Mu Pigpig Ngak Got ni Ma Ayuwegem ni Nge Puf Rogom

“Baaray fan ni nge t’uf Got rodad: fan e ngad folgad ko tin ni ke yog ni ngad rin’ed. Ma tin ni ke yog ni ngad rin’ed e gathi rib mo’maw’.”​—1 JOHN 5:3.

RAYOG NIM FULWEG?

Mang e baadag Satan ni ngad lemnaged u murung’agen e pi motochiyel rok Got?

Mang fan ni thingar da kol ayuwgad ko mini’ e ngad chaggad ngorad?

Mang e ra ayuwegdad ya nge yog ni ngad pared nib yul’yul’ ngak Got ni ir e ma pithigdad ko kireb?

1. Uw rogon u wan’ Jehovah e puf rogon? Mang puf rogon e ke pi’ Jehovah ngak Adam nge Efa?

 GOO Jehovah e bay e puf rogon rok ndariy gin nra mus riy. Machane gubin ngiyal’ ni ma fanay e re puf rogon rok ney nib fel’ rogon. Der ma gagiyegnag urngin ban’en ni ma rin’ e pi tapigpig rok. Ya ma pagrad ni ngar turguyed ban’en ma ma pag ni ngar rin’ed e tin nib mat’aw ni yad baadag ni ngar rin’ed. Bod ni kemus ni taa ban’en e ke yog ngak Adam nge Efa ni dabiyog ni ngar rin’ew. Ke yog ngorow ni dab ra kew wom’engin “fare ke gek’iy ni ma tamilangnag an’uy ko tin nib fel’ nge tin nib kireb.” (Gen. 2:17) Ere de mo’maw’ ni ngar rin’ew e tin nib m’agan’ Got ngay ni yugu aram rogon ni bay e puf rogon rorow!

2. Mang fan ni Adam nge Efa e kar mangew sib ko denen?

² Mang fan ni ke pi’ Got e puf rogon ngak Adam nge Efa ni aram rogon? Ke sunmiyrow Got ni bod yaan me pi’ e nangan’ ngorow, ere ba puluw ni nge lemnag ni t’ufeg rorow ni fan ngak e ra pow’iyrow ko kanawo’ nib mat’aw. (Gen. 1:27; Rom. 2:15) Machane, de pining Adam nge Efa e magar ngak e En ke Sunmiyrow ko puf rogon ni ke pi’ ngorow. Ma aram e yow e kar turguyew ko mang e tin nib kireb nge tin nib mat’aw. Yow be lemnag ni faanra yow ra rin’ ni aram rogon ma kari puf rogorow. Machane, bin riyul’ riy, bochan e n’en ni kar rin’ew ma yow nge pi fakrow e kar manged sib ko denen nge yam’.​—Rom. 5:12.

3, 4. Uw rogon ni be guy Satan rogon ni nge bannagdad u murung’agen e motochiyel rok Got?

³ Faanra ke yog rok Satan ni nge k’aring l’agruw e girdi’ nib flont nge bokum e engel ni ngar paged e motochiyel rok Got, ere ku rayog ni nge rin’ ngodad. Taareb rogon e n’en ni ma rin’ Satan e ngiyal’ ney. Be guy rogon ni nge tay nga lanin’dad ni motochiyel rok Got e rib mo’maw’ ni ngan fol riy ma dariy e felfelan’ riy. (1 John 5:3) Girdi’ nu fayleng e yad ma lemnag ni aram rogon, ma faanra ngaud chaggad ngorad  ma rayog ni ngad lemgad ni bod yad. Reb e walag ni ppin ni ke 24 e duw rok e chiney e ke yog ni ke af ngak e ngongol nib kireb ya bochan ni ke chag ngak e girdi’ nib kireb. Ke rus ni nge lem nib thil nga rogon e lem ko piin fel’ yangaren. Ma bochan e re n’em ma ke un ko ngongol ni darngal. Sana kam thamiy nrib mo’maw’ ni ngam palog ko pi fager rom.

⁴ Machane, mus ko girdi’ u lan e ulung nrayog ni ngar k’aringed gur ngam rin’ e tin nib kireb. Reb e walag ni pumoon ni kab pagal e ke yog ni bay boch e fager rok u lan e ulung ni yad ma chag ngak boch e ppin ni gathi tapigpig rok Jehovah. Ma ke af ngak e re ngongol nem ya ma un ngorad. Me yog ni gaar: ‘Ke kireb e tha’ u thilmow Jehovah. Nap’an ni gu un ko muulung ma ma chalchalbag ngay, ma gathi ri gu ma un ko machib. Ma ireray e ngiyal’ ni kug naab nib fel’ ndab ku gu un ngorad, ma ireray e n’en ni kug rin’.’ Gur, kam guy ni ngongol ko pi fager rom e rayog ni nge af ngom? Gad ra weliy murung’agen e n’en ni buch rok boch e girdi’ u Bible.​—Rom. 15:4.

