1, 2. Mang fan ni bay e girdi’ ni yad baadag ni ngar nanged murung’agen e fig?

 BAY BA ngiyal’ ni kam kay e fig, fa? Nap’an piyu Israel kakrom, ma ireray ban’en ni yad baadag ni yad ma kay. (Nah. 3:12; Luke 13:6-9) Ngiyal’ ney e boor yang u fayleng ni yima yung e re fig ney riy. Fig e fel’ nga fithik’ i dowey, maku ma yog boch e girdi’ ni ku ma ayuweg e gum’ircha’.

² Bay ba ngiyal’ ni taareb rogonnag Jehovah rarogon e girdi’ ko fig. Ma gathi be weliy murung’agen rogon nrayog ni nge ayuweg e fig fithik’ i dowey. Ya i weliy murung’agen e n’en ni bay u gum’ircha’dad. Ma n’en ni weliy e rayog ni nge ayuwegdad nge chon e tabinaw rodad. Ya be tamilangnag e bin riyul’ i rarogodad. Ma nap’an ni gad ra weliy murung’agen e re n’ey, mab fel’ ni nge lemnag e piin Kristiano e n’en nrayog ni ngar filed riy.

3. Mang e be yip’ fan fapi fig ni kan weliy ko Jeremiah ko guruy ni 24?

³ Nap’an fare duw ni 617 u m’on ni nge yib Kristus, ma girdi’ nu Judah e yad be rin’ boch ban’en ni dabun Jehovah. Ma aram me thagthagnag nga laniyan’ Jeremiah e n’en nra buch ko fare nam nu Judah. Ke weliy murung’agen l’agruw dug e fig, ni aram e be yip’ fan l’agruw ulung i girdi’. Bin som’on e dug e bay e fig riy “nib fafalel’” ma bin kabay e dug e “tin kireb” e fig e bay riy. (Mu beeg e Jeremiah 24:1-3.) Tin nib kireb e fig e be yip’ fan Zedekiah ni Pilung nge piin ni taarebrogorad ngak, ni dabki n’uw nap’an ma ra cham Nebukadnezzar ni Pilung nge pi salthaw rok ngorad. Machane, ku bay e piin ni yad bod e tin nib falel’ e fig, ni bod rogon Ezekiel nge Daniel nge fa dalip i fager rok Daniel nge ku boch e girdi’ ni kun fekrad nga Babylon ni yad ba kalbus. Ma boch nga tomuren ma boch e girdi’ ni Jew e ku yad ra sul ni ngar toyed fare tempel nu Jerusalem.​—Jer. 24:8-10; 25:11, 12; 29:10.

4. Uw rogon ma n’en ni yog Got u murung’agen e tin nib fel’ e fig e rayog ni nge pi’ e athamgil ngodad?

 ⁴ I weliy Jehovah murung’agen e pi girdi’ nib fel’ nu Judah ni gaar: “Bay gu pi’ ngorad ba lem ni ngar chogowniged ni ngar nanged ni gag SOMOL. Ma bay ra manged girdi’eg.” (Jer. 24:7, BT) Re n’ey e ra pi’ e athamgil ngodad ya baadag Got ni nge yag e ‘lem ni ngad chogowniged ni ngad nanged’. Ma re n’ey e be yip’ fan ni gad baadag ni ngad nanged murung’agen nib fel’ rogon, ma ngad manged girdien. Ere, uw rogon nrayog ni ngad manged e re miti girdi’ nem? Rayog ni ngad rin’ed e re n’ey ni faan ga ra fil e Bible, ma gad fol ko pi n’en ni kad filed. Ma tomuren ma gad kalgadngan’dad, ma dab kud rin’ed e tin nib kireb ban’en. Ma ra munmun ma gad ognag e yafas rodad ngak Got, min taufenagdad u daken fithingan e Chitamangiy nge fak nge gelngin Got nib thothup. (Matt. 28:19, 20; Acts 3:19) Ere, kam rin’ e pi n’ey, fa? Ara, ga be un ngak e Pi Mich Rok Jehovah ko pi muulung rorad ni gubin ngiyal’, ma ga be athamgil ni ngam rin’ e pi n’ey, fa?

