Piin ni “Milekag” e Ke Taareban’rad ko Bin Riyul’ e Liyor
Piin ni “Milekag” e Ke Taareban’rad ko Bin Riyul’ e Liyor
“Girdien yugu boch e nam e bay ur . . . wolduguyed e but’ rom ma yad be ayuweg e yungi woldug rom ni grapes. Ma bay nnangmed ni gimed e pi prist rok Somol.—ISA. 61:5, 6.
UW ROGON NI GA RA FULWEG?
Uw rogon u wan’ boch e girdi’ girdien yugu boch e nam, machane mang e be yog e Bible u murung’agen?
Kan pining girdien urngin e nam ni ngar rin’ed e mang?
Uw rogon, ma bod ni gad be par u ba fayleng e ngiyal’ ney ndakuriy girdien yugu boch e nam riy?
1. Uw rogon ni ma lemnag boch e girdi’ murung’agen girdien yugu boch e nam?
ROGON ni kad weliyed ko fare article ni ke yan, ma boch e girdi’ e dubrad daken girdien yugu boch e nam. Sana yad be lemnag ni ka yad ba fel’ ngorad. Machane, girdi’ ni ma lemnag ni aram rogon e de gol. Dariy be’ ni kab fel’ ngak yugu be’. Reb e babyor e be yog ni gaar: “Girdi’ nib thilthil raen dowrad e be yog e Bible ni yad e pi walag.” (The Races of Mankind ) Pi walag e ba ga’ ni yad ba thilthil, machane yugu aram rogon ma ka be par ni yad walag.
2, 3. Uw rogon u wan’ Jehovah girdien yugu boch e nam?
2 Kakrom, ma bochan fare m’ag ni kan fal’eg, ma piyu Israel e kar manged e girdi’ rok Jehovah. Yugu aram rogon nib fel’ e tha’ u thilrad Got, machane fare Motochiyel e be yog ni ngar ted fan e girdi’ ni gathi yad piyu Israel, ma dab ur laniyan’gad ngorad. Maku aram e n’en nthingar da rin’ed e ngiyal’ ney. Pi Kristiano e thingar dab ra laniyan’gad ngak girdien yugu boch e nam. Mang fan? Ya yog apostal Peter ni gaar: “Ka fin gu nang e chiney nriyul’ ni gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.”—Acts 10:34, 35.
3 Girdi’ nu bang ni kar pared u Israel kakrom e ke yib angin ngorad. Mang fan? Ya kar fel’gad u wan’ Jehovah. Me munmun, me weliy apostal Paul u murung’agen Jehovah ni gaar: “Got e ke mus ni piyu Israel e ir e Got rorad? Gathi ku ir e Got rok e piin ni gathi yad piyu Israel? Mmudugil ni ir.”—Rom. 3:29; Joel 2:32.
4. Mang fan nrayog ni nga nog ndakuriy girdien yugu boch e nam u lan “fare Israel rok Got”?
4 Tomuren ni ke fal’eg Got fare m’ag nib beech ni fan ko fare ulung ko Kristiano ni kan dugliyrad, ma fare nam nu Israel e daki par nib fel’ e tha’ u thilrad Got. Ere, fare ulung ko Kristiano ni kan dugliyrad e ke mang “fare Israel rok Got.” (Gal. 6:16, NW) Me weliy Paul ni u lan e re nam nib beech ney ma “dariy ban’en nib thil u thilin e piin ni gathi yad piyu Israel nge piyu Israel, nge piin ni kan maad’ad ngorad nge piin ni dawor ni maad’ad ngorad, nge piin ni gathi yad yu Greece, nge pi nam ni dawori ga’ e llowan’ rorad, nge girdi’ ni yad e sib ara girdi’ ni gathi yad e sib, yi Kristus e ir e urngin, mi Kristus e ba’ u fithik’ urngin e girdi’ ni kar yodoro’gad.” (Kol. 3:11) Ere bochan e pi thin ney, me yan i aw ndakuriy girdien yugu boch e nam u lan e ulung ko Kristiano.
