1. Mang fan ni Jehovah e ir e bin som’on e Tamachib nth’abi fel’?

 TAMACHIB e aram be’ ni ma weliy e thin nib fel’. Jehovah Got e ir e bin som’on e Tamachib nth’abi fel’. Tomuren ni togopuluw Adam nge Efa, me yog Jehovah nra thang Satan ni Moonyan’. (Gen. 3:15) Ere, kab kakrom i yib ke mada’ ko chiney ni be tamilangnag Jehovah rogon nra gagiyelnag feni thothup fithingan, nge rogon nra pithig e pi magawon ni ke tababnag Satan, nge rogon nra yag e yafas ndariy n’umngin nap’an ko girdi’. Gubin e pi n’ey ni bay u lan e Thin rok Got ni aram e Bible.

2. (a) Uw rogon ni pi engel u tharmiy e ku yad boch e tamachib? (b) Mang fan ni Jesus e ir reb e tamachib nrayog ni ngan folwok rok?

² Pi engel u tharmiy e ku yad boch e tamachib, ya yad ma weliy e thin nib fel’, maku yad ma ayuweg e girdi’ ni ngar wereged e thin nib fel’ u fayleng i yan. (Luke 1:19; 2:10; Acts 8:26, 27, 35; Rev. 14:6) Ma uw rogon Mikael ni ir pilungen e engel? Ku ir reb e tamachib. Nap’an ni immoy u fayleng ni ir Jesus, ma bin th’abi ga’ fan e maruwel ni i rin’ e aram e i machibnag fare thin nib fel’. N’en ni rin’ e be dag ni machib e aram e re maruwel nthingari ga’ fan u wan’dad.​—Luke 4:16-21.

3. (a) Mang fare thin nib fel’ ni gad ma machibnag? (b) Mang deer e ba t’uf ni ngad pied e fulweg riy?

³ I yog Jesus ngak pi gachalpen ni ngar manged boch e tamachib. (Matt. 28:19, 20; Acts 1:8) Me yog apostal Paul ngak Timothy ni gaar: “Ma ga rin’ e maruwel rok e tamachib ko Thin Nib Fel’ ni yib rok Got, ma ga ngongliy urngin e maruwel ni kan pi’ ngom nrogon e tapigpig rok Got.” (2 Tim. 4:5) Mang e thin nib fel’ ni gad ma machibnag? Gad ma weliy ko girdi’ ni gad ba t’uf rok Jehovah ni ir e Chitamangidad nu tharmiy. (John 3:16; 1 Pet. 5:7) Bochan ni bay Gil’ilungun Got ma aram e mich riy nib t’uf e girdi’ rok. Ere, gad ma yog ko girdi’ ni faan yad ra fol rok Got nge Gil’ilungun, mi yad rin’ e tin nib mat’aw, ma aram e rayog ni ngar manged fager rok. (Ps. 15:1, 2) Ra chuweg Jehovah  gubin e gafgow nge kireban’ ni ma yib ngodad ni bochan boch ban’en nib kireb ni i buch rodad kafram. Ireray e thin nrib fel’! (Isa. 65:17) Ere, bochan ni gadad boch e tamachib mab t’uf ni ngad pied e fulweg ko gal deer ni baaray ni gaar: Mang fan nib t’uf ni nge rung’ag e girdi’ fare thin nib fel’ e ngiyal’ ney? Ma uw rogon ni ngad rin’ed e re maruwel ney nrogon nrayog rodad?

4. Mang boch e ban ni ma yog e girdi’ u murung’agen Got?

⁴ Susun e ke bannagem be’, ya ke yog ni chitamam e n’agmed chon e tabinaw rom. Miki yog ni dabun e chitamam ni nge nang murung’agem, ma ma mithag boch ban’en rom, ma ir be’ nib kireb. Miki yog ndariy fan ni ngam gay e gin ni bay riy, ya ke yim’. Boch e girdi’ e aram e n’en ni yad ma yog u murung’agen Got. Yad ma yog nib kireb Got ma dabiyog ni ngad nanged murung’agen. Boch e tayugang’ ko teliw e yad ma yog nra gechignag Got e piin ni yad ba kireb u fithik’ e nifiy ni manemus. Maku boch e girdi’ e yad ma yog ni ir e ma k’aring e yoko’ nge ku boch ban’en ni ma gafgow e girdi’ riy. Yad ma yog ni yugu aram rogon ni ma yim’ e girdi’ nib fel’ nge girdi’ nib kireb ko pi n’ey, machane ireray e n’en ni ma fanay Got ni nge gechignag e girdi’.

