“Baara’ Ira’ e Yafas ni Dariy N’umngin Nap’an”
“Baara’ Ira’ e Yafas ni Dariy N’umngin Nap’an”
“Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.”—JOHN 17:3.
TAMILANGAN’ e rayog ni nge ayuweg e yafas rom. Nap’an nib m’ar Nouhou ni ke gaman ragag e pul yangaren, ma nina rok ni ir reb e kangof ni ma maruwel u lan reb e binaw u Niger e manang e n’en ni nge rin’. Ke fal’eg ban’en ni nge unum e bitir rok ni aram e ke aruy e suga nge sol nge ran nib beech nga taabang. Rogon ni yog reb e ulung ni UNICEF, e bochan ni “i rin’ e re n’ey nib papey ni nge ayuweg e bitir rok nge mu me fek nga aspital ma aram e n’en ni ayuweg fare tir ni nge gol nib papey.”
Tamilangan’ ni yib u Bible e rayog ni nge ayuweg e yafas. Moses ni ir e yoloy e gin som’on e babyor ko Bible e gaar: “Pi machib rok Got ney e gathi thin ni dariy fan, ya ir e pogofan romed. Um folgad riy mu um pired nib n’uw nap’med u lan e re nam ni bay nga ba’nem e lul’ ni Jordan ni aram e ngam marod mpired ngay.” (Deuteronomy 32:47, BT) Ere, riyul’ ni faan gad ra fol ko thin nu Bible ma ra n’uw nap’an e yafas rodad, fa? Ma uw rogon ni nge ayuweg e yafas rodad?
Pi article u m’on e ke tamilangnag ni riyul’ ni Bible e reb e babyor nib thil ko yugu boch e babyor ya pi yiiy ni bay riy e goo ke lebug, ma chepin e girdi’ ni bay riy e ba puluw, ma thin riy a ba puluw ko science, ma dariy reb e thin riy ni ke togopuluw nga reb, ma rayog ni ngan fanay e thin riy e chiney. Aram e n’en ni ke micheg ni riyul’ nib thil e Bible. Ere, faanra ke yog e Bible ni rayog e yafas ni dariy n’umngin nap’an ngom, ma gathi ba ga’ fan ni ga ra fal’eg i yaliy nib fel’ rogon, fa?
Gamad be pi’ e athamgil ngom ni ngam fil e Bible ni nge yog e tamilangan’ nge tin nib riyul’ ngom nra yibnag e gapas nga lanin’uy nge felfelan’ e chiney i yan nga m’on. Ra felfelan’ e Pi Mich Rok Jehovah ni ngar ayuweged gur ni nge yog e bin riyul’ e tamilangan’ ngom.
[Box/Picture on page 9]
Ku reb i fan nib thil e Bible e bochan ni rayog ni nge pi’ e fulweg ko pi deer ni ba ga’ fan ni gad ma fith:
• Mang fan ni gad bay u roy?
• Mang fan ni ka boor e magawon?
• Ku bay e athap ko piin ni yad ba t’uf rog ni kar mad, fa?
Rayog ni ngam pirieg e fulweg ko pi deer ney nib puluw ko thin nu Bible u lan e re babyor ney ni ke fal’eg e Pi Mich Rok Jehovah.