Be Gal Ramaen Jehovah Rom, Fa?

“Be gal ramaen Somol rodad.”​—2 KOR. 3:18.

UW ROGON NI GA RA FULWEG?

Uw rogon ni nge gal ramaen Got rodad ni yugu aram rogon ni ka gad bogi tadenen?

Uw rogon ni ma ayuwegdad e meybil nge pi muulung ni gad ma un ngay ni nge gal ramaen Got rodad?

Mang e ra ayuwegdad ni nga i gal ramaen Jehovah rodad?

1, 2. Mang fan nrayog ni nge m’ug pi fel’ngin Jehovah rodad?

 GAD gubin ni bay boch ban’en u rarogon e gallabthir rodad ni ma m’ug rodad. Aram fan ni gad ma rung’ag ni yima gaar, ‘Cha’nem e bod yaan e chitamangin’ ara ‘Cha’nem e bod yaan e chitiningin.’ Ma bitir e ba ga’ ni yad ma folwok ko gallabthir rorad. Machane, uw rogodad? Rayog ni ngad folwokgad rok Jehovah ni ir e Chitamangidad ni bay u tharmiy, fa? Yugu aram rogon ndawor da guyed, ma rayog ni ngad nanged pi fel’ngin ni faan gad ra fil e Thin rok, mu ud yaliyed e pi n’en ni ke sunmiy, mu ud fal’eged i lemnag e pi n’en ni gad be fil u Bible nib ga’ ni pi n’en ni be weliy murung’agen Jesus Kristus ni Fak Got. (John 1:18; Rom. 1:20) Riyul’ nrayog ni nge gal ramaen Jehovah rodad.

² U m’on ni kan sunmiy Adam nge Efa, ma manang Got nrayog ko girdi’ ni ngar rin’ed e tin nib m’agan’ ngay, me m’ug pi fel’ngin rorad, mi yad pining e sorok ngak. (Mu beeg e Genesis 1:26, 27.) Gadad e piin Kristiano e gad baadag ni nga i m’ug pi fel’ngin Got rodad. Faan gad ra rin’ ni aray rogon, ma aram e rayog ni nge gal ramaen Got rodad ni yugu demtrug ko kun nam e da bad riy, ara rogon e yalen ko gin ni gad ma par riy, ara tolngin e skul rodad. Mang fan? Bochan ni “gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.”​—Acts 10:34, 35.

3. Mang e rayog ni nge thamiy e pi Kristiano u nap’an ni yad be pigpig ngak Jehovah?

³ Pi Kristiano ni kan dugliyrad e ma gal ramaen Jehovah rorad. Apostal Paul ni kan dugliy nga gelngin Got nib thothup e yoloy ni gaar: “Ma gadad ndawor ni upunguy ban’en nga owchedad e be gal ramaen Somol rodad ni ke af rok ngodad, ni gadad gubin ma be ga’ ramaen rodad i yan ma gadad be pig i yan nga yaan e re n’en ni be gal ramaen rodad.”  (2 Kor. 3:18) Nap’an ni ke sul Moses ni profet u daken fare Burey nu Sinai ni ke fek fa gal yang i malang ni bay fa Ragag i Motochiyel u daken, ma be gal ramaen owchen ni bochan e ke non Jehovah ngak. (Ex. 34:29, 30) Dariy bayay ni ke buch ko piin Kristiano e n’en ni ke buch rok Moses, machane, nap’an ni yad ra weliy murung’agen Jehovah ko girdi’, nge pi fel’ngin nrib fel’, nge n’en nib m’agan’ ngay ni fan ko girdi’, ma gowa be gal ramaen e felfelan’ u dakenrad. Pi Kristiano ni kan dugliyrad nge piin ni yad ba muun ngorad u fayleng e taareb rogorad nga ba mit e therek ni yima ngongliy kakrom ko wasey ni ma gal ramaen ni bochan e ma gal ramaen Jehovah rorad ko pi n’en ni yad ma rin’ nge machib ni yad ma tay. (2 Kor. 4:1) Ere, be gal ramaen Jehovah rom ni bochan e ngongol rom nge machib ni ga ma un ngay, fa?

GAD BAADAG NI NGE GAL RAMAEN JEHOVAH RODAD

4, 5. (a) Mang e magawon rodad ni bod Paul? (b) Uw rogon ni ke gafgownagdad e denen?

