Gapas U Lan Biyu’ E Duw Nge Tomuren!
Gapas U Lan Biyu’ E Duw Nge Tomuren!
“Got e bay i gagiyegnag urngin ban’en.”—1 KOR. 15:28.
RAYOG NI NGAM WELIY?
Nap’an nra lebug e pi thin nu Bible ney ma uw rogom?
1. Mang e pi n’en nib fel’ nrayog ni nge yag ngak e girdi’ ni “pire’ ni pire’” ara ulung nib ga’?
MU SUSUNNAG e pi n’en nib fel’ nrayog ni nge rin’ reb e am ni pilung riy e be’ nib gol mab mat’aw nra gagiyeg u lan biyu’ e duw. Ireray e pi n’en nrayog ni nge yag ngak e girdi’ ni “pire’ ni pire’” ara ulung nib ga’. Yad ra magey nib fas u tomuren “fare gafgow ni ba ga’,” ma ireray e n’en nra gothey e re m’ag nib kireb ney.—Rev. 7:9, 14.
2. Mang e ke buch rok e girdi’ u nap’an 6,000 e duw ni ke yan?
2 Nap’an 6,000 e duw ni ke yan, ma ke guy e girdi’ rogon ni ngar gagiyegniged yad. Re gagiyeg ney e ke k’aring e magawon nge gafgow ngak e girdi’. Kakrom ma ke yog e Bible ni gaar: “Bay boch e girdi’ riy nib gel gelngirad ma boch e be gafgow u tan pa’rad.” (Ekl. 8:9, BT) Mang e be buch e ngiyal’ ney? Yima mahl ma boor e girdi’ ni yad ma togopuluw ngak e en ni bay e liw rok nib tolang. Ma boor e girdi’ ni kar gafgowgad, ma kar m’argad, ma ke kireb e pi n’en ni bay u toobey, ma ke thil e yafang, nge ku boch e magawon. Girdien e am e kar pied e fonow ni dab kun rin’ e pi n’en ni be k’aring e gafgow ya ra danga’ ma ra gel boch e magawon rodad.
3. Mang e ra buch u nap’an e Gagiyeg rok Kristus u lan Biyu’ i Duw?
3 U tan e gagiyeg rok Jesus Kristus nge fa 144,000 e girdi’ ni yad ra un ngak ko gagiyeg, ma yira rin’ e pi n’en nra chuweg urngin e magawon ni ke yib ngak e girdi’ nge Fayleng. Gagiyeg rorad u lan Biyu’ e Duw e ra lebguy e n’en ni ke micheg Jehovah Got ngorad ni gaar: “Bay gu sunumiy reb e fayleng nib beech nge reb e lan e lang nib beech. Ma tin kakrom e ri bay ni pag talin.” (Isa. 65:17) Mang boch ban’en nib fel’ nra buch boch nga m’on ndawor da guyed? Pi yiiy u Bible e ra ayuwegdad ngad nanged e “pi n’en ndanir guy nga owchey” ara pi n’en ndawori buch.—2 Kor. 4:18.
‘BAY RA TOYED E NAUN MA BAY RA YUNGED E WOLDUG’
4. Mang fan ni boor e girdi’ ndariy e naun rorad nib fel’ e ngiyal’ ney?
4 Urngin e girdi’ e yad baadag ni bay e naun rorad nrayog ni ngar pared chon e tabinaw rorad riy u fithik’ e pagan’. Machane ngiyal’ ney ma ireray e magawon nrib gel. Boor e mach ni kaygi pag urngin e girdi’ ni yad ma par riy. Ma boor e girdi’ ni yad be par u lan e naun nib war mab achichig ara reb e naun ni ke n’uw nap’an ma ba alit. Yad be athapeg ni reb e rran ma rayog ni nge yag ngorad reb e naun ni ngar pared riy.
5, 6. (a) Uw rogon ni nge riyul’ e thin ni bay ko Isaiah 65:21 nge Mikah 4:4? (b) Uw rogon ni nge yag ngodad e pi tow’ath ney?
