Mu Athamgil Ngam Ayuweg e Mabgol Rom

“Baaray bbugithin ni fan ngak e piin ni kar uned ko mabgol, ni gathi thin rog ya thin rok Somol.”​—1 KOR. 7:10.

RAYOG NI NGAM WELIY?

Mang fan nrayog ni nga nog ni Got e ir e ke chagiy e piin ni kar mabgolgad?

Uw rogon nrayog ni nge ayuweg e piin piilal e pi Kristiano ni bay e magawon ko mabgol rorad?

Susun ni nge uw rogon e mabgol u wan’dad?

1. Uw rogon e mabgol u wan’ e piin Kristiano, ma mang fan?

 NAP’AN nra un e piin Kristiano ko mabgol, ma aram e kar micheged ban’en ngak Got nrib ga’ fan. (Ekl. 5:4-6) Bochan ni Jehovah e ir e ke Sunmiy e mabgol, ma rayog ni nga nog ni ir e ke ‘chagiy’ e piin ni kar mabgolgad. (Mark 10:9) Ra par ni aram rogon u wan’ Jehovah ndemtrug rogon e motochiyel u reb e nam. Pi tapigpig rok Jehovah e susun ni ngar lemnaged e pi n’en ni kar micheged u lan e mabgol rorad, ni yugu aram rogon ni bay boch i yad ni kar mabgolgad u m’on ni ngar uned ko pigpig ngak Jehovah.

2. Mang boch e deer ni gad ra weliy ko re article ney?

² Faanra ba fel’ e mabgol ma rayog ni nge yibnag e felfelan’. Machane, mang e rayog ni ngan rin’ ni faanra ke yib e magawon nga lan e mabgol? Faanra ke kireb e mabgol rok l’agruw ni’, ma rayog ni nge sul ngki fel’ bayay, fa? Ma mang ayuw e bay ni fan ko piin ndakuriy e gapas u lan e mabgol rorad?

YIRA PIRIEG E FELFELAN’ RIY FA DANGA’?

3, 4. Mang e ra buch ni faanra de gonopiy be’ e en ni mel’eg ni ngar mabgolgow?

³ Faanra ba fel’ e mabgol rok reb e Kristiano ma ra pirieg e felfelan’ riy, ma rayog ni nge pining e sorok ngak Jehovah. Machane, faanra ba kireb e mabgol rok, ma ra k’aring e kireban’ nib gel. Aram fan ni piin Kristiano ni yad ba muchugbil ni yad ma fol ko fonow rok Got u murung’agen e mabgol, e rayog ni ngar pirieged e felfelan’ u nap’an ni kar uned ko mabgol. Machane, faanra de gonopiy be’ e en ni mel’eg ni nge leay ma rayog ni nga i pirieg e kireban’. Boch e fel’ yangaren e yad ma un ko fager ndawori taw nga nap’an nrayog ni ngar uned ko mabgol. Ma boch e girdi’ e kar pirieged be’ ni yad baadag ko Internet mar gurgad ngar leayed facha’, me tomur riy mar pirieged boor e magawon. Ma boch e girdi’ e kar rin’ed reb e denen nib ubchiya’ u nap’an ni yad be puruy’nag  e mabgol, ma nap’an ni kar mabgolgad ma da ku ur ted farad ni bod kafram.

⁴ Boch e Kristiano e darur mabgolgad “nrogon e mabgol ni ma tay e piin ni girdien Kristus,” ma boor e magawon ni kar pirieged ya kar leayed be’ ni gathi tapigpig rok Jehovah. (1 Kor. 7:39) Faanra ireray e n’en ni ke buch rom, ma ngam meybil ngak Got ni nge n’ag fan me ayuwegem. Dabi chuweg wenegan e kireb ni ke rin’ be’, machane ra ayuweg facha’ ni ke kalngan’ ya nge yog ni athamgil u fithik’ e magawon rok. (Ps. 130:1-4) Ere, mu athamgil u rogon nrayog rom ni ngam rin’ e tin nib m’agan’ Got ngay, ma aram e ‘felfelan’ ni ma pi’ Somol ngom e bay i pi’ gelngim.’​—Neh. 8:10.

