Kan Tay ni Nge Mil Fan Urngin Ban’en Ngom Ma Yima Pagan’uy Ngom!
Kan Tay ni Nge Mil Fan Urngin Ban’en Ngom Ma Yima Pagan’uy Ngom!
“Gathi gimed e mmil famed ngomed, yi Got e mmil famed ngak.”—1 KOR. 6:19.
UW ROGON NI GA RA FULWEG?
Mang e maruwel rok e piin ni kan tay ni nge mil fan boch ban’en ngorad kakrom?
Mang e pi maruwel rok urngin e piin ni ke tayrad Got ni nge mil fan boch ban’en ngorad?
Susun uw rogon e pigpig rodad ngak Got u wan’dad?
1. Nap’an nra lemnag e girdi’ murung’agen e pi sib, ma mang e ra yib ngan’rad?
GONAP’AN 2,500 e duw ni ke yan, ma be’ ni Greek ni ma yoloy e babyor e yoloy ni gaar: “Dariy be’ ni baadag ni nge mang ba sib.” Boor e girdi’ e ngiyal’ n’ey nrib puluw e pi thin ney u wan’rad. Nap’an nra lemnag e girdi’ fare bugithin ni sib, ma ra yib ngan’rad e girdi’ ni kan towasariyrad ni ngar pigpiggad ngak boch e girdi’, ma yibe gafgownagrad. Ma yad be rin’ e maruwel ni girdi’ ni yad be gafgownagrad e ra fel’ rogorad riy.
2, 3. (a) Uw rogon ni yima tayfan e pi sib rok Kristus? (b) Mang boch e deer ni gad ra weliy e chiney?
2 Machane, ke yog Jesus ni pi gachalpen e yad ra mang pi tapigpig nib sobut’an’rad, ara pi sib. Machane, tin riyul’ e Kristiano e yad e pi sib ni gathi yima gafgownagrad, ya yima pagan’uy ngorad ma yima tayfarad. Mu lemnag e n’en ni yog Jesus u murung’agen e “tapigpig” ara sib. De n’uw nap’an u m’on ni yim’, me yog ni bayi pi’ e maruwel ngak “fare tapigpig nib yul’yul’ ma ba gonop.”—Matt. 24:45-47.
3 Fare babyor u Bible ni Luke e ku be yog Jesus riy u murung’agen pi gachalpen ni yad e “tapigpig” ara sib. (Mu beeg e Luke 12:42-44.) Yooren e Kristiano nib yul’yul’ ni ka yad ba fas e chiney e gathi yad bang ko fare tapigpig nib yul’yul’ ni yog Jesus. Machane thin nu Bible e be dag ni urngin e tapigpig rok Got e rayog ni nga nog ni yad e piin ni kan tay ni nge mil fan urngin ban’en ngorad. Mang e pi maruwel ni kan pi’ ngodad. Ma susun uw rogon e pi n’em u wan’dad? Gad ra weliy ko mang e ke rin’ e piin ni kan tay ni nge mil fan urngin ban’en ngorad kakrom, ya nge yag ni ngad nanged e fulweg riy.
MARUWEL NI KE MIL FAN NGORAD
4, 5. Mang e pi n’en ni ma rin’ e piin ni kan tay ni nge mil fan urngin ban’en ngorad? Mu weliy.
4 Kakrom ma en ni kan tay ni nge mil fan urngin ban’en ngak e ba ga’ ni ir e sib ni ke mil fan ngak ni nge ayuweg e tabinaw ara fol chuway’ ko masta rok. Ir e ma ayuweg urngin ban’en ko masta rok nib muun ngay e salpiy nge pi tapigpig rok. Ma bagayad e piin ni kan pi’ ngak e maruwel ni aram rogon e Eliezer. Ke mil fan ni nge ayuweg boor e chugum rok Abraham. Sana ku ir e cha’ ni Abraham e ke l’og ni nge yan nga Mesopotamia ni nge mel’eg reb e ppin ni nge mang leengin Isak ni fak. Reb e maruwel e re n’em nib ga’ fan!—Gen. 13:2; 15:2; 24:2-4.