5, 6. Mang e ma lemnag e girdi’ ni bochan fare machib ni girdi’ e ke sum ko gamanman nge machib ko pi yurba’ i teliw ni googsur?

⁵ Boch e girdi’ e yad ma yog ndariy e Got. Piin nib mich u wan’rad e re machib ney e yad ma yog ndariy be’ ni ke Sunmiydad, maku dariy be’ ni ke sunmiy e pi n’en nib fas ni bay u roy u fayleng. Maku boch e girdi’ e yad ma yog ni ke sum e girdi’ ko gamanman. Ere, yad ma yog ni aram fan ni girdi’ e bay yu ngiyal’ ni yad ma cham ma ra bagayad ma ir e be lemnag ir. Yad ma lemnag ni ka ban’en ni aram rogon ni piin nib gel lungurad e ngaur gafgownaged e piin nib war lungurad. Ere, piin nib mich u wan’rad fare machib ni girdi’ e sum ko gamanman e dariy ban’en ni yad be athapeg ni fan ko gabul nge langlath.

⁶ Ere, bochan fare machib ni girdi’ e kar sumgad ko gamanman nge machib ko pi yurba’ i teliw ni googsur, ma aram reb i fan ni be gafgow e girdi’ ko tin tomuren e rran. (Rom. 1:28-31; 2 Tim. 3:1-5) Gathi ireray e thin nib fel’. Ya rogon ni yog apostal Paul e ireray e n’en ni be k’aring e girdi’ ni nge ‘par lanin’rad u fithik’ e lumor, ma der yog ngorad e bin ni ma pi’ Got e wok.’ (Efe. 4:17-19) Maku reb, e fare machib ni girdi’ e kar sumgad ko gamanman nge pi machib ko pi yurba’ i teliw ni googsur e ke taleg e girdi’ ndarur nanged fare thin nib fel’ ni ke pi’ Got ngodad.​—Mu beeg e Efesus 2:11-13.

7, 8. Mang reb e kanawo’ nrayog ni nge nang e girdi’ fare thin nib fel’ riy?

⁷ Faanra nge fel’ e tha’ u thilin e girdi’ nge Got, ma som’on e ba t’uf ni ngar nanged ni bay Got ma bay fan ni ngar gayed rogon ni ngar nanged murung’agen. Rayog ni ngad ayuweged yad ni ngar filed murung’agen Got u nap’an ni gad be pi’ e athamgil nga lanin’rad ni ngar filed murung’agen e pi n’en ni ke sunmiy. Nap’an nra m’agan’ e girdi’ ni ngar sapgad ko pi n’en ni ke sunmiy Got u toobrad mar fal’eged i lemnag e n’en ni kar guyed, ma rayog ni ngar filed murung’agen e gonop rok Got nge gelngin nib gel. (Rom. 1:19, 20) Machane, ku bay boch e deer ndabiyog ni nge pirieg be’ e fulweg riy ni faanra kemus ni nge fil murung’agen e pi n’en ni kan sunmiy. Bod rogon ndabiyog ni nge nang fan ni ma pag Got e gafgow, nge n’en nib m’agan’ Got ngay ni fan ko fayleng, maku dabiyog ni nge nang ko ma lemnagdad Got fa danga’.

⁸ Kemus ni rogon me nang be’ fare thin nib fel’ ni murung’agen Got nge tin nib m’agan’ ngay e nge fil e Bible. Ri gad ba tow’ath nrayog ni ngad ayuweged boch e girdi’ ni ngar nanged  fare thin nib fel’! Machane, faanra gad baadag ni ngad ayuweged be’ nge mich Got u wan’ me fel’ e tha’ u thilrow, ma gathi kemus ni ngad filed e tin riyul’ ngak. Ya ku thingar da ayuweged nge nang fan nib t’uf ni nge mich e pi n’em u wan’. (2 Tim. 3:14) Ere, ba t’uf ni ngad filed rogon ni ngad ayuweged e girdi’ ni nge mich u wan’rad e pi n’en ni kar filed ni bod rogon ni i rin’ Jesus. Mang fan nib salap Jesus i rin’ e re n’ey? Reb i fan e bochan ni i fith e deer nib fel’ rogon. Ere, uw rogon ni ngad folwokgad rok?

