Ngam Maruweliy Nge Yag ni Ngam Mang Be’ Nth’abi Sobut’
Ngam Maruweliy Nge Yag ni Ngam Mang Be’ Nth’abi Sobut’
“En ni ir e th’abi sobut’ u fithik’med ni gimed gubin, e ir e th’abi tolang.”—LUKE 9:48.
RAYOG NI NGAM PIRIEG E PI FULWEG?
Mang e ra ayuwegdad nge yag ni ngaud sobut’niged gadad?
Uw rogon, ma be’ nib sobut’an’ e ba “tolang”?
Uw rogon nrayog ni ngad sobut’niged gadad u lan e mabgol, ngu lan e ulung, nge tha’ u thildad boch e girdi’?
1, 2. Mang fonow e ke pi’ Jesus ngak e pi apostal rok? Mang fan ni ke rin’ e re n’em?
KE SUM reb e magawon u nap’an ni immoy Jesus u Galile ko duw ni 32 C.E. Boch ko pi gachalpen e kar maluagthingad ko mini’ arorad ni ir e th’abi tolang u fithik’rad. I yoloy Luke ni gaar: “Me yib i luluag pi gachalpen e thin ko mini’ e arorad ni ir e th’abi tolang u fithik’rad. Ma manang Jesus e n’en ni yad be lemnag, me ere kol pa’ bochi tir, me sak’iynag nga tooben, me gaar ngorad, ‘En nra ayuweg e re tir ney ni bochag, e ke ayuwegeg; ma en nra ayuwegeg, e ke ayuweg e en ni ir e ke l’ugeg ku gub, Ya en ni ir e th’abi sobut’ u fithik’med ni gimed gubin, e ir e th’abi tolang.’” (Luke 9:46-48) Ke ayuweg Jesus e pi apostal ngar nanged nib t’uf ni ngar sobut’niged yad.
2 Gur, ke fonownagrad Jesus ni ngar ngongolgad ni bod rogon e ngongol rok piyu Jew ko bin som’on e chibog? Danga’. Bin riyul’ riy, e ba thil e ngongol rorad. Reb e babyor e be yog nrib ga’ fan ngak piyu Jew ni ngar nanged ko mini’ e en bin th’abi tolang u fithik’rad, ma ri yad ma lemnag ko ke yag rorad ni ngar pininged e sorok ngak urngin e girdi’ nib tolang e liw rorad, fa dawor. (Theological Dictionary of the New Testament) Ere ke fonownag Jesus e pi apostal rok ni ngar ngongolgad nib thil ko ngongol rok yooren e girdi’ e ngiyal’ nem.
3. (a) Mang e be yip’ fan ni ngad sobut’niged gadad? Mang fan nib mo’maw’ ni ngad rin’ed ni aram rogon? (b) Mang boch e deer ni ngad fulweged ko re article ney?
3 Fare bugithin ni Greek ni kan piliyeg ni “th’abi sobut’” e be yip’ fan be’ ni kab ga’ fan yugu boch e girdi’ ngak ara be’ ndariy e liw rok nib tolang. Ma girdi’ ni aram rogon e ma sobut’nag ir ma der lemnag ni ir be’ nib ga’ fan. Ke fil Jesus ngak e pi apostal rok nib t’uf ni ngar sobut’niged yad ma ngar boded e bitir. Pi Kristiano e ngiyal’ ney e ba t’uf ni ngar filed fare fonow ni ke pi’ Jesus ngak e pi apostal rok. Bochan ndawor da flontgad ma sana yu ngiyal’ e mo’maw’ ni ngad sobut’niged gadad. Ma gad ma guy rogon ni ngad rin’ed ban’en ni nge m’ug riy ni gadad ba cheg ngak yugu boch e girdi’. Maku, fayleng rok Satan e ma k’aringdad ni ngad siingad, ma ngaud towasargad. Mang e rayog ni nge ayuwegdad nge yag ni ngad sobut’niged gadad? Ma mang e be yip’ Jesus fan u nap’an ni yog ni ‘en ni ir e th’abi sobut’ u fithik’dad ni gadad gubin, e ir e th’abi tolang’? Ma mingiyal’ e ba t’uf ni ngad athamgilgad ni ngad sobut’niged gadad?