5 Ma Josef ni fak tungin Abraham e ir e kan tay ni nge ayuweg e tabinaw rok Potifar. (Gen. 39:1, 2) Me munmun, ma immoy be’ ni kan tay ni nge “mmil fan e naun rok Josef ngak.” Ma ir faen ni ke ayuweg fa ragag i walagen Josef me pi’ e tin nib t’uf rorad. Me tay Josef chilen ngak ni nge fanay fare kap ni silber nge yag ni ngan skengnag pi walagen. Ba tamilang ni en ni kan tay ni nge mil fan urngin ban’en ngak e ri be pagan’ e masta rok ngak.—Gen. 43:19-25; 44:1-12.
6. Mang e pi maruwel ni ke mil fan ngak e piin piilal?
6 Tomuren ni ke yan bokum miriay e duw, me yoloy Paul ni apostal ni yog riy ni piin ni piilal e ke “mil fan e maruwel rok Got” ngorad. (Titus 1:7) Piin piilal e kan tayrad ni ngar “gafaliyed fare ran’ i saf” rok Got, ere yad ma yog e thin ma yad ma pow’iy e girdi’ u lan e ulung. (1 Pet. 5:1, 2) Riyul’ nib thilthil e maruwel rorad. Yooren e piin piilal e yad ma pigpig u lan taareb e ulung. Ma piin piilal ni ma lekag e ulung e boor e ulung ni yad ma ayuweg. Ma piin piilal ni yad bang ko Branch Committee e yad ma ayuweg e pi ulung u lan reb e nam. Machane, urngin e piin piilal e yibe athapeg ni ngaur rin’ed e maruwel rorad u fithik’ e yul’yul’; ma yad gubin e “thingar rogned ngak Got rogon e maruwel rok ni ur ngongliyed.”—Heb. 13:17.
7. Uw rogon, ma urngin e Kristiano e kan tay ni nge mil fan boch ban’en ngorad?
7 Machane, uw rogon e pi Kristiano nib yul’yul’ ni gathi yad e piin piilal? Ke yol apostal Peter ngak e pi Kristiano nyugu demtrug, me yog ni gaar: “Rogon e tow’ath ni kan pi’ ngomed ni be’ nge be’ e ngam fanayed ni ngam ayuweged gimed, ya kan taymed ni nge mil fan ngomed e runguy rok Got nib gel ni kan dag u boor e kanawo’.” (1 Pet. 1:1; 4:10, NW) Ma dag Got e runguy rok ngodad ni gadad gubin ma arfan ni ma pi’ ngodad e tow’ath, nge salap nrayog ni ngad fanayed ni ngad ayuweged e pi walagdad riy. Ere, gubin e girdi’ ni yad be pigpig ngak Got e kan tay ni nge mil fan boch ban’en ngorad. Ma pagan’ ngodad, ma ma tay fadad, ma baadag ni ngad fanayed nib fel’ rogon e pi n’en ni ke pi’ ngodad.
