Mu Fil Ban’en ko Thin Rok Got

Mang e Ma Rin’ e Pi Kan nu Tharmiy ni Bay Rogon Ngodad?

Re article ney e bay boch e deer riy ni sana kaam fith kafram. Be weliy e re article ney e fulweg riy ni kan fek u Bible. Pi Mich Rok Jehovah e yad baadag ni ngar weliyed e fulweg riy ngom.

1. Chon Mini’ e Pi Engel?

Yad e pi kan ni kan sunmiyrad ma yad ma par u tharmiy. Ka yad ba tolang ngak e girdi’. Fa bin riyul’ e Got ni ku ir reb e kan e ke sunmiy e pi engel u m’on ni ke sunmiy e fayleng. (Job 38:4, 7; Matthew 18:10) Bokum milyon e engel ni yad ba liyeg Jehovah.​—Mu beeg e Psalm 103:20, 21; Daniel 7:9, 10.

2. Ma ayuweg e pi engel e girdi’, fa?

Ke ayuweg e pi engel Lot ni be’ nib mat’aw. I par u lan fare mach ni ke dugliy Got ni nge kirebnag ya girdi’ ni yad ma par riy e yad ba kireb. Ke yib l’agruw e engel ni ngar fonownagew Lot nge chon e tabinaw rok ngar chuwgad u rom. Boch e girdi’ e yad be finey ni be thin ni gosgos ma dar folgad. Machane Lot nge fa gali ppin ni fak e kar mageygad ni yad ba fas ya kar folgad ko fonow ni ke pi’ Got ngorad u daken fa gali engel.​—Mu beeg e Genesis 19:1, 13-17, 26.

Be yog e Bible ni be ayuweg e pi engel e girdi’ e ngiyal’ ney, ya yad be pow’iy e piin ni yad be machibnag fare thin nib fel’ u murung’agen Gil’ilungun Got u fithik’ e yul’yul’. (Matthew 24:14) Fare thin nib fel’ e ba muun ngay e fonow. Bod fare fonow ni kan pi’ ngak Lot e gathi thin ni gosgos. Ke pi’ Got e re fonow nem ngak u daken fa gal engel.​—Mu beeg e Revelation 1:1; 14:6, 7.

Ma fanay Got e pi engel ni ngar gelnaged e michan’ rodad u nap’an ni ke yib e skeng ngodad. Ke fanay Got reb e engel ni nge pi’ gelngin Jesus.​—Mu beeg e Luke 22:41-43.

Dabki n’uw nap’an ma ra fanay e pi engel u reb e kanawo’, ni aram e ngar chuweged e girdi’ nib kireb ni yad be k’aring e gafgow. Ma re n’em e ra fal’eg laniyan’ e girdi’.​—Mu beeg e 2 Thessalonika 1:6-8.

 3. Mang e ma rin’ e pi moonyan’ ni bay rogon ngodad?

Boor e girdi’ nu fayleng e kar togopuluwgad ngak Got, ere ku arrogon u tharmiy ni boor e engel ni kar togopuluwgad ngak Got. (2 Peter 2:4) Pi engel ni kar togopuluwgad ngak Got e ka nog e pi moonyan’ ngorad. Ma Satan e ir pilungen e pi moonyan’. Satan nge pi moonyan’ rok e yad ma bannag e girdi’.​—Mu beeg e Revelation 12:9.

Ma fanay Satan e siyobay nib kireb, nge am ko girdi’, nge pi yurba’ i teliw ni googsur ni nge k’aring e girdi’ ngar paloggad rok Got. Ere Satan e ke k’aring e girdi’ ni ngar uned ko ngongol nde mat’aw, nge cham, maku ir e ke k’aring ni nge yib e gafgow ngorad.​—Mu beeg e 1 John 5:19.

4. Uw rogon ni ma bannag e pi moonyan’ e girdi’?

Ke yag rok Satan ni nge bannag boor e girdi’ ni ngar lemnaged ni piin ni kar m’ad e kar manged e pi kan nrayog ni ngar nonad ngorad. Be yog e Bible ndariy ban’en nrayog ni nge rin’ e yam’. (Eklesiastes 9:5) Machane pi moonyan’ e yad ma bannag e girdi’ ya yad ma non ni laman e piin ni ke yim’ nib t’uf rorad. (Isaiah 8:19) Pi moonyan’ e yad ma fanay e sothuw, nge gathliy ni ngar bannaged e girdi’. Thin rok Got e be fonownagdad ni ngad paloggad ko pi ngongol ney. Thingar da n’aged urngin ban’en ni bay rodad ni bay rogon ko pi moonyan’ nge pig.​—Mu beeg e Deuteronomy 18:10, 11; Acts 19:19.

Faanra ba t’uf Jehovah rodad, ma thingar dab da rusgad ngak e pi moonyan’. Nap’an ni ngad filed e Thin rok Got mad folgad riy, ma aram e gad be togopuluw ngak fare Moonyan’ ma gad be chuchugur ngak Got. Kab gel gelngin Jehovah ngak e pi moonyan’. Ma pi engel rok nib yul’yul’ e rayog ni ngar gelnaged gadad ko ngiyal’ nib t’uf.​—Mu beeg e Psalm 34:7; James 4:7, 8.

Ra ga baadag ni ngkum nang boch, mag guy e guruy ni 10 ko fare babyor ni ke fal’eg e Pi Mich Rok Jehovah.