Ba Ga’ Fan e Piin nib Ppin u Wan’ Got ma Ma Tay Farad

NAP’AN ni immoy Jesus u fayleng, ma i dag pi fel’ngin e Chitamangin u daken e pi n’en ni i rin’. I yog ni gaar: “Dariy ban’en ni kug rin’ ni gag e lem rog, machane ke mus ni gu be yog e tin ni ke yog e en ni Chitamangiy ngog ni nggog . . . Ya gubin ngiyal’ ma gu be rin’ e tin nib m’agan’ ngay.” (John 8:28, 29; Kolose 1:15) Ere, gad ra lemnag rogon ni non Jesus nge rogon e lem rok ngak e piin nib ppin, ma rayog ni ngad nanged fan rogon ni ma lemnagrad Got nge pi n’en ni baadag ni ngar rin’ed.

Bochan e pi n’en ni kan yoloy nga lan e Gospel, ma girdi’ ni llowan’ e ba fel’ u wan’rad rogon ni ma lemnag Jesus rarogon e piin nib ppin. Uw rogon? Ma uw rogon ni be m’ug ko machib ni i tay ni baadag ni nge ayuweg e piin nib ppin ni nge yag e puf rogon ngorad e ngiyal’ ney?

Rogon ni Ngongol Jesus Ngak e Piin nib Ppin

◼ Rogon ni ma lemnag Jesus e piin nib ppin e gathi kemus ni ngaur pared e pumoon. Rogon ni ma lemnag boch e tayugang’ ko teliw ni Jew e nap’an nra mada’ reb e pumoon nge reb e ppin, ma rayog ni nge sum e ngongol ndarngal. Ma bochan ni yima yog ni piin nib ppin e yad tapgin e ar’ar, ma aram fan ni susun ndabi non e pumoon ngorad u fithik’ e girdi’ ni yoor, ara ba t’uf ni ngar upunguyed lolugrad u nap’an ni yad ra yan u fithik’ e girdi’. Machane, I fonownag Jesus e piin pumoon ni ngar gagiyegniged e ar’ar rorad ko ngongol ndarngal, ma ngar ted fan e piin nib ppin, ma gathi ngan tayrad nga bang ni nge dab ra maathukgad nga fithik’ e girdi’.—Matthew 5:28.

Miki yog Jesus ni gaar: “En nra chuweg leengin ngki leay yugu reb e ppin, e ke th’ab e motochiyel ya kar pirew yugu reb e ppin ni gathi mabgol rok, ni aram e ke togopluw faanem ngak leengin.” (Mark 10:11, 12) Ere, de puluw u wan’ Jesus rogon fare machib ni i yog reb e sensey ko motochiyel ‘nrayog ni nge chuweg be’ leengin ndemtrug e n’en ni ke bucheg.’ (Matthew 19:3, 9) Rogon ni ma lemnag boor e Jew kakrom e ra par reb e pumoon nge be’ ni gathi mabgol rok, ma der th’ab e motochiyel ara der togopuluw ngak leengin, ya kemus ni fare pin e rayog rok ni nge ngongliy e ngongol ni aram rogon nib togopuluw ko pumoon rok. Rogon ni ke yog be’ ni ma fil murung’agen e thin nu Bible e gaar, “Bochan ni ke taareb rogonnag Jesus e n’en nib mil fan ngak e piin figirngiy nge piin leengiy, ma re n’ey e ke taarebrogonnag e piin pumoon nge piin nib ppin.”

Rogon angin e machib rok e ngiyal’ ney: Nap’an e pi muulung ko Pi Mich rok Jehovah mab puf rogon e piin nib ppin ni ngar nonad ngak e pumoon u lan e ulung ni Kristiano. Ma dabi mager e piin nib ppin ni richey me kireb rogon e sap ara non reb e walag nib pumoon ngak nib kireb, ya pi pumoon ni Kristiano ney e yad ma ngongol ‘ngak e piin ni puwelwol ni gowa yad pi chitiningrad, ma ku er rogon e ngongol rorad ngak e piin nrugod ni ngar pired ni gowa yad pi walagrad ni ppin nib machalbog lanin’rad.’—1 Timothy 5:2.

