Mu Kol Ayuw ko Pi Wup Rok Moonyan’!

“Ngar milgad nga orel ko wup rok moonyan’.”​—2 TIM. 2:26.

UW ROGON NI GA RA FULWEG?

Faanra gubin ngiyal’ ni ga ma gay e kireb rok boch e girdi’, ma mang e thingar mu rin’?

Mang e gad ra fil rok Pilate nge Peter u murung’agen e towasar nge marus ko girdi’?

Mang e ra ayuwegem ni nge dabi kireban’um nib gel ni bochan e denen ni kam rin’ nib ubchiya’?

1, 2. Mang e pi n’en ni ma tay fare Moonyan’ ni fan ngodad ni bod e wup ni gad ra weliy ko re article ney?

 MA GAY fare Moonyan’ rogon ni nge kol e pi tapigpig rok Jehovah. Machane gathi taareb rogon ngak be’ ni ma mokol gamanman nib ga’ ni ma li’ ngem’ e gamanman ni ke kol. Ya n’en ni baadag ni nge rin’ fare Moonyan’ e tomuren ni ke kol be’ me k’aring ni nge rin’ e tin ni baadag.​—Mu beeg e 2 Timothy 2:24-26.

² Faanra baadag be’ ni ma mokol gamanman ni nge kol e gamanman ni kab fas ma ra fanay ba wup. Sana baadag ni nge rin’ ban’en ya nge chuw fare gamanman ko gin ni be mith riy, me yag ni nge kol ni be fanay e uppol. Ara rayog ni nge fanay ba wup ni ke mithag ya nge dabi nang fare gamanman. Maku aram e n’en ni ma rin’ Satan, ya baadag ni nge kol e pi tapigpig rok Got ni ka yad ba fas. Faanra dubdad ni nge koldad Satan mab t’uf ni ngad nanged mad folgad ko fonow nra ayuwegdad ngad nanged e gin ni ke tay Satan e pi wup rok ngay. U lan e re article ney, ma gad ra weliy dalip e wup ni ma tay Satan ni nge kol boch e girdi’ rok Got. Ma pi n’ey ni bod e wup ni aram e (1) dabkiyog ni ngan gagiyegnag e thin, nge (2) marus nge towasar, nge (3) kireban’ nib gel ni bochan e denen ni kan rin’. Ma bin migid e article e ra weliy murung’agen l’agruw ban’en ni ki tay Satan ni bod e wup.

MU GAGIYEGNAG E THIN ROM

3, 4. Mang wenegan nra yib riy nfaanra dabiyog ni ngad gagiyegniged bolowthdad? Mu weliy.

³ Faanra be par e pi gamanman u lan reb e loway ma mo’maw’ ni ngan kolrad. Rayog ni nge urfeg be’ bang ko fare loway ya nge chuw e pi gamanman ko gin ni yad be mith riy, me yag ni nge kolrad. U lan e ulung ko Kristiano ma mo’maw’ rok fare Moonyan’ ni nge kol e pi walag u rom. Ere ma athamgil ni nge wageynag e girdi’ u lan e ulung ko Kristiano ni bod rogon faen ni ke urfeg fare loway. Ma faanra bay e pi walag ni kar chuwgad ko ulung ni bochan fare magawon, ma mom  ni nge kolrad. Uw rogon, ma ra yan i aw ni gad be ayuweg Satan ni nge koldad ndab da nanged?

⁴ Ke yog James ni bolowthey e bod ba nifiy. (Mu beeg e James 3:6-8.) Faanra dabiyog ni ngad gagiyegniged bolowthdad, ma rayog ni ngad k’aringed ni nge wagey e girdi’ u lan e ulung ni bod ni kam tababnag e nifiy. Ni uw rogon? Mu lemnag e re n’ey: Nap’an ni yibe muulung, mi nog ni reb e walag ni ppin e ke mang regular pioneer. Tomuren fare muulung, ma bay l’agruw i walag ni yow be weliy murung’agen fare walag ni kefin ni mang regular pioneer. Bagayow e ke yog ni ke felfelan’ ma be athapeg nrayog ni nge ulul ko pioneer e re walag nem. Ma bagayow e ke yog ni ke un e cha’ nem ko pioneer ya kemus ni baadag ni nge yog e girdi’ u lan e ulung e sorok ngak. Ere mini’ ko gal walag nem e ga baadag ni nge mang fager rom? Mom ni ngan nang ko mini’ arorow e baadag ni nge wageynag e girdi’ u lan e ulung ko thin rok.

