1, 2. Mang reb e tow’ath nib ga’ fan ni bay ko Pi Mich Rok Jehovah? Uw rogon u wan’um e re n’ey?

 FAANRA kan pi’ reb e tow’ath ngak be’ ni bochan e ke yag ni nge mu’nag reb e maruwel nib ga’ fan, ma ra nang ni yibe tayfan. Bod ni, bay boch e girdi’ ni kan pi’ e tow’ath ngorad ni bochan e kar ayuweged l’agruw e nam ni nge aw e gapas u thilrow. Machane, kab gel e fel’ riy ni faanra ke l’ogem Got ni ngam ayuweg e girdi’ ni nge fel’ e tha’ u thilrad!

² Kemus ni yigoo gadad e Pi Mich Rok Jehovah e kan pi’ e re tow’ath ney ngodad nrib ga’ fan. Got nge Kristus e yow be pow’iy fare maruwel ni gad be rin’ ni gad be ayuweg e girdi’ ni ngar “manged pi tafager” rok Got. (2 Kor. 5:20) Ere, ma fanaydad Jehovah ni ngad pow’iyed e girdi’ ngak. Ma angin riy e, ke yag rok bokum milyon e girdi’ u lan boor ko 235 e nam ni ngar manged fager rok Got me yag e athap ko yafas ni manemus ngorad. (Titus 2:11) Gad ma dag ni gad ba pasig ko fare maruwel ni machib ma gad ma yog ngak e “en ni ba adag” ni nge yib nge fil e tin riyul’. (Rev. 22:17) Ba “pasigan’dad ni ngad rin’ed e tin nib fel’.” Re n’ey e be yip’ fan nib ga’ fan u wan’dad e n’en ni gad ma rin’ ni fan ngak Jehovah ma gad ma athamgil ni ngad rin’ed e tin nib m’agan’ ngay. (Titus 2:14) Ere, chiney e ngad filed rogon nrayog ni ngad ayuweged boch e girdi’ ngar nanged murung’agen Jehovah ni faanra gad ba pasig. Fare maruwel ni machib e aram reb e kanawo’ ni gad ma rin’ e re n’ey riy.

3. Mang fan nrayog ni nge pagan’dad ni bochan e “ba pasig Jehovah”?

³ Be yog e Isaiah 9:7, (NW) nra mang Fak Got e Pilung me rin’ boch ban’en nib fel’ ni fan ngodad. Ra riyul’ urngin e pi n’ey ni bochan e “ba pasig Jehovah.” Faanra ba pasig be’ ma ri baadag ni nge rin’ ban’en. Ere, thin ko re verse ney e be micheg ngodad nri baadag Jehovah ni nge ayuweg e girdi’ ngar thapgad ngak. Susun ni ngad felfelan’gad ma gad pasig i rin’ fare maruwel ni machib ni bochan e Jehovah e ir reb e Got nib pasig. Ere, bochan ni gimew be maruwel Got u taabang, ma ga  be machibnag fare thin nib fel’ u rogon nrayog rom, fa?​—1 Kor. 3:9.

4. Uw rogon ni dag Jesus e bin th’abi fel’ e kanawo’ u rogon ni ngan pasig ko machib?

⁴ I dag Jesus e bin th’abi fel’ e kanawo’ u rogon ni ngan pasig ko machib. Yugu aram rogon ni boor e girdi’ ni ur togopuluwgad ngak ma yad baadag ni ngar lied nge yim’, machane i par nib pasig nge mada’ ko bin tomur e rran ko yafas rok u fayleng. (John 18:36, 37) Bochan ni manang ni ke chugur ni nge yim’, ma aram me maruwel nib gel ni nge ayuweg e girdi’ ngar nanged murung’agen Jehovah.

5. Mang fan ni taareb rogon Jesus ngak faen ni ma maruwel u milay’ ni faani weliy murung’agen ko fare fanathin?

⁵ Nap’an e duw ni 32, me yog Jesus reb e fanathin ni murung’agen be’ nib moon ni immoy ba ke gek’iy ni fig ni ke tugul u milay’ rok nder yib wom’engin. Tomuren dalip e duw me yog fare moon ni ir e fen fagi milay’ ngak e en ni ma maruwel u milay’ rok ni nge th’ab fare ke gek’iy. Machane, me yog facha’ ngak ni dab kaan th’ab fare ke gek’iy ya nge tay e n’en ni ma yong’olnag e but’ ngay ya nge yib wom’engin. (Mu beeg e Luke 13:6-9.) Nap’an ni yog Jesus e re fanathin ney ma ri in e girdi’ ni kar manged pi gachalpen. Machane, re fanathin rok ney e be dag riy ni baadag ni nge maruwel nib gel ya manang ni dabki n’uw nap’an me yim’. Ere, i machib u fithik’ e pasig u Judea nge Perea u lan nel’ e pul. In e rran u m’on ni nge yim’ me yor ni bochan e yooren e girdi’ e dubrad ni ngar motoyilgad ngak.​—Matt. 13:15; Luke 19:41.