“RIB TOAR E GONOP ROK NGE LLOWAN’ ROK”
4, 5. Mang e rayog ni nge k’aringdad ni ngaud sobut’niged gadad? Mu weliy.
4 Reb e kanawo’ nrayog ni ngad sobut’niged gadad e dab da paged talin ni kab ga’ Jehovah ngodad ndabi chuchugur. Bin riyul’ riy e “dariy be’ ni manang e lem rok.” (Isa. 40:28) Ke yoloy apostal Paul u murung’agen feni gilbuguwan Jehovah ni gaar: “Ri ba ga’ e flaab rok Got! Ma rib toar e gonop rok nge llowan’ rok! Mini’ e rayog ni nge weliy rogon ni ma turguy Got ban’en? Mini’ e manang rogon kanawoen ni ma maruwel? (Rom. 11:33) Ke yan sogonap’an 2,000 e duw u tomuren ni ke yoloy Paul e pi thin nem, ere ke yoor e tamilangan’ ko girdi’. Machane ka be par nib riyul’ e n’en ni ke yog. Demtrug feni yoor e tamilangan’ rodad, ma ra par ni bay ban’en nrayog ni ngad filed murung’agen Jehovah, nge maruwel rok, nge lem rok.
5 Bod ni, n’en ni ke ayuweg Leo * ni nga i par nib sobut’an’ e ke guy ndabiyog rok ni nge nang urngin ban’en u murung’agen e tin ni ke sunmiy Got. Nap’an ni kab pagel, ma ri baadag ni nge fil murung’agen e science. Ri baadag ni nge nang murung’agen e palpalth’ib, ere ke dugliy ni ireray e n’en ni nge fil u skul. Machane ke guy ni science e dabiyog ni nge ayuweg ni nge nang urngin ban’en u murung’agen e palpalth’ib. Ere, ke tabab ni nge fil murung’agen e motochiyel. Me munmun ma ke mang reb e lawyer, ma boch ngaram riy me mang reb e judge. Tomur riy, me yib e Pi Mich Rok Jehovah ni ngar filed e Bible ngorow e ppin rok, ma ke fel’ u wan’row e tin riyul’, me munmun min taufenagrow. Yugu aram rogon nib tolang e skul rok, ma mang e ke ayuweg ni nge sobut’nag ir? Me fulweg ni gaar, “Ke tamilang u wan’ug nyugu demtrug feni yoor e n’en ni kad filed u murung’agen Jehovah nge fare palpalth’ib, ma ka bay boor ban’en nrayog ni ngad filed.”
6, 7. (a) Uw rogon ni i sobut’nag Jehovah ir? (b) Uw rogon, ma sobut’an’ ni ma dag Jehovah e ra ‘tolangnag’ be’?
6 Maku reb nrayog ni nge ayuwegdad ni ngaud sobut’niged gadad e dab da paged talin ni ma sobut’nag Jehovah ir. Mu lemnag e re n’ey: ‘Gadad be maruwel rok Got u taabang.’ (1 Kor. 3:9) Mu susunnag! Jehovah Got ni ir e Th’abi tolang e be tay ni ba’ fadad ya ke bing e kanawo’ ngodad nge yag ni ngad machibnaged fare thin nib fel’ ni gad be fanay e Thin rok ni aram e Bible. Yugu aram rogon ni Jehovah e ma ayuweg ni nge tugul e awoch ko tin riyul’, ma ke pi’ e maruwel ngodad ni ngad yunged e awoch ko tin riyul’ ma ngad puoged e ran ngay. Ere ke pi’ e maruwel ngodad ni nge yag ni ngad maruwelgad rok u taabang. (1 Kor. 3:6, 7) Gur, gathi be dag e re n’ey nriyul’ ni ma sobut’nag Got ir? Dariy e maruwar riy, ni n’en ni ke rin’ Jehovah e kari pi’ e athamgil nga lanin’dad ni ngaud sobut’niged gadad.