5, 6. (a) Mang deer e rayog ni nge sum u murung’agen e thin ni bay ko Isaiah 61:5, 6? (b) Mini’ e pi “prist rok Somol” nge “girdien yugu boch e nam” ni ke yoloy Isaiah? (c) Uw rogon, ma fapi “prist rok Somol” nge “girdien yugu boch e nam” e yad be maruwel u taabang?
5 Boch e girdi’ e yad be lemnag ko mang e be yip’ fan e Isaiah guruy ni 61, ni be weliy murung’agen e yiiy ni ke lebug u lan e ulung ko Kristiano. Thin ni bay ko verse 6 ko re guruy ney e be weliy murung’agen e “pi prist rok Somol.” Machane verse 5 e be weliy murung’agen “girdien yugu boch e nam” nra maruwelgad u taabang e “pi prist” nem. Ere mang e be yip’ fan e re n’ey?
6 Fapi “prist rok Somol” e yad e pi Kristiano ni kan dugliyrad ni yad ra “fos ko yay nsom’on nra ni faseg e girdi’ ko yam’” ma yad ra mang “pi prist rok Got nge Kristus, ma bay ra uned ngak ko gagiyeg u lan bbiyu’ e duw.” (Rev. 20:6) Maku bay boor e Kristiano nib yul’yul’ ni yad be athapeg ni ngar pared u roy u fayleng. Ma yad be maruwel u taabang e piin ni bay e athap rorad ni nga ranod nga tharmiy. Piin ni bay e athap rorad ni ngar pared u roy u fayleng e gathi yad bang ko “fare Israel rok Got,” machane u reb e kanawo’, maku yad bod e milekag. Yad ba felfelan’ ni ngar maruwelgad u taabang e piin ni “prist rok Somol,” ni gowa yad be ‘wolduguy e but’’ ma ‘yad be ayuweg e yungi woldug ni grapes.’ Yad be ayuweg e pi Kristiano ni kan dugliyrad ni ngar pininged e sorok ngak Got u daken e maruwel rorad ni yad be machibnag e thin riyul’ ngak e girdi’. Ere piin Kristiano ni kan dugliyrad nge “yugu boch e saf” e yad be fil e thin riyul’ ngak e girdi’, ma yad be ayuwegrad ni ngar folgad riy.—John 10:16.
“YAD E MILEKAG” NI BOD ABRAHAM
7. Uw rogon, ma pi Kristiano e ngiyal’ ney e yad bod Abraham nge pi tapigpig rok Got kakrom nib yul’yul’?
7 Fare article ni ke yan e be weliy ni tin riyul’ e Kristiano e yad bod girdien yugu boch e nam, ara milekag ko fayleng rok Satan nib kireb. Yad bod e pi tapigpig rok Got kakrom nib muun Abraham ngorad, ya thin rok Got e be yog ni “yad e milekag ni yad be par u roy u fayleng.” (Heb. 11:13) Demtrug ko mang e athap rodad ko gabul nge langlath, ma rayog ni nge fel’ thildad Got ni bod Abraham. Ke weliy James ni gaar, “‘Abraham e i par nib mich Got u wan’, ma bochan e michan’ rok ngak Got me matheeg Got ngak ni ke mang be’ nib mat’aw.’ Me pining Got Abraham ni gaar, ‘Abraham ni fager rog.’”—Jas. 2:23.
8. Mang e n’en ni kan micheg ngak Abraham, ma uw rogon e re n’em u wan’?
8 Ke micheg Got ni daken Abraham nge piin ni owchen e yira tow’athnag riy urngin e tabinaw u fayleng ara urngin e nam. (Mu beeg e Genesis 22:15-18.) Yugu aram rogon nde lebug e re n’em u nap’an Abraham, machane i par nib mich u wan’ nra lebug. U lan bokum e duw, ma Abraham nge chon e tabinaw rok e yad ma thilthilyeg e binaw ni yad ma par riy, ma i par ni fager rok Got.