KE MIL FADAD NGAK GOT
8. Gadad e piin ni kan tay ni nge mil fan boch ban’en ngodad, ma mang e n’en nthingar dab da paged talin?
8 Gad ra weliy dalip ban’en ni urngin e Kristiano e ba t’uf ni nge dab ra paged talin. Bin som’on: Gadad gubin e ke mil fadad ngak Got ma thingar da felfelan’naged gum’irchaen. Ke yoloy Paul ni gaar: “Ere gathi gimed e mmil famed ngomed, yi Got e mmil famed ngak; ke chuw’iymed nib tolang puluwmed ni pi’.” Re n’ey e be yip’ fan rachaen Kristus. (1 Kor. 6:19, 20) Bochan ni ke mil fadad ngak Got, ere ba t’uf ni ngad folgad ko motochiyel rok, ma motochiyel rok e gathi rib mo’maw’. (Rom. 14:8; 1 John 5:3) Maku gadad e sib rok Kristus. Gadad e kari puf rogodad ni bod rogon e piin ni kan tay ni nge mil fan boch ban’en ngorad kakrom. Machane, dabiyog ni ngad rin’ed e tin ni gad baadag nyugu demtrug. Ya thingar da folgad ko thin ni ka nog ngodad ni ngad rin’ed. Demtrug e tow’ath ara maruwel ni kan pi’ ngodad, ma ka gadad be par ni gadad e tapigpig rok Got nge Kristus.
9. Mang e ke weliy Jesus u murung’agen e n’en ni baadag e masta ni nge rin’ e sib rok?
9 Ke ayuwegdad Jesus ni ngad nanged ko mang e baadag e masta ni nge rin’ e sib rok. Ke weliy ngak pi gachalpen murung’agen reb e sib ni ke yib nga tabinaw u tomuren ni ke un ko maruwel u reb e rran ni polo’. Gur, ke yog fare masta ngak e sib rok ni gaar, ‘Mu gurnigem ngam abich?’ Danga’. Ya ke yog ngak ni gaar: “Mu ngongliy rogon e ggan rog ko blayal’, ma ga m’ag madan e taang nga daken e mad rom nguum pi’ ganag nguug abich ma gu be garbod; nge mu’ ma aram e rayog ni ngam koy ban’en ma ga garbod.” Ere mang e ke fil Jesus ngak pi gachalpen? Ke weliy Jesus ni gaar: “Ere ku er rogomed; faanra mmu’gad i rin’ e tin ni ka nog ngomed ni ngam rin’ed ma nge lungumed, Gamad bogi tapigpig; ni kemus ni maruwel romad e kug ngongliyed.”—Luke 17:7-10.
10. Mang e be dag nib ga’ fan u wan’ Jehovah urngin ban’en ni gad ma rin’ ni fan ngak?
10 Riyul’ nib felfelan’ Jehovah ko athamgil ni gad be tay ni fan ko pigpig ngak. Be micheg e Bible ngodad ni gaar: “Got e gathi ba laniyan’. Gathi bayi pag talin e maruwel ni kam ngongliyed, ara rogon nib t’uf romed ni kam daged.” (Heb. 6:10) Dabi ning Jehovah ban’en ngodad ndabiyog rodad. Maku n’en ni ma ning ngodad e ra fel’ rogodad riy ma de mo’maw’. Machane, rogon ni yog Jesus e faen ni sib e dabi rin’ nsom’on e tin ni baadag. Re n’ey e be yip’ fan nnap’an ni kad ognaged gadad ngak Got, ma kad turguyed ni ngad rin’ed nsom’on e tin nib m’agan’ ngay. Ba puluw e re n’ey u wan’um, fa?
N’EN NI BAADAG JEHOVAH NI NGAD RIN’ED NI GADAD GUBIN
11, 12. Mang fel’ngin e thingar da daged ma mang e thingar da siyeged?
11 Bin l’agruw e: Gadad e piin ni kan tay ni nge mil fan boch ban’en ngodad e ba taareb rogon e pi kenggin e motochiyel ni gad ma fol riy. Riyul’ ni bay boch e maruwel ni kemus ni in e walag e kan pi’ ngorad e pi maruwel ney. Machane, yooren e maruwel nge motochiyel e kan pi’ ngak urngin e girdi’ u lan e ulung. Bod ni urngin e tapigpig rok Jehovah e thingar ra t’ufeged yad. Ke yog Jesus ni t’ufeg e aram reb e pow ko tin riyul’ e Kristiano. (John 13:35) Machane, gathi kemus ni pi walagdad u lan e ulung e gad ma t’ufeged yad. Ya gad ma athamgil ni ngad t’ufeged e piin ni gathi yad bang ko ulung rodad. Ireray e n’en ni gadad gubin e thingar da rin’ed.
