Nge Yag ni Ngam Togopuluwgad ko Pi Ban Rok Moonyan’!

“Nge yag ni ngam togopuluwgad ko pi ban rok moonyan’.”​—EFE. 6:11, BT.

UW ROGON NI GA RA FULWEG?

Uw rogon ma rayog ni nge siyeg reb e tapigpig rok Jehovah ni nge dabi aw ko fare wup ni aram e chogowen e chugum?

Mang e ra ayuweg reb e Kristiano nib mabgol ni nge dab ra parew be’ ni gathi mabgol rok?

Mang nib mich u wan’um nra fel’ rogon be’ ni nge dabi un ko ngongol ni chogowen e chugum nge ngongol ndarngal?

1, 2. (a) Mang fan ndariy e runguy rok Satan ngak e piin ni kan dugliyrad nge “yugu boch e saf”? (b) Mang l’agruw e wup rok Satan ni yira weliy ko re article ney?

 SATAN NI FARE MOONYAN’ e der ma runguy e girdi’, nib ga’ ni piin ni yad be pigpig ngak Jehovah. Bin riyul’ riy, e be cham ngak e piin ni kan dugliyrad. (Rev. 12:17) Tin riyul’ e Kristiano e ngiyal’ ney e yad be pow’iy e pi tamachib ni nge yag ni ngar ululgad ko machib, ma rayog ni ngar tamilangnaged ni Satan e ir e be gagiyegnag e re fayleng ney. Maku dariy e runguy rok Satan ngak “yugu boch e saf” ni piin ni yad be ayuweg e piin ni kan dugliyrad, ma bay e athap rorad ko yafas ni manemus ni ireray e n’en ni ke mul u pa’ Satan. (John 10:16) Aram fan ni ke damumuw! Demtrug ko athap rodad e gad ra yan nga tharmiy ara gad ra par u fayleng, ma Satan e toogor rodad. Be nameg ni ngad awgad ko wup rok.​—1 Pet. 5:8.

² Ma fanay Satan boor mit e wup. Bochan ni piin ni gathi tapigpig rok Got e ke tay Satan “lanin’rad nga fithik’ e lumor,” ma aram fan ni kar dabuyed fare thin nib fel’ ma dabiyog ni ngar guyed e pi wup ney. Machane, ku bay boch e girdi’ ni kar folgad ko thin rok Got ni kur awgad ko pi wup rok fare Moonyan’. (2 Kor. 4:3, 4) Fare article ni ke yan e be dag ngodad ko uw rogon ni ngad siyeged fa dalip i wup rok Satan ni: (1) dabkiyog ni ngan gagiyegnag e thin, (2) marus nge towasar, (3) kireban’ nib gel ni bochan e denen ni kan rin’. Chiney e gad ra weliy rogon ni ngad siyeged l’agruw e wup ni ku be tay Satan ni fan ngodad ni aram e chogowen e chugum nge ngongol ndarngal.

CHOGOWEN E CHUGUM, E YIB I THANG U WAN’RAD FARE THIN ROK GOT

3, 4. Uw rogon ma magafan’ ko re fayleng ney e ra k’aring e girdi’ ni ngar chogownaged e chugum?

³ Reb ko pi fanathin rok Jesus, e ke weliy murung’agen e  awoch ni wer nga fithik’ e pan ni bay rachangalen. I weliy ni bay boch e girdi’ ni kar rung’aged murung’agen e thin rok Got, ma “bochan e magafan’ rorad ko re par rodad ney u fayleng nge chogowen e fel’ rogon e yib i thang u wun’rad fare thin rok Got nnog ngorad, ma dakur k’ufgad.” (Matt. 13:22) Arrogon, chogowen e chugum e ba wup ni be fanay Satan ni toogor rodad.

⁴ Bay l’agruw ban’en ni ma ‘thang u wan’ e girdi’ fare thin rok Got nnog ngorad.’ Reb e aram e “magafan’ rorad ko re par rodad ney u fayleng.” Ngiyal’ ney ni ke “mo’maw’” e par rodad, ma boor ban’en ni nge magafan’dad ngay. (2 Tim. 3:1) Chiney ni ke tolang puluwon urngin ban’en ma sana dariy e maruwel rom, ma aram e ke mo’maw’ ni nge gaman e salpiy rom ko tin nib t’uf rom. Maku rayog ni be magafan’um rarogon e par rom boch nga m’on ma ga fithem ni nge lungum, ‘Gur, ra gaman e salpiy rog ko tin nib t’uf rog u nap’an ni kug pilibthir, ma dabkiyog ni nggu un ko maruwel?’ Boch e girdi’ e kar guyed rogon ni ngar yoornaged e salpiy rorad ya yad be lemnag nfaanra ke yoor e salpiy rorad, ma dakuriy ban’en nra magafan’rad ngay.

