Be Kunuy “Jehovah” Chon e Tabinaw Rok

“Mu athamgiliyed nguum pired ni gimed taab girdi’ ni fare [“gelngin Got nib thothup,” NW] e ke pi’ ngomed.”​—EFE. 4:1, 3.

UW ROGON NI NGAM WELIY?

Mang e be rin’ Jehovah ni nge lebguy e tin nib m’agan’ ngay?

Uw rogon ni ngad “taab girdi’gad” ni fare gelngin Got nib thothup e ke pi’ ngodad?

Mang e ra ayuwegdad ya nge yog ni ‘ngad golgad ngodad’?

1, 2. Mang e tin nib m’agan’ Jehovah ngay ni fan ko fayleng nge girdi’?

 TABINAW. Mang e ra yib ngan’um ni faanra kam rung’ag e re bugithin ney? Ga ra lemnag ni bay e t’ufeg nge felfelan’ riy? Fa ra yib ngan’um ni gimed chon e tabinaw rom e bay ban’en ni gimed ma rin’ u taabang, fa? Ara ga ra lemnag ni tabinaw romed e aram e gin ni bay e pagan’ riy, ma bay ban’en nrayog ni ngam filed riy, ma rayog ni ngam weliyed u taabang e n’en ni gimed be lemnag. Susun ni aram rogon nfaanra bay e t’ufeg u lan e tabinaw romed. Jehovah e ke Sunmiy e tabinaw. (Efe. 3:14, 15) Baadag Got ni urngin e engel u tharmiy nge girdi’ nu fayleng e yad ra mang reb e tabinaw ni bay e pagan’ u fithik’rad, ma ra taareban’rad.

² Tomuren ni ke denen Adam nge Efa ma girdi’ e gathi ka yad bang ko tabinaw rok Got, machane, de thil e tin nib m’agan’ Got ngay. Ra n’igin ni nge sug e Paradis u fayleng ko girdi’. (Gen. 1:28; Isa. 45:18) Ke rin’ urngin ban’en ni nge lebug e tin nib m’agan’ ngay. Ma boch ban’en ni ke rin’ e kan yoloy ko fare babyor u Bible ni Efesus ni be weliy murung’agen e taareban’. Gad ra weliy murung’agen boch e thin ko Efesus ma ngad guyed ko mang e rayog ni ngad rin’ed nib puluw ko tin nib m’agan’ ngay ni aram e nge taarebnag e tin ni ke sunmiy.

N’EN NI BE RIN’ JEHOVAH NI NGE LEBGUY E TIN NIB M’AGAN’ NGAY

3. Mang e ke rin’ Got nrogon ni yog ko Efesus 1:10? Wuin e ke tabab i rin’ e bin som’on?

³ Ke yog Moses ngak piyu Israel ni gaar: “I Somol ni ke mus ni ir e ir e Got rodad.” (Deut. 6:4) Tin ni be rin’ Jehovah e ba puluw ko tin nib m’agan’ ngay. Nap’an ni “taw nga nap’an,” me tabab Got ni nge rin’ boch ban’en ni nge taarebnag e tin ke sunmiy. (Mu beeg e Efesus 1:8-10.) Ke rin’ Jehovah l’agruw ban’en. Som’on e ke rin’ ban’en ni nge ayuweg e piin ni kan dugliyrad nrayog ni nga ranod nga tharmiy, yad ra ulul ko maruwel rorad u tan pa’ Jesus Kristus. Ke tabab Jehovah i rin’ e re n’ey ko Pentekost 33 C.E. u nap’an ni kan dugliyrad nga  gelngin Got nib thothup. Yad ra un ngak Kristus nga tharmiy ngar gagiyeggad. (Acts 2:1-4) Bochan fare biyul ni pi’ Kristus ma piin ni kan dugliyrad e kar manged e piin nib mat’aw u wan’ Got ma bay rogorad ni nge yog ngorad e yafas. Ma yad manang ni ke fakayrad Got ere kar manged “pi fak.”​—Rom. 3:23, 24; 5:1; 8:15-17.