9. Faanra gad baadag ni ngad ayuweged e girdi’ ni nge mich fare thin nib fel’ u wan’rad, ma mang e thingar da rin’ed?

⁹ Mang fan ni ngaud fithed e deer u nap’an ni gad be machib ni bod rogon ni i rin’ Jesus? Mu susunnag ni ke yog e togta rom nib t’uf ni ngan seyem. Sana ra riyul’ u wan’um e n’en ni ke yog. Machane, uw rogon ni faanra yog ni ngan seyem nde fith rarogon e m’ar rom? Sana dabi riyul’ u wan’um e n’en ni ke yog. Ki mada’ ko togta ni boor ban’en ni manang u murung’agen rogon i tafalaynag e girdi’ mab t’uf ni nge fith e deer me motoyil, mfini yag ni nge tafalaynag be’. Ere, ku er rogodad ni faanra gad baadag ni ngad ayuweged e girdi’ ni nge mich u wan’rad fare thin nib fel’ ni murung’agen Gil’ilungun Got, ma thingar da fithed boch e deer ngorad nib fel’ rogon ya nge yag nda nanged e n’en nib t’uf rorad.

10, 11. Mang e rayog ni ngad rin’ed ni faan gad ra folwok u rogon ni i fil Jesus ban’en ko girdi’?

¹⁰ Manang Jesus ni gathi kemus ni ma fith reb e sensey boch e deer ni bochan e nge nang boch ban’en u murung’agen e en ni be fil ban’en ngak, ya ku bochan e nge ayuweg facha’ ni nge lem me weliy laniyan’. Bod nnap’an ni lemnag Jesus ni nge fil murung’agen e sobut’an’ ngak pi gachalpen, ma som’on e fith reb e deer ngorad nra ayuwegrad ni ngar lemgad. (Mark 9:33) Ku immoy bayay ni fith Jesus reb e deer ngak Peter, me pi’ l’agruw e fulweg ngak, me yog ni nge mel’eg e bin nib puluw. N’en ni rin’ e ayuweg Peter ni nge fil ban’en nib ga’ fan. (Matt. 17:24-26) Ku immoy bayay ni fith Jesus in e deer ngak pi gachalpen ni bochan e baadag ni nge nang e n’en ni bay u gum’ircha’rad. Ma pi deer nem e ayuwegrad ni ngar weliyed e n’en ni yad be lemnag. (Mu beeg e Matthew 16:13-17.) Gathi yug ma yog Jesus e n’en ni nge rin’ e girdi’. Ya ma fith e deer ni nge ayuweg e girdi’ ngar adaged fare thin nib fel’ mi yad thilyeg boch ban’en ko ngongol rorad.

¹¹ Faan gad ra folwok u rogon ni ma fith Jesus ban’en, ma rayog ni ngad nanged e bin th’abi fel’ e kanawo’ ni ngad ayuweged be’ ni kad mada’naged u nap’an e machib. Ku rayog ni ngad filed rogon ni ngad nonad ngak e piin ni kar togopuluwgad ngodad. Ku rayog ni ngad filed ko girdi’ rogon ni ngar rin’ed e pi n’en nra fel’ rogorad riy. Chiney e ngad weliyed dalip e kanawo’ nrayog ni ngad fithed e deer riy nib fel’ rogon.

12-14. Uw rogon nrayog ni ngam ayuweg fakam ni nge machib u fithik’ e pagan’? Mu weliy reb e kanawo’.