NAP’AN NI KE MAGAWON E MABGOL

5. Mang lem e ba fel’ ni ngan siyeg u murung’agen e mabgol nder yog ni ngan pirieg e felfelan’ riy?

⁵ Faanra der pirieg boch e girdi’ e felfelan’ u lan e mabgol rorad, ma sana yad ra gaar u wan’rad: ‘Gur, rib ga’ fan ni ngguy rogon ndabi dar e mabgol rog? Sana gu ra felfelan’ ni faan gu ra leay yugu be’!’ Sana yad ra lemnag ni ngar digeyed e en mabgol rorad, me lungurad: ‘Gu baadag ni ngki puf rogog bayay! Ere mang fan ndab gu dargow e en mabgol rog? Mang fan ndabi bagamow me par rok ya nge yog ni ngkug felfelan’ bayay ni yugu aram rogon nde puluw fan ko Bible?’ Piin Kristiano e thingar ra athamgilgad ni ngar folgad ko thin rok Got ko bin ni ngaur lemgad ni aray rogon.

6. Mu weliy fan e thin ni yog Jesus ko Matthew 19:9.

⁶ Faanra dar reb e Kristiano nge en mabgol rok, ma reb e rayog ni ngki mabgol bayay ma reb e danga’. I gaar Jesus: “En nra chuweg leengin ni gathi ban’en ni ke par fare pin nge be’ ngki leengiy yugu reb e ppin, e aram e ke th’ab e motochiyel, ya kar pirew yugu reb e ppin ni gathi mabgol rok.” (Matt. 19:9) Fare bugithin ni ngongol ndarngal e ba muun ngay ni nge par be’ nge be’ ni gathi mabgol rok, nge ku boch e ngongol nib kireb ni bay rogon ko par ko pumoon nge ppin. Faanra be lemnag reb e Kristiano ni ngar dargow e en mabgol rok ni yugu aram rogon ndawori un bagayow ngak be’ ni gathi mabgol rok, ma rib ga’ fan ni nge meybil ngak Got ni nge ayuweg.

7. Mang e rayog ni nge lemnag e girdi’ ni faanra ke kireb e mabgol rok l’agruw e Kristiano?

⁷ Faanra ke kireb e mabgol rok be’ ma rayog ni nge m’ug riy ni ke magawon e tha’ u thilrow Got. Ke fith apostal Paul reb e deer nib ga’ fan ni gaar: “Faanra de nang be’ rogon ni nge gagiyegnag girdien e tabinaw rok, me ere uw rogon me yog ni nge ayuweg e galesiya rok Got?” (1 Tim. 3:5) Bin riyul’ riy, e faanra be yog l’agruw ni’ ni yow e Kristiano, machane ke kireb e mabgol rorow ma rayog ni nge lemnag e girdi’ ndarur folgow ko n’en ni yow be machibnag.​—Rom. 2:21-24.

8. Faanra ke lemnag ba wu’ e mabgol ni Kristiano ni ngar dargow, ma mang e magawon rorow?

⁸ Faanra be lemnag ba wu’ e mabgol ni  Kristiano ni nge bagayow me par rok ara ngar dargow nde puluw fan ko thin nu Bible, mab mudugil ni bay e magawon u thilrad Got. Sana bay bagayow ara yow l’agruw ndarur folgow ko pi kenggin e motochiyel u Bible. Faanra riyul’ ni be ‘pagan’row ngak Somol u polo’ i lanin’row,’ ma dabiyog ni nga dogned ndabiyog ni ngar ayuwegew e mabgol rorow ndabi wer.​—Mu beeg e Proverbs 3:5, 6.

9. Uw rogon ni ke yib angin ngak boch e Kristiano ya kar athamgilgad ni ngar ayuweged e mabgol rorad ndabi wer?

⁹ Boor e mabgol e ke chugur ni nge wer me munmun me sul ngki fel’ bayay. Pi Kristiano ni kar athamgilgad ni nge dab ra gurgad ngar chuwgad ko mabgol rorad u nap’an ni ke sum e magawon, e ba ga’ ni ke yib angin ngorad. Am lemnag e n’en nrayog ni nge buch u lan reb e tabinaw nde taareb e michan’ ko girdi’ riy. I yoloy apostal Peter ni gaar: “Ku er rogomed pi leengiy nthingar um folgad rok pi figirngimed, ni fan e faanra ba’ boch i yad ndawori mich e thin rok Got u wun’rad ma rayog ni nge mich u wun’rad ni bochan pangimed. Ma aram e dakuriy fan bbugithin ni nga mogned ngorad, ya bay ra guyed rogon feni machalbog pangimed nge rogon ni gimed be ta’ farad.” (1 Pet. 3:1, 2) Arrogon, rayog ni nge mich e thin rok Got u wan’ be’ ni bochan e ba fel’ e ngongol rok figirngin ara leengin. Mabgol ni aray rogon e ma pining e sorok ngak Got, ma aram reb e tow’ath ni bay rok e en figirngiy, nge en leengiy, nge pi fakrow.