5. Chon mini’ e ba ga’ ni be weliy fare babyor rok Jeremiah murung’agrad?

⁵ Yugu aram rogon ni kad rin’ed gubin e pi n’ey, ma thingar da ululgad ngad puluwniged e lem rodad nge ngongol rodad ko pi n’en nib m’agan’ Got ngay. Mang fan? Gad ra nang e fulweg ko re n’ey u nap’an ni gad ra weliy e n’en ni yoloy Jeremiah u murung’agen rarogon gum’irchaey. Machane, fare babyor rok Jeremiah e ba ga’ ni be weliy murung’agen fare nam nu Judah u nap’an ni be gagiyeg lal e pilung riy. (Jer.1:15, 16) Ere, pi n’ey ni yog Jeremiah e fan ngak e piin ni kar ognaged yad ngak Jehovah. Maku aram rogon e girdi’ u nap’an Moses nib m’agan’rad ngay ni ngar manged girdien Jehovah. (Ex. 19:3-8) Aram rogon u nap’an Jeremiah ni gaar e girdi’: “Arrogon, nggu sulod ngak SOMOL nib bochan e ir e Got romad.” (Jer. 3:22, BT) Machane, uw rarogon gum’ircha’rad?

6. Mang ni nge ga’ fan u wan’dad e pi n’en ni yog Got u murung’agen gum’irchaey?

⁶ Pi togta e yad ma fanay ba mit e machine ya nge yag ni ngar yaliyed e pi n’en ni bay u fithik’ i dowdad, ma ngar nanged ko uw rarogon ni be maruwel gum’irchaey. Ma Jehovah e rayog rok ni nge nang e pi n’en ni baadag gum’ircha’dad ara rarogon gum’ircha’dad. Ere, i yog murung’agen e re n’ey ni gaar: “Mini’ e rayog ni nge nang fan laniyan’ e girdi’? Dakuriy yugu reb e ban’en ni aram feni sasaliyeb; ke pag rogon feni m’ar ni dabki gol. I gag Somol e gu ma wurgiy lanin’uy gu ma skengnag gum’irchaen e girdi’. Rogon e par rok bagayad e aram rogon labgen ni gu ra pi’ ngak.” (Jer. 17:9, 10, BT) Ere, rayog rok Jehovah ni nge nang e pi n’en ni baadag gum’ircha’dad, nge pi n’en ni gad ma lemnag, nge rarogodad, nge pi n’en ni gad ma nameg u lan e yafas rodad. Ma ma skengnag Got rarogon gum’ircha’dad. Maku rayog rom ni ngam fal’eg i yaliy e pi n’en ni bay u gum’irchaem.

7. Uw rogon ni i weliy Jeremiah rarogon gum’irchaen e girdi’ nu Jew ko ngiyal’ ni immoy riy?

⁷ Thingar da yaliyed e bin riyul’ i rarogodad. Ere, uw rarogon gum’irchaen piyu Jew u wan Jehovah u nap’an ni immoy Jeremiah? Aray rogon ni weliy Jeremiah murung’agrad ni kar folgad ko fare motochiyel rok Moses u rogon ni ngan maad’adnagey, machane dar “ayuweged fare m’ag” u thilrad Jehovah. (Jer. 9:25, 26) Arrogon, re n’ey e be yip’ fan ni da ur yul’yul’gad ngak Jehovah.

8, 9. Uw rogon nib kireb gum’irchaen piyu Jew, ma mang e ba t’uf ni ngar rin’ed?

⁸ Bay ban’en ni yog Got ngak piyu Jew ni ngar rin’ed. I yog ngorad ni ngar chuweged e pi kireb ni bay u lanin’rad. (Jer. 18:11) Mang fan? Ya faanra dab ra rin’ed ni aram rogon, ma ‘damumuw rok e ra yik’ ni bod e nifiy ni bochan e ngongol rorad nib kireb.’ Ere, yad be darifannag e  thin rok Jehovah ni bochan nib kireb e pi n’en ni bay u gum’ircha’rad. (Mu beeg e Mark 7:20-23.) Yad e girdi’ nib ta togopuluw, ma dubrad ni ngar thilyeged e ngongol rorad. Ere, rarogon gum’ircha’rad nib muun ngay e pi n’en ni yad ma nameg, nge rarogon e lem rorad e ba kireb u wan’ Jehovah. (Mu beeg e Jeremiah 5:23, 24; 7:24-26, BT.) Ere, i yog Got ngorad nib t’uf ni ngar thilyeged e ngongol rorad ya gaar: “Mu ted u tagil’ e m’ag u thildad.”​—Jer. 4:4; 18:11, 12, BT.