◼ I tay Jesus e tayim ni nge fil boch ban’en ngak e piin nib ppin. I fil Jesus, miki pi’ e athamgil ngorad ni ngar weliyed lanin’rad ma ngkur rin’ed e n’en ni yad baadag, ma re n’ey e ba thil ko n’en ni i fil e pi sensey ko motochiyel. Nap’an nde siyeg Maria ni nge motoyil ngak Jesus u nap’an ni be machib, ma re n’ey e be dag ni piin nib ppin e gathi kemus ni ngar ngongliyed e maruwel u lan e tabinaw. (Luke 10:38-42) Mus ngak Martha ni walagen Maria ni ke yib angin fare machib rok Jesus ngak, ma ke tamilang e re n’ey u rogon ni pi’ e fulweg nib fel’ rogon ko pi deer ni i fith Jesus u murung’agen e yam’ ni tay Lazarus.—John 11:21-27.

 Pi n’en ni ma lemnag e piin nib ppin e ba ga’ fan u wan’ Jesus. Nap’an piyu Jew kakrom ma boor i yad e ma lemnag nib felfelan’ reb e matin ni faanra fakay e bitir nib pumoon, nib ga’ ni faanra ir reb e profet. Bay ba ngiyal’ ni tolul reb e ppin ni gaar: “Kari felan’ e re pin ni ir e gargelnigem mi i duruw’iyem nga thuthun!” Ma ka chi ngiyal’ nem me tamilangnag Jesus ban’en nrib ga’ fan. (Luke 11:27, 28) I weliy ngak ni n’en th’abi ga’ fan e ngan fol ko motochiyel rok Got ko bin ni ngan fol ko n’en nib m’agan’ e girdi’ ngay.—John 8:32.

Rogon angin e machib rok e ngiyal’ ney: Ba ga’ fan e fulweg ko piin nib ppin u nap’an e pi muulung ko Kristiano u wan’ piin ni yad ma yarmiy e muulung ara piin piilal. Maku yad ma tayfan e piin ni kar puwelwolgad ni nge “par pangirad ni bod yalen e piin ni ppin ni yad ma par nib mat’aw pangirad” u nap’an ni yad be par ni yigoo yad. (Titus 2:3) Mab pagan’rad ngorad ni yad ra machibnag fare thin nib fel’ u murung’agen Gil’ilungun Got u fayleng i yan.—Psalm 68:11; mu guy fare kahol ni “Ke Siyeg Apostal Paul e Piin nib Ppin ni Ngar Nonad, Fa?”

◼ Ma lemnag Jesus e piin nib ppin. Kakrom ma bitir ni ppin e gathi rib ga’ farad ko bitir ni pumoon. Rogon ni be yog fare babyor ni ka nog e Talmud ngay u murung’agen e re n’ey e gaar: “Nge felan’ e piin ni kar fakayed e bitir ni pumoon, mab buch waathan e piin ni kar fakayed e bitir nib ppin.” Maku bay boch e gallabthir ni yad ma lemnag ni faanra yad ra fakay e bitir nib ppin ma aram reb e maruwel nib mo’maw’, ya ba t’uf ni ngar gayed be’ ni nge mang figirngin, maku thingar ni pi’ e tow’ath ni puluwon u nap’an ni nge un nga reb e mabgol. Ma dabiyog ni nge pagan’ fa gallabthir ngak ni nge ayuwegrow u nap’an ni kar pilibthirgow.