5. Uw rogon ma “chogowen e fel’ rogon” e ra mang wup ngodad?

⁵ Ki weliy Jesus murung’agen e bin l’agruw ni aram e “chogowen e fel’ rogon.” Chogowen e fel’ rogon nge magafan’ e rayog ni nge thang u wun’uy fare thin rok Got. Be yog e Bible ni ‘salpiy e ra yororiyey.’ (Ekl. 7:12) Machane, ngan nameg ni nge yoor e salpiy e dariy e gonop riy. Boor e girdi’ ni kar pirieged ni nap’an nra maruwelgad nib gel ya nge yoor e salpiy rorad, me k’aringrad e re n’ey ni ngar chogownaged e chugum nib gel. Boch e girdi’ e kar manged sib rok e salpiy.​—Matt. 6:24.

6, 7. (a) Uw rogon ma rayog ni nge k’aringem be’ u tabon e maruwel ni ngam chogownag e chugum? (b) Faanra ka nog ngak reb e Kristiano nrayog ni nge un ko maruwel nib pag urngin e awa riy, ma mang e susun ni nge lemnag?

⁶ Rayog ni nge sum u lanin’um ni ga baadag ni nge yoor e salpiy rom ndam lemnag ko som’on. Mu lemnag e n’en ni baaray. En ni ga’ ko maruwel rom e ke yog ngom ni gaar: “Bay ban’en nib fel’ ni gu baadag ni nggog ngom! Bay e maruwel nib ga’ ni ke winnag e company rodad. Ma re n’ey e be yip’ fan ni u lan in e pul mab t’uf ni ngad maruwelgad nib pag urngin e awa. Machane ba mudugil ni yira pi’ puluwon urngin e maruwel rom.” Faanra gur e ka nog ngom ni aram rogon ma mang e ngam rin’? Riyul’ nib ga’ fan ni ngam pi’ e tin nib t’uf ko tabinaw rom ni bod e ggan nge naun rorad, machane gathi kemus ni ireray e n’en nib t’uf ni ngam pi’ ngorad. (1 Tim. 5:8) Ka bay boch ban’en nib t’uf ni ngam lemnag. Uw urngin e awa e ga ra tay ni fan ko maruwel rom? Ra magawon e re n’ey ko pigpig ku Got ni ga ma tay nib  muun ngay e pi muulung nge Fol Bible ni Tabinaw, fa?

⁷ Mang e n’en ni th’abi ga’ fan u wan’um, rogon ni nge yoor e salpiy rom, fa rogon ni nge fel’ e tha’ u thilmew Got? Gur, dab kum m’oneg u wan’um Gil’ilungun Got ya ga baadag ni nge yoor e salpiy rom? Rayog ni ngam guy u rogon nra kirebnag e salpiy e michan’ rom nge michan’ rok chon e tabinaw rom? Faanra ireray e n’en ni be buch rom e chiney, ma uw rogon ni nge dabi thang e chogowen e chugum e thin rok Got u wan’um?​—Mu beeg e 1 Timothy 6:9, 10.

8. Mang thin nu Bible e rayog ni nge ayuwegdad nge yag ni ngad yaliyed rarogon e par rodad?

⁸ Faanra dubdad nra thang chogowen e chugum e thin rok Got u wan’dad, ma ngaud yaliyed rarogon e par rodad u gubin ngiyal’. Dab da boded Esau ni ke m’ug ko ngongol rok ndariy fan e tirok Got u wan’! (Gen. 25:34; Heb. 12:16) Maku dab da boded fare moon ni pire’ ban’en rok ni ka nog ngak ni nge pi’ ni chuway’ urngin ban’en ni bay rok me pi’ e salpiy riy ngak e piin ni yad ba gafgow me yib nge un ngak Jesus. Ma de fol e cha’ nem ko n’en ni yog Jesus, me “yan ni ke kireban’, ya pire’ ban’en rok.” (Matt. 19:21, 22) Bochan e chugum, ma rib ga’ e tow’ath ni ke mul u pa’ fare moon ni aram e rayog ni nge un ngak Jesus ni ir be’ ni th’abi gilbuguwan! Ere, ngam kol ayuw ni nge dabi mul u paam e tow’ath ni bay rom ni gur reb i gachalpen Jesus Kristus.