9, 10. (a) Uw rogon ni ngad folwokgad rok Abraham? (b) Mang e rayog ni ngad pininged e girdi’ ni ngar uned ngay?
9 Yugu aram rogon nde nang Abraham ko uw n’umngin nap’an ni nge sonnag fini lebug e n’en ni ke micheg Got, machane i par nib t’uf Jehovah rok ma de tal ko pigpig ngak. Bochan nde pagtalin Abraham ni ir e milekag ma aram fan nde athamgil ni nge mang girdien reb e nam. (Heb. 11:14, 15) Ba t’uf ni ngad folgad ko n’en ni rin’ Abraham, ni i tiyan’ ko pigpig ku Got. Thingar dab da lemnaged nrib ga’ fan ni nge yoor e chugum rodad, ara nge gilbuguwdad, ara nge yag e maruwel nib fel’ ngodad! Mang fan ni ngad guyed rogon ni nge mudugil e par rodad ko re fayleng ney ni ke chugur ni nge mus? Mang fan ni ngad t’ufeged ban’en ni dabki n’uw nap’an ma yira kirebnag? Bod rogon Abraham ma gadad be sonnag ban’en nrib fel’. Ya ke m’agan’dad ngay ni ngad sonnaged e pi n’en ni ke micheg Got ngodad u fithik’ e gum’an’ nge mada’ ko ngiyal’ nra lebug.—Mu beeg e Roma 8:25.
10 Ka be ognag Jehovah fapi tow’ath ni ke micheg ni nge pi’ ngak girdien urngin e nam u daken owchen Abraham. Fapi “prist rok Somol” ni kan dugliyrad nge “girdien yugu boch e nam” ara yugu boch e saf e yad be yog ngak e girdi’ u ga’ngin yang e fayleng ni ka boor ko 600 e thin ni bay riy ni yibe piningrad ni ngar filed u murung’agen e pi tow’ath ney.
NGAN T’UFEG GIRDIEN URNGIN E NAM
11. Mang e ke yog Solomon ni nge rin’ girdien e pi nam?
11 Nap’an ni ke ognag Solomon fare tempel rok Jehovah ko duw ni 1026 u m’on ni yib Kristus me fek e meybil, ma thin ni yog e ra ayuwegdad ni ngad nanged ko uw rogon e girdi’ u urngin e nam u wan’ Jehovah. U lan e meybil rok e yog ni gaar: “Ra par be’ u ba nam nib orel ni yug be’ u bang me rung’ag murung’agem nga fanam sorom, nge pi maang’ang ni kam rin’ ni fan ngak e girdi’ rom, me yib ko re tempel ney ni nge tay fam me meybil ngom, ma ga motoyil ko meybil rok. Mu telim ngak u tharmiy ni tafenam, ma ga rin’ e tin ni ke wenignag ngom ni ngam rin’, ya nge urngin e girdi’ ko pi nam nu fayleng mi yad nangem mu ur pired ni ba’ madgum u wun’rad ni bod rogon e tirom e girdi’.”—1 Ki. 8:41-43.
12. Mang fan ni Pi Mich Rok Jehovah e yad bod girdien yugu boch e nam u lan e nam ni yad be par riy?
12 Be’ nu bang e be yip’ fan be’ ni ke yib u bang ma dabi n’uw nap’an me chuw, ara be’ ni be par u reb e nam ni gathi nam rok. Pi Mich Rok Jehovah e gowa yad be par u lan reb e nam ni gathi nam rorad. Yad be par u lan e pi nam u ga’ngin yang u fayleng, machane yad be par u tan gil’ilungun Got u tharmiy ngu tan pa’ Jesus ni ir e Pilung riy. Aram fan ni darur uned ko ngongolen e am u lan e re nam ni yad be par riy, nyugu aram rogon ni boch e girdi’ e yad be lemnag nthingar ra uned ngay.