⁹ Ere, ke m’ug u rarogon e ngongol ni tay piyu Jew nib t’uf ni ngan fal’eg i yaliy e pi n’en ni bay u gum’ircha’rad. Maku aram rogon e magawon rok piyu Israel u nap’an ni immoy Moses. (Deut.10:16; 30:6) Ere, ba t’uf ni ngar chuweged e pi n’en ni yad ma lemnag nib kireb, nge pi n’en ni yad ma ar’arnag, nge pi n’en nib kireb ni yad be nameg, ya nge yag ni ngar daged nib ga’ fan e pi motochiyel rok Jehovah u wan’rad.​—Acts 7:51.

10. Uw rogon ni ngad folwokgad ko n’en ni rin’ David?

¹⁰ Thingar da pininged e magar ngak Got ni ma ayuwegdad ni ngad nanged e bin riyul’ i rarogodad. Bochan ni gad e pi tapigpig rok Jehovah mab t’uf ni ngad lemniged rarogon gum’ircha’dad, fa? Boor e girdi’ u lan e ulung ni be pigpig ngak Jehovah u fithik’ e yul’yul’ ya yad be rin’ e tin nib mat’aw. Ma gathi yad bod e “tin kireb” e fig. Mu lemnag David ni ir be’ nib mat’aw e ngongol rok ni gaar ngak Jehovah: “Got, mu guy lanin’ug ngam nang; mu skengnigeg ngam nang e lem rog. Ma gguy ko bay e sabanban riy fa dariy.”​—Ps. 17:3; 139:23, 24.

11, 12. (a) Mang fan ni thingar da fal’eged i yaliy e pi n’en ni bay u gum’ircha’dad? (b) Mang e dab da lemniged nra rin’ Jehovah ni fan ngodad?

¹¹ Baadag Jehovah nra bagadad me gay rogon ni nge nang nib fel’ rogon, me fel’ u wan’, me athamgil ni nge par nib yul’yul’ ngak. Be yog Jeremiah ni Jehovah e ma fal’eg i yaliy e piin nib mat’aw ma manang e “tin ni bay u lanin’rad.” (Jer. 20:12) Ma bochan ni ma fal’eg i yaliy rarogon gum’irchaen e piin nib mat’aw, ere nge bagadad me fal’eg i yaliy e pi n’en ni bay u gum’irchaen. (Mu beeg e Psalm 11:5, BT.) Nap’an ni gad ra rin’ e re n’ey, ma gad ra pirieg nde puluw e pi n’en ni gad ma lemnag, nge pi n’en ni gad ma nameg, ma aram e pi n’en ni be mo’maw’nag ngodad ni ngad folgad ko fonow rok Got. Ma yu ngiyal’ e ba mo’maw’ rodad ni ngad folgad rok Jehovah. Ere, ba t’uf ni ngad fal’eged i yaliy rarogon gum’ircha’dad, ya nge yag ni ngad chuweged e tin nib kireb ni bay riy. Ere, mang boch ban’en nib kireb ni bay u lanin’dad? Uw rogon me yag ni ngad thilyeged e pi n’ey?​—Jer. 4:4.

¹² Dabi towasariydad Jehovah ni ngad thilyeged rarogon e lem rodad. Ke weliy murung’agen e tin “nib fafalel’” e fig nra pi’ ngorad e “lem ni ngar chogowniged ni ngar nanged” ni ir Got. Ma dabi towasariyrad ni ngar thilyeged rarogon gum’ircha’rad. Ya yad e ngar dugliyed u wan’rad ni ngar adaged ni ngar nanged Got, maku arrogon gadad.

13, 14. Uw rogon nrayog ni nge magawonnag be’ e pi n’en ni bay u gum’irchaen ?