10, 11. Mang boch e magawon ndan lemnag nrayog ni nge sum u lan e mabgol? Mang e rayog ni nge pagan’ reb e Kristiano ngay?

¹⁰ Boor e Kristiano nib muchugbil ni yad baadag ni ngar rin’ed e tin nib m’agan’ Jehovah ngay, ere aram fan ni kar mel’eged be’ u lan e ulung ni ngar leayed. Yugu aram rogon, maku rayog ni nge thil boch ban’en ndan lemnag. Bod ni rayog ni nga i par bagayow fa wu’ i mabgol nib kireban’. Fa reb e, boch nga tomuren ni kar mabgolgow me tal bagayow ko machib ma aram me meewar ko tirok Got ban’en. Ireray e n’en ni buch rok Linda * ni ir reb e Kristiano nib pasig ko pigpig ngak Got maku ir reb e matin ni ma t’ufeg e tabinaw rok. I un e pumoon rok ko ngongol nib kireb ma aram min tharbog ko ulung, ma de yog rok ni nge rin’ ban’en ngay. Ere, mang e susun ni nge rin’ reb e Kristiano ni faanra be lemnag ni dabkiyog ni nge pithig e magawon ko mabgol rok?

¹¹ Sana ga ra fith ni lungum, ‘Rib ga’ fan ni nggu athamgil ni nge dabi dar e mabgol rog ni yugu demtrug e n’en nra buch, fa?’ Dariy be’ ni nge dugliy e n’en ni ngam rin’. Machane, bay fan ndab mu tal i guy rogon ni nge dabi dar e mabgol rom. Pi Kristiano ni kar athamgilgad ni ngar ayuweged e mabgol rorad, ni bochan e dabi pagrad e nangan’ rorad ni ngar chuwgad ko mabgol rorad e rib ga’ farad u wan’ Got. (Mu beeg e 1 Peter 2:19, 20.) Ra fanay Jehovah e Thin rok nge gelngin nib thothup ni nge ayuweg reb e Kristiano ni be guy rogon ni nge fel’ e mabgol rok bayay.

BA M’AGAN’RAD NGAY NI NGAR PIED E AYUW

12. Ra uw rogodad u wan’ e piin piilal ni faan gad ra ning e ayuw ngorad?

¹² Faanra bay e magawon ko mabgol rom, ma rayog ni ngam ning e ayuw ngak e pi Kristiano ni kar ilalgad ko tirok Got ban’en. Piin piilal e aram e piin ni yad ma ayuweg e ulung ma yad ba felfelan’ ni ngar ayuweged gur u daken boch e fonow nu Bible. (Acts 20:28; Jas. 5:14, 15) Dab mu lemnag ni faan gimew ra ning e en mabgol rom e  ayuw ngak e piin piilal mi gimed weliy e magawon romew u taabang ma aram e dab kur ted famew. Ya ra gel e t’ufeg rorad ngomew ni bochan e yad be guy ni gimew be athamgil ni ngam rin’ew e tin nib m’agan’ Got ngay.

13. Mang fonow e bay ko 1 Korinth 7:10-16?

¹³ Nap’an nra ning reb e Kristiano nde taareb e michan’ rorow e en mabgol rok e ayuw ngak e piin piilal, ma ma fanay e piin piilal fare fonow ni pi’ Paul ni gaar: “Baaray bbugithin ni fan ngak e piin ni kar uned ko mabgol, ni gathi thin rog ya thin rok Somol ni ke gaar: ‘Be’ ni ppin ni ke mabgol e thingari dabi chuw rok e pumoon rok; ma faanra rin’, ma thingari par ndabki un ko mabgol fa reb e nge sul ngak figirngin nge fel’ thilrow; ma be’ ni pumoon ni ke mabgol e thingari dabi n’ag leengin. . . . I gur e en ni girdien Kristus gur ma leengiy gur, ke diin ma ka mu nang ndabiyog ni ngam thapeg figirngim ngak Kristus? Ara ke diin ma ka mu nang i gur e cha’ ni kam mang girdien Kristus ma figirngiy gur ndabiyog ni ngam thapeg leengim ngak Kristus?’” (1 Kor. 7:10-16) Rib tow’ath be’ ni faanra yog rok ni nge ayuweg e en mabgol rok ni nge un ko tin riyul’!