7 Sobut’an’ ni i dag Jehovah e kari ayuweg David ni fare psalmist. Ke yon’ e tang ngak Jehovah ni gaar: “Mu yoror rog ma ga be ayuweg e pogofan rog; ayuw ni kam tay ngog [“sobut’an’ ni kam dag,” NW] e ke gilnag buguwag.” (2 Sam. 22:36) Manang David ni ke yag rok ni nge rin’ boch ban’en nib ga’ fan ya bochan ke sobut’nag Jehovah ir, ma aram me tiyan’ ngak, me pi’ e ayuw ngak. (Ps. 113:5-7) Maku er rogodad. Pi fel’ngin, nge salap, nge pi tow’ath ara maruwel ni bay rodad, e Jehovah e ke pi’ ngodad. (1 Kor. 4:7) Reb e kanawo’ ni be’ ni be sobut’nag ir ni nge ‘tolang’ ara nge gilbuguwan e aram e nge mang tapigpig rok Jehovah ni ke mon’og ko tirok Got ban’en. (Luke 9:48) Ngad guyed ko uw rogon.
‘EN NI IR E TH’ABI SOBUT’ U FITHIK’MED, E IR E TH’ABI TOLANG’
8. Mang ni girdien e ulung e ba t’uf ni ngar sobut’niged yad?
8 Piin ni yad ba sobut’an’ e yad ba felfelan’ u lan e ulung rok Jehovah, ma yad ma ayuweg e pi n’en ni yima rin’ u lan e ulung. Petra e be’ nib fel’ yangaren, ma chon e tabinaw rok e yad e Pi Mich Rok Jehovah. Me munmun ma daki chag ko ulung ya ke dugliy ni nge rin’ ban’en u rogon nib m’agan’ ngay. Tomuren ni ke yan boch e duw me tabab ni nge chag ko ulung bayay. Ke felfelan’ e chiney ni ir bang ko ulung rok Jehovah, ma baadag ni nge fol ko pi n’en ni kan yarmiy u lan e ulung. Mang fan ni ke thil e lem rok e chiney? Ke yoloy ni gaar: “Ba t’uf ni nggu nang fan ma nggu maruweliy l’agruw i fel’ngin ni aram e sobut’an’, ma nggu nang e tin dabiyog ni nggu rin’, ya nge yag ni nggu par u lan e ulung u fithik’ e felfelan’.”
9. Susun uw rogon e thin rok Got u wan’ be’ nib sobut’an’, ma uw rogon ni nge ayuweg e re n’ey ni nge mon’og ko pigpig ku Got?
9 Be’ nib sobut’an’ e riyul’ ni yad ma pining e magar ngak Jehovah ko urngin ban’en ni ke pi’ ngodad, mab muun ngay e thin rok. Ere, ma beeg e Bible nge Fare Wulyang ko Damit nge Awake! u fithik’ e pasig. Boor e tapigpig rok Jehovah ni ma beeg e babyor nib beech ni gubin u m’on ni ngar chaariyed nga tafen. Faanra gad ma fil e pi babyor rodad ni aram rogon ma ra ayuwegdad ni nge fel’ e tha’ u thildad Jehovah, ma ra fanaydad ni ngad rin’ed boor ban’en ni fan ko pigpig ngak.—Heb. 5:13, 14.
10. Uw rogon ni ngad sobut’niged gadad u lan e ulung?
10 Maku bay reb e kanawo’ ni nge “tolang,” ara nge fel’ be’ nib sobut’an’ u wan’ Jehovah. Urngin e ulung rok, e bay e piin piilal ni ke dugliyrad gelngin Got nib thothup. Yad ma tay e pi muulung ni bod e muulung ni fan ko urngin e girdi’ u lan e ulung, nge machib, ma yad ma yan ngar guyed e girdi’ u lan e tabinaw rorad. Faanra gad ma sobut’niged gadad, ma ngad uned ko pi yaram ney u fithik’ e felfelan’, ma aram e gad be ayuweg ni nge par ni bay e felfelan’, nge gapas, nge taareban’ u lan e ulung. (Mu beeg e Hebrews 13:7, 17.) Faanra gur reb e piilal ara ministerial servant u lan e ulung, ma ga be dag ni gab sobut’an’ ma ga be pining e magar ngak Jehovah ya ke pi’ ngom e maruwel ni aram rogon?
11, 12. Mang lem nge ngongol e ra ayuwegdad ni ngad mon’oggad u lan e ulung rok Jehovah, ma mang fan ni aram rogon?