KE FEL’ U WAN’RAD

5, 6. Uw rogon ni bannag Absalom e girdi’? Gur, ke yib angin e re ban rok nem?

⁵ Be weliy e Bible murung’agen boor e girdi’ ni ngongol rorad nib kireb e ke af ngak boch e girdi’. Bagayad e Absalom ni fak David ni Pilung. Absalom e rib pichoay. Machane ke par ni be lemnag e tin nib kireb ni bod e n’en ni rin’ Satan. Baadag Absalom ni nge yan nga lon chitamangin ni yugu aram rogon ndariy mat’awun ni nge mang pilung. * Ere ke athamgil Absalom ni nge tay nga laniyan’ e girdi’ ni kab fel’ ngak David ya ri baadag ni nge ayuwegrad ma chitamangin e danga’. I yog Absalom boor e thin nde riyul’ nib togopuluw ngak e chitamangin ni bod rogon e n’en ni rin’ fare Moonyan’ u Eden.​—2 Sam. 15:1-5.

⁶ Gur, ke yib angin e n’en ni ke rin’ Absalom? Arrogon, bay boch ni ke yib angin, ya be yog e Bible ni gaar: “Me fel’ Absalom u wan’ e girdi’.” (2 Sam. 15:6) Ke yog rok Absalom ni nge bannag e girdi’ machane tomur riy me war. Bochan e n’en ni ke rin’ me yim’, miki yim’ bokum biyu’ e girdi’ ni ke bannagrad.​—2 Sam. 18:7, 14-17.

7. Mang e gad ra fil ko n’en ni buch rok Absalom? (Mu guy fare sasing ni bay ko page 19.)

⁷ Mang fan nrib mom ni ke bannag Absalom piyu Israel? Sana bochan nri yad baadag e pi n’en ni ke micheg ngorad ara bochan nrib fel’ yaan. Machane, ba mudugil nreb i fan nib mom ni kan bannagrad e bochan dar yul’yul’gad ngak Jehovah nge David ni ir ke dugliy Got ni nge mang pilung. Ngiyal’ ney, e ka ma fanay Satan e girdi’ ni bod “Absalom” ya be guy rogon ni nge bannag e pi tapigpig rok Jehovah. Sana yad ra yog ni lungurad, ‘Rib mo’maw’ e motochiyel rok Jehovah. Mu yaliy e piin ni gathi yad e tapigpig rok Jehovah. Ri yad ba felfelan’!’ Nap’an ni ga ra rung’ag ku be’ e pi thin ney ma ga ra nang nde riyul’ e n’en ni be yog ma ga par ni gab yul’yul’ ku Got? Ga ra nang ni kemus ni fare motochiyel rok Jehovah “nrib fel’,” ni aram fare motochiyel rok Kristus e ra ayuwegem ni nge puf rogom? (Jas. 1:25) Faanra aram rogon ma ga dag nib t’uf rom e re motochiyel nem, ma ga fanay e puf rogon ni kan pi’ ngom ni ngam felfelan’nag Jehovah.​—Mu beeg e 1 Peter 2:16.

8. Mang e n’en ni buch rok boch e girdi’ ni be m’ug riy ndabi yib e felfelan’ ngak e piin ndarur folgad ko motochiyel rok Jehovah?

⁸ Ri baadag Satan ni nge bannag e piin fel’ yangaren. Reb e walag ni pumoon ni ke gaman 30 e duw rok e chiney e weliy murung’agen e n’en ni buch rok u nap’an ni kab fel’ yangaren ni gaar: “Kafram e gu ma lemnag nder ayuwegeg e motochiyel rok Jehovah ya be magawonnageg.” Ma wenegan riy e ke un ko ngongol ndarngal. Machane, re n’em e de pi’ e felfelan’ ngak, ya yog ni gaar: “Nangan’ rog e ke magawonnageg u lan boor e duw.” I yoloy reb e walag ni ppin murung’agen e n’en ni buch rok u nap’an ni kab  fel’ yangaren ni gaar: “Tomuren ni kam un ko ngongol ndarngal ma ra kireban’um ma ga thamiy ni dakuriy fam. Ki mada’ ko chiney ni ke yan 19 e duw ma ka ma yib ngan’ug e n’en ni buch rog.” Maku reb e walag ni ppin e yog ni gaar: “Dabun Satan ni ngam lemnag wenegan e ngongol nib kireb. Baadag ni ngam lemnag ni ngongol ndarngal e ma pi’ e felfelan’ ngom, machane, bin riyul’ riy e tomuren ni kam un ngay ma ga ra thamiy ndakuriy fam. Gathi riyul’ e n’en ni yima dag ko kachido ni bay e felfelan’ riy!”

