“Dab Gu Tamdag”
“Dab Gu Tamdag”
“Mus ni faan yad ra cham ngog, ma gu ra ug par ni kab pagan’ug ngak Somol.”—PS. 27:3.
UW ROGON NI NGE AYUWEGEM E PI VERSE NI BAARAY NI NGE PAR NIB MUDUGIL LANIN’UM?
1. Mang boch e deer ni bay ko Psalm 27 nra ayuwegdad ni ngad nanged fan?
MANG ni gad ma machib nib gel ni yugu aram rogon ni be gel i yan e magawon ko fayleng? Mang ni gad ma thognag boor e awa ma gad ma fanay gelngidad ko re maruwel ney ni yugu aram rogon ni ke buchuuw e salpiy ko nam? Ma uw rogon ni nge par nib mudugil lanin’dad ni yugu aram rogon ni boor e girdi’ ni yad be tatamdag ko pi n’en nra buch boch nga m’on? Reb e tang rok David ni Pilung ni bay ko Psalm 27 e ra pi’ e fulweg ko pi deer ney.
2. Mang e ra buch rok be’ ni ke yib e tamdag ngak nib gel? Mang ayuw ni bay nra pagan’dad ngay?
2 Ke tababnag David e re Psalm ney ko pi thin ni baaray: “I Somol e tamilang rog me ir e ba’ rog ni be ayuwegeg i yan; dab gu tamdag ngak be’. Somol e be yororiyeg rok urngin e riya’; ere dab gu tamdag.” (Ps. 27:1) Be’ ni ke yib e tamdag ngak nib gel e ra war laniyan’, ma dabkiyog ni nge rin’ ban’en. Machane, be’ ni be pagan’ ngak Jehovah e ba mudugil laniyan’ ma der ma ta tamdag. (1 Pet. 3:14) Faanra ngad ted Jehovah ni nge mang manaf rodad ma ‘ra i par nib pagan’dad ndariy rogon ni ngad rusgad.’ (Prov. 1:33; 3:25) Mang fan?
‘JEHOVAH E TAMILANG ROG ME IR E BA’ ROG NI BE AYUWEGEG’
3. Uw rogon ni ke mang Jehovah e tamilang rodad? Mang e thingar da rin’ed?
3 Nap’an ni yog e Bible ni “Somol e tamilang rog,” ma re n’ey e be yip’ fan ni Jehovah e ma fil ngodad e tin riyul’. (Ps. 27:1) Rayog ni nge ayuwegdad e magal ngad guyed boch ban’en u kanawo’ nrayog ni nge magawonnagdad, machane, dabiyog ni nge chuweg e pi n’em. Ba t’uf ni ngad siyeged e pi n’em. Ere ku arrogon Jehovah, ya ma ayuwegdad ni ngad nanged fan e pi n’en ni be buch u fayleng e ngiyal’ ney. Ma ginangdad u boch e magawon nrayog ni nge yib ngodad. Miki pi’ e pi kenggin e motochiyel nu Bible nriyul’ ni ma ayuwegdad, machane, thingar da folgad ko n’en ni kad filed. Gad ra rin’ ni aram rogon, ma aram e kad boded David ni ‘kab gonop ngak e pi toogor rok’ nge ‘pi sensey rok.’—Ps. 119:98, 99, 130.
4. (a) Mang fan nrayog ni nge yog David u fithik’ e pagan’ ni gaar, “Somol . . . ir e ba’ rog ni be ayuwegeg”? (b) Wuin e ra ayuweg Jehovah e pi tapigpig rok ni ngar mageygad ni yad ba fas?
4 Thin rok David ni bay ko Psalm 27:1 e be m’ug riy ni ke yib ngan’ u rogon ni ke ayuweg Jehovah kakrom. Bod ni ke ayuweg Jehovah David “u pa’ e layon nge bear.” Maku ke ayuweg David ni nge gel ngak Goliath. Tomur riy, “Me guy Saul ni Pilung rogon ni nge rugoy fare sarey ngak David”, machane ke ayuweg Jehovah ko pi magawon nem. (1 Sam. 17:37, 49, 50; 18:11, 12; 19:10) Arfan ni ke yog David u fithik’ e pagan’ ni gaar: “Somol . . . ir e ba’ rog ni be ayuwegeg”! Maku ra ayuweg Jehovah e pi tapigpig rok ni bod rogon e n’en nrin’ ngak David. Ni uw rogon? Ra ayuweg e pi tapigpig rok ni yad ra magey nib fas u nap’an fare “gafgow ni ba ga’.”—Rev. 7:14; 2 Pet. 2:9.
