Rogon ni Ngad Manged e Piin nib Mich e Bible u Wan’dad nge Girdi’ ko Nam nib Fel’ Pangidad

MANG l’agruw i ban’en ni i rin’ Jesus u nap’an ni i machib? Som’on e athamgil Jesus ni nge thilyeg laniyan’ e girdi’ ni be’ nge be’ ma gathi am rorad. Gad ra guy e n’en ni i tamilangnag Jesus ko fare Welthin rok u Daken e Burey. U m’on ni nge weliy fare fanathin u murung’agen e sol nge tamilang, ma ke yog ngak e girdi’ ni ur motoyilgad ngak ni piin ni yad ba felfelan’ e kar “pirieged u lanin’rad ni kar gafgowgad ndabisiy ni nge yog Got ngorad.” Miki gaar: “Nge felan’ e piin nib fel’ lanin’rad, . . . nge felan’ e piin ni ke machalbog lanin’rad, . . . nge felan’ e piin ni yad be muruwliy ni nge aw e gapas u thilin e girdi’.” (Matthew 5:1-11) Ke ayuweg Jesus pi gachalpen ni ngar puluwniged e lem rorad ko lem rok Got ko mang e ba fel’ nge mang e ba kireb ni ngar rin’ed nge uw feni rib ga’ fan ni ngar pigpiggad ngak Got u polo’ i gum’ircha’rad.

Bin migid e nap’an ni guy Jesus e girdi’ ni yad be gafgow, ma bochan ni yad ba t’uf rok ma baadag ni nge ayuwegrad. Machane, de chuweg urngin e magawon rorad. (Matthew 20:30-34) Ke chuweg e m’ar ko girdi’, machane ku gad be m’ar e ngiyal’ ney. (Luke 6:17-19) Ke ayuweg e girdi’ ni yad ba gafgow, machane dawori m’ay ngongolen e girdi’ nib sasalap. Ke duruw’iy e piin ni kar m’ad ko mak’iy, machane ku bay e uyungol e ngiyal’ ney.​—Mark 6:41-44.

Ngan Thilyeg Lanin’uy min Baudeg e Magawon

Mang fan ni nameg Jesus ni nge thilyeg laniyan’ e girdi’ me baudeg e magawon rorad ma gathi nge thilyeg ngongolen e am ara nge chuweg e gafgow? Manang Jesus ni boch nga m’on ma ra fanay Got Gil’ilungun ni nge chuweg gubin e am ko girdi’ nge n’en ni ma k’aring e gafgow ngodad. (Luke 4:43; 8:1) Aram fan nnap’an ni yog pi gachalpen Jesus ngak ni nge ulul i golnag e m’ar, me yog ngorad ni gaar: “Thingar darod ko pi binaw nib chugur ngaray, ya ngku gu machib riy, ya er fag ni ku gub.” (Mark 1:32-38) Ke baudeg Jesus e gafgow ko girdi’ machane n’en nib m’on u wan’ e nge machibnag fare Thin rok Got.

Pi Mich Rok Jehovah e ngiyal’ ney e yad be folwok rok Jesus u rogon e machib ni i tay. Yad be pi e ayuw ngak e girdi’ nib t’uf e ayuw rorad ni bochan e yad baadag ni ngar baudniged e magawon rorad. Machane dar lemnag ni ngar chuweged e pi gafgow ko re fayleng ney. Ya be pagan’rad ko Gil’ilungun Got ni nge chuweg tapgin e magawon rodad. (Matthew 6:10) Yad be athamgil ni ngar thilyeged laniyan’ e girdi’ ma gathi am rorad. Re n’ey e ban’en nib fel’ ya n’en ni ba ga’ ni ma magawonnagdad e gathi am ya ngongol ko girdi’.

Girdi’ ko nam rodad nib fel’ pangirad

Yugu aram rogon ma Pi Mich Rok Jehovah e ba mich u wan’rad ni thingar ra daged e ngongol nib fel’ ni bochan e yad e Kristiano. Aram fan ni yad ma fol ko am. Maku yad ma pi’ e athamgil ngak boch e girdi’ ni ngar folgad ko motochiyel ko am u daken e machib nge pi babyor ni yad ma wereg. Faanra n’en ni be motochiyelnag e am e ba togopluw ko n’en ni be yog e Bible ma aram e dabi fol e Pi Mich Rok Jehovah riy. Yad ma ‘fol rok Got ko bin ni ngar folgad rok e girdi’.’​—Acts 5:29; Roma 13:1-7.

 Pi Mich Rok Jehovah e yad ma mada’nag e girdi’ ko pi binaw ni ngar ayuweged yad ko fol Bible ndariy puluwon. Angin ni ke yib e ke fel’ pangin bokum milyon e girdi’. Gubin e duw ma bokum biyu’ e girdi’ e ke yog ni ngar digeyed pangirad nib kireb ni bod rogon e mu thoy tamagow, nge chingaw, nge ngan fek e falay nib kireb, nge gosgos ni yima fek e salpiy riy, nge ngongol ni darngal. Ke fel’ rogon e ngongol rorad kar manged boch e girdi’ nib manigil ko nam rorad ya kar nanged rogon ni ngar fanayed e pi kenggin e motochiyel u Bible ko yafas rorad.

Maku reb riy e tamilangan’ ni yib ko Bible e rayog ni nge ayuweg e girdi’ u lan e tabinaw ni nge gel e tayfan rorad ngorad, ma nge fel’ e numon u thilin e mabgol, nge gallabthir nge bitir, nge thilin e pi bitir u lan e tabinaw. Aram e pi n’en ni nge gelnag e tha’ u thilin e girdi’ u lan e tabinaw. Tha’ nib gel u thilin girdien e tabinaw e rayog ni nge yib angin ko girdi’ u lan fare binaw.

U tomuren ni kam fal’eg i lemnag e pi n’en ni kan weliy ko re article ney, ma mang e ga be lemnag: Ba puluw ko thin nu Bible ni nge maruwel e teliw nge am u taabang? Ba tamilang e fulweg riy, ni aram e dabiyog. Machane uw rogon e tin riyul’ e Kristiano, thingar ra manged boch e girdi’ ko nam rorad nib fel’ pangirad, fa? Arrogon! Uw rogon ni ngar rin’ed e re n’ey? Susun ni ngar folgad rok Jesus ni ngar boded e sol nge tamilang ngak gubin e girdi’ u ga’ngin yang u fayleng.

Piin ni yad be athamgil ni ngar folwokgad rok Jesus e ra fel’ rogorad nge pi tabinaw rorad nge binaw ni yad be par riy. Pi Mich rok Jehovah ni yad bay ko gin ni ga be par riy e yad ra felfelan’ ni ngar ayuweged gur ko fol Bible ni aram e n’en ni yad be rin’ ko gin ni ga be par riy. *

[Footnote]

[Blurb on page 7]

I nameg Jesus ni nge thilyeg laniyan’ e girdi’ ma gathi pi am

[Blurb on page 8]

Pi Mich Rok Jehovah e ba mich u wan’rad nib mil fan ngorad ni ngar manged boch e girdi’ ko nam rorad nib fel’ pangirad