9, 10. Rogon ni be yog e Bible ma susun uw rogon e chugum u wan’dad?

⁹ Ba t’uf ni ngad motoyilgad ko fonow ni ke pi’ Jesus ya nge dabi kirebnag e chugum e michan’ rodad, ya yog ni gaar: “Dabi magafan’ be’ nge gaar: U uw e bay yib e ggan rog riy? ara n’en ni nggu garbod ngay? ara mad ni nggon’? (Ereray e pi n’en ni gubin ngiyal’ ma be nameg e piin ni yugu boch e kan e yad be meybil ngorad.) Chitamangimed ni bay u tharmiy e manang ni pi n’ey ni urngin e dabi siy ni nge yog ngomed.”​—Matt. 6:31, 32; Luke 21:34, 35.

¹⁰ Faanra dubdad ni chugum e nge mang wup ngodad, mab t’uf ni ngad boded Agur ni ir be’ ni ke yoloy boch e thin nu Bible, ya yog ni gaar: “Mu ayuwegeg nge dab ug sasalap l’ugun, ma dab ri fel’ rogog ma dab rug gafgow. Ere mu pi’ ngog chi urngin e ggan nib t’uf rog.” (Prov. 30:8, BT) Ere ba tamilang ni manang Agur ni salpiy e rayog ni nge ayuweg e girdi’, maku manang ni chogowen e fel’ rogon e ra kirebnagdad. Dab mu pagtalin ni magafan’ nge chogowen e fel’ rogon e ra kirebnag e tha’ u thilmew Jehovah. Faanra ri gad ma lemnag murung’agen e chugum, ma rayog ni nge m’aynag e tayim rodad, nge gelngidad, ma kad dabuyed ni ngad m’oneged Gil’ilungun Got ko yafas rodad. Ere thingar da kol ayuwgad ni dab da awgad ko fare wup ni ma tay Satan ni aram e chogowen e chugum!​—Mu beeg e Hebrews 13:5. 

BA WUP NI BOD E LOW NI KAN UPUNGUY NIB MO’MAW’ NI NGAN GUY

11, 12. Uw rogon ma reb e Kristiano e rayog ni ngar parew be’ ni gathi mabgol rok u tabon e maruwel rok?

¹¹ Pi ta mokol gamanman ni yad baadag ni ngar koled e gamanman nib gel e yad ma ker e low ko gin ni ma yan e gamanman riy. Ba ga’ ni yima upunguy e low nga nochi ley i ren nge but’. Ma reb ko pi wup ni ma tay Satan ni boor e girdi’ ni ke kolrad riy e taareb rogon ko fare low ni aram e ngongol ndarngal. (Prov. 22:14; 23:27) Boor e Kristiano ni kar uned ko ngongol ndarngal ya kar ted yad nga bang nib mom ni ngar awgad ko re wup ney. Boch e Kristiano e kan k’aringrad ni ngar pared be’ ni gathi mabgol rorad u tomuren ni kar daged ko ngongol ara thin rorad ni yad baadaged yad.

¹² Re magawon ney e rayog ni nge tabab u tabon e maruwel rom. Bin riyul’ riy, e boor ko baley u oren e piin ni ppin ni kar pared be’ ni gathi mabgol rorad ni yad nga maruwel. Machane,  piin ni pumoon ni kar uned ko re ngongol ney e ba chugur ni yad urngin e kar pared be’ ni yad nga maruwel. Gur, ga be un nga reb e maruwel ni girdien e maruwel riy e pumoon nge ppin? Faanra aram rogon, ma uw rogon e tha’ u thilmed? Ga be athamgil ni nge dab mu rin’ ara mog ban’en nra k’aring be’ ni gathi mabgol rom ni nge lemnag ni ga baadag, fa? Bod ni, tomuren boor yay ni ke non reb e walag ni ppin ngak reb e pumoon ni yow nga maruwel, ma sana ke adag ni nge yog ngak urngin e magawon rok nib muun ngay e tha’ u thilrow e pumoon rok. Maku reb, e tomuren ni reb e ppin e ke mang fager rok reb e pumoon ni Kristiano ni yow nga maruwel ma sana ra yog fare pumoon u laniyan’ ni gaar: “Ba ga’ fan e thin rog u wan’ ma riyul’ ni ma motoyil ngog. Ma ba ga’ fag u wan’. Gu be athapeg nra buch ni aram rogon u lan e tabinaw rog.” Gur, rayog ni ngam guy ni gali Kristiano ney e ba mom ni ngar awgow ko ngongol ndarngal?