DAB MU PAGTALIN U ROGON NI KE AYUWEGEM JEHOVAH
5, 6. (a) Uw rogon ni nge par nib mudugil lanin’dad nfaanra dab da paged talin rogon ni ke ayuwegdad Got kafram? (b) Mang fan nib fel’ ni ngad lemnaged rogon ni ke ayuweg Jehovah e girdi’ rok kakrom?
5 Rayog ni ngad beeged e thin ni bay ko Psalm 27:2, 3 nra ayuwegdad ni nge mudugil lanin’dad. (Mu beeg.) Ke yib ngan’ David u rogon ni ke ayuweg Jehovah u nap’an ni ke yib e magawon ngak. (1 Sam. 17:34-37) Bochan nde pagtalin e pi n’em ma ke yog rok ni nge k’adan’ u nap’an ni ke yib boch e magawon nib gel ngak. Gur, ke yib ngan’um u rogon ni ke ayuwegem Jehovah kafram? Kam meybil ngak Jehovah ni boor yay ni nge ayuwegem u reb e magawon nib gel ni ke yib ngom, ma kam guy ko u rogon ni ke pi’ e gonop ngom nge gelngim ma ke yog rom ni ngam gel ko re skeng nem? Ara ke yib ngan’um rogon ni ke chuweg boch ban’en ni i magawonnag e machib ni ga be tay ara ke bing e kanawo’ ngom, ma ke yog ni ngam un nga reb e maruwel u lan e ulung nib ga’ fan? (1 Kor. 16:9) Uw rogon ni ke ayuwegem e pi n’em? Pi n’em e susun ni nge ayuwegem ni nge dab mu pagtalin nrayog rok Jehovah ni nge ayuwegem nge yog ni ngam pithig boch e magawon nib gel?—Rom. 5:3-5.
6 Mang e gad ra rin’ ni faanra baadag reb e am ni nge kirebnag e ulung rok e Pi Mich Rok Jehovah? Dawori n’uw nap’an, ma bay boch e girdi’ ni kar guyed rogon ni ngar kirebnaged e ulung rok Jehovah, machane der yog rorad. Faanra yib ngan’dad u rogon ni ke ayuweg Jehovah e girdi’ rok kakrom, ma rayog ni ngad k’adedan’dad ndemtrug e n’en nra buch rodad boch nga m’on.—Dan. 3:28.
T’UFEG RODAD KO BIN RIYUL’ E LIYOR
7, 8. (a) Rogon ni bay ko Psalm 27:4, mang e ke ning David ngak Jehovah? (b) Mang fare tempel rok Jehovah ni gathi girdi’ e ke ngongliy, ma uw rogon ni yima liyor ngak u rom?
7 T’ufeg rodad ko bin riyul’ e liyor e ku ra ayuwegdad ni nge par nib mudugil lanin’dad. (Mu beeg e Psalm 27:4.) U nap’an David ma “naun rok Somol” e gathi tempel ya tabernacle ni kan ngongliy ko tento. Ke guy David rogon ni nge fal’eg urngin ban’en ya nge yog rok Solomon ni nge toy fare tempel nib fel’ yaan ni fan ngak Jehovah. Tomuren ni ke yan boor e duw me weliy Jesus ni bay ba ngiyal’ nra taw ngay ma daki t’uf ni nge yan e girdi’ nga tempel ni ngar liyorgad ngak Jehovah. (John 4:21-23) Thin rok apostal Paul ni bay ko Hebrew guruy ni 8 nge mada’ ko 10 e be dag ni ke sum reb e tempel ni gathi girdi’ e ke fal’eg, u nap’an ni ke un Jesus ko taufe ko duw ni 29 C.E., me ognag ngak Jehovah ni nge rin’ e tin nib m’agan’ ngay. Ke yarmiy Jehovah ban’en ni rayog ni nge ayuwegdad nge yog ni ngad liyorgad ngak. (Heb. 10:10) Re tempel ney e Jehovah e ke fal’eg, mu daken e michan’ rodad ko maligach ni ke pi’ Jesus, ma rayog ni ngad fel’gad u wan’. Uw rogon ni ngad liyorgad ngak? Ngad meybilgad ni “gadad ba yul’yul’ u lanin’dad ngak ma mmich u wan’dad nder maruwaran’dad rok”; ma ngad tedan’dad i weliy ngak e girdi’ murung’agen e athap rodad, ma ngad pied e athamgil nga laniyan’ e pi walagdad u nap’an ni gad ra un ko pi muulung rodad ngu nap’an e fol Bible ni tabinaw. (Heb. 10:22-25) Ra par nib gel e michan’ rodad e ngiyal’ ney ko tin tomuren e rran nfaanra ba ga’ fan u wan’dad fare yaram rok Got ni fan ko bin riyul’ e liyor.
