang fan nib t’uf ni ngan machibnag fare thin nib fel’ ndemtrug ko kari mab e kanawo’ fa dawor?

 ⁴ Ra ngad nanged fan ni yog Paul ngak Timothy ni nge machibnag e thin rok Got ko girdi’ ndemtrug ko kari mab e kanawo’ ngak fa dawor, mab t’uf ni ngad yaliyed e thin ni bay nga tomuren e re verse nem ni be gaar: “Ngam machibnag e thin rok Got ko girdi’ ndemtrug ko kari mab e kanawo’ ngom fa dawor; ma gguy rogon ni nge riyul’ u wan’rad, ma ga fal owcherad ko kireb ni yad be rin’, ma ga pi’ e athamgil nga lanin’rad, mu um fil e thin rok Got ngorad u fithik’ e gum’an’. Ya ba’ ba ngiyal’ ni bayi taw ngay me dabuy e girdi’ ni ngar motoyilgad ko bin nib riyul’ e machib, mi yad fol ko tin ni yad ba adag, ma bay u ranod nguur gayed i yan e piin ni nge machibnagrad ni yad e bay ra machibniged ngorad e tin ni ir e yad be yim’ ni bochan ni ngar rung’aged. Ma bay ra pied keru’rad ko tin nib riyul’.” (2 Tim. 4:2-4) Ke yog Jesus u m’on riy ni bay boch e girdi’ ni yad ra digey e bin riyul’ e liyor mar chelgad ngar togopuluwgad ngay. (Matt. 13:24, 25, 38) Ere aram fan nrib ga’ fan ni nge “machibnag” Timothy e thin rok Got ngak e girdi’ nib muun e girdi’ u lan e ulung ngay, ya nge dabi bannag e piin ni kar digeyed e bin riyul’ e liyor e piin Kristiano ko machib rorad ni googsur. Ngiyal’ nem e ke par e yafas ko girdi’ u thatharen e riya’. Ma uw rogon e ngiyal’ ney?

5, 6. Mang boch ban’en ni ke mich u wan’ e girdi’ ni gad ma mada’nagrad u nap’an e machib?

⁵ Ke garer e machib rok e piin ni kar digeyed e bin riyul’ e liyor nga gubin yang. (2 Thess. 2:3, 8) Mang boch e machib nde riyul’ ni ke mich u wan’ boor e girdi’ e ngiyal’ ney? Boor yang ni yima machibnag fare machib riy ni ke sum e girdi’ ko gamanman, ni taareb rogon nga yugu boch e machib ni yima weliy. Yugu aram rogon ni fare thin ni yima yog ni girdi’ e ke sum ko gamanman e girdien e science e yad ma weliy, machane re machib ney e ke yan i par ni ke bod reb e teliw, machane de un Got ngay. Ku reb e machib ni boor e girdi’ ni ke mich u wan’rad e fare machib ni Got e der ma lemnagdad, ere de t’uf ni ngad lemnaged. Mang fan ni bokum milyon e girdi’ e yad be motoyil ko pi machib ney ni ir e be taleg nder fel’ e tha’ u thilrad Got? Bochan ni taa ban’en e be k’aring e girdi’ ni ngar lemnaged, ni aram e, ‘Demtrug e n’en ni ga baadag ni ngam rin’ ma ga rin’, ya dab ni pufthinnagem ko ngongol rom.’ Ireray e n’en ni yad baadag ni ngar rung’aged me mich u wan’rad.​—Mu beeg e Psalm 10:4.

⁶ Machane ku bay boch e machib ni ke mich u wan’ e girdi’. Boch e girdi’ ni ka yad ma yan nga galesiya e yad baadag ni nga i gaar e pi tamachib rorad ngorad, ‘Demtrug e n’en nra um rin’ed, maku ra um pared ni gimed ba t’uf rok Got.’ Maku boch e girdi’ e yad baadag ni ma yog e padrey nge pastor rorad ngorad ni pi madnom ni yad ma tay, nge misa, nge pi liyos ni yad ma liyor ngay e ba m’agan’ Got ngay. Pi girdi’ ney e dar nanged e riya’ ni bay ko pi n’ey. (Ps. 115:4-8) Machane, faan gad ra ayuwegrad ni ngar nanged e tin nib m’agan’ Got ngay nge tin riyul’ u Bible, ma aram e rayog ni nge yib angin Gil’ilungun Got ngorad.