¹³ I yog Jesus ni n’en ni bay u gum’irchaen be’ e rayog ni nge k’aring ni nge lemnag boch ban’en nib “kireb,” ni aram e ngan thang e fan  ku be’, ara ngan par ku be’ ni gathi mabgol rok, ara ku boch e ngongol nde yalen. (Matt. 15:19) Ni bod ni faanra ma lemnag be’ boch ban’en nde puluw, ma rayog ni ngar parew be’ ni gathi mabgol rok, ara nge un ko ngongol ndarngal. Ma faanra dabi wenig ngak Got ni nge n’ag fan e kireb rok, ma aram e dabki fel’ e tha’ u thilrow. Machane, yugu aram rogon ni dabi rin’ reb e oloboch nib ubchiya’, maku rayog ni nge pag boch e lem nde puluw ni nge ilal u laniyan’. (Mu beeg e Matthew 5:27, 28.) Ere, rib ga’ fan ni dab da paged e mit ney e lem ni nge par u lanin’dad. Ga ma lemnag be’ u yugu reb e kanawo’ nib mith nde puluw u wan’ Jehovah, fa? Ere, ba t’uf ni ngam thilyeg e miti ney e lem ni bay u gum’irchaem.

¹⁴ Rayog ni nge pag reb e Kristiano e damumuw rok ni nge k’aring ni nge fanenikay reb i walagen u laniyan’. (Lev. 19:17) Ere, ba t’uf rok ni nge chuweg e miti lem nem.​—Matt. 5:21, 22.

15, 16. (a) Uw rogon me yag rok reb e Kristiano ni nge ‘ayuweg fare m’ag’? (b) Mang fan ni ga be lemnag ni baadag Jehovah ni ngad “ayuweged fare m’ag”?

¹⁵ Boor e piin Kristiano ni darur paged e miti ney e lem ni nge sum u lan gum’ircha’rad. Machane, ke weliy Jesus murung’agen e lem nib “kireb.” Ni bod nrayog ni ngad lemniged ni yul’yul’ rodad ngak girdien e tabinaw rodad e kub ga’ fan nga yugu boch ban’en. Dariy e maruwar riy ni piin Kristiano e yad baadag ni ngar t’ufeged e girdi’ rorad ko bin ni ngar boded yugu boch e girdi’ ko re fayleng ney ni ‘darur runguyed e girdi’.’ (2 Tim. 3:1, 3) Machane, rayog ni nge pag rogon e yul’yul’ ni gad ma dag ngorad. Boor e girdi’ nib mich u wan’rad ni “ba ga’ fan girdien e tabinaw rorad ko yugu boch e girdi’.” Ere, faanra kan rin’ ban’en nib kireb ngak reb i chon e tabinaw rodad, ma gad ma damumuw. Bod rogon e pi pumoon ni walagen Dinah ni ke gel e damumuw rorad ni bochan e n’en ni kan rin’ ngak. Me tomur riy, mar li’ed bokum e girdi’ ngar m’ad. (Gen. 34:13, 25-30) Ma bochan ni damumuw Absalom me re n’ey e k’aring ni nge li’ Amnon nge yim’. (2 Sam. 13:1-30) Arrogon, lem nib “kireb” e rayog ni nge k’aring e riya’ ngodad.

¹⁶ Tin riyul’ e Kristiano e darur uned i thang e pogofan ko girdi’. Machane, bay boch i yad nrayog ni nge damumuw nib gel u nap’an ni yira gafgownag girdien e tabinaw rorad. Ara sana yad be lemnag ni ke buch ban’en ni aram rogon. Ere, uw rogon ni yad ra ngongol ngak e en ni ke bucheg ban’en ni aram rogon? Sana yad ra siyeg ni ngar chaggad ngak ara ngar pininged nga tabinaw rorad. (Heb. 13:1, 2) Machane, reb e Kristiano ni ma t’ufeg walagen e dabi rin’ ban’en ni aram rogon. Ya manang Jehovah e pi n’en ni bay u gum’ircha’dad. Ere, faanra ra  guy Jehovah e pi n’en nib kireb u gum’ircha’dad, ma ra gaar darur “ayuweged fare m’ag.” (Jer. 9:25, 26) Aram fan ni yog Jehovah ni gaar: “Mu ted u tagil’ e m’ag u thildad.”​—Jer. 4:4, BT.