14, 15. Ra uw rogon ma aram e rayog ni nge “chuw” reb e ppin ni Kristiano ko pumoon rok? Mang nib ga’ fan ni nge meybil me fal’eg i lemnag e magawon rok nib fel’ rogon?

¹⁴ Ra uw rogon ma aram e rayog ni nge “chuw” reb e ppin ni Kristiano ko pumoon rok? Boch e ppin e ke dugliy ni nge chuw ko pumoon rok ni bochan e der pi’ e tin nib t’uf ko tabinaw rok. Maku boch e ke chuw ni bochan e yibe li’ nib pag rogon ma kan tay e yafas rok nga thatharen e riya’ ara be taleg e en mabgol rok ndab ki pigpig ngak Jehovah.

¹⁵ Susun ni facha’ e ra dugliy ko nge chuw ko en mabgol rok fa danga’. Machane, susun ni nge meybil me fal’eg i lemnag e magawon rok nib fel’ rogon. Gur, riyul’ ni en mabgol rok fare Kristiano nder ma pigpig ngak Jehovah e ir e be taleg ndabi pigpig ngak Jehovah ara fare Kristiano e ir rok e der fil e Bible rok, ma der tiyan’ nga i un ko muulung nge machib?

16. Mang fan ndabi gur e piin Kristiano ngar chuwgad ko mabgol rorad?

¹⁶ Bochan nib ga’ fan u wan’dad e tha’ u thildad Got ma gad be tayfan e mabgol ni aram reb e tow’ath ni ke pi’, ma aram fan ndarud gurgad ngad chuwgad ko mabgol rodad. Ma bochan ni gadad e tapigpig rok Jehovah, ma rib ga’ fan u wan’dad ni ngad ted fan fithingan nib thothup. Ere, ba mudugil ni dubdad ni ngad chuwgad ko mabgol rodad ni bochan e gad be lemnag ni ngkud uned nga reb e mabgol.​—Jer. 17:9; Mal. 2:13-16.

17. Ra uw rogon ma aram e rayog ni nga nog ni ke pining Got e pi mabgol ni Kristiano ni ngar pared u fithik’ e gapas?

¹⁷ Reb e Kristiano ni ke leay be’ ni gathi ir reb e tapigpig rok Got e thingari athamgil ni nge ayuweg e mabgol rok nga i par nib fel’. Machane, susun ndabi lemnag ni ir e kireb rok ni faanra ke athamgil ni nge ayuweg e mabgol rok, machane  ke dugliy e en mabgol rok nder pigpig ngak Got ni nge chuw. I yoloy Paul ni gaar: “Faanra finey e arorow nde mich Kristus u wan’ ni nge chuw rok e arorow ni ke mang reb i girdien Kristus ma faanem ni ke mang girdien Kristus e nge pag faanem nge yan. Ya ra yodorom ma faanem ni girdien Kristus ko fa gali yabgol ndemtrug ko en ni figirngiy ara en ni leengiy e rayog ni nge pag faanem nge yan; yi Got e ke piningmed ni ngam pired u fithik’ e gapas.”​—1 Kor. 7:15.

NGE PAGAN’UM NGAK JEHOVAH

18. Yugu aram rogon ndabiyog ni ngan ayuweg reb e mabgol, ma mang angin nra yib ni faan yira athamgil ni ngan rin’?

¹⁸ Nap’an nra yib e magawon nga lan e mabgol rom, mag ning e ayuw ngak Jehovah me pagan’um ngak. (Mu beeg e Psalm 27:14.) Am lemnag Linda ni faan kad weliyed murung’agen. Yugu aram rogon ni boor e duw ni i gay rogon ni nge ayuweg e mabgol rok, machane tomur riy mi yow dar e pumoon rok. Gur, ke lemnag ni ke adbey e tayim rok? I yog ni gaar, “Danga’. Bochan e athamgil ni kug tay ma ke nang boch e girdi’ ni ireray e tin riyul’. Gu be par ndariy ban’en ni be magawonnag e nangan’ rog. Ma bin th’abi fel’ riy e, n’en ni kug rin’ e ke ayuweg fakmow ni ppin ni nge par nib gel e michan’ rok. Ke mang reb e Mich rok Jehovah nib pasig.”