4, 5. Mang e bin migid ni ke rin’ Jehovah?

⁴ Bin migid me kunuy Got e girdi’ ni yad ra par u Paradis u fayleng u tan Gil’ilungun Kristus. Ma fare ulung ko girdi’ ni “pire’ ni pire’” e yad e bin som’on ni ngar pared u Paradis. (Rev. 7:9, 13-17; 21:1-5) Ma nap’an e Gagiyeg rok Kristus u lan reb e biyu’ e duw ma bokum bilyon e girdi’ ni ran fasegrad ko yam’ mar pared u roy u fayleng. (Rev. 20:12, 13) Rayog ni ngad lemnaged ni bay boor e kanawo’ nrayog ni ngad daged riy nriyul’ ni gadad e girdi’ ni ke taareban’dad. Ma fare ulung ko girdi’ ni pire’ ni pire’ nge piin ni kan fasegrad ko yam’ e yad ra mang ‘urngin ban’en ni bay u but’ ni kan kunuyrad. Nap’an nra m’ay fare biyu’ e duw ma yira skengnagrad. Piin ni yad ra par nib yul’yul’ e yad ra mang “pi fak Got” u fayleng.​—Rom. 8:21; Rev. 20:7, 8. 

⁵ Ngiyal’ ney e be ulul Jehovah i rin’ ban’en ni be ayuweg e piin ni kan dugliyrad ni nge yog ni nga ranod nga tharmiy maku be ayuweg e piin ni yad ra par u Paradis. Machane, mang e ngad rin’ed nib puluw ko n’en ni be rin’ Got?

‘MU PARED NI GIMED TAAB GIRDI’ NI FARE GELNGIN NIB THOTHUP E KE PI’ NGOMED’

6. Mang e thin nu Bible ni be yog ni thingar da muulunggad u taabang?

⁶ Be yog e Bible ni piin Kristiano e thingar ra muulunggad u taabang. (1 Kor. 14:23; Heb. 10:24, 25) Dab da muulunggad ni bod e n’en ni ma rin’ e girdi’ u nap’an ni yad ra yan nga market ara tafen e gosgos. Ya ba t’uf ni ngad folgad ko pi n’en ni be fil Jehovah ngodad ma ngad paged gelngin Got nib thothup ni nge ayuwegdad me par nib fel’ e ngongol rodad.

7. Mang e be yip’ fan ni “nguud pired ni gadad taab girdi’ ni fare gelngin Got nib thothup e ke pi’ ngodad?

⁷ Bochan ni ke mich fare biyul ni ke pi’ Kristus u wan’dad, ma kad manged girdi’ nib mat’aw u wan’ Jehovah. Faanra gadad bang ko piin kan dugliyrad ma kad manged pifak Got ma faanra gadad bang ko yugu boch e saf ma kad manged pi fager rok Got. Machane, chiney ni ka gad be par ko re fayleng ney, ma rayog ni nge sum e magawon u fithik’dad. (Rom. 5:9; Jas. 2:23) Aram fan ni be yog e Bible ni ngad gum’an’gad. Mang e thingar da rin’ed ni nge yog ni nge taareban’dad e pi walagdad? Ba t’uf ni ngad filed rogon ni ngad ‘sobut’an’gad ma gad ba sumunguy.’ Ke yog Paul ni thingar da athamgilgad ni “nguud pired ni gadad taab girdi’ ni [“fare gelngin Got nib thothup,” NW] e ke pi’ ngodad u daken fare gapas ni ir e ke m’agdad nga taabang.” (Mu beeg e Efesus 4:1-3.) Gad ra fol ko re fonow ney ma be yip’ fan ni ngad paged gelngin Got nib thothup ni nge gagiyegnagdad me yib wom’engin ngodad. Maku dab da rin’ed e tin nib kireb ara pi n’en ni ma fanenikay Got. Wom’engin gelngin Got nib thothup e ra ayuwegdad ni ngad pithiged e magawon ni ke sum u fithik’dad ma ma ayuwegdad ni nge taareban’dad. Machane, ngongol nib kireb e ra ruwraba’nagdad.