8 Pi tapigpig rok Jehovah u ga’ngin yang e fayleng e yad ma fanay boor e tayim rorad ni fan ko machib, ma yad ma fil boch e thin nu bang, ma ka ranod nga boch e binaw ni buchuuw e girdi’ riy ni ma machibnag murung’agen Gil’ilungun Got ni ngar pied e ayuw ngorad. Ere be m’ug riy ni kar boded fare psalmist ni ke mus ni taa ban’en e ke ning ngak Jehovah. Yad baadag ni ngar felan’gad nga feni fel’ Jehovah ma yad be pigpig ngak ndemtrug ko mang e ra buch rorad.—Mu beeg e Psalm 27:6.
NGE PAGAN’UM NRA AYUWEGEM GOT
9, 10. Mang e be micheg ko Psalm 27:10?
9 Be m’ug ko thin rok David ni i pagan’ nra ayuweg Jehovah, ya yog ni gaar: “Ra n’igeg e chitamag nge chitinag, machane Somol e ra ayuwegneg.” (Ps. 27:10) Bochan e thin ni bay ko 1 Samuel guruy ni 22, ma kad nanged ni gallibthir rok David e dar digeyew David. Machane, boor e girdi’ ni kar gafgowgad ni bochan ni gallibthir rorad e kar digeyed yad. Ma boor i yad e ke ayuwegrad e ulung ko Kristiano.
10 Ba m’agan’ Jehovah ngay ni nge ayuweg e pi tapigpig rok ni kan digeyrad. Ere, ba mutrug nra ayuwegrad u nap’an ni ke yib boch e magawon ngorad. Bod nfaanra ke magafan’dad nga rogon ni ngad pied e tin nib t’uf ko tabinaw rodad, ma dab da paged talin nra ayuwegdad Jehovah ko pi n’em. (Heb. 13:5, 6) Manang rarogodad, maku manang e tin nib t’uf rodad.
11. Mang e ra lemnag e girdi’ ni faan gad ra dag ngorad ni be pagan’dad ngak Jehovah? Mu weliy.
11 Gad ra weliy murung’agen Victoria ni be’ nu Liberia ni bay dalip e bitir rok. Cha’ney e ma un ko fol Bible, ma nap’an ni ke mon’og ko tirok Got ma ke chugur ni nge un ko taufe, ma fare pumoon ni ur parew e ke digeyrad. Yugu aram rogon ni dariy e naun rorad maku dariy e maruwel rok ma de tal i fil e Bible, me munmun me un ko taufe. Tomuren ni ke un ko taufe, ma bitir rok ni ppin ni 13 e duw rok e pirieg reb e saifu nib sug ko salpiy. Kar dugliyew ni dab ra theegew e salpiy u lan fare saifu. Ma n’en ni kar rin’ew e kar gayew fare salthaw ni ir e fen e re saifu nem. Me gaar faen ni salthaw ngorow, faan manga urngin e girdi’ e yad ba yul’yul’ ni bod e Pi Mich Rok Jehovah ma ra fel’ boch rarogon e fayleng mab gapas. Me beeg Victoria boch e thin nu Bible ngak ni be weliy murung’agen e bin nib beech e fayleng ni ke micheg Jehovah. Me pi’ fare salthaw boch e salpiy ngak Victoria ya ke felfelan’ ko michan’ nge yul’yul’ rok. Girdi’ u ga’ngin yang e fayleng e yad manang ni Pi Mich Rok Jehovah e ri yad ba yul’yul’, ya yad manang ni bay gelngin Jehovah ni nge ayuwegrad ko urngin ban’en nib t’uf rorad.