17. Faanra riyul’ ni bay madgun Jehovah u wan’dad, ma uw rogon nra ayuwegdad ni ngad thilyeged rarogon gum’ircha’dad?

¹⁷ Nap’an ni ga ra fal’eg i lemnag rarogon gum’irchaem, ma rayog ni ga ra pirieg nri gathi ga ma athamgil ni ngam fol ko pi fonow rok Got. Ya sana bochan ndawor mu “ayuweg fare m’ag.” Sana ga be rus ko n’en nra yog e girdi’ u murung’agem. Fa reb e ga baadag ni nge gilbuguwam ara nge yoor e salpiy rom. Ara reb e gab gelan’ ma ga ma gay rogon ni ngan rin’ e tin ni ga baadag. Gathi goo gur e ga ma lemnag ban’en ni aram rogon. (Jer. 7:24; 11:8) Ya i weliy Jeremiah murung’agen boch piyu Jew ndar yul’yul’gad ma yad “bogi gelan’ ni tatogopuluw.” Dakir ‘liyorgad ngak’ Jehovah ni yugu aram rogon ni yad ba t’uf rok ma ma pi’ e tin nib t’uf rorad. (Jer. 5:23, 24) Ere, faanra riyul’ ni gad ma liyor ngak Jehovah ma gad ma tayfan, ma gad ra gay rogon ni ngad chuweged e pi n’en nib kireb ni bay u gum’ircha’dad. Ma re n’ey e ra ayuwegdad ni ngad thilyeged rarogon gum’ircha’dad ma gad fol ko pi n’en ni ke yog ngodad.

18. Mang e micheg Jehovah ngak e piin ni kar manged girdien fare m’ag rok nib beech?

¹⁸ Jehovah e ra pi’ e ‘lem ni ngan chogownag ni ngan nang’, ya be guy gelngin e athamgil ni gad be tay. Ya be micheg nra rin’ e re n’ey ni fan ngak e piin ni kan dugliyrad ni kar manged girdien fare m’ag rok nib beech. Be yog ni gaar: “Bay gu tay e motochiyel rog nga lanin’rad mu gu yoloy nga lan ngorongorrad. Bay gu mang Got rorad, ma bay ra manged girdi’ rog. Ma dakuriy bagayad ni nge machibnag bagayad, ma dakuriy bagayad ni nge weliy e thin ngak bagayad ni nge gaar, Mu nang Somol. Yad gubin ni bay ra nanged gag ni mus rok e en nth’abi sobut’ nge mada’ ngak e en nth’abi tolang rorad. Bay gu n’ag fan e denen rorad u wan’ug ma dab ku gu lemnag e kireb ni kar ngongliyed.”​—Jer. 31:31-34. * (Mu guy e footnote.)

19. Mang e rayog ni ngad athapeged boch nga m’on?

¹⁹ Gadad gubin ma gad be sap nga m’on ko pi n’en ni micheg Got ngodad. Ere, nge bagadad me gay rogon ni nge nang Jehovah nib fel’ rogon, ma ngad manged girdien. Ma rayog ni nge ulul e tamilangan’ rodad u murung’agen Jehovah ni manemus, ni faan gad ra wenig ni nge n’ag fan e kireb rodad u daken fare biyul ni pi’ Jesus Kristus. Ma bochan ni gad baadag ni nge n’ag Got fan e denen rodad, ma aram fan ni kub t’uf ni ngan n’aged fan e denen rok e girdi’ ni yugu aram rogon nib mo’maw’. Ma kub t’uf ni ngad gayed rogon ni dab da fanenikayed e girdi’. Re n’ey e ra dag nriyul’ ni gad baadag ni ngad pigpiggad ngak Jehovah, ma gad baadag ni ngad nanged murung’agen nib fel’ rogon. Ma aram e gad bod e piin ni yog Jehovah murung’agrad ni gaar: “Gimed ra gayeg ma gimed ra piriegeg ni bochan e gimed be gayeg u polo’ i gum’ircha’med. Gimed ra piriegeg.”​—Jer. 29:13, 14, BT.