Mu Chugur Ngak Got

“Wenig Ngom, Mu Ayuwegmad Nggu Sulod Ngom”

Bay ba ngiyal’ ni kaam pigpig ngak Jehovah, fa? Ma kam lemnag ni ngam pigpig ngak bayay machane sana ga be lemnag ni dabiyog ni nge fel’ e tha’ u thilmew? Wenig ngom mu fal’eg i beeg e biney e article. Ya kan fal’eg rogon ni fan ngom.

“G U MEYBIL ngak Jehovah ni gu be wenig ngak ni nge n’ag fan e kireb rog me yog ni nge fel’ e tha’ u thilmow.” Aram rogon ni yog be’ nib ppin ni ke malog ko tin riyul’. Ga be runguy e re ppin nem, fa? Ka ga ma lemnag ko ‘Uw rogon u wan’ Got e piin ni ur pigpiggad ngak kafram? Gur, ma lemnagrad? Baadag ni nge “fel’ e tha’ u thilrad bayay”?’ Ra ngan nang e fulweg ko pi deer n’ey, ma gad ra guy fapi thin ni yoloy Jeremiah. Ya fulweg riy e dabisiy ni ra fal’eg lanin’uy.​—Mu beeg e Jeremiah 31:18-20.

Mu lemnag e n’en ni buch u nap’an ni yoloy Jeremiah e thin rok. Boch e chibog u m’on u nap’an ni immoy Jeremiah ko fare duw ni 740 B.C.E., me pag Jehovah fare ragag i ganong rok piyu Israel ni nge kolrad piyu Assyria. * Ke pagrad Got ni ngar gafgowgad ya nge yog ni ngan fonownagrad ni bochan e denen ni kar ngongliyed nib ubuchiya ma kar feked yathin e ginang ni ke pi’ e pi profet ngorad. (2 Kings 17:5-18) Ere kar kalgadngan’rad ni bochan e pi gafgow ni yib ngorad u nap’an ni kan kalbusnagrad ma kar paloggad rok Got nge binaw rorad? Ere gur, ke pag Jehovah tilrad? Rayog ni nge fel’ e tha’ u thilrad bayay?

“Kug Kalngan’ug”

Ke kal e pi girdi’ nem ngan’rad u nap’an ni kan kalbusnagrad. Manang Jehovah gelngin e kireban’ rorad. Mu motoyil u rogon ni be weliy Jehovah rogon e ngongol rorad nge lem rok piyu Israel ni kan pining piyu Ephraim ngorad.

Be gaar Jehovah: “Ku gu rung’ag laman a girdi’ nu Israel ni be lungurad u fithik’ e kireban’.” (Verse 18) Ke rung’ag laman piyu Israel ni yad be wenig ni ngan n’ag fan e denen rorad. Rogon i yog be nib llowan’ e fare bugithin ni “be lungurad u fithik’ e kireban’” e be yip’ fan ni ngan “chechingeg lolugey.” Pi girdi’ n’ey e yad bod be nib pagal nib balyang ni be chechingeg lolugen u nap’an ni be lemnag rogon e gafgow ni ke ta ir nga fithik’ me sul ngi i lemnag rogon e par rok ko som’on. (Luke 15:11-17) Mang e be yog boch e girdi’?

“Somol, ug moyed ni gamad bod e garbaw ni maloboch ni gelan’, machane kam fil rogon ngomad ni nggu folgad.” (Verse 18) Ke nang e pi girdi’ n’em ni ba t’uf ni ngan fonownagrad. Yad bod ba garbaw ni maloboch. Rogon i yog reb e babyor e, “re n’ey e kan taarebrogonnag nga ba garbaw ni ran gechignag som’on me fini nang rogon ni nge fol.”

“Mu fulwegmad, ma gamad sul; I gur Somol, ni gur e Got romad.” (Verse 18) Kar sobut’niged lanin’rad ma kar ninged e ayuw ngak Got. Kar maloggad,  machane kar ninged e ayuw ngak ni nge yog ni nge fel’ e tha’ u thilrad bayay. Rogon e thin ni bay u lan reb e Bible e gaar: “I gur e Got romad. Wenig ngom mu ayuwegmad ni nggu sulod ngom.”​—Contemporary English Version.

“Gu pied keru’mad ngom, . . . kug tamra’gad, ma kan dariyfannagmad.” (Verse 19) Ke kireban’rad ni bochan e kar denengad. Ma ke m’agan’rad ngay ni nga nog ni yad ba kireb. Ma gelngin e kireban’ ni kar ted e bod e amith ni ga be thamiy u nap’an ni gowa yibe pirdiiy ngorongorem.​—Luke 15:18, 19, 21.