13. Uw rogon ma rayog ni nge tabab l’agruw ni’ u lan e ulung ni ngar dagew ko ngongol ara thin rorow ni yow baadagew yow?

¹³ U lan e ulung, ma rayog ni nge tabab l’agruw ni’ ni ngar dagew ko ngongol ara thin rorow ni yow baadagew yow. Mu lemnag e n’en ni buch rok Daniel nge Sarah * ni leengin ni yow e pioneer. Ke yog Daniel ni ir reb e piilal ni ma fek urngin e maruwel ni ma pi’ e ulung ngak. Immoy lal e pumoon ni ka yad ba pagel ni ma fil e Bible ngorad, ma dalip i yad e kar uned ko taufe. Pi walag nem ni kafin ra uned ko taufe e ba t’uf ni ngan pi’ e athamgil nga lanin’rad. Ngiyal’ ni ke yoor e n’en ni be rin’ Daniel ni fan ko ulung, ma Sarah e ma ayuwegrad. Ma kub t’uf rok Sarah e ayuw, ma pi pumoon nem e yad ma pi’ e ayuw ngak. Ma re n’em e ke mang wup nib mo’maw’ ni ngan palog riy. Ke yog Daniel ni gaar: “U lan boor e pul ni be pi’ e ppin rog e ayuw ngorad ma ke warnag e michan’ rok nge laniyan’. Ma ngiyal’ nem e da gu pi’ e ayuw ngak, ma aram e ke sum e magawon nrib gel. Ppin rog nge bagayad e pi pagel nem e kar unew ko ngongol ndarngal. Kaygi yoor pa’ u puluwog ma aram e da gu naab ni ke war e michan’ rok.” Gur, uw rogon ni ngam siyeg e magawon ni aram rogon?

14, 15. Mang boch ban’en nra ayuweg e pi Kristiano ni kar mabgolgad ndab ra pared be’ ni gathi mabgol rorad?

¹⁴ Ra ayuwegem nge yag ni ngam siyeg e ngongol ni aram rogon nfaanra ngam fal’eg i lemnag fan e mabgol. Yog Jesus ni gaar: “Thingari dabi dareg e girdi’ e gali cha’ ni Got e ke chagiyrow.” (Matt. 19:6) Dab mu lemnag ni maruwel rom ni fan ko ulung e kab ga’ fan ko en mabgol rom. Faanra ga be par ko gin nib palog ko en mabgol rom ni yugu dariy fan, ma ra warnag e mabgol romew. Rayog ni bigimew e yow ra par be’ ni gathi mabgol rok.

¹⁵ Machane, faanra gur reb e piilal, ma uw rogon e ulung? Ke yoloy apostal Paul ni gaar: “Nguum gafaliyed fare ran’ i saf ni Got e ke pi’ ngomed, nguum gafaliyed yad nib m’agan’med ngay nrogon nib m’agan’ Got ngay ni ngam rin’ed, ma gathi nguum rin’ed nde m’agan’med ngay.” (1 Pet. 5:2) Thingar dab mu pag e girdi’ u lan e ulung ni ke mil farad ngom. Machane, thingar dab mu rin’ e maruwel ni fan ko ulung nib pag rogon ma dabkiyog ni ngam ayuweg e ppin rom. Re n’ey e ra magawonnag e mabgol rom. Ke yog Daniel ni gaar: ‘Thingar dab mu rin’ boor ban’en ni nge dabkiyog ni ngam ayuweg e tabinaw rom.’

16, 17. (a) Mang e pi n’en nib fel’ ni nge rin’ e pi Kristiano nib mabgol u tabon e maruwel rorad ni nge tamilang u wan’ e girdi’ ni bay e en mabgol rorad? (b) Mog boch e article ko pi magazine rodad nrayog ni nge ayuweg e pi Kristiano ni dab ra pared be’ ni gathi mabgol rorad.