6. Mang nib ga’ fan ni ngad guyed rogon ni nge yoor ban’en nda rin’ed ni fan ko machib?

⁶ Bochan ni ke chugur e tomur, ma thingar da guyed rogon ni nge yoor ban’en nda rin’ed ni fan ko machib. (Mu beeg e Daniel 2:41-45.) Ri gad ba tow’ath ni gadad e Pi Mich Rok Jehovah! Yigoo gadad e rayog ni ngad weliyed ko girdi’ u ga’ngin yang e fayleng rogon ni yira pithig e pi magawon rodad. Ke yog reb e shimbung nib mo’maw’ ni ngan nang ko mang fan ni ma buch boch ban’en nib kireb ko girdi’ nib fel’. Machane, Bible e be tamilangnag fan e re n’ey, ma bochan ni gadad e Kristiano mab milfan ngodad ni ngad weliyed ko girdi’. Susun e ngad rin’ed e maruwel rok Jehovah ni gad ba ‘pasig ngay u lanin’dad.’ (Rom. 12:11) Ere, faan gad ra machib ni gad ba pasig, ma rayog ni ngad ayuweged e girdi’ ngar nanged murung’agen Jehovah me t’uf rorad, ma re n’ey e ra tow’athnagdad Got riy.

7, 8. Uw rogon ni gad ma pining e sorok ngak Jehovah ko pi n’en ni gad ma pag fadad riy?

⁷ Nap’an ni i machib Paul ma boor e magawon ni i yan u fithik’, ni bod ni immoy yu ngiyal’ nda i “mol” ma der “abich.” (2 Kor. 6:5) Pi walagdad e ku bay boch ban’en ni yad ma pag farad riy ni fan ko machib. Piin pioneer ara piin ni yad ma machib u polo’ e tayim rorad e yad ma tay ni machib e aram e re maruwel nth’abi ga’ fan. Machane, boor i yad e ku thingar ra uned ko maruwel ni ma yag e salpiy riy. Kum lemnag e pi missionary ni yad ma maruwel nib gel ni ngar ayuweged e girdi’ u boch e nam. (Fil. 2:17) Mus ko piin piilal ni bay yu ngiyal’ ni yad ma pag e abich ma der fel’ e mol rorad ni bochan e ngar ayuweged boch e girdi’ u lan e ulung. Pi walag ni kar pilibthirgad nge piin ni yad ba m’ar u lan e ulung e yad ma athamgil ni ngar uned ko muulung nge machib. Ri ma yib e athamgil nga lanin’dad ni gad ma guy e pi tapigpig rok Got ney ni ke m’agan’rad ngay ni ngar paged farad ni fan ko fare maruwel ni machib. Gathi goo gadad e gad ma guy e pi n’ey, ya ki mada’ ko girdi’ u wuru’ e ulung ma kar nanged feni ga’ fan e re maruwel ney u wan’dad.

⁸ Immoy be’ ni gathi ir reb e Pi Mich Rok Jehovah ni yoloy bangi babyor ngak e piin ni yad ma ngongliy e shimbung u United Kingdom ni gaar: “Dakir pagan’ e girdi’ ko pi yurba’ i teliw. Dagnang ko mang e be rin’ e pi tayugang’ ko pi yurba’ i teliw. Ya dariy bagayad ni ma yan ko machib ni bod ni i rin’ Kristus. Yigoo Pi Mich Rok Jehovah e yad ma lemnag e girdi’, ere aram fan ni yad ma yan ni yad be machibnag e tin riyul’ ngorad.” Yooren e girdi’ u fayleng e dubrad ni ngar paged farad ni fan ngak boch e girdi’. Machane, gadad e bochan nib m’agan’dad ngay ni ngad paged fadad ni fan ko  fare maruwel ni machib, ma aram e gad be pining e sorok ngak Jehovah Got.​—Rom. 12:1.

