Nga i Par nib Mudugil u Wan’dad ni Gadad e “Milekag”

“Ri gu be wenig ngomed, ya gimed e milekag ni kam bad ngaray nga fayleng! Dab mu paged gimed ngak e tin ni be yim’ e dowef romed ni bochan.”—1 PET. 2:11.

UW ROGON NI GA RA FULWEG?

Mang fan nrayog ni nga dogned ni pi Kristiano ni kan dugliyrad e yad e milekag?

Uw rogon, ma “yugu boch e saf” e ku rayog ni nga nog ni yad e milekag?

Mang e ga be athapeg ni nge yib ngom boch nga m’on?

1, 2. Chon mini’ e ke yog Peter ni Got e “ke mel’egrad”? Mang fan ni ke yog ni yad e “milekag”?

 SOGONAP’AN 30 e duw u tomuren ni ke yan Jesus nga tharmiy, me yoloy Peter reb e babyor ni fan ngak e piin ni yad e milekag ni Got e “mel’egrad ni kar wergad ko nug nu Pontus, ngu Galatia, ngu Kappadocia, ngu Asia, ngu Bithynia ni yad be milnag e pogofan rorad.” (1 Pet. 1:1) Ba tamilang ni fare bugithin ni “Got e mel’egrad” ni ke fanay Peter e be yip’ fan e piin ni kan dugliyrad nga gelngin Got nib thothup ni kan “pi’ e yafos nib beech” ngorad nge yag ni ngar uned ngak Jesus ko gagiyeg u tharmiy. (Mu beeg e 1 Peter 1:3, 4.) Machane, mang fan ni tomur riy me yog Peter ni yad e “milekag”? (1 Pet. 2:11) Ma mang ni gad baadag ni ngad weliyed murung’agen e re n’ey ya ri buchuuw u fithik’ e Pi Mich Rok Jehovah u ga’ngin yang e fayleng e yad be yog ni yad e Kristiano ni kan dugliyrad ara kan mel’egrad?

² Piin ni kan dugliyrad ko bin som’on e chibog e ba puluw ni nga nog ni yad e “milekag.” Ya dab ra par u roy u fayleng ni manemus. Apostal Paul ni ir bagayad e piin ni kan dugliyrad ara bang ko fa “chi ulung” e weliy ni gaar: “Gadad e gadad e girdien yu tharmiy, ni ka yugu da pired ni gadad be sonnag e en ni ir e thapegdad ngak Got ni nge yib u tharmiy nga but’; ni aram Somol ni Jesus Kristus.” (Luke 12:32; Fil. 3:20) Re n’ey e be yip’ fan ni tomuren nra yim’ e piin kan dugliyrad mi yad chuw u fayleng, ni Satan e be gagiyegnag, me yag ngorad e yafas u tharmiy ma dabkur m’ad biid. (Mu beeg e Filippi 1:21-23.) Kar pared u roy u fayleng nib ngoch nap’an, ere riyul’ ni yad e “milekag.”

3. Mang deer e ra sum u murung’agen “yugu boch e saf”?

³ Machane, uw rogon fare “yugu boch e saf”? (John 10:16) Gur, gathi be yog e Bible ni yad ra par u roy u fayleng  ni manemus? Riyul’ ni bay ra tafnayed e fayleng ni manemus! Machane, ku rayog ni nga nog ni yad e milekag e ngiyal’ ney. Ni uw rogon?

“TIN NI KE SUNUMIY GOT E BE GEL’GEL’ KO AMITH”

4. Mang magawon e dabiyog rok e girdi’ ni ngar pithiged u daken ngongolen e am, nge science, nge salpiy?

⁴ Chiney ndawori kirebnag Jehovah e m’ag rok Satan nib kireb, ma gubin e girdi’ e yad ra par nib gafgow nib muun e pi Kristiano ngay nbochan e togopuluw ni be tay Satan ngak Jehovah. Be yog e Roma 8:22 ni gaar: “Gadad manang ni urngin e tin ni ke sunumiy Got e be gel’gel’ ko amith ni bod rogon e amith ko gargel, ni kab kakrom i yib ke mada’ ko chiney.” Boor e girdi’ ni yad baadag ni ngar pithiged e magawon rodad u daken ngongolen e am, nge science, nge salpiy. Machane, de yag rorad ni ngar chuweged e gafgow ni ma yib ngak e girdi’.