11 Be’ nib sobut’an’ e ra mon’og u lan e ulung, ya lem nge ngongol rok e ra ayuweg ni nge mang tapigpig rok Got nib fel’ maku rayog ni nge ayuweg e ulung. Ke puguran Jesus ngak pi gachalpen ni ngar sobut’niged yad, ya boch i yad e ka yad ma lem ni bod e girdi’ nib tolangan’ e ngiyal’ nem. Luke 9:46 e be gaar: “Me yib i luluag pi gachalpen e thin ko mini’ e arorad ni ir e th’abi tolang u fithik’rad.” Gur, ku rayog ni ngad lemnaged ni ka gad ba salap ngak e pi walagdad ara yugu boch e girdi’? Thingar da pared ni gad ba thil ko yooren e girdi’ ni bay u toobdad ni yad ba tolangan’ ma yad ba siin. Faanra gadad ba sobut’an’ ma gad ma tay e tin nib m’agan’ Got ngay nib m’on ko yafas rodad, ma ra felfelan’ e pi walagdad ni ngar chaggad ngodad.
12 Faanra ke tamilang u wan’dad fan fare fonow rok Jesus ni ngad sobut’niged gadad, ma ra k’aringdad ni ngad ngongolgad ni aram rogon ni gubin ngiyal’. Gad ra weliy dalip e kanawo’.
NGAM ATHAMGIL NI NGAM SOBUT’NAGEM
13, 14. Uw rogon ni nge sobut’nag e en figirngiy ara en leengiy ir? Uw rogon ni nge ayuweg e re n’ey e mabgol?
13 U lan e mabgol. Boor e girdi’ e ngiyal’ ney ni kemus ni mat’awrad e yad be lemnag. Dariy fan u wan’rad mat’awun boch e girdi’. Machane, be’ nib sobut’an’ e ma fol ko n’en ni ke yog Paul ngak e pi Kristiano nu Roma ni gaar: “Gubin ngiyal’ ma thingar ud nameged e pi n’en ni ma fek e gapas i yib, nge pi n’en ni ma gelnagdad.” (Rom. 14:19) Be’ nib sobut’an’ e ma athamgil ni nge awnag e gapas u thilrad urngin e girdi’ nib ga’ ni en ni mabgol rok.
14 Ra buch ni n’en ni ma chuweg e chalban ni baadag e en figirngiy ni nge un ngay, ma gathi ireram e n’en ni baadag leengin. Sana en figirngiy e ke mel’eg ni nge par u tabinaw ya baadag ni nge beeg reb e babyor. Machane, leengin e baadag ni nge yan nga bang ko abich ara nge yan nge guy boch e fager rok. Mom rok faen leengiy ni nge tay fan e pumoon rok nfaanra ba sobut’ laniyan’ e pumoon rok ma gathi kemus ni be lemnag e n’en baadag, ya ku be lemnag e n’en baadag leengin. Maku ra gel e t’ufeg rok faen figirngiy ngak leengin nfaanra gathi kemus ni n’en ni baadag e be lemnag, ya ku be lemnag e n’en ni baadag e pumoon rok. Ra fel’ e tha’ u thilrow nfaanra yow l’agruw ni yow ma sobut’nagew yow.—Mu beeg e Filippi 2:1 *-4.
15, 16. Rogon ni yog ko Psalm 131, mang e ke yog David ngak piyu Israel ni ngar rin’ed? Ma uw rogon ni ngad rin’ed e re n’ey u lan e ulung?
15 U lan e ulung. Boor e girdi’ nu fayleng e yad be lemnag ni thingari yag ngorad nib papey e tin ni yad baadag. Dariy e gum’an’ rorad ma dubrad ni ngar sonnaged ban’en. Machane, faanra gadad ba sobut’an’, ma mom ni ngad sonnaged Jehovah ara ngad pagedan’dad ngak. (Mu beeg e Psalm 131:1-3.) Faanra gad ba sobut’an’ ma gad ma sonnag Jehovah ma ra tow’athnagdad. Ya bay e pagan’ rodad, ma ra felfelan’dad. Ere rayog ni ngad nanged ko mang fan ni ke pi’ David e athamgil nga laniyan’ piyu Israel ni ngar athamgilgad ni ngar sonnaged e Got rorad u fithik’ e gum’an’!
