Mang Fan ni Ka Be Ulul e Ngongol ni Sasaliyeb?

“Bay boch e girdi’ riy nib gel gelngirad ma boch e be gafgow u tan pa’rad.”—EKLESIASTES 8:9.

RE THIN ney e be tamilangnag rogon e gagiyeg ni be tay e girdi’. Pi girdi’ ney e yad tapgin e pi gafgow ni be buch. Kab kakrom i yib, ma piin ni yad baadag ni ngar ayuweged e girdi’ e ku ma af e lem ni chogow nge ngongol ni sasalap ngorad u nap’an nra tolang e liw rorad. Mang fan e re n’ey? Mang fan ni ka be ulul e ngongol ni sasaliyeb? Bay dalip i fan.

1. Bochan ni gadad e ta denen.

Be tamilangnag e Bible ni gadad gubin ni gad ‘bay u tan gelngin e denen.’ (Roma 3:9) Denen e bod rogon ba mit e m’ar ndabiyog ni nge chuw ya be ‘par u fithik’dad.’ Bokum biyu’ e duw ni ke yan, ma be ‘gagiyegnagdad’ ni bod reb e pilung. Re “motochiyel” ney e be maruwel u fithik’dad ni gubin ngiyal’. Bochan ni gadad gubin e ta denen, ma re lem ney e ma k’aring boch e girdi’ ni ngar lemniged yad nge tin nib fel’ ngorad ko som’on, ara yad ma nameg ni nge yag boch ban’en ngorad ara liw nib tolang ni bochan ni yad be fanay mat’awrad ko gagiyeg.—Roma 5:21; 7:17, 20, 23, 25.

2. Rarogon e fayleng nib kireb ni gad be par riy.

Re fayleng ney ni gad be par riy e ke sug ko lem nib chogow nge fel’ ngak. Ma bochan e re n’ey ma girdi’ ni yad be par riy e ba mo’maw’ rorad ni ngar pared ni yad be thil. Bochan fare lem nib fel’ ngak, ma boch e girdi’ e yad baadag ni nge tolang boch e liw rorad. Maku yad baadag ni ngki yoor boch e salpiy nge chugum ni ngki yag ngorad ko tin nib t’uf ko par rorad. Mab m’agan’rad ngay ni ngar ngongolgad u fithik’ e sasalap ni nge yag e n’en ni yad be nameg. Yima un “ko kireb ni bochan e aram rogon ni ma rin’ e tin yoor e girdi’” ko bin ni ngan togopuluw ko tin nib kireb ni be rin’ e girdi’.—Exodus 23:2.

3. Be gagiyegnagdad Satan ni Moonyan’.

Faen ni ta togopuluw ni aram Satan e “ir faanem ni bannag e girdi’ nu fayleng ni polo’.” (Revelation 12:9) Ba felfelan’ Satan ni nge k’aring laniyan’ boch e girdi’ ni ngar rin’ed boch ban’en nib kireb. Ma waliyrad ni ngar adaged ni nge yag boch ban’en ngorad ni bod rogon e chugum nge salpiy ni aram e n’en ni ma fanay ni nge adag e girdi’ ni ngar ngongolgad u fithik’ e sasaliyeb.

Ere, re n’ey e be yip’ fan ni gadad bod e liyos ni Satan e ir e be yog e n’en ni ngad rin’ed, fa? Gad ra nang e fulweg riy ko bin migid e article.