5. Mang e ke rin’ bokum milyon e girdi’ ni ka nap’an e duw ni 1914, ma mang fan?

⁵ Aram fan ni ka nap’an e duw ni 1914, ma bokum milyon e girdi’ e kar mel’eged ni ngar pared u tan pa’ Kristus ni ir e pilung ni ke dugliy Got. Dubrad ni ngar manged bang ko fayleng rok Satan, ma aram e dubrad ni ngar folgad ko ngongol rorad. Machane, yad ma fanay e yafas rorad nge pi n’en ni bay rorad ni fan ko Gil’ilungun Got.—Rom. 14:7, 8.

6. Uw rogon, ma rayog ni nga nog ni Pi Mich Rok Jehovah e yad e milekag?

⁶ Ka boor ko 200 e nam ni bay e Pi Mich Rok Jehovah riy, ma yad be athamgil ni ngar folgad ko motochiyel ko am. Machane, demtrug e nam ni yad bay riy ma yad bod e milekag. Darur uned ko ngongolen e am. Chiney e ke michan’rad ni yad girdien fa bin nib beech e fayleng ni aram e n’en ni ke micheg Got. Yad ba felfelan’ ni dabki n’uw nap’an, ma dab ku ra pared ni yad e milekag.

7. Uw rogon, ma pi tapigpig rok Got e dab ku ra pared ni yad e milekag, ma uw e ngaur pared riy ni manemus?

⁷ Dabki n’uw nap’an, ma ra kirebnag Jesus Kristus e m’ag rok Satan nib kireb. Am rok Kristus nib flont e ra chuweg e denen nge gafgow. Maku ra chuweg urngin e girdi’ nra togopuluw nga mat’awun Got ko  gagiyeg ni ir e th’abi tolang u palpalth’ib. Ma pi tapigpig rok Got nib yul’yul’ e rayog ni ngar pared u paradis u fayleng ni manemus. (Mu beeg e Revelation 21:1-5.) Ere urngin e girdi’ e “bay ra pired ni gathi yad e sib rok e wod, mi yad un ko flaab rok pi fak Got.”—Rom. 8:21.

MITI MANG NGONGOL E THINGARI YAG NGAK E TIN RIYUL’ E KRISTIANO?

8, 9. Ngam weliy ko mang e be yip’ Peter fan ko fare bugithin “ndab mu paged gimed ngak e tin ni be yim’ e dowef rorad ni bochan.”

⁸ Ke weliy Peter ko uw rogon e ngongol rok e Kristiano ni gaar: “Pi tafager rog, ri gu be wenig ngomed, ya gimed e milekag ni kam bad ngaray nga fayleng! Dab mu paged gimed ngak e tin ni be yim’ e dowef romed ni bochan, ni gubin ngiyal’ ma be cham ngak lanin’med.” (1 Pet. 2:11) Re fonow nem e kan pi’ ngak e pi Kristiano ni kan dugliyrad, machane yugu boch e saf rok Jesus e kub t’uf ni ngar folgad riy.

⁹ Boch ban’en ni gad be yim’ ni bochan e de kireb nfaanra ngad maruweliyed ni nge yag ngodad u rogon nib puluw ko motochiyel rok e en Ta Sunmiy. Re n’ey e rayog ni nge pi’ e felfelan’ ngodad. Bod ni, girdi’ e yad baadag ni ngar ked e ggan nib fel’ ma ngar garbodgad, ma ngar uned ko maruwel ni ma k’aring e felfelan’, ma ngar chaggad ngak e girdi’ nib fel’. Maku dariy e kireb riy nfaanra be’ nge ani mabgol rok e ngar parew. (1 Kor. 7:3-5) Machane ba tamilang ni be weliy Peter murung’agen e ‘tin ni be yim’ e dowef rorad ni bochan’ ni ‘gubin ngiyal’ ma be cham ngak lanin’rad.’ Re n’ey e be yip’ fan e ar’ar nib kireb. Boch e Bible e ke piliyeg e re bugithin ney ni “Ar’ar ko ngongol ndarngal” (King James Version) ara “Ar’ar nib kireb” (New International Version). Ke yog Jehovah ngodad rogon ni ngaud ngongolgad nge rogon ni ngad fanayed e tin gadad be yim’ nbochan. Dab da paged ni tin ni gadad be yim’ nbochan e ra kirebnag e tha’ u thildad Got. Faanra ngad fanayed e pi n’ey u kanawo’ nib kireb, ma gad be tay e yafas rodad nga thatharen e riya’.