12 Maku kan tay chilen ngodad ni ngad rin’ed e tin ni ke yog nib mat’aw, ma ngad paloggad ko pi n’en ni be yog e Bible nib kireb. Ke yoloy Paul ni gaar: “Girdi’ ni ma ngongliy e ngongol ko darngal, ara yad ma ta’fan ma yad ma meybil ko liyos ni ma meybil boch e girdi’ ngay, ara yad ma par e piin ni gathi mabgol rorad, ara yad e pumoon ni ma darngalnag e pumoon, ara piin ni yad ma iring ban’en u fithik’ e yargel, ara yad ba chogow, ara yad ma balyang ko rrum, ara yad ma t’ar e thin nga daken boch e girdi’, ara yad ma th’ab e motochiyel - dariy bagayad e mit i girdi’ ney nrayog ngorad e gin nsuwon Got.” (1 Kor. 6:9,10) Riyul’ nib t’uf ni ngad athamgilgad nge yag ni ngad folgad ko motochiyel rok Got. Machane, faanra ngad rin’ed e pi n’ey ma ra fel’ rogodad riy, ya ra ayuwegdad ni nge fel’ fithik’ i dowdad, ma ra fel’ e tha’ u thildad yugu boch e girdi’, maku ra fel’ e tha’ u thildad Got.—Mu beeg e Isaiah 48:17, 18.
13, 14. Mang maruwel e kan pi’ ngak urngin e Kristiano, ma uw rogon e re maruwel ney u wan’dad?
13 Maku dab mu paged talin ni en ni kan tay ni nge mil fan boch ban’en ngak e bay e maruwel nthingari rin’. Ere gadad e ku bay ban’en nthingar da rin’ed. Kan pi’ e tow’ath ngodad ni aram e tamilangan’ ko tin riyul’. Baadag Got ni ngad filed e re tamilangan’ ney ngak e girdi’. (Matt. 28:19, 20) Ke yoloy Paul ni gaar: “Susun e ngam changargad ngomad ni gamad e pi tapigpig rok Kristus ni gamad e kan ta’mad ni ke mil fan ngomad e tin riyul’ ni ke m’ay i lemnag rok Got.” (1 Kor. 4:1) Manang Paul ni ke mil fan ngak ni nge fil e “tin riyul’” u Bible ngak e girdi’. Ireray e n’en ni baadag Jesus ni Masta rok ni nge rin’ Paul.—1 Kor. 9:16.
14 Gad ra fil e tin riyul’ ngak e girdi’, ma aram e gad be dag ni yad ba t’uf rodad. Riyul’ nib thilthil rarogodad, ere kub thilthil e n’en nrayog ni ngad rin’ed ni fan ko re maruwel ney. Manang Jehovah rarogodad. N’en nib ga’ fan, e ngad rin’ed e tin nrayog rodad. Gad ra rin’ ni aram rogon, ma aram e gad be dag nib t’uf Got nge en buguli yoror rodad.
FENI GA’ FAN NI NGAN YUL’YUL’
15-17. (a) Mang nib ga’ fan ni en ni kan tay ni nge mil fan boch ban’en ngak e nga i par nib yul’yul’? (b) Uw rogon ni dag Jesus angin nra yib ngak be’ nder yul’yul’?
15 Bin dalip ban’en nthingar dab da paged talin e: Thingar da yul’yul’gad ma ngaud folgad. Faen ni kan tay ni nge mil fan boch ban’en ngak e sana bay boor i fel’ngin nib fel’ nge salap, machane dariy fan e pi n’ey nfaanra dabi fol ko masta rok. Ma kub t’uf ni nge par nib yul’yul’ ya nge yib angin e re maruwel rok nem ngak. Dab mu pagtalin e n’en ni yoloy Paul ni gaar: “Re n’en ni ir e th’abi ga’ fan ni nge rin’ e cha’ ni ir e mmil fan e pi n’ey ngak e nge par nib yul’yul’ ngak e masta rok.”—1 Kor. 4:2.