5 U tan Gil’ilungun Got, ma rayog ni nge yag e naun ngak urngin e girdi’ ya ke yiiynag Isaiah ni gaar: “Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.” (Isa. 65:21) Machane gathi kemus ni naun e yad be athapeg ni nge yag ngorad. Ngiyal’ ney, ma boor e girdi’ ni bay e naun rorad, ma ri in i yad ni bay e naun rorad nib ga’. Machane ke magafan’rad ya yad be lemnag ni dabkiyog ni ngar ayuweged e naun rorad. Ara yad be lemnag nra yan e moro’ro’ nga lan e naun rorad ngar iringed boch e chugum rorad. Nap’an nra gagiyeg Gil’ilungun Got ma dakuriy e magawon ni aram rogon. I yoloy Mikah ni profet ni gaar: “Gubin e girdi’ ni bayi be’ me par u fithik’ e gapas u tooben e woldug rok ni grapes nge woldug ni yu ke gek’iy ni fig, ma be par ndakuriy be’ nra k’aring e marus ngak.”—Mik. 4:4.
6 Mang e thingar da rin’ed nfaanra gad baadag ni ngad pared u tan Gil’ilungun Got? Gad gubin nib t’uf ni nge yag reb e naun ngodad nib fel’. Machane dab da guyed rogon ni ngad ted e malfith ya nge yag reb e naun ngodad. Ba fel’ ni ngad daged nriyul’ ni gad be tedan’dad ko n’en ni ke micheg Jehovah. Ke weliy Jesus murung’agen ni gaar: “Gamanman ni fox e bay e low ni taferad, ma arche’ e bay taferad ni kar toyed, machane en ni Fak e Girdi’ e dariy bang ni nge pag ir riy nga but’ nge toffan.” (Luke 9:58) Rayog rok Jesus ni nge toy ara chuw’iy reb e naun nrib fel’. Machane mang nde rin’? Ba tamilang ndabun Jesus ni nge rin’ ban’en nrayog ni nge magawonnag ma dabkiyog ni nge m’oneg Gil’ilungun Got. Gur, rayog ni ngad folgad ko n’en nrin’ Jesus ma dabi magafan’dad ni chugum e nge mang ban’en nth’abi ga’ fan u wan’dad?—Matt. 6:33, 34.
“WOLF NGE SAF E . . . BAY UR ABICHGAD U TAABANG”
7. Mang e motochiyel rok Jehovah ko tha’ u thilin e girdi’ nge gamanman?
7 Nap’an ni ke sunmiy Jehovah urngin ban’en u fayleng ma girdi’ e bin tomur ni ke sunmiy. Ke weliy Jehovah ngak Jesus ni be’ nib Salap i Maruweliy Ban’en u murung’agen e tin nib m’agan’ ngay ni gaar: “Aram e chiney e ngad ngongliyed e girdi’; girdi’ e bay ra boded gadad mi yad bod yaadad. Ma girdi’ e nge suwey e nig, nge arche’, nge gamanman nib mongmor, nge urngin e gamanman ni maloboch, ni tin ni ba ga’ nge tin ni ba achig.” (Gen. 1:26) Ke tay Jehovah chilen ngak Adam nge Efa ni ngar ayuwegew e gamanman mar suweyew. Me munmun ma urngin e girdi’ e rayog ni ngar suweyed e gamanman.
8. Uw rogon ngongolen yooren e gamanman e ngiyal’ ney?
8 Gur, riyul’ nrayog ni nge suwey e girdi’ urngin e gamanman ma ra yib e gapas u thilrad? Boor e girdi’ nib fel’ thilrad e gamanman rorad, ni bod e kus nge gatuw. Machane, uw rogon e gamanman ni maloboch? Pi scientist ni yad ma par nib chugur ko gin ni ma par e pi gamanman ni maloboch riy e kar filed u murung’agen e gamanman, ma kar pirieged ni urngin e gamanman ni ka nog e mammal ngorad e bay e runguy nge t’ufeg rorad. Gad manang ni gamanman e yad ma tamdag ara yad ma damumuw nfaanra bay ban’en ni ke k’aring e marus ara damumuw ngorad, machane bay e runguy rorad. Fapi scientist e ka rogned, nap’an ni be ayuweg e gamanman e bitir rorad ma ireray e ngiyal’ nri yad ma dag e runguy.