9. Mang e ra ayuwegdad ni ngad pasiggad i rin’ e tin nib fel’ ni fan ko fare maruwel ni machib?

⁹ Mang e susun ni ngad rin’ed ni faanra gathi ri ka gad ba pasig ko machib ni bod rogon kafram? Susun e ngad lemnaged angin e maruwel ni ma pi’ Jehovah ngodad ni ngad rin’ed. (Mu beeg e Roma 10:13-15.) Faanra nge yag e yafas ko girdi’, ma thingari mich Jehovah u wan’rad mi yad pining fithingan. Machane, dabiyog ni ngar rin’ed e re n’ey ni faanra dab da machibnaged yad. Re n’ey e ra k’aringdad ni ngad adaged ni ngad pasiggad i rin’ e tin nib fel’ ma gad un i machibnag fare thin nib fel’ ni murung’agen Gil’ilungun Got u rogon nrayog rodad.

10. Uw rogon ma ngongol rodad nib fel’ e ra k’aring e girdi’ ngar adaged ni ngar nanged murung’agen Got?

¹⁰ Gathi kemus ni pasig ni gad ma tay ni fan ko machib e ma k’aring e girdi’ ngar adaged ni ngar nanged murung’agen Got. Ngongol nib fel’ ni gad ma rin’ ni gadad e Kristiano e ku aram reb e kanawo’ nrayog ni ngad ayuweged e girdi’ riy. I weliy Paul feni ga’ fan e ngongol rodad ni gaar: “Dabumad ni nge pirieg be’ ban’en nib kireb ko maruwel romad, ere gamad be guy rogon ndab gu ninged e kanawo’ rok be’.” (2 Kor. 6:3) Thin nib fel’ ni gad ma yog nge ngongol rodad nib fel’ e ra k’aring boch e girdi’ ngar adaged ni ngar liyorgad ngak Jehovah. (Titus 2:10) Bin riyul’ riy e, ba ga’ ni gad ma rung’ag murung’agen boch e girdi’ ni kar adaged e tin riyul’ ni bochan e kar guyed rogon ni gad ma folwok rok Kristus u rogon e ngongol ni gad ma dag.

11. Mang fan ni susun e ngad fal’eged i lemnag rogon e ngongol rodad nge n’en ni ma rin’ ngak boch e girdi’?

¹¹ Faanra ud rin’ed e ngongol nib fel’ ma rayog ni nge k’aring e girdi’ ngar adaged e tin riyul’, ma faanra ud rin’ed e ngongol nib kireb ma rayog ni nge k’aring e girdi’ ni nge dab ra adaged ni ngar nanged murung’agen Jehovah. Ere, demtrug ko gad bay u tabon e maruwel, ara tabinaw, ara skul, ma susun e ngaud guyed rogon ndab ud rin’ed boch ban’en nra k’aring be’ ni nge dabuy ni  nge nang murung’agen Jehovah. Faanra ud “denengad” ni lem rodad, ma rayog ni nge kireb e tha’ u thildad Jehovah. (Heb. 10:26, 27) Re n’ey e susun nra k’aringdad ni ngad fal’eged i lemnag rogon e ngongol rodad nge n’en ni ma rin’ ngak boch e girdi’. Bochan ni be gel e kireb ko ngongol ko girdi’ nu fayleng, ma susun e ra mom ni nge guy e girdi’ e n’en nib thil u ‘thilin e en ni be pigpig ngak Got nge en nder pigpig ngak.’ (Mal. 3:18) Arrogon, ngongol nib fel’ ni gad ma dag e aram reb e kanawo’ nib ga’ fan nrayog ni ngad ayuweged e girdi’ riy ngar adaged ni ngar manged fager rok Got.

12-14. Faanra ud athamgilgad u fithik’ e togopuluw, ma uw rogon nra ayuweg boch e girdi’ ngar adaged e tin riyul’? Mu weliy ban’en ni ke buch.