5. Mang e thingar da yaliyed gadad riy ya nge yag ni ngad gagiyegniged e thin rodad?

⁵ Uw rogon ni ngad gagiyegniged e thin rodad? Ke yog Jesus ni gaar: “L’uguney e ma weliy e n’en ni ke sugnag lanin’uy.” (Matt. 12:34) Ere som’on e ngad yaliyed gum’ircha’dad. Thingar da siyeged e lem nra k’aringdad ni nga dogned e thin nib kireb u murung’agen e girdi’. Bod ni, faanra kad rung’aged ni bay reb e walag ni pumoon ni be athamgil ni nge rin’ boor ban’en ni fan ko ulung, ma gur, gad ra lemnag ni ke rin’ e re walag nem ni aram rogon ya ba t’uf Jehovah rok? Fa gad ra lemnag ni ke rin’ ni aram rogon ya baadag ni nge yag boch ban’en ngak? Faanra gubin ngiyal’ ni gad ma lemnag ni be pigpig e pi walagdad ngak Jehovah ya yad baadag ni nge yag boch ban’en ngorad, mab fel’ ni ngad lemnaged ni aram e n’en ni ke rin’ fare Moonyan’ ngak Job. (Job 1:9-11) Ffel’ ni ngad yaliyed gadad ko mang fan ni gad be lemnag ni aram rogon u murung’agen e cha’ nem. Riyul’ ni bay fan ni ngad lemgad ni aram rogon? Ara ke af ngodad e lem ko fayleng nib kireb e ngiyal’ ney?​—2 Tim. 3:1-4.

6, 7. (a) Mang boch ban’en nra k’aringdad ni goo thibngin e girdi’ e gad be yaliy? (b) Mang e gad ra rin’ nfaanra ka nog e thin nib kireb ngodad?

⁶ Mu lemnag boch ban’en nra k’aringdad ni goo thibngin e girdi’ e gad be yaliy. Reb, e sana gad baadag ni nge gagiyel e pi n’en ni kad rin’ed. Sana gad be gathibthibnag boch e girdi’ ya gad be guy rogon ni nge gagiyel ni ka gad ba cheg ngorad. Ara gad be rin’ ni aram rogon ya nge dabi gagiyel e n’en nthingar da rin’ed machane de yag rodad. Demtrug ko kad rin’ed e re n’em ni bochan e gad ba tolangan’, ara gad be awan’ ngak boch e girdi’, ara darud pagedan’dad ngodad, ma re n’ey e ra magawonnagdad.

⁷ Sana gad be lemnag nriyul’ ni bay fan ni ngad gathibthibnaged be’. Ra buch ni ke yog ban’en u murung’agdad ni ke k’aring e damumuw ngodad. Machane de mat’aw ni ngam fulweg taban e kireb ni ke rin’ be’ ngom, ya faanra ngam fulweg ma ra gel e magawon u thilmew, ma ga be rin’ e tin nib m’agan’ fare Moonyan’ ngay. (2 Tim. 2:26) Thingar da folwokgad rok Jesus. Nap’an ni ka  nog e thin nib kireb ngak “ma de ta’ puluwon ni thin nib kireb.” Ya i “pag fan urngin ban’en ngak Got, ni ir fare Tapufthin nib mat’aw.” (1 Pet. 2:21-23) I pagan’ Jesus ngak Jehovah nra pithig urngin e magawon u rogon nib m’agan’ ngay. Ere susun ni ngad pagedan’dad ngak Jehovah ni bod Jesus. Nap’an ni gad be yog e thin nra pi’ e athamgil nga laniyan’ e girdi’ ma aram e gad be ayuweg fare ‘gapas ni ir e ke m’agdad nga taabang.’​—Mu beeg e Efesus 4:1-3. *

DAB MU PAG NI MARUS NGE TOWASAR E NGE MANG WUP NGOM

8, 9. Mang fan ni ke turguy Pilate ni ngan li’ Jesus ngem’?

⁸ Fare gamanman ni ke aw ko wup e dabkiyog ni nge yan nga bang ni baadag. Maku arrogon be’ ni ke yib e marus ngak ara bochan e towasar ni dabkiyog ni nge rin’ boch ban’en ni baadag. (Mu beeg e Proverbs 29:25.) Gad ra weliy murung’agen l’agruw e girdi’ ni kar rin’ew ban’en nib kireb ni bochan e marus nge towasar.

