Mu Chuchugur Ngak Got

“Tin Kakrom e Ri Bay ni Pag Talin”

PI N’EN ni buch rom kafram ni ke par u lanin’um e rayog ni nge fal’eg e tafinay rom. Gad ra lemnag e ngiyal’ ni ud moyed e piin ni yad ba t’uf rodad u taabang ma re n’ey e rayog ni nge fal’eg lanin’dad. Machane yu ngiyal’ e ra yib ngan’dad boch ban’en nib kireb ni buch rodad kafram ma ra kirebnag e tafinay rodad. Ere pi n’en ni buch rom kafram e ma kirebnag e tafinay rom, fa? Faanra arrogon ma sana ga ma lemnag ni, ‘Pi n’en ni buch rog kafram ni ke par u lanin’ug e bay ba ngiyal’ ni ra chuw, fa?’ Gad ra pirieg e fulweg ni ra fal’eg lanin’dad ko fare thin ni yoloy Isaiah ni profet.​—Mu beeg e Isaiah 65:17.

Rib m’agan’ Jehovah ngay ni nge chuweg tapgin e n’en ni kad rin’ed kafram ni ma k’aring e amith nga lanin’dad. Uw rogon? Ra chuweg e re fayleng ney nib kireb nge gubin ban’en nib kireb ni bay riy me tay reb nib fel’ nga lon ma par ni dariy n’umngin nap’an. I micheg Jehovah u daken Isaiah ni gaar: “Bay gu sunumiy reb e fayleng nib beech nge reb e lan e lang nib beech.” Gad ra nang fan e n’en ni micheg ma ra yog e athap ngodad nra fal’eg lanin’dad.

Mang fan fare lan e lang nib beech? Be weliy e Bible l’agruw e pow nrayog ni nge ayuwegdad. Som’on e ku bay l’agruw e girdi’ ni kar yoloyew e Bible ma kar weliyew murung’agen fare lan e lang nib beech ni bay rogon ko n’en nra buch ko re fayleng ney. (2 Peter 3:13; Revelation 21:1-4) Bin migid ma fare bugithin ni “lan e lang” u lan e Bible e be yip’ fan e gagiyeg ara am. (Isaiah 14:4, 12; Daniel 4:25, 26) Fa bin nib beech lan e lang e ireram e bin nib beech e am ni rayog ni nge fek i yib e tin nib mat’aw ban’en ngaray nga fayleng. Kemus ni taareb e am nrayog ni nge rin’ gubin e pi n’ey, ni aram Gil’ilungun Got ni fare am ni bay u tharmiy ni ke fil Jesus ngodad ni ngad yibilayed. Re Gil’ilungun nem e ra fek i yib e n’en nib m’agan’ Got ngay u ga’ngin yang e fayleng.​—Matthew 6:9, 10.

Mang fare fayleng nib beech? Gad ra guy l’agruw e thin nu Bible ni ra ayuwegdad ni ngad nanged e fulweg riy. Som’on, e fare bugithin ni “fayleng” u lan e Bible e yu ngiyal’ e be yip’ fan e girdi’ ma gathi re fayleng ney ni be par e girdi’ u daken. (Psalm 96:1) Bin l’agruw e ke yiiynag e Bible ni girdi’ ni yad ba yul’yul’ ni yad be par u tan e gagiyeg rok Got e yad ra fil e pi n’en nib mat’aw ma yad ra garer u fayleng i yan. (Isaiah 26:9) Ere fare fayleng nib beech e be yip’ fan ba ulung i girdi’ ni yad bay u tan e gagiyeg rok Got ma yad ba yul’yul’ ko pi motochiyel rok.

Ere ke tamilang u wan’um rogon ni ra chuweg Jehovah tapgin e n’en ni ke buch rodad kafram ni bay u lanin’dad ni ba kireb, fa? Dabki n’uw nap’an ma ra lebguy e n’en nib m’agan’ ngay ni fan ko bin nib beech e lan e lang nge bin nib beech e fayleng u lan fare m’ag nib beech. *U lan e bin nib beech e m’ag ma pi n’en ni ke k’aring e gafgow nga fithik’ i dowdad, nge tafinay rodad, nge lanin’dad e gad ra pagtalin. Girdi’ ni yad ba yul’yul’ e ri yad ra felfelan’ ko yafas rorad ma dab ra paged talin e pi n’en ni ra buch rorad u reb e rran nge reb.

Uw rogon e gafgow ni be tay lanin’dad e ngiyal’ n’ey? N’en i micheg Jehovah u daken Isaiah e gaar: “Ma tin kakrom e ri bay ni pag talin.” Urngin e n’en ni ma k’aring e amith ngodad u lan e re m’ag nib kireb n’ey e ra munmun ma ra chuw. Ffel’ u wan’um e re n’ey, fa? Faanra arrogon ma mang fan ni dab mu gay rogon ni ngam chuchugur ngak fare Got ni ke micheg e tin nib fel’ ngodad boch nga m’on.

[Footnote]

[Blurb on page 12]

Ba m’agan’ Jehovah ngay ni nge chuweg tapgin e n’en ni i buch rodad kafram ni ma kirebnag lanin’dad