12. Mang fan ni ngad ululgad ko pigpig ngak Jehovah ni yugu aram rogon ni kan talegdad ko maruwel ara dariy e salpiy rodad? Mu weliy.
12 Mu lemnag e n’en ni buch rok Thomas ni reb e publisher ndawori un ko taufe ni be’ nu Sierra Leone. Ir reb e sensey, ma kafin ni un ko maruwel, ke chugur ni nge gaman reb e duw ndan pi’ puluwon ngak. Ka nog nrayog ni ngan pi’ puluwon ngak nfaanra non ngak e en nib ga’ ko re skul nem. Ma cha’nem ni ir e ba ga’ ko re skul nem e ke yog ngak Thomas ndabiyog ni nge ulul ko maruwel rok u rom ya bochan ni ir bagayad e Pi Mich Rok Jehovah. Faanra baadag ni nge ulul ko maruwel mab t’uf ni nge digey e teliw rok. Me digey Thomas e re maruwel rok nem ni yugu aram rogon ndan pi’ puluwon. Tomur riy, me pirieg yugu reb e maruwel ni ma fal’eg e radio nge cell phone ni ke kireb. Ere, boor e mich riy ni faanra ngad pagedan’dad ngak Jehovah ma ra pi’ e tin nib t’uf rodad. Bochan ni ir e ke Sunmiy urngin ban’en ma ma Ayuweg e girdi’ rok ni gubin ngiyal’ ere gad manang nra ayuwegdad.
13. Mang fan ni pi walagdad ni yad ma par u lan e pi nam nib gafgow e boor e tayim ni yad ma fanay ni fan ko machib?
13 Pi walagdad u lan e pi nam nib gafgow e boor e tayim ni yad ma fanay ni fan ko machib. Mang fan? Reb e tochuch rodad e yoloy ni gaar: “Boor e girdi’ ni kar uned ko fol Bible e dariy e maruwel rorad, ere boor e tayim rorad ni ngar filed e Bible ni rran. Maku arrogon e pi walagdad ni bay boor e tayim rorad ni fan ko machib. Ma girdi’ ni yad ma par u reb e nam nrib gel e gafgow riy e ba mom ni nge mich u wan’rad ni gadad be par ko tin tomuren e rran ya yad be guy e pi n’en ni be buch u toobrad.” Maku, u reb e nam ni boor e publisher riy nra reb ma bay dalip e girdi’ ni be fil e Bible ngorad. Ma reb e missionary ni ma par u rom ni ke pag 12 e duw e yoloy ni boor ko pi walag e yad ma thognag boor e awa ni fan ko machib ya de yoor e chugum rorad nib t’uf ni ngar ayuweged.
14. Uw rogon nra ayuweg Got fare ulung nib ga’?
14 Ke micheg Jehovah nra ayuweg e ulung rok, ma be pagan’dad ngak. (Ps. 37:28; 91:1-3) Bay ba ulung i girdi’ nib ga’ ni yad ra magey nib fas u nap’an fare “gafgow ni ba ga’.” (Rev. 7:9, 14) Ere, ra ayuweg Got fare ulung nib ga’ ya dabi pag be’ ni nge thang owchen urngin e girdi’ rok e ngiyal’ ney ko tin tomuren e rran. Maku reb e kanawo’ ni ma ayuwegrad Jehovah e ma pi’ ngorad urngin ban’en nib t’uf rorad ya nge yog ni ngar pared ni yad ba yul’yul’ ngak u nap’an nra yib e skeng ngorad. Ma nap’an e Armageddon ma ra ayuwegrad ni ngar mageygad ni yad ba fas.
‘JEHOVAH, MU FIL NGOG E N’EN NI GAB ADAG NI NGGU RIN’’
15, 16. Uw rogon nra fel’ rogodad riy nfaanra ngad folgad ko n’en ni ke fil Got ngodad? Mu weliy.