9. Uw rogon ni nge thil e gamanman boch nga m’on?
9 Ere susun ndab da gingad ngay u nap’an ni gad be beeg u Bible nra yib e gapas u thilin e girdi’ nge gamanman. (Mu beeg e Isaiah 11:6-9; 65:25.) Mang fan? Mu lemnag e ngiyal’ ni Noah nge chon e tabinaw rok e kar bad nga wen ko fare barkow u tomuren ni kan tharey e fayleng ko Ran, me yog Jehovah ni gaar: “Urngin e gamanman nu fayleng, nib muun e arche’ ngay, nge gamanman nib achig, nge nig e bay ur pired ni yad ba tamdag ngomed.” Ngiyal’ ney e boor e gamanman ni ma mil rok e girdi’ ni ngar ayuweged e yafas rorad. (Gen. 9:2, 3) Gur, rayog ni nge gagiyegnag Jehovah ni nge dabki tamdag e gamanman ngak e girdi’, ma rayog ni nge lebug e n’en ni ke yog Jehovah ko tabolngin? (Hos. 2:18) Ere rib gel e felfelan’ nra yib ngak urngin e girdi’ ni bay ra mageygad nib fas ngaur pared u fayleng!
“MA BAYI N’AG URNGIN E LU’ U OWCHERAD”
10. Mang fan ni ma yor e girdi’?
10 Nap’an ni ke guy Solomon e “tin be buch ni de mat’aw u lan e re fayleng ney” me yog u fithik’ e kireban’ ni gaar: “Piin ka ni gafgownagrad e yad be yor, ma dariy be’ nra ayuwegrad.” (Ekl. 4:1, BT) Maku aram rogon e magawon e ngiyal’ ney ara kab gel boch. Mini’ arodad ndawori yor? Riyul’ ni yu ngiyal’ e ma yor e girdi’ nbochan gelngin e felfelan’. Machane, ba ga’ ni ma yor e girdi’ nbochan ni ke kireban’rad.
11. Bin ngan ko fapi chep nu Bible e ke k’aring e kireban’ ngom nib gel?
11 Mu lemnag e pi thin nu Bible ni be weliy murung’agen boor e girdi’ ni kar yorgad. Nap’an ni ke yim’ Sarah ni ke gaman 127 e duw rok, “me kireban’ Abraham” me yor nib gel. (Gen. 23:1, 2) Nap’an ni fingichiy Naomi fa gali ppin ni leengin fak “mi yow pag lamrow nga lang ngar yorgow” ngemu’ ma kur “pagew lamrow nga lang bayay ngar yorgow.” (Ruth 1:9, 14) Nap’an ni ke m’ar Hezekiah ni Pilung, ma ka nog ngak nib mudugil nra yim’, me meybil ngak Got “me tabab ko meyor nib gel,” me runguy Jehovah. (2 Ki. 20:1-5) Ma gadad gubin ni ke kireban’dad ko n’en ni buch u nap’an ni yog Peter nde nang Jesus. Nap’an ni ke rung’ag Peter ni ke chochol e nimen “me yan nga wuru’ e yoror ngi i yor ni kari kireban’.”—Matt. 26:75.
12. Uw rogon ni nge fal’eg Gil’ilungun Got laniyan’ e girdi’?
12 Bochan nri boor ban’en ni ma buch rok e girdi’ ni ma k’aring e kireban’ ngorad, mab t’uf ni ngan fal’eg lanin’rad. Ireray e n’en nra buch u nap’an e Gagiyeg rok Got u Lan Biyu’ e Duw ya thin rok Got e be gaar: “Ma bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.” (Rev. 21:4) Rib fel’ ni ngan lemnag ni bayi m’ay e magawon nge gafgow. Ma kub fel’ ni ngan lemnag ni ke micheg Got nra chuw e yam’. Uw rogon ni nge lebug e re n’ey?
“GUBIN E YAM’ NI BAY U LAN E LOW NI BAYI RUNG’AG LAMAN, MI YAD YIB U LAN E LOW RORAD NGA WURU’”
13. Mang e be rin’ e yam’ ngak e girdi’ ni ka nap’an e ngiyal’ ni ke denen Adam?
13 Nap’an ni ke denen Adam me tabab e yam’ ni nge gagiyegnag e girdi’ ni bod e pilung. Dariy e girdi’ ni ta denen nrayog ni nge mil rok, ma re n’ey e ma k’aring e kireban’ nib gel. (Rom. 5:12, 14) Bokum milyon e girdi’ e “yad be tamdag ko yam’,” ma arfan ni “yad be par ni yad e sib ko tamdag u n’umngin nap’an e yafos rorad.”—Heb. 2:15.