⁴ Gadad e pi tapigpig rok Jehovah e ba mudugil ni gad baadag ni ngad ted fan ma gad pining e sorok ngak e En ni Ke Sunmiydad ko pi n’en ni gad ma rin’. Machane ba ga’ ni pi n’en ni gad baadag e gathi aram e n’en ni gad ma rin’. Ku aram rogon e magawon rok Paul. (Mu beeg e Roma 7:21-25.) I weliy Paul fan e re n’ey ni gaar: “Ke denen urngin e girdi’, kar pired ni yad mmal’af rok Got ke mul e flaab rok u pa’rad.” (Rom. 3:23) Bochan ni ke denen Adam, ma urngin e girdi’ ni kar manged sib ko denen. Ere, denen e bod reb e Pilung nib kireb ni be gagiyegnag urngin e girdi’.​—Rom. 5:12; 6:12.

⁵ Mang e denen? Denen e ba togopuluw nga rarogon Got, nge pi kanawo’ rok, nge pi n’en nib m’agan’ ngay. Denen e ma kirebnag e tha’ u thilin be’ nge Got. Denen e ma talegdad ndabi gal ramaen Got rodad ni bod rogon be’ ni ma mun gat’ing ni ke pag gan e gat’ing rok nga ban’en ma de kan. Yu ngiyal’ e gad ma denen ni lem rodad, ma yu ngiyal’ e danga’. (Num. 15:27-31) Denen e ir e ma gagiyegnag e girdi’, ma aram e n’en ni ma palognagrad ko En ni Ke Sunmiyrad. (Ps. 51:5; Isa. 59:2; Kol. 1:21) Aram fan ni yooren e girdi’ e yad ma ngongol u reb e kanawo’ nde m’agan’ Jehovah ngay ma der yog ni nge gal ramaen Got rorad. Ere, rib gel e gafgow ni ke tay e girdi’ ni bochan e denen.

6. Uw rogon ni nge gal ramaen Got rodad ni yugu aram rogon ni ka gad bogi tadenen?

⁶ Yugu aram rogon ni gad bogi tadenen, machane ke ‘pi’ Jehovah e l’agan’’ ngodad. (Rom. 15:13) Ke pi’ ban’en nrayog ni nge chuweg e denen rodad ni aram fare biyul ni maligach ni pi’ Jesus Kristus. Faanra mich e re maligach nem u wan’dad, ma aram e rayog ni nge dab kud manged “sib rok e denen,” me gal ramaen Jehovah rodad. (Rom. 5:19; 6:6; John 3:16) Faanra i par nib fel’ e tha’ u thildad Jehovah, ma gathi kemus nra tow’athnagdad e chiney ya ku ra tow’athnagdad boch nga m’on ni aram e gad ra flont me yog e yafas ndariy n’umngin nap’an ngodad. Yugu aram rogon ni ka gad bogi tadenen, ma ri gad ba tow’ath ni be lemnag Got nrayog ni nge gal ramaen rodad!

MANG E RA AYUWEGDAD NI NGE GAL RAMAEN GOT RODAD?

7. Faanra nga i gal ramaen Got rodad, ma mang e susun ndab ud mithaged?

⁷ Faanra nge gal ramaen Got rodad, ma thingar da nanged e pi n’en ni gad ba meewar riy. (2 Kron. 6:36) Ere, susun e dab ud mithaged e pi meewar rodad ma gad guy rogon ni ngad gelgad ngay ya nge yog ni i gal ramaen Got rodad. Bod ni faanra gad ma yaliy boch ban’en ni bay yaan e puwlag riy, ma thingar dogned e magawon rodad ngak e piin piilal ma gad ning e ayuw ngorad. (Jas. 5:14, 15) Ireray e n’en nsom’on nib t’uf ni ngad rin’ed ni faanra gad baadag ni nge gal ramaen Got rodad. Bochan ni gadad e pi tapigpig rok Jehovah, ma thingar ud fal’eged i yaliyed gadad ya nge yog nda nanged ko gad be rin’ e tin nib m’agan’ ngay fa danga’. (Prov. 28:18; 1 Kor. 10:12) Demtrug e pi n’en ni gad ba meewar riy,  ma thingar da guyed rogon ni ngad gelgad ngay ya nge yog ni gal ramaen Got rodad.