MANG E BE YIP’ FAN NI NGAD MACHIBGAD NDEMTRUG KO KARI MAB E KANAWO’ NGODAD FA DAWOR?

7. Uw rogon ni nge m’ug ni gad manang feni ga’ fan e machib ni gad be tay?

⁷ Reb e togta ni be sey be’ nib m’ar, e thingari tiyan’ ni bochan e rayog ni nge yim’ facha’. Nap’an ni gad be yan ko machib, ma rayog ni nge m’ug ni gad be tedan’dad ko machib ni faan gad ra fal’eg i lemnag boch e deer, ara boch e magawon, ara boch ban’en nra adag e girdi’ ni ngan weliy. Maku reb e faanra gad manang feni ga’ fan e machib ni gad be tay ma ra k’aringdad ni ngad thilyeged boch ban’en ni gad ma rin’ nge ngiyal’ ni gad ma rin’ riy ya nge yog nda mada’naged e pi girdi’ ney ko ngiyal’ ni yad baadag ni ngar motoyilgad.​—Rom. 1:15, 16; 1 Tim. 4:16.

8. Mang e ba muun ngay ni nge m’ug ni gad manang feni ga’ fan ban’en?

⁸ Ra nge m’ug ni gad manang feni ga’ fan ban’en mab muun ngay ni ngad m’oneged boch ban’en u wan’dad. (Mu beeg e Genesis 19:15.) Susun e ke skengnagem e togta u ba mit e m’ar. Ma nap’an ni sul e skeng rom me piningem ni ngam man mu guy, me gaar ngom: “Am sap! Rib ubchiya’ e m’ar rom. Ere faanra dab mu rin’ ban’en ngay u lan reb e pul ma ga ra magawon.” Ere mang e ga ra rin’? Sana yugu dab mu gur ngam chuw u ofis rok ni ka chingiyal’ nem  ngam man mu lemnag ban’en ni ngam rin’ ko m’ar rom, ya dabisiy ni ga ra motoyil ngak ni nge yog ngom e n’en nib t’uf ni ngam rin’, ngemu’ mfin mu sul nga tabinaw ngam lemnag e n’en ni ngam rin’.

9. Mang fan nrayog ni nga dogned ni i machibnag Paul e thin rok Got u Efesus ndemtrug ko kari mab e kanawo’ ngak fa dawor?

⁹ Rayog ni ngad nanged feni ga’ fan u wan’ Paul e n’en ni i rin’ ni faan gad ra beeg e n’en ni yog ngak e piin piilal nu Efesus u murung’agen e machib ni i tay u Asia. (Mu beeg e Acts 20:18-21.) Ba tamilang nnap’an ni yigi taw e ngaram me tabab i machibnag fare thin nib fel’ ko girdi’ u mit e tabinaw i yan. Maku reb e, l’agruw e duw ni i par ni be pi’ e welthin u “lan tafen e muulung rok Tyrannus.” (Acts 19:1, 8-10) Ere ba tamilang ni feni ga’ fan u wan’ Paul e pi n’en ni i rin’ e aram e n’en ni i gagiyegnag e pi n’en ni i rin’ u gubin e rran. Fare fonow ni ‘ngad machibnaged e thin rok Got ndemtrug ko kari mab e kanawo’ ngodad fa dawor’ e gathi kan pi’ ni nge k’aringdad ni ngad lemnaged nre maruwel ney ni gad be rin’ e kaygi pag rogon. Machane re maruwel ney ni machib e thingari m’on ko yafas rodad.

10. Mang fan ni ngad felfelan’gad ni sogonap’an 100 e duw ni ke yan ma i machib e pi Kristiano ndemtrug ko kari mab e kanawo’ ngorad fa dawor?