8. Uw rogon ni ma kirebnag e tin nib kireb ni yima ar’arnag e tha’ u thilin e girdi’ nge tha’ u thilrad Got?

⁸ Uw rogon ni ma kirebnag e “tin nib kireb ni yima ar’arnag” e tha’ u thilin e girdi’? (Mu beeg e Galatia 5:19-21.) Girdi’ ni ma un ko ngongol ni darngal e ra par nib palog rok Jehovah nge ulung rok, ma en ni kar parew be’ ni gathi mabgol rok e ke kirebnag e tha’ u thilrad e en mabgol rok nge pi bitir rok. Ma be’ ni ke un ko ngongol ni golong e ke kirebnag e tha’ u thilrow Got nge tha’ u thilrad e piin nib t’uf rorad. Faanra ga be guy rogon ni ngam puthuy l’agruw ban’en nga taabang ni ga be fanay e glue, ma ga manang nib t’uf ni som’on e ngam klinnag. Ma be’ ni ma un ko ngongol ni puwlag e be darifannag e motochiyel rok Got nib mat’aw. Ere tin nib kireb ni yima ar’arnag e ma ruwraba’nag e girdi’ ma ma kirebnag e tha’ u thilrad Got. Pi ngongol ney e dabun Jehovah.

9. Mang boch e deer e rayog ni ngad fithed gadad riy, ya ngad nanged ko riyul’ ni gad be athamgil ni nge par e gapas u fithik’dad me taareban’dad?

⁹ Ere ba t’uf ni ngad fithed gadad ni nge lungudad:  ‘Riyul’ ni gu be athamgil ni nge par ni bay e gapas nge taareban’ u lan e ulung? Mang e gu ra rin’ u nap’an ni ke sum e magawon u thilmow be’? Gu ra weliy e re magawon nem ngak e pi fager rog ya gu baadag ni ngar ayuweged gag? Gu baadag ni piin ni piilal e ra pithig e magawon ma de t’uf ni nggu non ngak facha’ ni ke sum e magawon u thilmow? Faanra kug nang ni ke damumuw ngog, ma dab gu chugur ngak ya dabug ni nggu weliyew murung’agen e magawon romow? Faanra kad rin’ed reb ko pi n’ey ma gad be dag ni gad be ngongol nib puluw ko tin nib m’agan’ Jehovah ngay ni be taarebnag urngin e girdi’ u tan e gagiyeg rok Kristus?

10, 11. (a) Uw feni ga’ fan ni nge yib e gapas nga fithik’dad e pi walagdad? (b) Mang e rayog ni ngad rin’ed ni nge yib e gapas nga fithik’dad ma ra tow’athnagdad Jehovah?

¹⁰ I yog Jesus ni gaar: “Faanra mman ni ngam pi’ e n’en ni ngam pi’ ngak Got u mit e altar me yib ngan’um ni bay ban’en nib togopuluw u wan’ walagem ngom, ma ga pag e n’en ni ngam pi’ ngak Got u mit e altar ma ga yan ni ka chingiyal’ nem ngam fal’eg thilmew walagem; ma aram e fin mu sul ngam pi’ e n’en ni ngam pi’ ngak Got. ‘Faanra egnigem be’ nge fekem nga tafen e puf oloboch ma ga fal’eg e thin ngak ko ngiyal’ ni ka bay e tayim riy.’” (Matt. 5:23-25) I yoloy James ni “tin nib mat’aw e ngongol e wom’engin ni yib ko awoch ni piin ni ma fal’eg thiliy e ra yunged u fithik’ e gapas.” (Jas. 3:17, 18) Ere dabiyog ni ngaud rin’ed e ngongol nib mat’aw ni faanra dariy e gapas u fithik’dad.