8. Mang e susun ni ngad rin’ed ni yugu aram rogon ndawor da flontgad?

⁸ Kemus ni goo Jesus e yog rok ni nge rin’ urngin e tin nib m’agan’ Got ngay mi i gal ramaen Got rok. Yugu aram rogon nde taareb rogodad ngak Jesus nib flont, machane, rayog ni ngad folwokgad rok, maku aram ban’en nthingar da athamgilgad ni ngaud rin’ed. (1 Pet. 2:21) Gathi kemus ni goo mon’og ni gad ma tay e ma guy Jehovah, ya ku ma guy e athamgil ni gad ma tay ni nge gal ramaen rodad, ma ma tow’athnagdad.

9. Uw rogon ni ma ayuwegdad e Bible nge yog ni gal ramaen Got rodad nib fel’ rogon?

⁹ Rayog ni nge ayuwegdad e Bible ngad nanged rogon ni nge gal ramaen Jehovah rodad nib fel’ rogon. Ba t’uf ni ngaud filed e Bible nib fel’ rogon mu ud fal’eged i lemnag e n’en ni be yog. (Ps. 1:1-3) Faanra ud beeged e Bible ni gubin e rran ma rayog ni ngad mon’oggad ko tirok Got ban’en. (Mu beeg e James 1:22-25.) Pi n’en ni gad ma fil u Bible e ra gelnag e michan’ rodad. Maku ra ayuwegdad ni ngaud pared ni gad ba fel’ u wan’ Jehovah ma dab da rin’ed reb e denen nib ubchiya’.​—Ps. 119:11, 47, 48.

10. Uw rogon nrayog ni nge ayuwegdad e meybil nge yog nda mon’oggad ko pigpig ni gad be tay ngak Jehovah?

¹⁰ Faanra nge gal ramaen Got rodad ma kub t’uf ni ngaud “meybilgad ni gubin ngiyal’.” (Rom. 12:12) Rayog maku susun ni ngad meybilgad ngak Jehovah ni nge ayuwegdad ngad pigpiggad ngak nrogon nib m’agan’ ngay. Rayog ni ngad ninged gelngin nib thothup, ma gad wenig ngak ni nge ayuwegdad nge gel e michan’ rodad, ma gad siyeg e pi n’en ni yibe waliydad ngay. Ku rayog ni ngad weniggad ngak ni nge ayuwegdad ni ngad ‘machibnaged e thin rok nrogon.’ (2 Tim. 2:15; Matt. 6:13; Luke 11:13; 17:5) Ba t’uf ni nge pagan’dad ngak Jehovah ni ir e Chitamangidad ni bay u tharmiy, ni bod rogon reb e bitir ni ma pagan’ ko chitamangin. Faan gad ra yog ngak ni nge ayuwegdad ngad mon’oggad ko pigpig ni gad be tay ngak, mab mudugil nra ayuwegdad. Dariy e ngiyal’ ni ngad lemnaged ni gad be magawonnag! Ere, ngaud meybilgad ngak ni gad be pining e sorok nge magar ngak, ma gad ning e ayuw ngak nib ga’ nu nap’an ni ke yib e skeng ngodad. Ku rayog ni nga dogned ngak ni nge ayuwegdad ya nge yog ni gal ramaen rodad ko pigpig ni gad ma tay ngak.​—Ps. 86:12; Jas. 1:5-7.

11. Uw rogon ni ma ayuwegdad e pi muulung ni gad ma un ngay ni nge gal ramaen Got rodad?

¹¹ Ke tay Jehovah “fare tapigpig nib yul’yul’ ma ba gonop” ni nge ayuweg e pi saf rok. (Matt. 24:45-47; Ps. 100:3) Baadag e re tapigpig ney ni nge ayuwegdad ni nge gal ramaen Jehovah rodad. Pi muulung ni gad ma un ngay e ma ayuwegdad ni ngad thilyeged boch ban’en u rarogodad me m’ug pi fel’ngin e Kristiano rodad, ni bod rogon be’ ni ma wup mad ni be fal’eg yu yang ko mad rodad ya ngad chuwgad ngay mab fel’ yaan. (Heb. 10:24, 25) Ere ngad athamgilgad ndab ud sagaalgad ko muulung, ya faanra mecham ngodad ni ngaud bad ko muulung nib sagaal, ma dabi yib angin e pi n’en ni yibe fil riy ngodad.