¹⁰ Machib ni i tay ba ulung i girdi’ ni Ur Filed e Bible u m’on ko duw ni 1914 e be tamilangnag e n’en ni be yip’ fan ni ngaud pared nib ga’ fan u wan’dad e n’en ni gad be rin’. Yugu aram rogon ni kemus ni in e biyu’ urngirad, ma kar nanged ni yad be par u ba ngiyal’ nib ga’ fan. Ere aram fan nra tababgad i machibnag murung’agen Gil’ilungun Got u fithik’ e pasig. Boor e welthin ni ur ted ko shimbung, maku immoy reb e kachido nra paged nge yaliy e girdi’ ni kenggin e “Photo-Drama of Creation.” Bokum milyon e girdi’ nra rung’aged fare thin nib fel’ ni bochan e re n’em. Faan gomanga dar nanged fini ga’ fan e ngiyal’ ni ur moyed riy, ma boor i gadad e dawori nang e tin riyul’.​—Mu beeg e Psalm 119:60.

MU KOL AYUW YA NGE DAB MU PAGTALIN FENI GA’ FAN E MACHIB

11. Mang e ke k’aring boch e girdi’ ni ngar paged talin feni ga’ fan e machib ni gad be tay?

¹¹ Pi n’en ni ma magawonnag laniyan’ e girdi’ e rayog ni nge k’aring be’ nge pagtalin feni ga’ fan e machib. Ma fanay Satan e re m’ag ney ni nge magawonnag e pigpig ni gad ma tay ngak Jehovah ni aram e ma guy rogon ni ngad mitgad u boch ban’en ni gad baadag nge boch ban’en nde ga’ fan. (1 Pet. 5:8; 1 John 2:15-17) Immoy boch e girdi’ ni ur pigpiggad ngak Jehovah kafram ni yad ba pasig, machane kar paged talin e n’en nib ga’ fan. Bod nnap’an e bin som’on e chibog ma immoy reb e Kristiano ni ka nog Demas ngak ni ur ‘maruwelgow’ Paul u taabang, ma faani munmun me pag boch ban’en u fayleng ni nge magawonnag e pigpig ni i tay. Ere n’en ni rin’ e digey Paul ma daki pi’ e athamgil nga laniyan’.​—Filem. 23, 24; 2 Tim. 4:10.

12. Mang e ka rayog ni ngad rin’ed e chiney? Mang e rayog ni ngad rin’ed boch nga m’on?

¹² Faanra nge par nib ga’ fan e machib u wan’dad, mab t’uf ni ngad siyeged e pi n’en nra magawonnag e machib ni gad be tay. Susun e ngad athamgilgad ni nge yog ngodad e “bin riyul’ e yafos.” (1 Tim. 6:18, 19) Dariy e maruwar riy nib mich u wan’um ni yafas ni manemus u fayleng u tan Gil’ilungun Got e ra bing e kanawo’ ngodad ni ngad rin’ed boor ban’en ni gad ra felfelan’ ngay. Machane kemus ni chiney e ka rayog ni ngad ayuweged e girdi’ ni ngar mageygad ni yad ba fas u nap’an e Armageddon.

13. Chiney ni kad manged Kristiano e uw rogon ni nga i par nib ga’ fan e machib u wan’dad?

¹³ Yooren e girdi’ nu fayleng e dar nanged Jehovah. Ere mang e ra ayuwegdad ni ngad pared nib ga’ fan e machib u wan’dad? Susun e dab da paged talin ni mus ngodad ma immoy ba ngiyal’ ndad nanged Got ma dariy e athap rodad. Machane kad filed e tin riyul’ u murung’agen Jehovah nge Jesus, ma chiney e gad be weliy ngak boch e girdi’. (Mu beeg e Efesus 5:14.) I yog Paul ni gaar: “Um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop. Urngin yay nra mab e kanawo’ ngomed ma ngam maruwelgad ngay ni fan ko tin nib fel’, ya tiney e rran e mmo’maw’.” (Efe. 5:15, 16) Rib ga’ fan ni ngad ted e tayim ni fan ko pi n’en nra chugurnagdad ngak Jehovah u lan e re fayleng nib kireb ney.

 GAD BE PAR U BA NGIYAL’ NIB GA’ FAN

14-16. Mang nrib ga’ fan ni ngan machibnag murung’agen Gil’ilungun Got e ngiyal’ ney?