10. Mang boch e kanawo’ ni ma fanay Satan ya nge yag ni nge bannag e Kristiano ni ngar manged bang ko re fayleng ney?

¹⁰ N’en ni be nameg Satan e nge warnag laniyan’ e tin riyul’ e Kristiano ni nge dab ku u ra lemnaged ni yad e “milekag” ko re fayleng ney. Baadag ni ngad chogownaged e chugum, mad uned ko ngongol ndarngal, ma nge gilbuguwdad, ma ngaud “m’ongad” u gubin ban’en, mad ufgad ko nam rodad. Machane ba t’uf ni nge tamilang u wan’dad ni urngin e pi n’em e wup rok Satan. Faanra ngad turguyed u wan’dad ni dab da uned ko pi ngongol nib kireb ney, ma aram e gad be dag nib tamilang ni dubdad ni ngad manged bang ko re fayleng rok Satan ney nib kireb. Ere ngaud daged ni gadad e milekag ko re fayleng ney. Ya ri gad baadag ni ngad pared u lan fa bin nib beech e fayleng nib mat’aw. Ma ngad maruwelgad nib gel ya nge yag ngodad e re tow’ath ney.

NGONGOL NIB FEL’

11, 12. Yu ngiyal’, ma uw rogon ni ma lemnag e girdi’ murung’agen e girdi’ nu bang? Mang e ma lemnag boch e girdi’ u murung’agen e Pi Mich Rok Jehovah?

¹¹ Me ulul Peter i weliy ko verse 12 ko mang e thingari rin’ e Kristiano ni yad e “milekag” ni gaar: “Susun e ngar um pired u fithik’ e piin ndar nanged Got nib fel’ pangimed, ya nga rogned nib kireb e ngongol romed, me Chirofen ni sul Kristus riy mi yad nang nib fel’ e ngongol romed, ma aram mi yad yog e sorok ngak Got.” Girdi’ ni ma par u bang e yu ngiyal’ ma yima gathibthibnagrad. Bochan ni yad ba thil ko piin buguli yoror rorad, ma rayog ni un lemnag ni yad e girdi’ nib kireb. Thin, nge ngongol, nge munmad, nge yaarad e sana ba  thil. Machane, ngongol rorad nib fel’ e ra ayuweg boch e girdi’ ni ngar nanged ni pi n’en ni be yog e girdi’ u murung’agrad e de riyul’.

¹² Maku er rogon e tin riyul’ e Kristiano ni yad ba thil nga yooren e piin buguli yoror rorad u boch e kanawo’, ni bod e thin rorad nge pi n’en ni ma chuweg e chalban ni yad ma un ngay. Bochan e munmad rorad nge rogon ni yad ma fal’eg yaarad e yima guy ni yad ba thil nga boch e girdi’ ko binaw rorad. Ma aram fan ni boch e girdi’ e yad ma yog e thin nib togopuluw ngorad. Machane boch e girdi’ e yad ma yog e thin nib fel’ u murung’agrad nbochan e ngongol rorad.

13, 14. Uw rogon ma “gonop rok Got e ke m’ug nib riyul’ ko tin kan guy ni ke yib riy”? Rayog ni ngam weliy boch ban’en ni i buch ni be m’ug riy nriyul’ ni aram rogon?