NGAUD FOLWOKGAD ROK GOT

12. Uw rogon nrayog ni ngad folwokgad rok Got?

¹² Faanra nge gal ramaen Jehovah rodad, ma thingar ‘ud pired ni gad be folwok rok.’ (Efe. 5:1) Reb e kanawo’ ni ngad folwokgad rok Jehovah riy e aram e ngad filed rogon ni ngaud lemgad ni bod rogon ni ma lem. Faan gad ra ngongol u rogon ni gad be lemnag nde puluw nga rogon nib m’agan’ ngay, ma aram e gad be darifannag maku gad be gafgownagdad. Bochan ni gad be par ko fayleng rok Satan, ma thingar da athamgilgad ni ngad fanenikayed e pi n’en ni ma fanenikay Jehovah, me t’uf rodad e pi n’en nib t’uf rok. (Ps. 97:10; 1 John 5:19) Susun ni nge mudugil u wan’dad ni bin nib mat’aw e kanawo’ ni ngad pigpiggad ngak Got riy e aram e ngaud rin’ed urngin ban’en ni fan e nga nog e sorok riy ngak.​—Mu beeg e 1 Korinth 10:31.

13. Mang fan nthingar da fanenikayed e denen, ma mang e ra k’aringdad e re n’ey ni ngad rin’ed?

 ¹³ Ma fanenikay Jehovah e denen, ere susun ni ngki arrogodad. Faanra riyul’ ni gad be fanenikay e denen ma gad ra athamgil ni ngad paloggad ko pi n’en nrayog ni nge k’aringdad ni ngad denengad. Bod ni, thingar da paloggad ko machib ni ma wereg e piin ni kar digeyed e bin riyul’ e liyor, ya faan gad ra un i rin’ e binem e denen ma aram e dabiyog ni nge gal ramaen Got rodad. (Deut. 13:6-9) Ere, thingar da paloggad ko piin ni kar digeyed e bin riyul’ e liyor ma kar chelgad kar togopuluwgad ngay ara be’ ni ma yog ni ir reb e walag machane ma darifannag Got. Thingar da rin’ed e re n’ey ni yugu aram rogon ni ir reb i girdien e tabinaw rodad. (1 Kor. 5:11) Dabi yib angin ni faan gad ra guy rogon ni ngad micheged nde riyul’ e n’en ni be weliy e piin ni kar chelgad kar togopuluwgad ko bin riyul’ e liyor ara piin ni yad ma togopuluw ko ulung rok Jehovah. Bin riyul’ riy, e de t’uf ni ngad guyed rogon ni ngad nanged e n’en ni yad be yog u lan e pi babyor rorad ara Internet, ya re n’ey e rayog ni nge kirebnag e tha’ u thildad Jehovah.​—Mu beeg e Isaiah 5:20; Matthew 7:6.

14. Mang e bin th’abi fel’ e kanawo’ ni ngad folwokgad rok Jehovah riy, ma mang fan?

¹⁴ Reb e kanawo’ ni ngad folwokgad rok Jehovah riy e aram e ngaud daged e t’ufeg. (1 John 4:16-19) Bin riyul’ riy, e t’ufeg ni bay u thildad e be m’ug riy ni gadad pi gachalpen Jesus maku gadad e pi tapigpig rok Jehovah. (John 13:34, 35) Bochan ndawor da flontgad, ma yu ngiyal’ e ba mo’maw’ ni ngad daged e t’ufeg. Machane  thingar da athamgilgad ni ngaud daged e t’ufeg ni gubin ngiyal’. Faan gad ra athamgil ni ngaud daged e t’ufeg nge boch i fel’ngin e Kristiano ma ra ayuwegdad ni nge dab da denengad ma dab da rin’ed boch ban’en ndariy e sumunguy riy.​—2 Pet. 1:5-7.

15. Faanra ba t’uf e girdi’ rodad, ma ra uw rogon e ngongol rodad ngorad?

¹⁵ T’ufeg e ma k’aringdad ni ngad adaged ni ngad rin’ed boch ban’en nib fel’ ni fan ngak boch e girdi’. (Rom. 13:8-10) Bod ni faanra ma t’ufeg be’ leengin ara figirngin, ma aram e ra i par nib yul’yul’ ngak. Faanra ba t’uf e piin piilal rodad ma gad ma tayfan e maruwel rorad, ma ra ud folgad rorad ni ki mada’ ko ngiyal’ nib mo’maw’. Piin bitir ni yad ma t’ufeg e gallabthir rorad ma yad ma tay farad e darur weliyed boch ban’en nib kireb u murung’agen e gallabthir rorad. Faanra ba t’uf e girdi’ rodad, ma aram e dab da lemnaged ndariy farad ara u dogned e thin ngorad ni be darifannagrad. (Jas. 3:9) Ma piin piilal ni yad ma t’ufeg e girdi’ rok Got e yad ma ayuwegrad u fithik’ e sumunguy.​—Acts 20:28, 29.