¹² U lan e gin l’agruw e babyor ni yoloy Paul nge yan ko ulung nu Korinth, me weliy ngorad ni un gafgownag, ma un toy ko dimow, ma u nin’ nga kalbus ni bochan e dabun e girdi’ e machib ni be tay. (Mu beeg e 2 Korinth 6:4, 5.) Faanra ud athamgilgad u fithik’ e togopuluw ni be yib ngodad, ma rayog ni nge k’aring boch e girdi’ ngar adaged e tin riyul’. In e duw ni ke yan, ma immoy boch e girdi’ u Angola nra guyed rogon ni nge chuw e Pi Mich Rok Jehovah ko binaw rorad. Kar toyed l’agruw e walag ko dimow nge 30 e girdi’ ni yad baadag e machib. Rib gel e cham nni tay ngorad ya i math’ yu yang u dowrad nga i yib e racha’ riy. Ki mada’ ko ppin nge bitir ni kun toyrad. Kar towasariyed e girdi’ ko re binaw nem ni ngar yaliyed e n’en ni yad be rin’ ni bochan e yad baadag ni nge rus e pi girdi’ nem nge dab kur motoyilgad ko Pi Mich Rok Jehovah. Machane, tomur riy ma yooren e pi girdi’ nem e rogned ko Pi Mich Rok Jehovah ko fare binaw ni ngan fil e Bible ngorad! Tomuren e re n’ey me yag ni nge ulul fare maruwel ni machib. Ma angin ni ke yib riy, e boor e girdi’ ni kar nanged e tin riyul’ maku boor e tow’ath ni ke yag ko pi walag ni bochan.

¹³ N’en ni kad weliyed e be dag ni faanra i guy e girdi’ ndarud rusgad u nap’an ni ke yib e skeng ngodad, ma rayog ni ngar adaged ni ngar motoyilgad ko tin riyul’. Bochan ni i par Peter nge pi apostal nda ur rusgad, ma aram e n’en ni pi’ e athamgil nga laniyan’ boch e girdi’ ni ngar manged fager rok Got. (Acts 5:17-29) Rayog ni nge adag e piin ni gad nga skul, nge maruwel, nge chon e tabinaw rodad e tin riyul’ ni bochan e kar guyed ndarud rusgad u nap’an ni kad mada’naged e togopuluw.

¹⁴ Ku bay boch i walagdad ni yibe gafgownagrad ni gubin ngiyal’. Chiney e bay 40 i walagdad u Armenia ni ka nin’rad nga kalbus ni bochan e yad be par u mathilin ngongolen e am. Maku dabisiy ni bay boch i yad ni bay ku nin’rad nga kalbus boch nga m’on ni bochan e re n’ey. U Eritrea e ku bay 55 e Pi Mich riy ni ka nin’rad nga kalbus, ni boch i yad e ke pag 60 e duw rorad. Ku bay 700 e Pi Mich ni ka nin’rad nga kalbus u South Korea ni bochan e yad be par u mathilin ngongolen e am. Ke gaman 60 e duw ni yibe yin’ e pi walagdad u rom nga kalbus. Susun e ngaud yibilayed e pi walag ney ya nge yag nra pared ni yad ba yul’yul’ ngak Got ni yugu aram rogon ni yibe gafgownagrad, ya yul’yul’ ni yad be tay e be pining e sorok ngak Got ma ra ayuweg boch e girdi’ ni ngar adaged e tin riyul’.​—Ps. 76:8-10.

15. Mu weliy ban’en ni ke buch ni be dag ni faanra ud yul’yul’gad ma rayog ni nge k’aring e girdi’ ngar adaged e tin riyul’.

¹⁵ Faanra gad ba yul’yul’, maku rayog ni nge k’aring e girdi’ ngar adaged ni ngar filed e tin riyul’. (Mu beeg e 2 Korinth 6:4, 7.) Immoy reb e walag nib pin ni yon’ e salpiy nga lan e gin ni yima yon’ puluwon e bus ngay u reb e bus me yog e fager rok ngak ni susun e dabi pi’ puluwon e bus ni bochan e de n’uw yang e gin ni nge yan ngay. Ma aram me yog fare walag ngak ni yugu aram rogon nde n’uw yang e gin ni nge yan ngay, machane thingari pi’ puluwon e bus ni bochan e aram e n’en nib mat’aw ni nge rin’. Nap’an ni tal e bus, me og fare fager rok nga but’, me fith faen ni ma kol e yap’ ko bus fare walag ni gaar, ‘Gur reb e Pi Mich Rok Jehovah?’ Me gaar fare walag, ‘Arrogon. Mang ni kam fith?’ Me gaar fare moon, ‘Kug rung’ag e n’en ni ku um weliyew, ma gu manang ni goo Pi Mich Rok Jehovah e yad ma pi’ puluwon e bus rorad ma yad ba yul’yul’ u gubin ban’en. Yooren e girdi’ e gathi aram rogorad.’ In e pul nga tomuren, me yib be’ nib pumoon ngak fare walag u nap’an e muulung, me gaar ngak, ‘Ka ga  manangeg? I gag faen ni ug kol e yap’ ko fare bus nim un riy bayay ni faan da weliyew murung’agen puluwon e bus. Tomuren ni kug guy fanam yul’yul’, mu gu turguy ni nggu un ngak e Pi Mich Rok Jehovah ko fol Bible.’ Ere, faanra i guy e girdi’ ni gad ba yul’yul’, ma ra pagan’rad ko fare thin nib fel’ ni gad be machibnag.