⁹ Pontius Pilate ni fare Pilung nu Roma e manang nde buch e rok Jesus ma dabun ni nge rin’ ban’en nib kireb ngak. Ke yog ndariy ‘ban’en ni ke ngongliy ni ke yib tapgin ni ngan thang e fan rok.’ Machane ke turguy Pilate ni ngan li’ Jesus ngem’. Mang fan? Bochan e towasar ni ke tay e girdi’ ngak. (Luke 23:15, 21-25) Ke towasariy e girdi’ Pilate ni nge rin’ e tin yad baadag ni lungurad: “Faan ga ra pag Jesus nge yan ma aram e gathi ka gur e fager rok fare pilung nu Roma”! (John 19:12) Sana ke rus Pilate ni ngan taleg ko maruwel rok ara ke rus ni nge yim’ nfaan ra ayuweg Kristus. Ere ke rin’ e tin nib m’agan’ fare Moonyan’ ngay.

10. Mang e ke k’aring Peter me yog nde nang Jesus?

¹⁰ Apostal Peter e bagayad e pi fager rok Jesus. I machibnag e girdi’ ni yoor ni Jesus e ir fare Messiah. (Matt. 16:16) Nap’an ni boor pi gachalpen Jesus nra paged nge dakur uned ngak ya dar nanged fan e n’en ni be yog ngorad, me par Peter nib yul’yul’ ngak Jesus. (John 6:66-69) Ma nap’an ni yib e girdi’ ni ngar koled Jesus me fanay Peter ba sayden ni nge ayuweg e Masta rok. (John 18:10, 11) Machane, munmun me yog Peter ngak boch e girdi’ nde nang ko mini’ Jesus Kristus ya ke rus ngorad. Marus e bod ba wup, ma bod ni ke aw Peter ngay nib ngoch nap’an. Ke m’ay gelngin ni nge rin’ e tin nib mat’aw, ma daki yag ni nge par nib yul’yul’ ngak Jesus.​—Matt. 26:74, 75.

11. Mang e pi n’en nib kireb ni susun ni ngad togopuluwgad ngay?

¹¹ Gubin e Kristiano mab t’uf ni ngar athamgilgad ndab rin’ed ban’en ndabun Got ni yugu aram rogon ni bay be’ ni be towasariyrad. Sana en ba ga’ ko maruwel rodad ara boch e girdi’ e ra towasariydad ni ngad sasalapgad ara k’aringdad ni ngad uned ko ngongol ndarngal. Ma piin ni yad ma un ko skul e sana ra towasariyrad e piin taab yangarrad ni ngar sasalapgad u nap’an ni bay e skeng u skul, ara ngar yaliyed ban’en ni yaan e puwlag, ara ngar thoyed e tamagow, ara ngar fanayed e falay nib kireb, ara ngar unumed e alkul nib pag urngin, ara ngar uned ko ngongol ndarngal. Ere mang e ra ayuwegdad ndab da rin’ed e tin dabun Jehovah ni bochan e marus nge towasar?

12. Mang e gad ra fil rok Pilate nge Peter?

¹² Ngad guyed ko mang e gad ra fil ko n’en ni i rin’ Pilate nge Peter. Gathi ri boor ban’en ni manang Pilate u murung’agen Kristus. Machane manang ndawori bucheg Jesus ban’en mab thil nga yugu boch e girdi’. Machane de sobut’an’ ma de t’uf rok fare Got nib riyul’. Ere rib mom ni ke aw ko wup rok fare Moonyan’. Machane Peter e ke nang e tin riyul’ mab t’uf Got rok. Machane yu ngiyal’ e der nang e gin ni nge mus riy, ma ke rus ko girdi’, me war e michan’ rok nbochan e towasar. U m’on nni kol Jesus me yog Peter ngak ni gaar: “Ra pagem e pi cha’ney ni yad gubin, mi gag e ri dab gu pagem!” (Mark 14:29) Faanra i pagan’ Peter ngak Got ni bod fare psalmist ma susun rayog ni nge gel ko fare skeng. I yon’ fare psalmist e tang ni gaar: “I Somol e ba’ rog, ere dab gu rus; mang e rayog ni nge rin’ e girdi’ ngog?” (Ps. 118:6) Fare nep’ u m’on ni yim’ Jesus, me fek Jesus Peter  nge l’agruw e apostal rok nga ranod nga lan fare milay’ nu Gethsemane. Machane, de yag rok Peter nge fa gal nem e apostal ni ngar pared ni yad ba od. Ke pugrad Jesus me yog ni gaar: “Um odgad nguum meybilgad ngak Got nge siy mpaged gimed ngak e pi n’en ni ma pingeg e girdi’ nge denen.” (Mark 14:38) Machane ki mol Peter bayay me munmun ma ke war e michan’ rok ni bochan e marus nge towasar.