Ke dag Jesus ni taareb feni ga’ fan e yafas ko piin nib ppin nge yafas ko piin pumoon u nap’an ni faseg fak Jairus. Miki faseg fare pagal ni fak fare pin nu Nain ni ke yim’ figirngin. (Mark 5:35, 41, 42; Luke 7:11-15) Tomuren ni golnag Jesus fare pin ni immoy “nib m’ar ni ragag nge meruk e duw” me yog ngak ni gaar “ir be’ ni owchen Abraham” ni ireray reb e ban’en ni ku yima yog, machane dariy u lan e pi babyor rok piyu Jew. (Luke 13:10-16) Nap’an ni fanay e re bugithin ney ni aram e be tay fan fare pin, maku be yan i m’ug riy nre ppin nem e taareb feni ga’ fan ngak e tin ni ku bay e girdi’ ko re binaw nem, miki nang Jesus nib gel e michan’ rok.—Luke 19:9; Galatia 3:7.

Angin e machib rok e ngiyal’ ney: Bay reb e thin nu Asia nib ga’ ni yima yog ni gaar: “Ga ra chuguliy e bitir nib ppin, ma gowa ga be rannag e woldug ko en ni buguli yoror rom.” Pi matam ni Kristiano e susun dab ra paged e biney e lem ni nge gagiyegnag e ngongol rorad, ya susun ni ngar chuguliyed pi fakrad ni ppin nge pumoon ni taareb rogon. Piin gallabthir ni Kristiano e ba milfan ngorad ni ngar ayuweged pi fakrad ni nge yag e skul, nge tafalay ngorad nib fel’ rogon.

◼ I pagan’ Jesus ngak e piin nib ppin. U lan e kourt rok piyu Jew, ma thin nra yog reb e ppin e yima taarebrogonnag ngak be’ nib sib. Be’ ni ma fil chepin e girdi’ kakrom ko bin taareb e chibog, ni Josephus fithingan e yog ni gaar: “Dabiyog ni nge pagan’uy ngorad ya yad e ppin.”

 Machane, ba thil e n’en ni be lemnag Jesus ngorad, ya ke mel’eg boch e ppin ni ngar manged e mich rok u nap’an ni ke fas ko yam’. (Matthew 28:1, 8-10) Yugu aram rogon ni pi ppin ney ni yad ba yul’yul’ e kar guyed nni li’ e Jesus nge yim’ min k’eyag, machane mo’maw’ rok e pi apostal ni nge mich e thin rok e pi ppin nem u wan’rad. (Matthew 27:55, 56, 61; Luke 24:10, 11) Machane, bochan ni m’ug Jesus ngak e pi ppin ney nsom’on u tomuren ni fas ko yam’, ma aram e be dag ni kub ga’ farad ni ngar manged e mich rok ni bod pi gachalpen.—Acts 1:8, 14.

Angin e machib rok e ngiyal’ ney: U lan e ulung rok e Pi Mich Rok Jehovah ma piin nib pumoon ni bay e maruwel nib milfan ngorad u lan e ulung e yad ma lemnag nib ga’ fan e n’en ni ma lemnag e piin nib ppin. Mus ngak e piin figirngiy ni Kristiano ma yad ma dag ni yad be ‘tay fan’ e ppin rorad u nap’an ni yad ra motoyil ngorad nib fel’ rogon.—1 Peter 3:7; Genesis 21:12.

Pi Kenggin e Motochiyel nu Bible e Ra Gelnag e Felfelan’ Rok e Piin nib Ppin

Faanra nge yag e tayfan nge puf rogon ngak e piin nib ppin nrogon nib m’agan’ Got ngay ko tabolngin, mab t’uf ni nge folwok e piin pumoon rok Kristus. (Genesis 1:27, 28) Piin figirngiy ni Kristiano nib sobut’an’rad e yad ma pag e pi kenggin e motochiyel nu Bible ni nge gagiyegnag e ngongol rorad ngak e ppin rorad, ya nge yag ni ngar felfelan’gad.—Efesus 5:28, 29.