13. (a) Mang e ra ayuwegdad ni nge dab ku uda lemnaged be’ ni ir “be’ nu bang”? (b) Mang e baadag Jehovah ni nge lemnag urngin e girdi’ u murung’agrad? Mu weliy.
13 Yu ngiyal’, ma rayog ni ngam nang e girdi’ nu bang u rogon ni yad ma non, nge yalen rorad, nge yaarad, nge munmad rorad. Machane, pi n’en ni ma rin’ e girdi’ u urngin e nam nib taareb rogon e kab ga’ fan ko pi n’en ni be m’ug ni yad ba thilthil riy. Ere faanra rayog rodad ni nge dab da lemnaged e pi n’en ni be m’ug riy ni ir be’ nu bang ma ra ayuwegdad ni ngad lemnaged ni gadad gubin e taareb rogodad. Faanra kemus ni taareb e am ara taareb e nam e bay u ga’ngin yang e fayleng ma susun dariy girdi’ riy ni be’ nu bang. Nap’an ni ke sunmiy Jehovah e girdi’ ma baadag ni nge taareban’rad ni bod reb e tabinaw ma taareb e am nra gagiyegnagrad ni aram e gagiyeg rok. Gur, rayog rok girdien urngin e pi nam e chiney ni dab ku u ra lemnaged ni bay e girdi’ riy ni girdien yugu boch e nam?
14, 15. Mang e ke yag ni nge rin’ e Pi Mich Rok Jehovah ni ba ulung?
14 Gad be par ko re fayleng ney ni boor e girdi’ riy nib siin, ma yad be lemnag ni u fithik’ e pi nam ma birorad e nam e th’abi fel’. Machane, ba fel’ ni ngad nanged ni bay boch e girdi’ nib t’uf girdien urngin e nam rorad. Ted Turner, ni ir be’ ni ke tababnag fare television network CNN, e kar maruwelgad u taabang e girdi’ ni boor ban’en ni yad manang nra bad ko pi nam nib thilthil u fayleng. Me yog ni gaar: “Kug guy ni pi cha’nem nra bad u yugu boch e nam e gathi yad e ‘girdi’ nu bang’ ya yad girdien e re fayleng ney ni bod gadad.” Ma ke fal’eg e motochiyel ndariy bagayad ni nge fanay fare bugithin ni ‘girdi’ nu bang’ ya “girdi’ ni yad ma par u fayleng u taabang.”
15 Kemus ni Pi Mich Rok Jehovah ni ba ulung u ga’ngin yang e fayleng e yad be fol u rogon ni ma lemnag Jehovah u murung’agen e girdi’ nra bad u urngin e nam. Bochan ni kar filed ko uw rogon e girdi’ u wan’ Jehovah, ere kar thilyeged rogon ni yad ma lemnag u murung’agen yugu boch e girdi’. Darur fanenikayed girdien yugu boch e nam, ma darur lemnaged ndabiyog ni nge pagan’uy ngorad. Pi Mich Rok Jehovah e yad ba felfelan’ ni ngar guyed e girdi’ nib thilthil rarogorad nge salap rorad. Kaam lemnag feni fel’ nrayog rorad ni ngar rin’ed ni aram rogon nge rogon ni kad thilyeged rogon ni gad ma lemnag murung’agen yugu boch e girdi’?
BA FAYLENG NDAKURIY “GIRDIEN YUGU BOCH E NAM RIY”
16, 17. Uw rogon e yafas rom u nap’an nra lebug fare thin ni bay ko Revelation 16:16 nge Daniel 2:44?
16 Dabki n’uw nap’an ma urngin e nam e yad ra cham ko gagiyeg rok Got u nap’an Armageddon. (Rev. 16:14, 16; 19:11-16) Boor ko 2,500 e duw kakrom, ma Daniel ni profet e ke yog ko mang e ra buch ko am ko girdi’. Ke yoloy ni gaar: “Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”—Dan. 2:44.
