“Nge Bigimed Me T’uf Bigimed Rok”
“Nge Bigimed Me T’uf Bigimed Rok”
“Nggu pi’ reb e motochiyel nib beech ngomed, nge bigimed me t’uf bigimed rok. Rogon ni um pired ni gimed ba t’uf rog, e aram rogon nthingar um pired nra bigimed ma ba t’uf rok bigimed. Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”—JOHN 13:34, 35.
Fan e Re N’ey: Ke yog Kristus ngak pi gachalpen ni ngar t’ufeged yad nrogon ni ke t’ufegrad. Uw rogon ni ke tu’fegrad? Ma t’ufeg Jesus urngin e girdi’, ni yugu aram rogon ni girdi’ e ngiyal’ nem e yad ma darifannag e girdi’ u boch e nam nge piin nib ppin. (John 4:7-10) T’ufeg e ke karing Jesus ni nge pagfan e tayim rok, nge gelngin, nge n’en nib t’uf rok ni nge yog ni nge ayuweg yugu boch e girdi’. (Mark 6:30-34) Ma ke dag Kristus e t’ufeg ko bin th’abi fel’ e kanawo’. Ya yog ni gaar: “I gag faanem nib fel’ rogon ni gu ma gafaliy e saf. En ni ma gafaliy e saf nib fel’ rogon e dabi siyeg ni nge yim’ ni fan ko fapi saf.”—John 10:11.
N’en ni Ka Nog Ngak e Pi Kristiano Kakrom ni Ngar Rin’ed: U lan e bin som’on e chibog ma pi Kristiano e yad ma pininged yad ni yad e ‘walag’ ni pumoon ara ppin. (Filemon 1, 2) Girdi’ u gubin e nam e rayog ni ngar chaggad ko ulung ni Kristiano ya ba mich u wan’rad ni “dariy ban’en nib thil rok piyu Israel nge piin ni gathi yad piyu Israel; i Got e taab Somol rorad ni yad gubin.” (Roma 10:11, 12) Tomuren e Pentekost 33 C.E., ma pi gachalpen Jesus u Jerusalem e “yad ma pi’ e binaw nge tin ni bay rorad ni chuway’ mi yad fek e salpiy riy ngar f’othed rorad, ni be yan u rogon e n’en nra be’ ma dabi siy ni nge yog ngak.” Ya mang fan? Ya nge yog ni nge par e ppin ni kafin taufenagrad u Jerusalem mar ululgad “ma ur pired ni be machibnagrad e pi apostal.” (Acts 2:41-45) Mang e k’aringrad ni ngar rin’ed e re n’em? Dawori gaman 200 e duw nga tomuren ni ke yim’ pi gachalpen Jesus me yog Tertullian e n’en ni yog boch e girdi’ u murung’agen e pi Kristiano ni gaar: “Ri yad ma t’ufeged yad . . . ma ba m’agan’rad ni yad ra yim’ ni fan ngak e pi walagrad.”
Mini’ e Riyul’ ni Yad Be Fol ko Pi N’en ni Yog Jesus? Be yog reb e babyor ni u lan e pi chibog ni ke yan ni piin ni yad ma yog ni yad e Kristiano e “ra bagayad mab gel e gafgow ni ma tay ngak bagayad ni faanra ngan taarebrogonnag ko n’en ni ke rin’ e girdi’ nib thil e michan’ rorad ngorad.” (The History of the Decline and Fall of the Roman Empire (1837)) Bay boch ban’en ni ka fin pirieg u Meriken ni bay rogon ko girdi’ ni yad ba m’ing ko teliw rorad ni ba ga’ ni girdi’ ni yad ma yog ni yad e Kristiano e ku yad ba laniyan’. Girdi’ ko teliw u reb e nam e ba ga’ ni dariy ban’en ni yad ma rin’ ni fan ko girdi’ u bang ni taareb e teliw rorad. Ere dubrad ni ngar ayuweged e girdi’ ni taareb e teliw rorad u yugu reb e nam u nap’an ni ba t’uf e ayuw rorad.
Tomuren ni ke aw aningeg e yoko’ u lan l’agruw e pul ko duw ni 2004 nga Florida ma en ga’ u reb e ulung ni ka nog e Florida’s Emergency Operations Committee ngay ni ma pi’ e ayuw ko girdi’ u nap’an nra buch ban’en ni bod rogon e yoko’ e ke guy rogon ni nge nang ko kan fanay e chugum ni kan pi’ ngorad ni ayuw nib fel’ rogon. Ke yog ni dariy reb e ulung ni aram feni fel’ rogon ni kan yarmiy ni bod e ulung rok e Pi Mich Rok Jehovah miki yog nra pi’ boch e tin nib t’uf rorad. Nap’an e duw ni 1997 me yan boch e Pi Mich Rok Jehovah ni yad bang ko fare ulung ni ma pi’ e ayuw ngak yugu boch e girdi’ ni ngar pied boch e falay, nge ggan, nge mad ko girdi’ ni walagrad nga Democratic Republic of Congo nib t’uf e ayuw rorad. Boch i walagrad u Europe e kar pied ngorad e chugum ni sogonap’an taareb milyon e dolla puluwon (U.S.).