¹¹ U lan e pi nam ni yibe mahl riy ma yibe susunnag ni 35 pasent ko binaw rorad e darur yunged e woldug riy ya kan pirieg ni bay e donmach ni kan k’eyag riy. Faanra bay e donmach ni ke pil u reb e binaw ma aram e dabkur yunged ban’en riy, ere ke mo’maw’ e par rorad ya dariy e maruwel rorad mi ki mo’maw’ ni ngar chuw’iyed e ggan ya dariy e salpiy rorad. Maku arrogodad, mo’maw’ ni ngaud mon’oggad ko tirok Got ni faanra dariy e gapas u thildad e pi walagdad ya bochan ni bay e ngongol rodad ni dubrad. Faanra aram rogon ma dabun e pi walagdad ni ngar chugurgad ngodad ni bod rogon fare donmach ni yima k’eyag ni ma k’aring e marus ko girdi’. Ere ba t’uf ni ngad thilyeged pangidad. Faanra dab da sagaalgad ni ngad n’aged fan e kireb rok e pi walagdad u wan’dad ma ra yib e gapas nga fithik’dad ma ra tow’athnagdad Jehovah.

12. Uw rogon ni nge ayuwegdad e piin piilal ni ngad taab girdi’gad?

¹² Maku piin piilal e rayog ni ngar ayuweged ni nge yib e gapas nga fithik’dad. Yad ra ayuwegdad ni ‘gadad gubin ni ngad bad nga taabang ngad taab girdi’gad u daken e michan’ rodad ngak Fak Got.’ (Efe. 4:13) Nap’an nra un e piin piilal ngodad i rin’ boch ban’en ni fan ku Got u taabang mi yad pi’ e fonow ngodad ni kan fek u Bible, ma aram e yad be ayuwegdad ni nga don’ed nga dakendad e bin nib beech i gadad. (Efe. 4:22-24) Nap’an nra pi’ e piin piilal e fonow ngom, ma dab mu pagtalin ni be fanayrad Jehovah ni ngar ayuweged gur ya nge  yog ni ngam par u lan fa bin nib beech e fayleng. Piin piilal, mu athamgilgad ni ngam yal’uweged e pi walag u reb e kanawo’ ni be m’ug riy nriyul’ ni gimed baadag ni ngam ayuweged yad.​—Gal. 6:1.

“UM GOLGAD NGOMED”

13. Mang wenegan riy nfaanra dab da folgad ko fonow ni bay ko Efesus 4:25-32?

¹³ Efesus 4:25-29 e be weliy boch ban’en ni thingar dab da rin’ed. Be yog ni dab da lifithed l’ugundad, ma dab da damumuwgad nib pag rogon, ma dab da malmalgad, ma dab dogned e thin nib kireb. Ya thingar dogned e thin ni ma pi’ e athamgil nga laniyan’ e girdi’. En dabi fol ko re fonow ney e be kirebnag e gapas ma be togopuluw nga “gelngin Got nib thothup,” ya fare gelngin Got nib thothup e ma ayuweg ni nge yib e gapas nga fithik’dad. (Efe. 4:30, NW) Ma kub t’uf ni ngad folgad ko thin rok Paul ni gaar: “Mu n’iged fan u wun’med urngin ban’en nib kireb ni ke aw nga lanin’med, nge tin ni kam dabuyed rok be’, ma dab ku um damumuwgad. Dab ku um tolulgad ngak be’ u fithik’ e damumuw ara umogned e thin nib kireb ngak be’! Dab ku um fanenikayed be’! Machane um golgad ngomed, me bigimed me munguy ngak bigimed, mu um n’iged fan u wan’med e tin nib kireb ni ke rin’ bigimed ngak bigimed, ni bod rogon Got ni bochan Kristus ma aram fan ni ke n’ag fan u wan’ e kireb ni kam rin’ed.”​—Efe. 4:31, 32.

14. (a) Mang e be yip’ fan fare bugithin ni “um golgad ngomed”? (b) Mang e ra ayuwegdad ni ngaud golgad ngak e girdi’?