17 Mu lemnag ko mang e ra rin’ e re n’ey ngom? Ngiyal’ ney, ma rayog ni nga nog ni gadad girdien yugu boch e nam ya boor e nam u fayleng nib thilthil, ma bay e pi mathil riy. Machane, tomuren e Armageddon ma dakuriy e pi mathil nem. Riyul’ ni girdi’ e de taareb rogon yaarad, ma re n’ey e be micheg ni ke sunmiyrad Got nib thil reb nga reb ya nge dabi chalbay. Ma bochan ni bay e athap rodad ni aram rogon boch nga m’on, ma aram e dab da talgad i rin’ e tin th’abi fel’ rodad nge yag ni ngad pininged e sorok ngak e en ni ke Sunmiydad.
18. Mang e n’en ni buch ni be m’ug riy ni Pi Mich Rok Jehovah e da ku ra lemnaged ni yad e girdi’ u yugu boch e nam?
18 Gur, riyul’ nra buch ni girdi’ u ga’ngin yang e fayleng e dab ku ra lemnaged ni bay girdien yugu boch e nam u fithik’rad? Pi Mich Rok Jehovah e ngiyal’ ney e da kurur lemnaged ni bay girdien yugu boch e nam u fithik’rad. Dawori n’uw nap’an, ma boch e maruwel ko branch ofis nib achig e kan pi’ ko pi branch u yugu boch e nam. Kan rin’ ni aram rogon ni fan ni nge mom boch rogon ni ngan mu’nag e pi maruwel u lan e ofis, maku ra ayuweg nge yag ni ngan machibnag fare thin nib fel’ u murung’agen Gil’ilungun Got nib fel’ rogon. (Matt. 24:14) Re n’ey e gathi be yan u rogon mathilin e pi nam nfaanra dariy e motochiyel ko am ni be yog ni aram rogon. Jesus Kristus ni ir fare Pilung ko Gil’ilungun Got e be ayuweg e Pi Mich Rok Jehovah ni nge dabi ruwraba’nagrad e mathil ko pi nam. Dabki n’uw nap’an ma ra chuweg e mathil ko urngin e nam u tomuren ni ke “gel” ngak urngin e toogor rok!—Rev. 6:2.
19. Bochan e tin riyul’, ma mang e ke yag ni nge rin’ e girdi’ rok Jehovah?
19 Pi Mich Rok Jehovah e kar bad u boor e nam ma mab thilthil e thin rorad. Machane, ke taareban’nagrad e tin riyul’ ma dab kun ruwraba’nagrad. (Mu beeg e Zefaniah 3:9. *) Yad reb e tabinaw ara ulung u ga’ngin yang e fayleng. Re tabinaw ney e ke taareban’rad e chiney, ere re n’ey e be micheg ni u lan fa bin nib beech e fayleng ma dakuriy be’ nu bang riy. Ma aram e urngin e girdi’ u roy u fayleng e yad ra felfelan’ ni ngar lemnaged ni urngin e girdi’ nib thilthil raen dowrad e yad e pi walag.
[Footnote]
^ Zefaniah 3:9 (NW): “Bay gu pingeg e thin rok e girdi’ nga reb e thin nib machalbog ya nge yog nra pininged fithingan Jehovah ni bochan e ngar pigpiggad ngak u taabang.”
[Study Questions]
[Blurb ko page 31]
Gur, ga be sonnag nra yib e tayim ndakuriy e mathil ko pi nam, ma dabki yib ngan’uy fare bugithin ni “be’ nu bang”?
[Sasing ko page 28]
Gur, ga ra yiluy owchem nga ba ngiyal’ nra lebguy Got e n’en ni ke micheg ni bod Abraham?
[Sasing ko page 30]
Dariy girdien yugu boch e nam u fithik’rad u wan’ Jehovah