9. (a) Mang boch e deer nrayog ni nge ayuwegdad ni ngad nanged ko uw rogon Jehovah nge pi motochiyel nge pi kenggin e motochiyel rok u wan’dad? (b) Mang nib ga’ fan ni ngad nanged Got nib fel’ rogon?

⁹ Rib gel e kireban’ riy, ya boor e pi walagdad nib fel’ yangaren nge ku boch e walag ni kar ilalgad e kar uned ko re ngongol ney nib kireb ma ke kireban’rad nib gel. (Gal. 6:7, 8) Ere, mu fithem ni nge lungum: ‘Gu manang e pi n’en ni ma fanay Satan ni nge bannageg, fa? Gu be lemnag nriyul’ ni Jehovah e fager rog ma gubin ngiyal’ ni ma yog ngog e thin riyul’ ma baadag ni nge yog e tin th’abi fel’ ngog? Rib mich u wan’ug ni dabi taleg rog e tin nib fel’ ni aram e pi n’en nra pi’ e felfelan’ ngog?’ (Mu beeg e Isaiah 48:17, 18.) Rayog ni nga mog ni arrogon ko pi deer ney ni faanra riyul’ Jehovah u wan’um. Ba t’uf ni ngam nang ni pi motochiyel nge pi kenggin e motochiyel u Bible e be m’ug riy ni gab t’uf rok Jehovah ma dabun ni nge magawonnagem.​—Ps. 25:14.

NGAM MEYBIL NGAK GOT NI NGE YOG NI NGAM FOL ROK MA GA PAR NI GAB GONOP

10. Mang fan ni thingar da athamgilgad ni ngad folwokgad rok Solomon ni Pilung?

¹⁰ Nap’an ni kab pagel Solomon me meybil u  fithik’ e sobut’an’ ni gaar: “Ku gub pagel nda gu nang rogon e gagiyeg.” Ere ke meybil ni nge pi’ Got e gonop ngak. (1 Ki. 3:7-9, 12) Ke fulweg Jehovah taban e re meybil nem. Ere faanra ngam yibilay e gonop maku ra pi’ ngom, ndemtrug ko ka gab pagel ara kam pilibthir. Riyul’ ni dabi pi’ Jehovah e gonop ngom nfaanra dab mu maruwel ngay. Machane ra ayuwegem nfaanra ngam fil e Thin rok nib fel’ rogon, mag yibilay gelngin nib thothup, ma ga fanay urngin e ayuw ni ke pi’ ngodad u lan e ulung rok. (Jas. 1:5) Riyul’ ni ke ayuweg Jehovah e pi tapigpig rok nib muun ngay e piin ni ka yad ba pagel ni nge yog e gonop ngorad ni kab fel’ ko gonop rok e piin ndarur folgad ko motochiyel rok Got, nge girdi’ ni yima yog ni “yad ba llowan’” ko re fayleng ney.​—Luke 10:21; mu beeg e Psalm 119:98-100.

11-13. (a) Mang e gad ra fil ko Psalm 26:4, nge Proverbs 13:20, nge 1 Korinth 15:33 nib ga’ fan? (b) Uw rogon ni ngam fol ko pi kenggin e motochiyel ney u Bible?

¹¹ Gad ra weliy e chiney boch e thin nu Bible ni be fil ngodad rogon ni ngad mel’eged e piin ni ngad chaggad ngorad. Pi thin ney e ra ayuwegdad ngad nanged ko mang nib ga’ fan ni ngad filed e Bible ma ud fal’eged i lemnag e thin ni kad beeged ya nge yog ni ngad nanged Jehovah nib fel’ rogon. Psalm 26:4 e be yog ni gaar: “Dagur ma chagil ko piin ni dariy rogorad nga bang; dariy rogog ko piin yad ma dake modingniged yad.” Ma Proverbs 13:20 e be gaar: “Mpachegem ngak e piin ni yad ba gonop me yog e gonop ngom. Mm’agem ngak e girdi’ ni balyang ma ga kireb.” Ma 1 Korinth 15:33 e be gaar: “Nchag ngak e girdi’ nib kireb me kireb pangiy nib fel’.”