16. Uw rogon nra ayuwegdad e t’ufeg u nap’an ni gad be machib?

¹⁶ Ku thingari m’ug e t’ufeg rodad ko machib ni gad ma tay. Faanra ba t’uf Jehovah rodad, ma yugu aram rogon ni dabun e girdi’ ni ngar motoyilgad ngodad ma dabi mulan’dad maku gad ra ulul i machibnag fare thin nib fel’. Ba t’uf ni ngad fal’eged rogodad u m’on ni nga darod ko machib ma ngad guyed rogon ni ngad salapgad ko machib. Faanra riyul’ nib t’uf Got nge girdi’ rodad, ma dab da lemnaged ni machib ni gad ma tay e aram ban’en nthingar da rin’ed. Ya gad ra tay nreb e tow’ath ni kan pi’ ngodad maku gad ra rin’ u fithik’ e felfelan’.​—Matt. 10:7.

NGA I GAL RAMAEN JEHOVAH ROM

17. Bochan ni gad manang ni gad bogi tadenen, ma mang e ba t’uf ni ngad rin’ed?

¹⁷ Yooren e girdi’ e darur nanged feni kireb e denen, machane gadad e gad manang. Aram fan ni gad manang nib t’uf ni ngad togopuluwgad ko pi meewar rodad. Gad manang nib t’uf ni ngad skulnaged e nangan’ rodad ya nge yog ni ayuwegdad ngad rin’ed e tin nib mat’aw u nap’an ni gad baadag ni ngad rin’ed ban’en nib kireb. (Rom. 7:22, 23) Riyul’ ni gad ba meewar, machane rayog ni nge pi’ Got gelngidad ni ngad rin’ed e tin nib fel’ ni gubin ngiyal’.​—2 Kor. 12:10.

18, 19. (a) Mang e ra ayuwegdad ni ngad togopuluwgad ko pi kan nib kireb? (b) Mang e ngad turguyed ni ngad rin’ed?

¹⁸ Faanra nge gal ramaen Jehovah rodad, maku thingar da togopuluwgad ko pi kan nib kireb. Fapi talin e cham ni ke pi’ Got ngodad e ir e ra ayuwegdad ni ngad rin’ed e re n’ey. (Efe. 6:11-13) Be guy Satan rogon ni nge mang ir e ngan pining e sorok ngak ma gathi Jehovah. Ku be guy rogon ni nge kirebnag e tha’ u thildad Jehovah. Ere, aram fan ni faanra ud pared ni gad ba yul’yul’ ngak Got ni yugu aram rogon ndawor da flontgad ma be gal ramaen rodad, ma aram e kad gelgad ngak Satan! Ere, ngaud pininged e sorok ngak Jehovah ni bod e pi engel nu tharmiy ni yad ma gaar: “Somol romad ma Got romad! Ba’ rogom ni nga nog e sorok ngom, min ta’ fam, ma ba’ rogom ni nge mil suwon urngin ban’en ngom. Yi gur e mu sunumiy urngin ban’en, yi gur e mu lemnag mi yad sum ni yad ba fos.”​—Rev. 4:11.

¹⁹ Ere, ngad turguyed u wan’dad ni nga i gal ramaen Jehovah rodad ni gubin ngiyal’. Ba mudugil ni be felfelan’ ni be guy boor e tapigpig rok ni yad ba yul’yul’ ni yad be athamgil ni ngaur folwokgad rok mi i gal ramaen rorad. (Prov. 27:11) Ere, manga ud lemgad ni bod David ni gaar: “A Somol ni Got rog, bay gu pining e sorok ngom u polo’ i gum’irchaeg; bay gu gilnag fithingam ni dariy n’umngin nap’an.” (Ps. 86:12, BT) Ri gad be athapeg e ngiyal’ nrayog ni nga i gal ramaen Jehovah rodad nrib fel’ rogon mu ud pininged e sorok ngak ndariy n’umngin nap’an! Gad manang nra buch e re n’ey. Ere, be gal ramaen Jehovah Got rom e chiney, ma ga be athapeg ni ngam rin’ ndariy n’umngin nap’an, fa?

[Study Questions]

[Pictures on page 31]

Ma gal ramaen Jehovah rom u daken e pi n’ey, fa?