¹⁴ Dariy ba ngiyal’ ni kari ga’ fan fare maruwel ni machib ni bod rogon e ngiyal’ ney. Ka nap’an e duw ni 1914 ni kad guyed boor ban’en ni be buch u fayleng ni bod rogon ni ke yiiynag e Bible. (Matt. 24:3-51) Gubin e girdi’ ni bay e yafas rorad u thatharen e riya’. Yugu aram rogon ni be fal’eg e pi nam nu fayleng e m’ag ko gapas u thilrad, ma ka bay sogonap’an 2,000 e donmach rorad ni bay e nuclear riy ndemtrug bang u fayleng nrayog ni ngan pag ngay. Ke yoor yay ni ma yog girdien e am ni bay boch e pi donmach nem ni ke yan nga bang. Gur, terrorist e yad e kar iringed e pi n’ey? Boch e girdi’ e ka rogned ni rayog ni nge yim’ urngin e girdi’ u fayleng u reb e cham nra tababnag e terrorist. Machane, gathi kemus ni goo mahl e ke tay e yafas ko girdi’ nu fayleng nga thatharen e riya’.

¹⁵ I yog reb e babyor ko duw ni 2009 ni gaar: “Yafang ni be thil e aram e bin th’abi ga’ e magawon ko bin 21 e chibog.” Ki yog ni gaar: “Wenegan e yafang ni be thil e ra k’aring e m’ar ngak yooren e girdi’ me tay e yafas rok bokum bilyon e girdi’ nga thatharen e riya’.” (The Lancet and University College London) Boor e nam nra kireb ni bochan e day ni be ga’ i yan, nge yal’, nge binaw ni be mathrow ko ran, nge m’ar, nge yoko’, nge mahl ni yibe tay ni bochan e dakir gaman e tin nib t’uf ko girdi’. Dariy e maruwar riy ni ke par e yafas ko girdi’ nga thatharen e riya’ ni bochan e mahl, nge yoko’, nge durru’, nge ku boch ban’en ni ma yib ni yima gafgow riy.

¹⁶ Rayog ni nge lemnag boch e girdi’ ni mahl ni yibe fanay e pi talin e cham ni bay e nuclear riy e rayog ni nge k’aring boch ban’en ni nge buch ni ir e ra lebguy fare yiiy rok Jesus u murung’agen e tin tomuren e rran. Machane, yooren e girdi’ e dar nanged fan e re yiiy rok Jesus nem. Ke yoor e duw ni be buch boch ban’en ni be dag nriyul’ ni bay Kristus ma ke chugur ni ngan thang e re m’ag ney. (Matt. 24:3) Dariy ba ngiyal’ ni ke buch e pi n’en ni ke yiiynag Jesus ni bod rogon e ngiyal’ ney. Ere ireray e ngiyal’ ni nge nang e girdi’ nib t’uf ni nge fel’ e tha’ u thilrad Got. Ma machib ni gad be tay e rayog ni nge ayuwegrad.

17, 18. (a) Bochan ni gad manang ni gad be par ko tin tomuren e rran, ma mang e ra k’aringdad ni ngad rin’ed? (b) Mang e rayog ni nge k’aring e girdi’ ni ngar adaged ni ngar motoyilgad ko fare thin nib fel’ u murung’agen Gil’ilungun Got?

¹⁷ Ka buchuuw e tayim ni ka bay nrayog ni ngad micheged nib t’uf Jehovah rodad, ma gad mu’nag fare maruwel ni machib ni ke pi’ ni ngad rin’ed ko tin tomuren e rran. N’en ni yog Paul ko pi Kristiano nu Roma e rib ga’ fan ngodad e ngiyal’ ney. I gaar: “Kam nanged e re awa ni ke taw ngay, ya ke taw nga nap’an ni ngam odgad. Ya ngiyal’ ni nga darod riy ngak Got e ke chugur e chiney ko ngiyal’ ni baaram nsom’on ni mich Jesus u wun’dad.”​—Rom. 13:11.

¹⁸ Pi n’en ni ka nog nra i buch ko tin tomuren e rran e rayog ni nge k’aring e girdi’ ni ngar nanged nib t’uf ni nge fel’ e tha’ u thilrad Got. Maku boch e girdi’ e yad ma adag ni ngar motoyilgad ko fare thin nib fel’ u nap’an ni yad ra lemnag rogon nder yog ko pi am ko girdi’ ni ngar pithiged e magawon ko salpiy, nge pi talin e cham ni bay e nuclear riy nrayog ni nge li’ boor e girdi’, nge cham, nge fayleng ni yibe kirebnag. Maku boch e girdi’ e yad ma adag ni ngar motoyilgad ko fare thin nib fel’ ni bochan e magawon u lan e tabinaw rorad, ni bod e m’ar, ara mabgol ni be dar, ara be’ ni ke yim’. Ere nap’an ni gad be yan ko machib, ma ireray e pi girdi’ nrayog ni ngad ayuweged.