16 Faanra ga be sonnag Jehovah u fithik’ e sobut’an’, ma ra fel’ lanin’um ni bod David. (Ps. 42:5) Sana ga be nameg ni ngam mang piilal ya ga baadag ni ngam ayuweg e ulung. (1 Tim. 3:1-7) Riyul’ ni daken e ayuw ko gelngin Got nib thothup, ma thingar mu rin’ e tin rayog rom nge yag ngom e pi fel’ngin nib t’uf ni nge yag ngak be’ ni baadag ni nge mang piilal. Machane, uw rogon nfaanra ke yib e re tow’ath ney ngak boch e walag nib papey, me gur e dawor? Be’ ni ma sobut’nag ir e ra sonnag e tayim ni ngan pi’ e tow’ath ara maruwel u lan e ulung ngak u fithik’ e gum’an’. Ma nge ulul ko pigpig ku Jehovah nge fare ulung nrogon nrayog rok u fithik’ e felfelan’.
17, 18. (a) Mang angin nra yib ngodad nfaanra ngad weniggad ngak be’ u nap’an ni kad olobochgad, ma ngad n’aged fan u wan’dad e kireb ni kan rin’ ngodad? (b) Mang e be yog e Proverbs 6:1-5 ni ngan rin’?
17 Tha’ u thildad boch e girdi’. Mo’maw’ rok yooren e girdi’ ni ngar weniggad ngak boch e girdi’. Machane, pi tapigpig rok Got e yad ma athamgil ni ngar sobut’niged yad, ma yad ma yog e oloboch rorad, maku yad ma wenig ni ngan n’ag fan e kireb ni kar rin’ed. Maku ba m’agan’rad ngay ni ngar n’aged fan e kireb ni ke rin’ boch e girdi’. Ba ga’ ni ma sum e magawon nib gel u fithik’ e girdi’ nib tolangan’rad, machane rayog ni nga i par ni bay e gapas u lan e ulung nfaanra yad ma n’ag fan rorad.
18 Sana ba t’uf ni ngad sobut’niged gadad ma ngad weniggad ngak be’ u fithik’ e yul’yul’. Bod ni, sana kam micheg ban’en ngak be’, machane, bochan ni bay e magawon ni ke sum, ma aram e de yag rom ni ngam rin’. Thingar da lemnaged e oloboch rodad, ma nga dogned ngak nriyul’ ni kad olobochgad nyugu aram rogon ni ku bay e oloboch rok riy.—Mu beeg e Proverbs 6:1-5.
19. Mang fan ni gadad ba felfelan’ ni be pi’ e Bible e athamgil nga lanin’dad ni ngaud sobut’niged gadad?
19 Ri gad ba felfelan’ ni be pi’ e Bible e athamgil nga lanin’dad ni ngaud sobut’niged gadad. Yu ngiyal’ e sana mo’maw’ ni ngad sobut’niged lanin’dad. Machane, faanra ngad lemnaged feni tolang Jehovah ngodad, ma i sobut’nag laniyan’, ma ra k’aringdad ni ngad sobut’niged gadad. Gad ra rin’ ni aram rogon, ma rayog ni ngad daged ni gadad e pi tapigpig rok Jehovah ni kad mon’oggad ko tirok Got ban’en. Ere gadad gubin ni ngad athamgilgad ni ngaud sobut’niged gadad.
[Boch e thin nra tamilangnag murung’agen]
^ Kan thilyeg fithingan e girdi’ u roy.
^ Filippi 2:1 (NW): “Ere, faanra ke gelnagmed e ngongol romed u fithik’ Kristus, ma gimed t’ufeged gimed, ma gimed be par nib taareban’med nga gelngin Got nib thothup, ma gimed be runguyed gimed.
[Study Questions]
[Sasing ko page 19]
Ke tay Jehovah ni bay fadad ya ke pi’ e tow’ath ngodad ni ngad machibnaged fare thin nib fel’
[Sasing ko page 22]
Mingiyal’ e kan bing e kanawo’ ngom nge yag ni ngam sobut’nagem?