¹⁴ Fare bugithin ni “um golgad ngomed” e be yip’ fan ni gathi gubin ngiyal’ ni gad ma gol ngak e girdi’, mab t’uf ni ngad athamgilgad ni ngaud ngongolgad ni aram rogon. Mab t’uf ni ngad lemnaged ni rib ga’ fan ni dab dogned e thin nra k’aring e kireban’ ngak be’! (Fil. 2:4) Sana gad baadag ni nga dogned e thin ni nge minmin e girdi’ ngay ma ra m’ug riy ni gadad ba sorok, machane dariy be’ nra kireban’ ngay, fa? Faanra ngad fal’eged i lemnag u m’on ni nga dogned e thin, ma ra ayuwegdad ni ‘ngaud golgad’ ngak e girdi’.

NGAM FIL ROGON NI NGAM T’UFEG MA NGAM TAYFAN CHON E TABINAW ROM

15. Uw rogon nra ayuweg e thin ni bay ko Efesus 5:28 e piin figirngiy ngar nanged nthingar ra folwokgad rok Kristus?

¹⁵ Be taareb rogonnag e Bible e tha’ u thilin Kristus nge ulung rok Got ko tha’ u thilin e en figirngiy nge leengin. Pi n’en ni i rin’ Kristus e ra ayuweg e en figirngiy ni nge nang nib t’uf ni nge ayuweg leengin ma i pow’iy u fithik’ e t’ufeg. Maku pi n’en ni i rin’ Kristus e ra ayuweg e en leengiy ni nge nang ni thingari yan nga laniyan’ e pumoon rok. (Efe. 5:22-33) Nap’an ni yoloy Paul ni gaar: “Pumoon e thingari t’uf rorad e piin nleengirad ni bod rogon nib t’uf dowrad rorad,” ma mini’ e be yog ni nge fol e piin figirngiy rok? (Efe. 5:28) N’en ni ke yog Paul u murung’agen Kristus nge ulung rok Got e ra ayuwegdad ni ngad pied e fulweg ko re deer nem. Ke yog nrib t’uf fare ulung rok Got rok Kristus me pi’ e yafas rok ni fan ngorad me beechnagrad “u daken e thin rok” Got. Ere, en figirngiy e ke milfan ngak ni nge ayuweg urngin e girdi’ u lan e tabinaw rok ni nge fel’ e tha’ u thilrad Jehovah. Re n’ey e ba puluw ko tin nib m’agan’ Jehovah ngay ni nge taarebnag urngin e girdi’ ngar manged ba tabinaw ni Kristus e be gagiyegnagrad.

16. Mang angin nra yib nfaanra rin’ e piin gallabthir e maruwel ni ke pi’ Jehovah ngorad?

¹⁶ Ba t’uf ni nge dabi pagtalin e piin gallabthir ni Jehovah e ke pi’ e maruwel ngorad ni ngar ayuweged e bitir rorad. Ba gel e kireban’ riy ya bay boor e girdi’ u fayleng e ngiyal’ ney e “dab kur golgad.” (2 Tim. 3:1, 3) Boor e piin figirngiy e dariy fan e re maruwel ney u wan’rad, ma bochan e re n’ey ma ke gafgow e pi bitir rorad. Machane, ke fonownag Paul e piin ni figirngiy ni Kristiano ni gaar: “Dab mu k’aringed e damumuw ngak e pi bitir romed. Machane ngam chuguluyed yad mi gimed llowan’nagrad nrogon ni ma fonownagey Jehovah nge rogon ni ma pow’iy e lem.” (Efe. 6:4, NW) Rayog ni nge fil e piin bitir rogon ni ngar t’ufeged e girdi’ ma ngar ted farad. Piin gallabthir ni yad ma fil e pi n’ey ngak e pi bitir rorad e yad be rin’ ban’en nib puluw ko tin nib m’agan’ Jehovah ngay ni aram e be taarebnag urngin e tin ke sunmiy. Ere piin gallabthir e thingar ra daged nib t’uf e pi bitir rorad rorad, ma ba t’uf ni  nge dab ra damumuwgad nib pag rogon, ma dab ra tolulgad ngorad, ma dab rogned e thin nra k’aring e damumuw ngorad. Yad ra rin’ ni aram rogon, ma aram e yad be fil ko bitir rorad u rogon ni ngar t’ufeged e girdi’ ma ngar ted fan e piin ni kab tolang ngorad. Re n’ey e ra ayuweg e pi bitir nge yog rorad ngar pared u lan fa bin nib beech e fayleng rok Got.