16. Mang angin nra yib ni faanra ud gum’an’gad, mu ud t’ufeged e girdi’, ma gad be gol ngorad? Mu weliy boch ban’en ni ma rin’ e pi tayugang’ ko pi yurba’ i teliw.

¹⁶ Faanra ud gum’an’gad, ma gad be t’ufeg e girdi’, ma gad be gol ngorad, ma rayog ni ngad k’aringed yad ngar adaged ni ngar nanged murung’agen Jehovah, nge tin nib m’agan’ ngay, mu kur nanged e girdi’ rok. Lem nge ngongol ko tin riyul’ e Kristiano e ma pining e sorok ngak Got. Boch e tayugang’ ko pi yurba’ i teliw e yad ma dake ba fel’ e lem nge ngongol rorad. Machane, yad ma bannag e girdi’ ko teliw rorad mu ur feked e salpiy rorad. Boch i yad e ma fanay e pi salpiy nem ni nge chuw’iy boch e naun nge karrow ngay nib tolang puluwon. Ku immoy reb e tayugang’ u barba’ e teliw ni fanay boch e pi salpiy nem ni nge toy e naun ko kus rok nib aircon. Pi tayugang’ ney e darur folgad ko fare thin ni yog Kristus ni faani gaar, “mpied ndab ni pi’ puluwon ngomed.” (Matt. 10:8) Yad bod e pi prist nu Israel kakrom ni yad ba kireb ma yad ma fil ban’en ko girdi’ ni bochan e ngar ‘feked puluwon,’ maku yad ma fil boch ban’en ko girdi’ u murung’agen Got nde puluw. (Mik. 3:11) Bochan e pi n’em ni yad be rin’, ma aram fan nder yag ni ngar ayuweged e girdi’ ni ngar manged fager rok Got.

17, 18. (a) Uw rogon ni ngad pininged e sorok ngak Jehovah u daken e ngongol rodad? (b) Mang fan ni ga baadag ni nga i pasigan’um ni ngam rin’ e tin nib fel’?

¹⁷ Faanra i guy e girdi’ ni gad be machibnag e tin riyul’ ma gad be ngongol ngak girdi’ u fithik’ e sumunguy, ma yad ra adag ni ngar manged fager rok Got. Immoy reb e walag ni pumoon nib pioneer ni yan nga tafen reb e pilibthir nib pin ni ke yim’ e pumoon rok, me yog fare pin ndabun ni nge nang murung’agen e machib rodad. Miki yog fare pin ko fare walag nnap’an ni be chubeg e bell ko mab rok ma bay u taang ni ke sak’iy ko tawo’ ni be guy rogon ni nge thilyeg e bulb ko magal rok. Me gaar fare walag ngak, “De fel’ ni ngam rin’ e re n’ir ni goo gur ya rayog ni ngam maad’ad.” Ma aram me yan fare walag i thilyeg e bulb ko magal ko fare pilibthir ma aram me yan ko bin migid e naun. Nap’an ni nang be’ nib pumoon ni fak fare pin e n’en ni ke buch, mi ri gin ngay me guy rogon ni nge gay fare walag ni nge pining e magar ngak. Munmun, me un fare pumoon ni fak fare pin ko fol Bible.

¹⁸ Mang fan ni ga baadag ni nga i pasigan’um ni ngam rin’ e tin nib fel’? Dabisiy ni bochan e ga manang ni faanra um pasig i rin’ fare maruwel ni machib mab fel’ e ngongol rom, ma rayog ni ngam pining e sorok ngak Jehovah mag ayuweg boch e girdi’ ni nge yag e yafas ngorad. (Mu beeg e 1 Korinth 10:31-33.) Ku reb i fan ni gad ba pasig ko machib mab fel’ e ngongol rodad e bochan ni gad baadag ni nge m’ug feni t’uf Got nge girdi’ rodad. (Matt. 22:37-39) Faanra ba pasigan’dad ni ngad rin’ed e tin nib fel’, ma rayog ni ngad pared ni gad ba felfelan’ mab fel’ e yafas rodad u wan’dad. Ku gad be athapeg e ngiyal’ nra par e girdi’ ni gubin ni yad ba felfelan’ ni yad be pigpig ma yad be pining e sorok ngak Jehovah ni ir e Ke Sunmiydad.