KAR THILYEGED E PAR RORAD YA KAR NANGED FENI GA’ FAN E MACHIB

19, 20. Uw rogon ni ke thilyeg boor e Kristiano rogon e par rorad ni bochan e kar nanged feni ga’ fan e machib ni gad be tay?

¹⁹ Bochan ni ke nang boor e Kristiano feni ga’ fan e machib ni gad be tay, ma aram fan ni boor i yad e kar thilyeged boch ban’en ko par rorad ya nge yog ni yoor e tayim rorad ni fan ko re maruwel ney. Ba wu’ e mabgol ni yow ma par u Ecuador e kar dugliyew ni ngar buchuuwnagew e maruwel nga puluwrow u tomuren ni kar rung’agew e pi welthin ni kan pi’ ko fare special assembly ko duw ni 2006 ni kenggin e “Mu Par ni Taa Ban’en e Ba M’on u Wan’um.” Kar yoloyew boch ban’en nga but’ nde t’uf rorow, mu lan dalip e pul mi yow chuw ko naun rorow ni dalip e singgil riy nga ranow ra parew nga reb e naun ni taareb e singgil riy, mi yow pi’ boch e chugum  rorow ni chuway’, mi yow thang urngin e malfith rorow ni immoy. De n’uw nap’an mi yow un ko pioneer ni ayuw mi yow fol ko n’en ni yog reb e circuit overseer ngorow ni aram e nga ranow ra piew e ayuw nga reb e ulung nib t’uf e ayuw riy.

²⁰ Reb e walag ni pumoon ni ma par u Meriken e yoloy ni gaar: “Nap’an ni gu unew e ppin rog nga reb e assembly ko duw ni 2006, ma ke gaman 30 e duw ni kug unew ko taufe. Nap’an ni gamow be sul i yan nga tabinaw u tomuren e re muulung nem, ma gamow weliy rogon nrayog ni nggu folgow ko fare fonow u murung’agen rogon ni nga i par ni taab n’en e ba m’on u wan’dad. (Matt. 6:19-22) Dalip e naun romow, ma boor e binaw ni tafemow, nge karrow nib tolang puluwon, ma bay e bowoch romow, nge reb e naun ni bod e karrow. Kug nangew ni kug adbeyew e tayim romow nge gelngimow ni nggu yognagew e chugum ni boor. Ere aram fan ni kug dugliyew ni nggu namegew ni nggu unew ko machib u polo’ e tayim. Nap’an e duw ni 2008 mu gu unew nga reb e ppin ni fakmow ko pioneer. Kar gu felfelan’gow ni gamad be maruwel e pi walag u taabang! Ke yog ni nggu piew e ayuw ko gin nib t’uf e ayuw riy. Ma kki yog ni nggu chugurgow ngak Jehovah ni bochan e boor ban’en ni gamow be rin’ ni fan ngak. Ma bin th’abi ga’ e tow’ath ni ke yog ngomow e aram e nap’an ni gamow ra guy e girdi’ ni kar felfelan’gad ni bochan ni kar rung’aged ma kar nanged fan e tin riyul’ ni bay ko Thin rok Got.”

21. Mang e ra k’aringdad ni ngad machibgad ndemtrug ko kari mab e kanawo’ ngodad fa dawor?

²¹ Gad manang ndab ki n’uw nap’an min “pufthinnag e girdi’ nib kireb nge mu’ min kirebnagrad.” (2 Pet. 3:7) Bochan e tin riyul’ ni kad filed u Bible, ma aram e n’en ni be k’aringdad ni ngad weliyed murung’agen fare gafgow nib ga’ nge bin nib beech e fayleng ni gad ba pasig. Gad manang nrib t’uf ni nge nang e girdi’ murung’agen e athap ko gabul nge langlath. Ere, faan gad ra rin’ e re maruwel ney nib mus rogodad riy, ma aram e gad be dag nib t’uf Got nge girdi’ rodad.

[Study Questions]