¹² Bin 1: Mang e ga ra rin’ ni faanra be rus fakam ni nge weliy ngak e piin ni yad nga skul fan ni ma yim’ e girdi’? Uw rogon nrayog ni ngam ayuweg ni nge non ngorad u fithik’ e pagan’? Rayog ni ngam fith boch e deer ngak nra ayuweg ni nge weliy rogon laniyan’ ni bod  rogon ni i rin’ Jesus, ko bin ni nga mog ngak nib kireb e n’en ni ke rin’ ara mog ngak e n’en ni nge yog. Ere, uw rogon nrayog ni ngam rin’ e re n’ey?

¹³ Mu beeg ngak fakam boch ban’en ni bay u lan fare ke babyor ni Mang e Ri Be Fil e Bible? Tomuren ni kam beegew boch ban’en ni bay ko Guruy ni 6, mag fith ngak ko mang e ke guy riy ni baadag. Mu pi’ e athamgil nga laniyan’ ni ngki lemnag boch i fan nib mich u wan’ nde m’agan’ Got ngay ni nga i yim’ e girdi’ nge fan ni baadag ni nge pigpig ngak Got. (Rom. 12:2) Mog ngak nde t’uf ni nge taareb e n’en ni ngam weliyew.

¹⁴ Tomuren e re n’ey ma gog ngak nrayog ni nge non ngak faen ni yow nga skul ni bod rogon ni kam non ngak. Rayog ni nge weliy ko mang e be fil e Bible ngodad u murung’agen fan ni ma yim’ e girdi’, ngemu’ me fith ngak e n’en ni be lemnag riy. Bod nrayog ni nge yog ngak faen ni yow nga skul ni nge beeg e paragraph 8 ko guruy ni 6 ko fare ke babyor ni Mang e Ri Be Fil e Bible? Tomuren ni ke beeg facha’ ma rayog ni nge fith ngak ni gaar, “Ga be lemnag ni bay reb e gallabthir nib t’uf fak rok ni baadag ni nge pilibthir nge yim’, fa?” Dabisiy nra gaar faen ni yow nga skul, dariy. Ma aram e rayog ni nge gaar e bitir rom, “Ere, faanra ke sunmiy Got e gal nsom’on e girdi’ ni ngar parew ni yow ba felfelan’, ma ma t’ufegrow, me ere gur, ba puluw ni nga dogned nib m’agan’ ngay ni ngar m’ow?” Rayog ni ngam rin’ew e re n’ey u taabang ya nge yag nim ayuweg fakam nge yag ni weliy ngak boch e girdi’ e pi n’en ni ke mich u wan’. Faan ga ra fil ngak fakam rogon ni nga i fith e deer nib fel’ rogon, ma rayog ni ngam ayuweg nge mang reb e tamachib nib fel’.

15. Uw rogon nrayog ni ngad fanayed e deer ni ngad ayuweged be’ nde mich Got u wan’?

¹⁵ Bin 2: Nap’an ni gad be machib, ma rayog ni ngad mada’naged be’ nib mich u wan’ ni Jesus Kristus e ir Got ni Gubin Ma Rayog Rok ma  gubin e piin ni yad ma pigpig ngak Got e thingari riyul’ u wan’rad e re machib ney. Yugu aram rogon, ma rayog ni ngad ayuweged facha’. Rayog ni ngad fithed u fithik’ e sumunguy ko mang fan ni ma lem ni aram rogon. Tomuren ni ke weliy laniyan’, ma rayog ni ngad pininged e magar ngak. Rayog ni ngad fithed ngak ko baadag ni nge beeg reb e brochure rodad ni be weliy ko mini’ Got, fa. Ma faanra baadag ma rayog ni ngad pied ngak fare ke babyor ni kenggin e Thin nib Fel’ ni Yib Rok Got. Faan gad ra gonopiy rogon ni ngad fithed e deer u fithik’ e sumunguy, ma rayog ni ngad ayuweged be’ ni nge taw fare thin nib fel’ nga gum’irchaen.

16. Mang fan ni susun e dab ud paged e en ni gad be fil e Bible ngak ni nga i sul u daken e fulweg ni bay ko babyor ni gad be fil?