¹² Mang e gad ra fil ko pi thin nem u Bible? (1) Baadag Jehovah ni ngaud mel’eged e piin ngaud chaggad ngorad. Baadag ni nge ayuwegdad ni nge dab da rin’ed ban’en nra magawonnagdad nge tha’ u thildad Got. (2) Ra af ngodad e ngongol rok e piin ni gad ma chag ngorad. Pi verse nem e be dag ni be guy Jehovah rogon ni ngad turguyed ban’en ni keb u gum’ircha’dad. Aram fan ni kan yoloy ni gathi ba motochiyel ya der yog ni “thingar dab mu rin’ e re n’ey” ara “thingar dab mu rin’ e re n’em.” Ere bod ni ke yog ngodad ni gaar: ‘Ireray e bin riyul’. Mang e ga ra rin’? Mang e bay u lan gum’irchaem?’

¹³ Ma bochan ni kan yoloy e pi verse ney ni gathi ba motochiyel, ma aram e rayog ni ngan fanay ni gubin ngiyal’ maku rayog ni ngan fanay u boor e kanawo’. Mu fithem ni nge lungum: Uw rogon ni nggu siyeg e piin ni “yad ma dake modingniged yad”? Mingiyal’ e rayog ni nggu chag ngak e girdi’ ni aram rogon? (Prov. 3:32; 6:12) Mini’ e piin ni “yad ba gonop” ni baadag Jehovah ni ngad chaggad ngorad? Ma mini’ e “girdi’ nib balyang” ni baadag ni ngad paloggad rorad? (Ps. 111:10; 112:1; Prov. 1:7) Mang ‘pangig’ nib fel’ e rayog ni nggu kirebnag, nfaanra nggu chag ngak e girdi’ nib kireb? Gur, goo girdi’ nu fayleng e ba kireb ni ngan chag ngorad, fa? (2 Pet. 2:1-3) Uw rogon ni ngam fulweg e pi deer ney?

14. Uw rogon ni nge mon’og e Fol Bible ni Tabinaw ni gimed ma tay?

¹⁴ Tomuren ni kam lemnag fan e pi verse nem, maku rayog ni ngam beeg boch e thin nu Bible nib ga’ fan ngom nge chon e tabinaw rom. * Pi gallabthir, mu nameged ni ngam weliyed e pi n’ey u nap’an e Fol Bible ni Tabinaw romed. Nap’an ni ngam rin’ed e re n’ey, dab mu paged talin ni gimed be nameg ni ngam ayuweged chon e tabinaw romed ni ngar nanged nri gadad ba t’uf rok Got nrogon ni be m’ug ko pi motochiyel nge pi kenggin e motochiyel rok. (Ps. 119:72) Fol Bible ni aram rogon e ra ayuweg chon e tabinaw ni ngar chugurgad ngak Jehovah maku ra fel’ e tha’ u thilin e girdi’ u lan e tabinaw.

15. Uw rogon ni ngam nang ni gur be’ ni ga ma fol rok Got ma gab gonop?

 ¹⁵ Uw rogon ni ngam nang ni gur be’ ni ga ma fol rok Got ma gab gonop? Reb e kanawo’ e ngam taareb rogonnag e lem rom ko lem rok e pi tapigpig rok Got nib yul’yul’ kakrom ni bod David ni Pilung. I yoloy ni gaar: “Got rog, ri gub adag ni nggu rin’ e tin nib m’agan’um ngay! Thin rom e be par u fithik’ i lanin’ug.” (Ps. 40:8) Maku en ni yoloy e Psalm 119 e yog ni gaar: “Rib t’uf rog e motochiyel rom! Gu ma par ni gu ma lemnag ni polo’ e rran.” (Ps. 119:97) Ba t’uf ni ngam maruwel nib gel ni faanra nge yog ngom e t’ufeg ni aram rogon. Ere, ba t’uf ni ngam fil e Bible nib fel’ rogon ma ngam meybil ngak Got ma ngam fal’eg i lemnag e pi n’en ni kam beeg. Maku ra gel e t’ufeg rom ko thin rok Got u nap’an ni kam guy ni boor e tow’ath ni ke pi’ Jehovah ngom ni bochan e kam fol ko pi motochiyel rok.​—Ps. 34:8.

NGAM MARUWEL NIB GEL NI NGE PUF ROGOM!