¹³ Ngongol rodad nib fel’ e ra ayuweg ni nge guy e girdi’ nde puluw ni nga nog e ‘thin nib kireb nib togopuluw’ ngodad. Kemus ni goo Jesus e rib fel’ rogon ni ke fol rok Got. Machane ke yog e girdi’ e thin nib kireb ni murung’agen. Boch e girdi’ e ka rogned ni ir be’ ni ta ma abich, ma ma unum e wain nib pag rogon, ma ma chag ngak e girdi’ ni ta denen. Machane ke dag ko ngongol rok nde riyul’ e n’en ni ka nog u murung’agen. Yog Jesus ni gaar: “Gonop rok Got e ke m’ug nib riyul’ ko tin kan guy ni ke yib riy.” (Matt. 11:19) Maku aram rogon e ngiyal’ ney. Bod ni, boch e girdi’ ni yad ma par ko binaw nib chugur ko Bethel u Selters u Chiyamen e ka rogned nrib thil e ngongol rok e piin ni ma par u Bethel. Machane fare mayor u Selter e ke ayuweg e Pi Mich Rok Jehovah ni gaar: “Pi Mich Rok Jehovah ni yad be pigpig u rom e ba thil e ngongol rorad, machane ireray e ngongol nder ma magawonnag boch e girdi’ u rom.”

¹⁴ Maku Pi Mich Rok Jehovah ni yad ma par u Moscow, Russia, e ka nog ni yad ma rin’ e tin nib kireb. Ma boch i yad e ka rogned ni Pi Mich Rok Jehovah e yad ma kirebnag e tabinaw, ma yad ma k’aring e girdi’ ni ngar lied be’ ngem’, ma dubrad ni ngar uned ko tafalay. Machane, nap’an e pul ni June ko duw ni 2010, ma fare European Court of Human Rights u Strasbourg, France e ka rogned ni girdi’ nu Moscow e kar olobochgad ya kar magawonnaged e liyor ni ma tay e Pi Mich Rok Jehovah u rom, ma dariy mat’awrad ni ngar taleged e muulung rorad. Fare European Court of Human Rights e ka rogned ni fare kourt u Russia e de yag ni ngar micheged ni bay ban’en nib kireb ni ke rin’ e Pi Mich Rok Jehovah u rom. Miki yog ni pi kourt ney e ba laniyan’ rogon ni kar fanayed e motochiyel u Moscow ngak e Pi Mich Rok Jehovah.

THINGAR DA FOLGAD KO AM

15. Mang kenggin e motochiyel u Bible ni be fol e tin riyul’ e Kristiano riy u ga’ngin yang u fayleng?

¹⁵ Pi Mich Rok Jehovah u ga’ngin yang u fayleng e yad be fol ko thin ni yog Peter nthingari fol e Kristiano riy. Ke yog ni thingar da folgad “rok urngin e piin ni yad be  tay murung’agen e girdi’,” nib muun ngay e pilung nge pi am. (1 Pet. 2:13, 14) Gathi gadad bang ko fayleng. Machane, rogon ni yog Paul ngodad ni ngad folgad rok girdien e am ni “Got e ke tayrad.”—Mu beeg e Roma 13:1, 5-7.

16, 17. (a) Mang e mich riy nder ma togopuluw e Pi Mich Rok Jehovah ko am? (b) Mang e ke yog boch e tayugang’ ko am?

¹⁶ Pi Mich Rok Jehovah e yad e “milekag” ko re m’ag ney, machane gathi be yip’ fan ni yad baadag ni ngar togopuluwgad ko am ara ngar gathibthibnaged boch e girdi’. Yad manang ni girdi’ e yad ma lemnag ko mini’ e susun ni nge mang girdien e am nge uw rogon ni ngan pithig e pi magawon. Boch e teliw e yad ma un ko ngongolen e am, machane Pi Mich Rok Jehovah e dubrad ni ngar uned ngay. Darur guyed rogon ni ngar thilyeged rogon ni ma gagiyegnag e girdi’ e pi tayugang’ ko am. Ri dabun e Pi Mich Rok Jehovah ni ngar togopuluwgad ko am maku dab ra k’aringed e girdi’ ni ngar yodoromgad.