16 Ba mudugil nfaanra ngaud yul’yul’gad ma ra tow’athnagdad Got. Ma faanra dab da yul’yul’gad ngak ma ra kireb e tha’ u thildad Got. Rayog ni ngad guyed nriyul’ ni aram rogon ko fanathin rok Jesus u murung’agen e salpiy ara talent. Ke yog fare masta e thin nib fel’ u murung’agen fa gali tapigpig ni kar ‘maruwelgow ko fare salpiy ni kan pi’ ngorow,’ ma kari tow’athnagrow. Machane ke pufthinnag fare tapigpig nde yul’yul’ me yog nib “kireb,” mab “malmal,” ma “dariy ban’en nib fel’ ngay.” Fare salpiy ara talent ni kan pi’ ngak e kan fek rok min nin’ nga wen nga fithik’ e lumor.—Mu beeg e Matthew 25:14-18, 23, 26, 28-30.
17 Maku immoy ba ngiyal’ ni ki weliy Jesus u murung’agen wenegan nra yib ngak be’ nder yul’yul’. Ke yog ni gaar: “Immoy be’ ni pire’ ban’en rok ni pag fan urngin rok ngak be’ nge mang faanem e i ayuweg ma be gagiyegnag. Mi nog ngak ni faanem e be adbey e salpiy rok. Me pining nga naun nge gaar ngak, Uw rogon e tin baaray e thin ni kug rung’ag ni murung’agem? Mpi’ ngog babyoren e tirog ban’en ni ga be gagiyegnag, ya aram e dab kum par ni gur e nguum gagiyegnag.” (Luke 16:1, 2) Bochan ni ke adbey e salpiy rok e masta rok, me yog ngak ni nge chuw ko naun rok. Pi verse ney e be fil ban’en ngodad nrib ga’ fan! Ere gad baadag ni ngad yul’yul’gad ni aram e ngaud rin’ed e tin th’abi fel’ rodad ko urngin ban’en ni be ning Got chilen ngodad.
BA FEL’ NI NGE PULUWNAG BE’ E NGONGOL ROK KO NGONGOL ROK BE’, FA?
18. Mang ndab da puluwniged e n’en ni gad be rin’ ko n’en ni be rin’ boch e girdi’?
18 Ra bagadad, ma rayog ni nge fith ir ni gaar, ‘Uw rogon boch ban’en ni kan tay ni nge mil fan ngog u wan’ug?’ Machane, rayog ni nge sum e magawon nfaanra ngad puluwniged e ngongol rodad ko ngongol rok boch e girdi’. Be fonownagdad e Bible ni gaar: “Ra be’ ma nge mang ir e changar ngak nge fal’eg i yaliy e ngongol rok ara pangin. Ma faanra ba fel’ e ngongol rok, me ere rayog ni nge felfelan’ ko ngongol ni ke rin’, me siy i puluwnag e ngongol rok ko ngongol ni ke rin’ yugu be’.” (Gal. 6:4) Thingar da tedan’dad ko tin nrayog ni ngad rin’ed ko bin ni ngad puluwniged e n’en ni gad be rin’ ko n’en ni be rin’ boch e girdi’. Re n’ey e ra ayuwegdad ni nge dab da ufgad maku dabi mulan’dad. Ma rayog ni ke thil rarogodad. Ya sana bochan e m’ar rodad, ma kad pilibthirgad, ma ke yoor e n’en nthingar da rin’ed, ma aram e dabkiyog ni ngad rin’ed boch ban’en ni gad ma rin’ kafram. Ma reb e sana ke thil rarogodad e chiney, ma rayog rodad ni ngad yoornaged boch e maruwel rodad. Ere faanra aram rogon, ma mang ndab da guyed rogon ni ngad yoornaged boch e maruwel rodad?