16. Mang e thingar dab da paged talin ni faanra gad baadag ni nge puf rogodad?

¹⁶ Kab kakrom i yib ma boor e girdi’ nib m’agan’rad ni ngar uned ko cham ya nge dab kur pared ni yad e sib rok reb e nam. Ku arrogon gur ni ga baadag ni ngam maruwel nib gel ya nge dab kum par ni gab sib ko denen. Dab mu pagtalin ni gathi goo Satan, nge fayleng rok, nge lem ko fayleng e toogor rom. Ya ku gur be’ ni gab meewar ma gum’irchaem e ba sasalap. (Jer. 17:9; Efe. 2:3) Machane, bochan e ayuw rok Jehovah e rayog ni ngam gel ngay. Gubin ngiyal’ ni ngam turguy ni ngam rin’ e tin nib mat’aw ma bay angin nra yib riy. Som’on e ga ra felfelan’nag Jehovah. (Prov. 27:11) Bin migid, e gubin ngiyal’ ni ngam guy ni faan ga ra fol ko “fare motochiyel nrib yal’uw ni ir e ma pithig e girdi’ ko kireb” ma ra yib angin ngom, ma ra mudugil u wan’um ni nga um par ko fare kanawo’ nib “wen’in” nra pow’iyem ko yafas ndariy n’umngin nap’an. Boch nga m’on ma ra pi’ Jehovah ngom e puf rogon ni ke micheg ni nge pi’ ngak urngin e girdi’ nib yul’yul’ ngak.​—Jas. 1:25; Matt. 7:13, 14.

17. Mang fan ni thingar dabi mulan’dad nga fadad meewar? Uw rogon ni ma ayuwegdad Jehovah?

¹⁷ Riyul’ ni yu ngiyal’ ma gadad gubin ni gad ma oloboch. (Ekl. 7:20) Faanra kam oloboch ma dabi mulan’um nge pag rogon ara ngam lemnag ndakuriy fam. Ya n’en ni ngam rin’ e ngam athamgil ni ngam yal’uweg e magawon rom ma ga ning e ayuw ko piin piilal. I yoloy James ni gaar: “Re meybil ney ni yira tay u fithik’ e michan’ ngak Got e ra golnag fare m’ar; i Somol e ra chuweg e m’ar rok, ma pi denen ni ke ngongliy e ra n’ag Got fan.” (Jas. 5:15) Arrogon, dab mu pagtalin ni riyul’ ni be runguyem Got ma baadag ni ngam par u lan e ulung rok ya ke guy ni bay ban’en rom nib fel’. (Mu beeg e Psalm 103:8, 9.) Gubin ngiyal’ nra ayuwegem Jehovah ni faanra ngam guy rogon ni ngam pigpig ngak u polo’ i gum’irchaem ngu lanin’um.​—1 Kron. 28:9.

18. Uw rogon ni ngad puluwniged e ngongol rodad ko meybil rok Jesus ni bay ko John 17:15?

¹⁸ Nap’an e bin tomur e nep’ u m’on ni yim’ Jesus, ma ir nge fa 11 i apostal rok nib yul’yul’ e kar meybilgad. Me yog Jesus ko meybil rok ni gaar: “Gu be wenignag ngom ni ngam ayuwegrad rok Faanem nib Kireb.” (John 17:15) Maku arrogon e ngiyal’ n’ey ni ma lemnag Jesus rarogon pi gachalpen. Ere, rayog ni nge mudugil u wan’dad nra fulweg Jehovah taban e meybil rok Jesus ma be matanagiydad e ngiyal’ ney ni ke mo’maw’ e par rodad. “[Jehovah] e ma pi’ e ayuw mma yoror rok e piin yad ba mat’aw ma yad ba yul’yul’. Ir e ma yoror rok e piin yad ma ayuweg boch e girdi’, ma matanagiy e piin yad ma folwok rok.” (Prov. 2:7, 8) Arrogon, faanra ngam athamgil ni ngam par ni gab yul’yul’ ngak Got ma ra yib boor e magawon ngom, machane, kemus ni ireray e kanawo’ ni nge yog e yafas ni manemus ngom riy ma rayog ni ngan pi’ ngom e bin riyul’ e puf rogon. (Rom. 8:21) Boch e girdi’ e yad be lemnag ni gathi aram rogon, machane, dab mu pag ni ngar bannaged gur!

[Footnotes]

[Study Questions]

[Pictures on page 19]

Uw rogon ni ngad nanged ko mini’ e piin ni yad ma ngongol ni bod Absalom ya nge yog ni ngad paloggad rorad?