14. Mang e ra buch u nap’an ndakuriy be’ nra yim’?
14 Be weliy e Bible murung’agen e ngiyal’ ni ‘bin th’abi tomur e toogor ni ngan gel ngak e yam’.’ (1 Kor. 15:26) L’agruw e ulung e ra fel’ rogorad riy. Girdi’ ni “pire’ ni pire’” ara fare ulung nib ga’ ni ka yad ba fas e chiney e rayog ni ngar mageygad nib fas ngar pared u lan fa bin nib beech e fayleng. Maku bay e athap rorad ni ngar pared ni yad ba fas ndariy n’umngin nap’an. Maku yira faseg bokum milyon e girdi’ ko yam’. Gur, rayog ni ngam susunnag feni gel e felfelan’ nra tay e girdi’ ni “pire’ ni pire’” u nap’an ni yad ra ayuweg e girdi’ ni kan fasegrad ko yam’? Faanra ngad beeged e thin nu Bible ni be weliy murung’agen e girdi’ ni kan fasegrad ko yam’, ma rayog ni ngad nanged feni gel e felfelan’ riy u nap’an ni yira faseg e girdi’ ko yam’ boch nga m’on.—Mu beeg e Mark 5:38-42; Luke 7:11-17.
15. Susun mang e ga ra rin’ u nap’an ni kam guy be’ nib t’uf rom ni kan faseg ko yam’?
15 Mu lemnag fare bugithin ni “yigoo ra gingad ngak ni ke balyangan’rad” nge fare bugithin ni “mi yad yog e sorok ngak Got.” Faanra ummoy u nap’an ni ke buch e re n’em ma sana ku ireray e n’en ni ga ra rin’. Nap’an ni gad ra guy ni kan faseg e piin nib t’uf rodad, ma ra yib e felfelan’ ngodad nib gel. Ke yog Jesus ni gaar: “Ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’.” (John 5:28, 29) Dariy bagadad ni ke guy ban’en ni aram rogon, machane ireray reb ko “pi n’en ndanir guy nga owchey” nri gad baadag ni ngad guyed.
GOT E RA “GAGIYEGNAG URNGIN BAN’EN”
16. (a) Mang fan nthingar da weliyed u fithik’ e pasig murung’agen e pi tow’ath ndawor da guyed? (b) Mang e ke yog Paul nrayog ni nge pi’ e athamgil nga laniyan’ e pi Kristiano u Korinth?
16 Arrogon, rayog ni nge yag e par ni bay e felfelan’ riy ngak e piin ni yad ra par nib yul’yul’ ngak Jehovah ko ngiyal’ ney ni ke mo’maw’ e par rodad! Yugu aram rogon ndawori yib ngodad e pi tow’ath ney, machane ba t’uf ni ngad lemnaged. Re n’ey e ra ayuwegdad ni nge yag ni ngaud tedan’dad ko pi n’en nib ga’ fan. Ma aram e rayog ni ngaud pigpiggad ngak Jehovah ma dabi magawonnag lanin’dad e pi n’en nu fayleng. (Luke 21:34; 1 Tim. 6:17-19) Nap’an e fol Bible ni tabinaw rodad, ara nap’an ni gad be non ngak e pi walagdad, ara nap’an ni gad be fil e Bible ngak e piin ni baadag e machib mab fel’ ni ngad weliyed murung’agen e athap rodad u fithik’ e pasig. Re n’ey e ra ayuwegdad ni nge par nib riyul’ u wan’dad e athap rodad. Ireray e n’en ni ke rin’ Paul ngak e pi Kristiano kakrom. Thin ni ke yog e ke ayuwegrad ni ngar lemnaged e pi n’en nra buch u nap’an ni nge m’ay fare Gagiyeg rok Kristus u Lan Biyu’ e Duw. Mu guy rogon ni ngam fal’eg i lemnag fan e thin ni yog Paul ni bay ko 1 Korinth 15:24, 25, 28.—Mu beeg.
17, 18. (a) Uw rogon ni i gagiyegnag Jehovah “urngin ban’en” ko tabolngin? (b) Mang e ra rin’ Jesus ya nge yag ni nge sulweg e gapas nge taareban’?