19. Mang e ra buch ni faanra athamgil be’ nge ayuweg e mabgol rok ni nge dabi dar?

¹⁹ Reb e ppin ni Kristiano ni Marilyn fithingan e ke felfelan’ ni ke pagan’ ngak Got ma ke athamgil ni nge ayuweg e mabgol rok. I yog ni gaar: “Kug lemnag ni nggu chuw ko pumoon rog ni bochan e der pi’ e tin nib t’uf ko tabinaw romow ma be magawonnag e pigpig ni gu be tay ngak Got. Machane, pumoon rog e immoy ni ir reb e piilal u m’on ni ke un nga ngongolen e siyobay nde fel’. Ke tabab ni nga i pag e muulung, ma aram e da ku ug nonow ngomow. Tomuren ni cham boch e girdi’ ni kireb ko mach ni gamow ma par riy, mar gu rus nib gel ma aram me mo’maw’ ngog ni ngaug chag ngak yugu boch e girdi’. Kug nang ni gag e gub kireb. Kug sulow ngaug nonow ngomow bayay, mu kug tew e fol Bible ni fan ko tabinaw romow, mu kug sulow ngaug unew ko muulung ni gubin ngiyal’. Rib gol e piin piilal ngomow ma kar guyed rogon ni ngar ayuweged gamow. Ke sul e mabgol romow ke fel’ bayay. Munmun mu kun pi’ boch e tow’ath ko pumoon rog u lan e ulung. Ri boor e magawon ni kug warow u fithik’, machane ke yib angin ko tomur.”

20, 21. Mang e susun ni ngad rin’ed ni fan ko mabgol rodad?

²⁰ Demtrug ko gad ba muchugbil ara gad ba mabgol, ma ngaud ninged e ayuw ngak Jehovah ni gubin ngiyal’ me pagan’dad ngak. Faanra bay e magawon ko mabgol rodad, ma ngad athamgilgad ngad pithiged e pi magawon ney, ma dab da paged talin nra un l’agruw ni’ ko mabgol ma “gathi ku yow ba ruw ni girdi’, ya kar taab girdi’gow.” (Matt. 19:6) Maku dab da paged talin ni faan gad ra athamgil u lan reb e tabinaw nde taareb e michan’ ko girdi’ riy, ma rayog ni ngad ayuweged e en mabgol rodad ni nge un ko tin riyul’.

²¹ Demtrug e magawon rodad, ma susun e ngaud ngongolgad u reb e kanawo’ nra guy e girdi’ u wuru’ e ulung mi yad nang ni ireray e tin riyul’. Faanra ke yib e magawon nib gel nga lan e mabgol rodad, ma gad be lemnag ni ngad chuwgad riy, ma ngad meybilgad nib gel, ma gad fal’eg i lemnag fan ni gad baadag ni ngad chuwgad ko mabgol rodad, ma gad yaliy e thin nu Bible, ma gad ning e ayuw ko piin piilal. Ma bin th’abi ga’ fan, e ngaud guyed rogon ni ngad rin’ed e tin nib m’agan’ Jehovah Got ngay mu ud ted fan e mabgol ni aram reb e tow’ath ni ke pi’ ngodad.

[Footnote]

[Study Questions]

[Blurb on page 20]

Pi Kristiano ni kar thamgilgad ni nge dab ra gurgad ngar chuwgad ko mabgol rorad u nap’an ni ke sum e magawon, e ba ga’ ni ke yib angin ngorad

[Blurb on page 22]

Nga i pagan’um ngak Jehovah mu um ning e ayuw ngak

[Picture on page 19]

Ma tow’athnag Jehovah e pi mabgol ni Kristiano ni yad ma guy rogon ni nge sul e mabgol rorad ngki fel’ bayay

[Picture on page 21]

Ulung ni Kristiano e aram e gin nrayog ni ngan fal’eg laniyan’ be’ riy min ayuweg ko tirok Got ban’en