¹⁶ Boor e fonow nib fel’ ni bay ko babyor ni Fare Wulyang ko Damit nge fare Awake! nra ayuweg e pi Kristiano ni kar mabgolgad ni nge dab ra pared be’ ni gathi mabgol rorad. Bod ni, Fare Wulyang Ntagil’ E Damit ni December 1, 2006 e  be pi’ e fonow ndab da chugurgad ngak e en ni gathi mabgol rodad u tabon e maruwel rodad ara yugu bang. Bod ni, faanra ngam un ko maruwel nib pag urngin e awa ni goo gimew be’ ni gathi mabgol rom, ma rayog ni ngam tababgow i rin’ ban’en ara yog boch ban’en ni be dag riy ni gimew baadagew gimew. Faanra bay e en mabgol rom, ma thingar mu tamilangnag ko thin rom ara ngongol rom ndabum ni ngam un ko ngongol nib kireb. Dab mu rin’ ban’en ni be m’ug riy ni ga baadag fa cha’ ara ngam k’aring ni nge adagem ni bochan e mad rom ara rogon ni ga ma fal’eg yaam. Ngam tay e sasing ko ppin rom nge bitir rom u tabon e maruwel rom. Re n’ey e ra puguran ngom nge boch e girdi’ nrib ga’ fan e tabinaw rom u wan’um. Dab mu pag ara mu k’aring be’ ni be dag ko ngongol ara thin rok ni baadagem ni nge ulul i rin’ ni aram rogon.”

¹⁷ Fare article ko Awake! ni April 2009 ni “Mang e Be Yip’ Fan ni Ngan Yul’yul’ u Lan e Mabgol?” e be fonownag nib kireb ni ngam lemnag ni ngam parew be’ ni gathi mabgol rom. Fare article e be dag ni faanra ulul be’ i lemnag ni aram rogon ma mom ni nge aw ko re ngongol ney. (Jas. 1:14, 15) Faanra kam un ko mabgol, mab fel’ ni ngaum beegew e en mabgol rom e re article ney. Jehovah e ke sunmiy e mabgol ma ireray e yaram nib thothup. Faanra kam tay e tayim ni ngaum nonow e en mabgol rom u murung’agen e mabgol romew ma aram reb e kanawo’ nib fel’ ni ngam dagew nib ga’ fan u wan’mew e tin nib thothup.​—Gen. 2:21-24.

18, 19. (a) Mang wenegan nra yib ngak be’ ni ngar parew be’ ni gathi mabgol rok? (b) Mang angin nra yib ngak e piin ni kar pared nib yul’yul’ ko en mabgol rorad?

¹⁸ Faanra kam tabab i ar’arnag e ngongol nib kireb mab fel’ ni ngam lemnag wenegan e re ngongol ney. (Prov. 7:22, 23; Gal. 6:7) Piin ni kar uned ko ngongol ndarngal e kar kireban’niged Jehovah nge en mabgol rorad nge yad. (Mu beeg e Malaki 2:13, 14.) Ngam lemnag angin ni ke yib ngak e piin ni kar ululgad i rin’ e ngongol nib machalbog. Bay e athap rorad ko yafas ni manemus mab fel’ e par rorad e ngiyal’ ney, mab fel’ e nangan’ rorad.​—Mu beeg e Proverbs 3:1, 2.

¹⁹ Ke yon’ fare psalmist e tang ni gaar: “Piin nib t’uf e motochiyel rom rorad e yad bay u lan e yoror ni dabi buch ban’en rorad, ma dariy ban’en nrayog ni nge mulegrad.” (Ps. 119:165, BT) Ere ngam ted fan e tin riyul’ u wan’med mu “um ayuwgad u rogon e ngongol romed. Dab um ngongolgad ni bod e girdi’ ndawori tamilangan’rad, machane nguum ngongolgad ni bod rogon e girdi’ nib gonop.” (Efe. 5:15, 16) Ngiyal’ ney e ma fanay Satan boor e wup ni nge kol e tin riyul’ e tapigpig rok Got. Machane ke pi’ Jehovah urngin ban’en nib t’uf rodad nge yag ni ngad “togopluwgad” ma ra ayuwegdad ni nge dab da awgad ko pi wup rok Satan ney.​—Efe. 6:11, 16.

[Footnote]

[Study Questions]

[Picture on page 29]

Chogowen e chugum e ra kirebnag e michan’ rok be’. Dab mu pag ni nge buch rom ni aram rogon

[Picture on page 32]

Ngongol ara thin rok be’ ni be yan i m’ug ni kemus ni baadag ni ngar parew be’ e rayog ni nge k’aring ngar parew be’ ni gathi mabgol rok