17. Mang e ba t’uf ni ngad rin’ed nge yog ni ngad togopuluwgad ngak fare Moonyan’?

¹⁷ Ba t’uf ni ngad nanged ni baadag fare Moonyan’ ni nge taleg e girdi’ ni dab ku ra pigpiggad ngak Got, maku aram rogon e n’en nra rin’ ngodad. Boor e mabgol u fayleng ni be wer, ma boch e kar parew be’ ndar mabgolgad, ma pumoon e be darngalnag e pumoon nge ppin ni be darngalnag e ppin, ere yad be rin’ e tin baadag Moonyan’ ni ngar rin’ed. Pi ngongol ney e ba fel’ u wan’ e girdi’ nu fayleng, machane dab da folgad rorad ya ngad folgad rok Kristus. (Efe. 4:17-21) Aram fan ni kan fonownagdad ni nga ‘don’ed nga dakendad urngin e talin e cham ni pi’ Got ngodad,’ nge yog ni ngad togopuluwgad ngak Satan nge pi moonyan’ rok.​—Mu beeg e Efesus 6:10-13.

“T’UFEG E THINGARI MANG IR E I GAGIYEGNAG E NGONGOL ROMED”

18. Mang e ba t’uf ni nge yog ngodad ma rayog ni nge taareban’dad?

¹⁸ Rayog ni nge taareban’dad ni faanra bay e t’ufeg rodad. Faanra ba t’uf Jesus ni “Somol” rodad, nge Jehovah ni “Got” rodad, nge pi walagdad, ma aram e t’ufeg e thingari mang ir e i gagiyegnag e ngongol rodad ma gad baadag ni ngad ‘athamgiliyed nguud pired ni gadad taab girdi’’ ni fare gelngin Got nib thothup e ke pi’ ngodad. (Efe. 4:3-6) Ke meybil Jesus u murung’agen e re t’ufeg nem ni gaar: “Gathi ke mus ni yad e gu be yibilayrad ngom, ya ku er rogon e piin ni kug mich u wun’rad ni bochan e thin rom ni kar weliyed ngorad. Chitamag! Gu be wenignag ngom ni ngam ayuwegrad ngar pired ni yad gubin ni kar taarebgad. Mu ayuwegrad ngar pired u fithik’dow ni bod rogon ni ga ba’ u fithik’ag ma gu ba’ u fithik’am. Mu ayuwegrad ngar taarebgad, nge yog ni mich u wan’ e girdi’ nu fayleng ni gur e kam l’ugeg ku gub.”​—John 17:20, 21, 26.

19. Mang e kam dugliy ni ngam rin’?

¹⁹ Sana bay boch e ngongol nib mo’maw’ ni ngad thilyeged, machane t’ufeg rodad e ra k’aringdad ni ngad meybilgad ni bod e n’en ni yog fare psalmist ni gaar: “Mu fil ngog rogon ni nggu pigpig ngom u polo’ i lanin’ug.” (Ps. 86:11) Thingar da togopuluwgad ngak fare Moonyan’ ni be guy rogon ni nge palognagdad rok e Chitamangidad nge pi walagdad. Ma ‘ud guyed rogon nguud pired ni gad be folwok rok Got, ni bochan e gadad pi fak ni gadad ba t’uf rok. T’ufeg e thingari mang ir e i gagiyegnag e ngongol rodad’ u lan e tabinaw, ngu nap’an ni gad be machib, ngu nap’an ni gad be chag ngak e girdi’ u lan e ulung rodad.​—Efe. 5:1, 2.

[Study Questions]

[Picture on page 29]

Me pag e n’en ni nge pi’ ngak Got u mit e altar, me yan ni ka chingiyal’ nem nge fal’eg thilrow walagen

[Picture on page 31]

Piin gallabthir, mu filed ngak e pi bitir romed u rogon ni ngar ted fan e girdi’