¹⁷ Ke yog Peter ni ‘ngan tay fan e pilung.’ Ere piin Kristiano e yad ma fol ko n’en ni ma yog e pi tayugang’ ko am ya nge yag ni ngar ted farad. (1 Pet. 2:17) Yu ngiyal’, ma pi tayugang’ ko am e yad ma yog ndariy tapgin ni ngan lemnag ni Pi Mich Rok Jehovah e ma k’aring e magawon. Bod ni, Steffen Reiche ni girdien e am nu Brandenburg, Germany, e munmun ma ke mang bang ko ulung ni ma fal’eg e motochiyel u rom, e ke yog nnap’an ni ke gafgownag girdien Hitler e Pi Mich Rok Jehovah ma ur pared nib fel’ e ngongol rorad. Yugu aram rogon ni kan gafgownagrad ma dar thilyeged e michan’ rorad, ma ur rin’ed e ngongol nib fel’ ngak yugu boch e kalbus. Miki yog ni ireray e pi fel’ngin nib ga’ fan ni nge yag ngak e girdi’ nu Chiyamen, ya boch e girdi’ e dakuriy e runguy rorad ngak e girdi’ nu bang ara piin nib thil e teliw rorad ara piin nib thil rogon ni yad ma lemnag u murung’agen ngongolen e am.

NGAN DAG E T’UFEG

18. (a) Mang nib mom ni ngad t’ufeged e pi walagdad u ga’ngin yang e fayleng? (b) Mang e ke yog boch e girdi’ u murung’agrad?

¹⁸ Ke yoloy apostal Peter ni gaar: “Nge t’uf romed e pi cha’ ni gimed ni ke mich Got u wan’rad, nge yib madgun Got u wan’med.” (1 Pet. 2:17) Pi Mich Rok Jehovah e bay madgun Got u wan’rad, ma re n’ey e be k’aringrad ni ngar rin’ed e tin nib m’agan’ Got ngay. Yad ba felfelan’ ni yad be pigpig ngak Jehovah, ma kar manged bang ko ulung rok u ga’ngin yang e fayleng ni girdi’ riy e ba taareb rogon e n’en ni yad be nameg. Aram fan nib mom ni ngar ‘t’ufeged’ yad. Nap’an nra guy e girdi’ ni gathi Pi Mich Rok Jehovah rogon ni yad ma t’ufeged yad ma yad ma gin ngay. Be’ ni ma turnag e tourist ara tourist guide ni ma maruwel u American travel agency e ke gin ko t’ufeg nge ayuw ni ke pi’ e Pi Mich Rok Jehovah ngak e pi walagrad ni kar bad u yugu boch e nam u nap’an fare international convention rorad ko duw ni 2009 u Chiyamen. Ke yog ni n’umngin nap’an ni ma un ko re maruwel rok nem ma de guy ban’en ni aram rogon. Me munmun, ma bagayad e Pi Mich Rok Jehovah e ke yog ni gaar: “Rogon ni non e cha’ nem u murung’agdad e be m’ug riy ni ke gin ngay, me non u fithik’ e pasig.” Gur, u nap’an ni kam un nga reb e convention, ma kam rung’ag be’ ni be yog e thin ni aram rogon u murung’agdad, fa?

19. Mang e gad baadag ni ngad rin’ed? Mang fan?

¹⁹ Ere kad filed ni boor ban’en ni ma rin’ e Pi Mich Rok Jehovah ni be m’ug riy ni yad e “milekag” ko re m’ag rok Satan ney. Ma ri yad baadag ni ngar rin’ed ni aram rogon. Ri yad be athapeg ndab ki n’uw nap’an ma rayog ni ngar pared u lan fa bin nib beech e fayleng rok Got ni manemus. Gur, ga baadag ni ngam un ngay?

[Study Questions]

[Sasing ko page 23]

Gathi gad be athamgil ni ngad ayuweged e fayleng rok Satan

[Sasing ko page 23]

Gad be ayuweg ni nge tamilang u wan’ e girdi’ murung’agen fa bin nib beech e fayleng rok Got

[Sasing ko page 25]

Tin riyul’ u Bible e ke ayuweg e re tabinaw ney ni yad e girdi’ nu Russia