Be’ nib sobut’an’ e de tolang e lem rok. Maku ir be’ nder ma sap ngak yugu boch e girdi’ ni gowa yad ba sobut’ ngak. Ma bochan ni gad gubin ma gad bogi ta denen, ma aram fan ni thingar da sumunguygad, ya bay e gin ni ngad musgad riy.

De tolangan’ Moses u nap’an ni kan pi’ mat’awun. Ba ga’ ni nap’an ni yira pi’ mat’awun reb e pumoon, ma rayog ni gad ra nang e bin riyul’ i rarogon ko riyul’ nib sobut’an’ fa danga’. Nap’an e bin ragag nge mereb e chibog ma reb e pumoon ni Robert G. Ingersoll fithingan e yoloy reb e babyor ni murung’agen e re n’ey ni gaar: “Yooren e girdi’ e rayog rorad ni ngar athamgilgad u fithik’ e magawon. Machane, faanra ga baadag ni ngam nang e bin riyul’ i rarogon be’, mag pi’ mat’awun.” Ireray reb e kanawo’ ni dag Moses riy ni ir be’ nib sobut’an’, mab fel’ ni ngad folwokgad rok. Ni uw rogon?

Ke pi’ Jehovah mat’awun Moses ni nge rin’ reb e maruwel nib ga’ fan ni aram e nge pow’iy e girdi’ nu Israel. Machane, re maruwel ney e de k’aring ni nge tolangan’. Mu lemnag e n’en ni rin’ Moses u fithik’ e sobut’an’ u nap’an ni kan fith reb e deer ngak nib mo’maw’, ni bay rogon nga mat’awuy ni ngan tafanay e binaw. (Numbers 27: 1-11) N’en ni nge dugliy e ban’en nib mo’maw’, ya rogon ni yira pithig e re magawon nem e ra mang def u rogon ni yira pithig boch e magawon nra yib boch nga m’on.

Ere, uw rogon ni nge pithig Moses e re magawon nem? Gur, ra lemnag nib mom e re n’ey ni bochan ni ir e be pow’iy e girdi’ nu Israel? Fa reb e nge lemnag nrayog rok ni bochan ni ke yoor e duw ni be pigpig ngak Jehovah ma fel’ e tha’ u thilrow?

Dabisiy nreb e moon nib tolangan’ mab ufanthin e ra lemnag ni rayog rok. Machane, gathi aram e n’en ni rin’ Moses. Ya yog e Bible ni gaar: “Me fek Moses e n’en ni ke yog fapi ppin i yan ngak Somol.” (Numbers 27:5, BT) Aygum lemnag! Yugu aram rogon ni ke pag 40 e duw ni ke pow’iy Moses piyu Israel, machane de pagan’ ko tin ni manang, ya be pagan’ ngak Jehovah. Ere, ba tamilang ni gad be guy ni Moses e ir be’ nib sobut’an’.

De lemnag Moses ni kemus ni ir e ke milfan mat’awun ngak. Kari felfelan’ u nap’an ni pag Jehovah yugu boch e pumoon nu Israel ni ngkur manged boch e profet ngar ayuweged ko fare maruwel nib milfan ngak. (Numbers 11:24-29) Ma nap’an ni yog e chitamangin e ppin rok ngak ni nge mel’eg boch e girdi’ ni ngar ayuweged ko re maruwel nem, me sobut’nag e lem rok me fol riy. (Exodus 18:13-24) Ma yugu aram rogon ni ke chugur ni nge yim’, machane kab gel gelngin me fith ngak Jehovah ni nge mel’eg be’ ni nge fek lon. Ma nap’an ni mel’eg Jehovah Joshua ni nge rin’ e re maruwel ney, me rin’ Moses urngin ban’en nrayog rok ni nge ayuweg, miki pi’ e athamgil nga laniyan’ fapi girdi’ nu Israel ni ngar folgad rok Joshua, ya nge yag ni pow’iyrad nga lan fare nam ni kan micheg. (Numbers 27:15-18; Deuteronomy 31:3-6; 34:7) Ere, ba tamilang ni lemnag Moses ni fare maruwel ni kan pi’ ngak ni nge pow’iy piyu Israel e reb e tow’ath. Machane, ba ga’ fan u wan’ ni nge ayuweg yugu boch e girdi’ ko bin ni nge lemnag mat’awun.

Thingar dab da paged mat’awdad nge gelngidad ara salap rodad ni nge k’aringdad ni ngad tolangan’gad. Ya dab da paged talin ni n’en ni th’abi ga’ fan e nge yag e sobut’an’ ngodad ko bin ni nge yoor e salap rodad, ma aram e ra fel’ e pigpig rodad ngak Jehovah. (1 Samuel 15:17) Ya faanra riyul’ ni gad ba sobut’an’, ma aram e nge puluw e ngongol rodad ko n’en ni yog e Bible ni gaar: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang.”​—Proverbs 3:5, 6.

Maku rayog ni ngad filed ban’en rok Moses ni aram e dabi ga’ fan u wan’dad e liw rodad ara mat’awdad.

Ere, bay ban’en nib fel’ ni gad ra fil rok Moses, fa? Dariy e maruwar riy ni ba’! Ya nap’an ni gad ra athamgil ni nge yag e sobut’an’ ngodad u fithik’ e yul’yul’, ma ra mom ni ngad chaggad ngak yugu boch e girdi’, ma nge fel’ e tha’ u thildad. Ma bin th’abi ga’ fan e ngad fel’gad u wan’ Jehovah ni ir e ma dag e re fel’ngin ney. (Psalm 18:35) Ya be yog e thin rok ni gaar: “I Got e ma togopluw ngak e piin nib tolangan’rad, ma ma ayuweg e piin nib sobut’an’rad.”(1 Peter 5:5) Ere, ireray fan ni ngad folwokgad u rogon ni dag Moses e sobut’an’.