¹⁶ Bin 3: Nap’an ni gad be fil e Bible ngak be’, ma mang e ra buch ni faanra ud paged facha’ nga i sul u daken e fulweg ni bay ko babyor ni gad be fil? Ra mo’maw’ ni nge mon’og ko tin riyul’. Mang fan? Ya be’ ni yima fil e Bible ngak ni yug ma sul u daken e pi fulweg ni bay u lan e babyor ni gad be fil ma der fal’eg i lemnag e n’en ni be yog e rayog ni ngan taareb rogonnag nga reb e woldug nde toar lik’ngin. Nap’an nra yib e togopuluw ngak ma ra mo’maw’ rok ni nge par ko tin riyul’. (Matt. 13:20, 21) Ere, ba t’uf ni ngad fithed e n’en ni be lemnag e en ni gad be fil e Bible ngak ko pi n’en ni gad be fil ya nge yag nda ayuweged. Mu guy rogon ngam nang ko be m’agan’ ko pi n’en ni be fil fa danga’, nge fan ni be lem ni aram rogon. Ngemu’ mu kum ayuweg ni nge fal’eg i lemnag e pi thin nu Bible ni kam beegew, ya nge yag ni puluw e pi n’en ni ke mich u wan’ ko n’en ni be yog e Bible. (Heb. 5:14) Faanra ud fithed e deer nib fel’ rogon, ma rayog ni ngad ayuweged e en ni gad be fil e Bible ngak ni nge gel e michan’ rok me yag ni par nib yul’yul’ u nap’an ni ke yib e togopuluw ngak ara nap’an ni kan bannag. (Kol. 2:6-8) Ku mang boch e kanawo’ nrayog ni ngad manged boch e tamachib nib fel’ riy?

17, 18. Mang e rayog ni ngam rin’ ni ngam ayuweg reb e walag ni gimew be yan u taabang u nap’an ni kam marow nga reb e tabinaw?

¹⁷ I l’og Jesus pi gachalpen nga u ranod ko machib ni yad lal’agruw. (Mark 6:7; Luke 10:1) Boch nga tomuren, me weliy apostal Paul murung’agen e ‘girdi’ ni ur muruwliyed’ e re maruwel nem u ‘taabang,’ ni aram e yad be machibnag fare thin nib fel’. (Fil. 4:3) Nap’an e duw ni 1953, me yarmiy e ulung rodad boch e walag ni ngar ayuweged boch e walag ndawor ra salapgad ko machib.

¹⁸ Mang e rayog ni ngam rin’ ni ngam ayuweg reb e walag ni gimew be yan u taabang u nap’an ni kam marow nga reb e tabinaw? (Mu beeg e 1 Korinth 3:6-9.) Nap’an ni be beeg reb e thin nu Bible, mag yaliy e Bible rom. Mu fal’eg e motoyil u nap’an ni be non fare walag, ya nge t’uf e ayuw rok ma rayog ni ngam ayuweg. (Ekl. 4:12) Machane, mu kol ayuw ndab mu th’ab e thin rok u nap’an ni be machibnag faen ni kam marow nga tafen, ara mu th’ab e thin rok faen ni yow be non. Faan ga ra th’ab e thin rorow, ma rayog ni nge mulan’ fare walag fe balyangan’ faen ni kam marow nga tafen. De kireb ni nga mog ban’en, machane tomuren ni kam non mag pag fare walag nge ulul ko n’en ni be weliy.

19. Mang e susun ndab da paged talin, ma mang fan?

¹⁹ Nap’an ni gimew be yan reb e walag u reb e tabinaw nga reb, ma uw rogon nrayog ni ngam ayuwegew gimew? Aram e ngiyal’ nrayog ni ngam weliyew rogon ni nge mon’og e machib ni gimew be tay. Mu kol ayuwgow ndab um weliyew boch ban’en nib kireb u murung’agen e girdi’ ko fa gin’en ni gimew be machib riy. Ma dab um gun’gun’nagew e pi walag. (Prov. 18:24) Susun e dab da paged talin ni gad gubin ndawor da flontgad. Ke pi’ Jehovah fare maruwel ni machib ngodad nib tow’ath ma ke fil ngodad rogon ni ngad rin’ed e re maruwel ney. (Mu beeg e 2 Korinth 4:1, 7.) Ere ngad daged nib ga’ fan fare thin nib fel’ u wan’dad ni aram e ngad athamgilgad ngad manged boch e tamachib nib fel’.