Piyu Israel e kar kalgadngan’rad. Kari kireban’rad, ma kar rogned e denen rorad ngak Got ma aram mar pied keru’rad ko tin nib kireb ni ur ngongliyed. Bochan ni kar kalgadngan’rad, ma gur ra runguyrad Got? Rayog ni ki fel’ e tha’ u thilrad?

“Lanin’ug e be un ngom”

Jehovah e ba chugur e tha’ u thilrad piyu Israel. Ya gaar: “Gu bod ba matam ngak piyu Israel, ni Ephraim e ir e bin nganni e pumoon ni fakag.” (Jeremiah 31:9) Dabiyog ni nge dabi pag reb e matam ni ma t’ufegey fak ni ke kalngan’ ko kireb rok ni nge sul ngak? Mu lemnag rogon ni ma dag Jehovah e t’ufeg ko girdi’ rok.

“Gur, Ephraim ni pagal ni fakag ni gab t’uf rog, ir e th’abi t’uf rog? Gubin ngiyal’ ni gu ra llowan’ nigem ma gu ma lemnagem ni gab t’uf rog.”(NW) (Verse 20) Rib fel’ e pi thin n’ey! Got e bod reb e matam ni ma t’ufegey ma dar ma thilyeg e thin rok, ere ke “llowannag” pi fak ya nge ginangrad ko kireb ni kar rin’ed. Nap’an ni kar dabuyed ni ngar folgad, me pagrad ni ngan kalbusnagrad, ma aram e daki fel’ e tha’ u thilrad. Yugu aram rogon nib t’uf ni nge gechignagrad, machane dawori pagtilrad. Ya dabiyog ni nge rin’ ban’en ni aram rogon. Reb a matam ni ma t’ufegey e dabi pagtalin pi fak. Ere uw rogon u wan Jehovah u nap’an ni ke guy ni riyul’ ni kar kalgadngan’rad?

“Ga bay u lanin’ug ni gab t’uf rog. Ri bay gu runguyem.” (Verse 20) Jehovah e rib t’uf pi fak rok. Bochan nriyul’ ni kar kalngan’rad, me runguyrad ma baadag ni nge fel’ e tha’ u thilrad bayay. Jehovah e bod fare matam ko fare fanathin u murung’agen fare pagal ni yan nga bang ni weliy Jesus ni ke “kireban’ ngak” me m’agan’ ngay ni nge fel’ bayay e tha’ u thilrad pi fak.​—Luke 15:20.

“Jehovah, mu pageg ni nggu sul ngom!”

Fapi thin ni bay ko Jeremiah 31:18-20 e ke tamilangnag rogon e t’ufeg nge runguy rok Jehovah ngodad. Got e der ma pagtalin e piin ni ur pigpiggad ngak kafram. Uw rogon ni faanra ku yad baadag ni ngar pigpiggad ngak bayay? Got e ‘ma n’ag fan u wan’ e kireb rodad.’ (Psalm 86:5) Dabi digey e piin ni kar kalgadngan’rad. (Psalm 51:17) Ya baadag ni nge fel’ e tha’ u thilrad bayay.​—Luke 15:22-24.

Fare ppin ni kan weliy murung’agen ko som’on e ke athamgil ni nge sul ngak Jehovah, me yan nga reb e ulung ko Pi Mich Rok Jehovah ko gin ni ma par riy. Som’on ma ba t’uf ni nge pag e lem nde puluw. I yog ni gaar: “Kug lemnag ni dariy fag.” Machane piin piilal ko ulung e kar pied e athamgil ngak mar ayuweged ni nge gel ko tirok Got ban’en. U fithik’ e felfelan’ rok me yog ni gaar: “Rib manigil ya ke pageg Jehovah ni nggu sul ngak!”

Faanra gur be ni um pigpig ngak Jehovah kafram, ma ga be lemnag ni nge fel’ e tha’ u thilmew bayay, ma gamad be pi’ athamgil ngom ni ngam un ko ulung ko Pi Mich Rok Jehovah ko gin ni ga be par riy. Dab mu pagtalin ni Jehovah e ma t’ufeg ma ma runguy e piin nra sul ni kar kalgadngan’rad ngak ni be lungurad, “Wenig ngom mu ayuwegmad nggu sulod ngom.”

Thin Nu Bible ni Ngan Beeg ko Pul ni April:

◼ Jeremiah 17-31

[Footnote]