15 Ba t’uf ni nga i fil Got ngodad rogon ni nge yog ni nge par nib mudugil lanin’dad. I yog David ni gaar: “Somol, mu fil ngog e n’en ni gab adag ni nggu rin’, ma ga fekeg i yan u daken ba pa’ i kanawo’ ndariy ban’en nra buch rog riy, ya boor e toogor rog.” (Ps. 27:11) Faanra gad baadag ni ngad folgad ko n’en ni be yog e re thin nu Bible ney, ma thingar da tedan’dad u rogon ni be pow’iydad Jehovah u daken e ulung rok ma ngad folgad riy. Bod ni boor e girdi’ ni kar folgad ko fonow ni ngar paged boor ban’en ya nge yog ni ngar tedan’rad nga taa ban’en. Ere kar thanged e malfith rorad ma kar pied e chugum rorad nchuway’, ma nap’an ni ke buchuuw e salpiy ko nam ma gathi rib gel e magafan’ ni kar ted. Chiney e daki t’uf ni ngar maruwelgad nib gel ya gathi ri boor e chugum nib t’uf ni ngar pied puluwon, ma ke yoor e tayim rorad ni ngar fanayed ko machib. Ere, ngad fithed gadad ni nge lungudad, ‘Gu ma fol ko urngin ban’en ni kug beeg u Bible nge boch e babyor ni ke fal’eg fare tapigpig nib yul’yul’ mab gonop ni yugu aram rogon nib mo’maw’?’—Matt. 24:45.
16 Faanra ngad paged Jehovah ni nge fil ban’en ngodad, me ir e ra yog ngodad e n’en ni ngad rin’ed, ma dariy fan ni ngad tamdaggad. Reb e walag ni regular pioneer u Meriken e ke guy rogon ni nge fek reb e maruwel nrayog ni nge ayuweg ir nge chon e tabinaw rok ni ngar ululgad ko pioneer. Machane ke yog faen nib ga’ ko maruwel rorad ngak ndabiyog ni nge fek e re maruwel nem ya de un ko skul nib tolang. Gur, ke buch rom ban’en ni aram rogon, ma ke kireban’um ya de yog rom ni ngam un ko skul nib tolang? Tomuren ni ke yan l’agruw e wik, ma faen nib ga’ ko maruwel rok e kan chuweg, ma ke yib reb e ga’ nga lon, me fith ngak fare walag ko mang e be nameg. Me yog ngak ni ir nge ppin rok e yow e Pi Mich Rok Jehovah ma yow ma machib nib polo’ e tayim rorow ma yow baadag ni ngar ululgow ko re maruwel ney. Tomuren ni ke yog fare walag e re n’em me yog fare ga’ ni gaar: “Gu manang ni gimed e girdi’ nib thil! U nap’an ni ke m’ar e papa’ rog ma l’agruw e girdi’ ko teliw romed ni ma yib ni ngar beegew e thin nu Bible ngak ni gubin e rran. Ere kug micheg ni faanra rayog ni nggu ayuweg e Pi Mich Rok Jehovah ma gu ra rin’.” Bin migid e rran me pi’ fare maruwel ngak fare walag, ni ereray fare maruwel ndan pi’ ngak ko som’on. Ere, riyul’ ni faanra ngad m’oneged Gil’ilungun Got ko yafas rodad ma ra pi’ Jehovah e tin nib t’uf rodad.—Matt. 6:33.
BA GA’ FAN E MICHAN’ NGE ATHAP RODAD
17. Mang e ra ayuwegdad ni nge dab da rusgad ko n’en nra buch boch nga m’on?
17 Ke ayuwegdad David ni ngad nanged feni ga’ fan e michan’ nge athap rodad, ya ke yog nra “guy e tin nib fel’ ni bayi rin’ Somol ni fan ngak e tirok e girdi’.” (Ps. 27:13) Gur, uw rogon e yafas rodad nfaanra de pi’ Got e athap ngodad ma dad nanged fare thin ni bay ko Psalm 27? Ere, ngiyal’ ney e rib t’uf ni ngaud meybilgad ngak Jehovah ni nge pi’ gelngidad me ayuwegdad ngad mageygad nib fas u nap’an e Armageddon.—Mu beeg e Psalm 27:14.
[Study Questions]
[Picture on page 23]
Ke yib ngan’ David u rogon ni ke ayuweg Jehovah u nap’an ni ke yib e magawon ngak
[Picture on page 25]
Gad be lemnag ni bochan ni ke buchuuw e salpiy ko nam ma kan bing e kanawo’ ngodad ni ngad yoornaged e tayim rodad ko machib?