Nap’an i tabab Yelena ni nge fil e Bible ma pumoon rok e ma gafgownag. Re pumoon nem e kan chuguliy u reb e tabinaw ni boor e wagey riy, ma yima kol e ppin ni ngan leengiy u gelngiy, ma gafgow ni yima tay ngak e girdi’ e boch ban’en ni ku yima rin’. I yog Yelena ni gaar, “pi n’en ni kug fil u Bible e ke pi’ e athamgil ngog. Ke tamilang u wan’ug ni bay be’ ni ri gub t’uf rok ma ba ga’ fag u wan’ ma ma lemnageg, ma kug nang ni faanra fil e pumoon rog e thin nu Bible, ma rayog ni nge thilyeg rogon ni ma lemnageg.” Kari felfelan’ u nap’an ni ke un figirngin ko fol Bible, me yag ni nge un ko taufe nge mang reb e Pi Mich Rok Jehovah. Miki yog ni gaar: “Pumoon rog e ke yag ni nge t’ar laniyan’, ma ke mom romow ni nggu n’agew fan e kireb romow.” Mang e ke nang ko tomur? I yog ni gaar, “Pi kenggin e motochiyel nu Bible e riyul’ ni ke ayuwegeg ni nge mich u wan’ug nib ga’ fag ma rayog ni nge pagan’ug u lan e mabgol rog.”—Kolose 3:13, 18, 19.

N’en ni ke buch rok Yelena e ban’en ni ku ma buch rok yugu boch e girdi’. Bay bokum milyon e ppin ni Kristiano ni kar pirieged e felfelan’ ni bochan e kar folgad ko pi kenggin e motochiyel nu Bible u lan e mabgol rorad. Maku kar pirieged e tayfan, nge felfelan’, nge puf rogon u fithik’ e pi walagrad ni Kristiano.—John 13:34, 35.

Pi pumoon nge piin nib ppin ni Kristiano e yad manang ni bochan e yad e girdi’ ni ta denen ma ‘m’ay farad’ u fithik’ e pi n’en ni ke sunmiy Got. Machane, faan gad ra chugur ngak Jehovah ni ir e Got rodad, ma bay e athap rodad ni ngad ‘pired ni gathi gad e sib rok e wod’ me yag ni ngad ‘uned ko flaab rok pi fak Got.’ Rib manigil e biney e athap ni fan ko piin pumoon nge piin nib ppin u tan e gagiyeg rok Got!—Roma 8:20, 21.

[Kahol ko page 9]

Ke Siyeg Apostal Paul e Piin nib Ppin ni Ngar Nonad, Fa?

I yoloy apostal Paul ni gaar: “Piin ni ppin e ngar pired ni kar th’abed gulungrad u lan e muulung ko galesiya i yan.” (1 Korinth 14:34) Mang fan e re n’ey ni yog? Be yog nde ga’ farad ara de ga’ e llowan’ rorad, fa? Danga’! Ya ba ga’ ni ma weliy murung’agen e pi n’en nib fel’ ni be fil e piin nib ppin ngak yugu boch e girdi’. (Acts 18:26; 2 Timothy 1:5; Titus 2:3-5) U lan e babyor rok ni yoloy ngak piyu Korinth e i fonownag Paul gubin e girdi’ ni bay e tow’ath rorad ni ngan welthin nthin nda nnang fan min weliy e yiiy ni “dariy bagayad ni nge non” u nap’an ni ku be non be’. (1 Korinth 14:26-30, 33) Bod ni bay boch e Kristiano ni ppin ni yad ba felfelan’ ni bochan e n’en ni ke michan’rad ngay, mar taleged e en ni be pi’ e welthin ni ngar fithed boch e deer ngak nrogon ni yima rin’ ko binem e binaw kakrom. Rogon ni dabki buch e re n’ey e pi Paul e athamgil ngorad ni ngar “fithed ngak e piin ni figirngirad u tabinaw.”—1 Korinth 14:35.

[Sasing ko page 10]

Ke pag Jesus Maria Magdalene ni nge weliy ngak pi gachalpen murung’agen e fas ko yam’ ni tay