17 Rib fel’ rogon ni kan weliy murung’agen rarogon e yafas u nap’an nra m’ay fare biyu’ e duw. Yog Paul ni gaar: “Ma aram e Got e bay i gagiyegnag urngin ban’en.” Mang e be yip’ fan e pi thin ney? Mu lemnag e ngiyal’ ni Adam nge Efa e ur moyew u Eden ni yow ba flont ma yow bang ko tabinaw rok Jehovah ni bay e gapas nge taareban’ riy. Ma Jehovah ni ir e En Th’abi Tolang u Palpalth’ib e i gagiyegnag urngin e pi engel nge girdi’ ndariy be’ ni be ab u thilrad. Rayog ni ngar nonad ngak, mi yad liyor ngak, ma be tow’athnagrad. Got e i “gagiyegnag urngin ban’en.”
18 Ke kireb e tha’ u thilrad u nap’an ni ke un e girdi’ ngak Satan ngar togopuluwgad ngak Jehovah. Machane, ka nap’an e duw ni 1914 ma be maruwel Gil’ilungun Got nge yag ni nge yibnag e gapas nge taareban’ u thilin Got nge girdi’ bayay. (Efe. 1:9, 10) Nap’an e Gagiyeg rok Got u Lan Biyu’ e Duw, ma pi n’en nib fel’ “ndanir guy nga owchey” e ra riyul’. Ma aram e “bayi taw ko tungun,” ni aram e nge m’ay fare Gagiyeg rok Kristus u Lan Biyu’ e Duw. Mang e ra buch? Yugu aram rogon ni kan “pag fan urngin ban’en” ngak Jesus u tharmiy ngu but’, ma de tolangan’. Der lemnag ni nge yan nga lon Jehovah. Ma ra pi’ “urngin ban’en ni be gagiyegnag ngak Got ni Chitamangiy” u fithik’ e sobut’an’. Ra fanay e liw rok nge mat’awun ni nge yag ni nge pining e “sorok riy ngak Got.”—Matt. 28:18; Fil. 2:9-11.
19, 20. (a) Uw rogon ni nge dag urngin e piin ni yad bay u tan Gil’ilungun Got nib m’agan’rad ngay ni Jehovah e pilung rorad nth’abi tolang? (b) Mang e pi tow’ath ni nge yag ngodad boch nga m’on?
19 Ngiyal’ nem, ma urngin e piin ni yad bay u tan Gil’ilungun Got e yad ra flont. Yad ra fol ko n’en ni i rin’ Jesus. Ma bochan ni yad ba sobut’an’, ma ra m’agan’rad ngay ni Jehovah e ra mang pilung rorad ni th’abi tolang. Ma yad ra gel ko bin tomur e skeng ni faanra yad baadag ni Jehovah e ra gagiyegnagrad. (Rev. 20:7-10) Tomur riy, ma urngin e girdi’ nge engel nra togopuluw ko gagiyeg rok e yira thangrad ni manemus. Rib gel e felfelan’ riy! Urngin chon e tabinaw rok Jehovah e yad ra pining e sorok ngak, ni ir e ra “gagiyegnag urngin ban’en.”—Mu beeg e Psalm 99:1-3.
20 Gur, pi tow’ath ndabki n’uw nap’an ma ra pi’ Got u daken Gil’ilungun e be k’aringem ni ngam tiyan’um i rin’ e tin nib m’agan’ ngay? Rayog ni ngam siyeg ni nge dabi magawonnag lanin’um e athap nde riyul’ ni ma ognag e fayleng rok Satan? Ga be ayuwegem ni nga i par nib mudugil u wan’um ni ngaum par u tan e gagiyeg rok Jehovah ni ir e th’abi tolang? Yibe athapeg ni ngongol rom e be dag ni ireray e n’en ni ga baadag ni ngam rin’ ndariy n’umngin nap’an. Ma aram e rayog ni nge yag e gapas nge yafas nib fel’ ngom ni gathi kemus nu lan biyu’ e duw.
[Study Questions]
[Picture on page 15]
Tomuren ni ke lebguy Jesus e maruwel rok ni ir e Pilung, ma ra pi’ urngin ban’en ni be gagiyegnag ngak e Chitamangin u fithik’ e sobut’an’