13. Uw rogon ni ngad togopuluwgad ngak be’ nra towasariydad ni ngad rin’ed e tin nib kireb?

¹³ N’en ni rin’ Pilate nge Peter e ku ra fil ngodad ban’en nib ga’ fan: Rayog ni nge gel be’ ko towasar ni faanra bay e tamilangan’ nib puluw, mab sobut’an’, ma manang e gin ni nge mus riy, mab t’uf Got rok, ma bay madgun Jehovah u wan’, ma der marus ko girdi’. Faanra bay e tamilangan’ rodad nib puluw ma gad ra weliy e michan’ rodad u fithik’ e pagan’. Rayog ni nge ayuwegdad e re n’ey ni nge dabi gel e towasar ngodad, ma dabi war e michan’ rodad ni bochan e marus ko girdi’. Riyul’ nthingar dab da lemnaged nri gadad ba gel ni bod e n’en ni rin’ Peter. Ya thingar da lemnaged nib t’uf rodad gelngin Got nge yag rodad ni ngad gelgad ko towasar. Thingar da yibilayed gelngin Got nib thothup, ma t’ufeg rodad ngak e ra k’aringdad ni ngad folgad ko motochiyel rok ma dab da rin’ ban’en nra kirebnag fithingan. Ma kub t’uf ni ngad fal’eged rogodad u m’on ni nge yib e skeng ngodad. Bod nib t’uf ni ngad meybilgad e pi bitir rodad u taabang ma ngad filed ngorad boch ban’en, ma yad ra nang e n’en nib t’uf ni ngar rin’ed ko ngiyal’ nra k’aringrad boch e bitir ni ngar rin’ed e tin nib kireb.​—2 Kor. 13:7. *

MU SIYEG NI NGE DABI KIREBAN’UM NIB GEL NI BOD BA WUP NI KAM AW NGAY

14. Mang e baadag fare Moonyan’ ni ngad lemnaged u murung’agen e kireb ni kad rin’ed?

¹⁴ Yu ngiyal’ ma yima fal’eg reb e wup ni kan ngongliy ko baley i ren ara malang nib ga’ ni kan tining nga lang u daken woen e gamanman. Re ley i ren nem ara malang e kan m’ag ko waya min tining nga lang min fek gafan ni waya min cheleg ngan dibchey u woen e gamanman. Ma nap’an nra yit’ e gamanman fare waya me mul fare ley i ren ara malang nga daken. Nap’an ni ke kireban’dad nib gel ya be yog e nangan’ rodad ngodad nrib gel e kireb ni kad rin’ed ma bod ni gowa ke aw ban’en nrib tomal nga dakendad, ma ke ‘aw parowdad kad masengsenggad.’ (Mu beeg e Psalm 38:3-5, 8, BT.) Baadag Satan ni ngad lemnaged ni dabki runguydad Jehovah ma dabiyog ni ngad folgad ko pi motochiyel rok.

15, 16. Mang e ra ayuwegem ni nge dabi kireban’um nib gel ni bochan e denen ni kam rin’ nib ubchiya’ ni bod ni kam aw ko wup?

¹⁵ Uw rogon ni ngam siyeg e magawon ni aram rogon, ni bod ni ke aw ban’en nib tomal nga dakenam? Faanra kam rin’ e denen nib ubchiya’, ma ngam rin’ ban’en e chiney ya nge fel’ e tha’ u thilmew Jehovah bayay. Ngam ning e ayuw ngak e piin piilal. (Jas. 5:14-16) Ngam athamgil ni ngam yal’uweg e magawon rom. (2 Kor. 7:11) Faanra kan gechignagem ma dabi mulan’um. Ya aram reb e pow ni gab t’uf rok Jehovah. (Heb. 12:6) Ngam athamgil ni nge dab mu denen bayay, ma ngam gay rogon ni nge dab kum rin’ urngin ban’en ni ke k’aringem ni ngam rin’ e tin nib kireb. Tomuren ni kam kalngan’um ma kam tabab i rin’ e tin m’agan’ Got ngay, ma thingari mich u wan’um nrayog ni nge n’ag fan e denen rom u daken e biyul ni ke pi’ Jesus Kristus.​—1 John 4:9, 14.

¹⁶ Yu ngiyal’, ma boch e girdi’ e ka be par ni be kireban’ nib gel u tomuren ni kan n’ag fan e denen rorad. Faanra aram rogon e magawon rom, ma dab mu pag talin ni ke n’ag Jehovah fan rok Peter nge yugu boch e apostal u tomuren ni kar digeyed Jesus u nap’an nrib t’uf e ayuw rok. Ke n’ag Jehovah fan u wan’ e kireb rok fare pumoon ni kan tharbog ko ulung nu Korinth ya ke un ko ngongol ndarngal machane munmun me kalngan’. (1 Kor. 5:1-5; 2 Kor. 2:6-8) Be weliy e Bible  murung’agen e girdi’ ni kar rin’ed e denen nib ubchiya’ machane ke n’ag Jehovah fan e kireb rorad.​—2 Kron. 33:2, 10-13; 1 Kor. 6:9-11.