19. Mang ni susun dabi mulan’dad nfaanra dan pi’ ngodad reb e tow’ath u lan e ulung?
19 Maku dab da taareb rogonnaged gadad ngak e piin ni bay e tow’ath rorad ni gad baadag ni nge yag ngodad. Bod ni sana baadag reb e walag ni nge mang reb piilal u lan e ulung, ara baadag ni nge pi’ e welthin u nap’an e assembly nge convention. Ba fel’ ni nge athamgil ni nge mon’og ko tirok Got, ma rayog ni nge bod e piin ni kan pi’ e tow’ath ngorad ni aram rogon. Machane, dabi mulan’dad nfaanra dabi yag ngodad nib papey. Sana bay fan ni dabi yag ngodad e re tow’ath nem nib papey. Dab mu pagtalin ni immoy ba ngiyal’ ni ke lemnag Moses nrayog rok ni nge ayuweg piyu Israel ngar chuwgad u Egypt, machane ba t’uf ni nge sonnag 40 e duw ma fini yag ni nge rin’ e re maruwel nem. Ma re n’em e ke ayuweg ni nge yag ngak e pi fel’ngin nib t’uf rok ni nge pow’iy e girdi’ nib gelan’rad mab ta togopluw.—Acts 7:22-25, 30-34.
20. Mang e gad ra fil ko n’en ni buch rok Jonathan?
20 Yu ngiyal’, ma bay reb e tow’ath nri dab ni pi’ ngom. Ireray e n’en ni ke buch rok Jonathan. Ir fak Saul ere rayog ni nge mang pilung nu Israel. Machane, ke mel’eg Got David ni kab pagel ni nge mang pilung. Ere mang e ke rin’ Jonathan? Ka fel’ e re n’em u wan’ me ayuweg David nyugu aram rogon nbochan e re n’em ma ke tay e yafas rok nga thatharen e riya’. Me yog ngak David ni gaar: “Bay mmang pilung nu Israel me gag e bay gu par ko re liw nib migid ngom.” (1 Sam. 23:17) Mang e ga ra fil ko n’en ni rin’ Jonathan? De gun’gun’ ni gathi ir e ra mang pilung. Ke awan’ Saul ngak David, machane Jonathan e danga’. Ere ngad athamgilgad ni ngad rin’ed nib fel’ rogon e maruwel ni kan pi’ ngodad ko bin ni ngad awan’gad ngak e pi walag ni bay e tow’ath rorad ndariy rodad. Ri gad manang ni u lan fa bin nib beech e fayleng, ma ra pi’ Jehovah e tin nib t’uf rok urngin e pi tapigpig rok.
21. Uw rogon e pigpig rodad ngak Jehovah u wan’dad?
21 Dab da paged talin ni gadad e piin ni ke tay Got ni nge mil fan boch ban’en ngodad, e dan towasariydad ni ngad pigpiggad ngak reb e masta ni ma gafgownagdad. Ya be pagan’ Jehovah ngodad ma ri ma tay fadad, ma arfan ni ke pi’ e maruwel ngodad nrib ga’ fan ni aram e ngan machibnag fare thin nib fel’ e ngiyal’ ney ni ka nog e tin tomuren e rran ngay, ni aram reb e maruwel nnap’an ni ran mu’nag ma dab kun rin’ bayay. Me pi’ mat’awdad ni ngad turguyed ko uw rogon ni ngad rin’ed e pi maruwel ni ke pi’ ngodad. Ere ngaud rin’ed e pi maruwel ni ke tay ni nge mil fan ngodad u fithik’ e yul’yul’. Ma dab da paged talin nri gadad ba tow’ath ni gadad be pigpig ngak Jehovah ni ir e En th’abi tolang u palpalth’ib.
[Study Questions]
[Sasing ko page 20]
Gad ra rin’ u fithik’ e yul’yul’ e maruwel ni kan pi’ ngodad