17. Mang e rayog ni nge rin’ fare biyul ngodad?

¹⁷ Ra n’ag Jehovah fan me pag talin e kireb ni kam rin’ nfaanra riyul’ ni ke mich u wan’um nra runguyem. Dab mu lemnag ni fare biyul ni ke pi’ Jesus e dabiyog ni nge ayuwegem ni nge n’ag Got fan e kireb rom. Ya faanra aram rogon ni ga be lemnag, ma aram e bod ni kam aw ko reb e wup rok Satan. Baadag ni ngam lemnag nder n’ag Jehovah fan e denen rom ya dabi gaman ko fare biyul ni ke pi’ Jesus. Machane, piin ni kar denengad ma kar kalgadngan’rad e yira n’ag fan rorad. (Prov. 24:16) Faanra ke mich u wan’um fare biyul ma ra ayuwegem ni nge dabki kireban’um nib gel ni bochan e denen ni kam rin’, ma rayog ni nge pi’ gelngim ni ngam pigpig ngak Got u polo’ i gum’irchaem, ngu polo’ i lanin’um, ngu polo’ i lem rom.​—Matt. 22:37.

GAD MANANG E PI WUP ROK SATAN

18. Uw rogon ni ngad siyeged e pi wup rok fare Moonyan’?

¹⁸ Gathi rib ga’ fan u wan’ Satan ko miti mang wup e gad ra aw ngay. N’en ni be nameg e ngad awgad ko wup rok, ara ngad rin’ed e tin nib m’agan’ ngay. Bochan ni gad manang e pi wup rok ara pi ban rok, ma rayog ni ngad gelgad ngak. (2 Kor. 2:10, 11) Dabiyog ni ngad awgad ko wup rok ni faanra ngad yibilayed e gonop ma dabi warnag lanin’dad e skeng ni ke yib ngodad. I yoloy James ni gaar: “Faanra dariy e gonop rok bigimed, ma nge wenignag ngak Got, ye ir e ra pi’ ngak; yi Got e ba gol ngak urngin e girdi’.” (Jas. 1:5) Ba t’uf ni ngad ngongolgad nrogon nib puluw ko meybil rodad ma aram e ngaud filed e Thin rok Got ni gubin ngiyal’ ma gad fol riy. Pi babyor ni ke fal’eg fare tapigpig nib yul’yul’ mab gonop e be tamilangnag e pi wup ni ma tay fare Moonyan’ ma ra ayuwegdad ni ngad siyeged.

19, 20. Mang fan ni thingar da fanenikayed e tin nib kireb?

¹⁹ Meybil nge fol Bible e ra ayuwegdad ni nge gel e t’ufeg rodad ko tin nib fel’. Machane kub ga’ fan ni ngaud fanenikayed e tin nib kireb. (Ps. 97:10) Faanra ngad fal’eged i lemnag wenegan e ngongol nib kireb ma ra ayuwegdad ni ngad siyeged. (Jas. 1:14, 15) Ba t’uf ni ngad athamgilgad ni ngad fanenikayed e tin nib kireb me t’uf rodad e tin nib fel’. Ya faan gad ra rin’ ni aram rogon, ma dab da chugurgad ko pi n’en ni ma fanay Satan ni bod e wup ngodad ya aram e pi n’en ni gad be fanenikay.

²⁰ Ri gad ba felfelan’ ni be ayuwegdad Got ni nge dabi gel Satan ngodad! U daken gelngin Got nib thothup, nge Bible, nge ulung rok e be ayuwegdad Jehovah rok “Faanem nib Kireb.” (Matt. 6:13) Gad ra fil ko bin migid e article u rogon ni ngad siyeged l’agruw e wup ni ku ma fanay fare Moonyan’ ni nge kol ara bannag e pi tapigpig rok Got.

[Footnotes]

[Study Questions]

[Picture on page 24]

Faanra dabiyog ni ngad gagiyegniged bolowthdad, ma rayog ni ngad k’aringed ni nge wagey e girdi’ u lan e ulung ni bod ni kam tababnag e nifiy

[Picture on page 27]

Rayog ni ngam siyeg ni nge dabi kireban’um nib gel ni bochan e denen ni kam rin’